Olonoño vi tava okuti Yesu wa kala komuenyo. Poku tukula ovolandu a popiwa la vakuasapulo vo kocita catete leci cavali, a tiamẽla ku Yesu kuenda Kakristão vatete, vo Encyclopædia Britannica, yunyamo wo 2002, mua sonehiwa ndoco: “Ovolandu aco a lekisa okuti kosimbu ndaño muẽle ovanyãli vetavo Liakristão, ka va ponduile oku tatãla ovina viatiamẽla kulandu wa Yesu, una weya oku patãliwa kesulilo liocita 18, vokuenda kuocita 19, kuenda kefetikilo liocita 20.”

 Elivulu Jesus and Archaeology (Yesu kuenda Uloño woku Fẽla Ovina Viosimbu), lia popia ndoco: “Koloneke vilo, ka kuli onoño yimue ya kemãla yi pondola oku patãla okuti, kua kala ulume umue u Yudea o tukuiwa hati, Yesu omãla wa Yosefe. Valua pokati kavo va tava okuti, cilo tu kuete asapulo alua a tiamẽla kovilinga kuenda kalongiso aye a velapo.”

 Embimbiliya li tukula Yesu okuti omunu muẽle. Olio li situlula olonduko via vakukululu yaye kuenda vangandiaye. (Mateo 1:1; 13:55) Embimbiliya li tukulavo onduko yolombiali via velapo via kala koloneke via Yesu. (Luka 3:1, 2) Ovina viaco, vi ecelela okuti, vakuakukonomuisa va imbila uvangi wokuti, ovolandu Embimbiliya a suapo.