Asapulo avĩ a sangiwa kovitumãlo viosi ndeci Votelevisãu, votelefone, votablet kuenda vokombutador. Olonjanja vialua, va lekisa alitalatu kuenda olovideo ka via sungulukile.

 Omãla va siata oku mola ovina viaco viosi.

 Nye o pondola oku linga oco o kuatise omãla vove oku yuvula oku sakalala calua lasapulo avĩ?

•  Omãla va kala ndati eci va yeva asapulo?

•  O kuatisa ndati omãla vove oku liyaka lasakalalo a kokiwa lasapulo?

•  Nye ci popiwa nda omõlove wa liyaka locitangi cimue?

•   Omãla valua va sumua poku tala asapulo atiamẽla kovilunga. Omãla vamue ka va tẽla oku situlula ovisimĩlo viavo, pole, eci ka ci lomboloka okuti asapulo avĩ ka a siatele oku va sumuisa. a Asakalalo vomãla a pondola oku livokiya calua, nda olonjali vi lekisavo okuti via sakalala.

•   Omãla pamue ka va kuata elomboloko lia suapo liatiamẽla kasapulo. Ndeci, ovo va pondola oku sima okuti, ovina ovo va mola, vi ka lipitavo lepata liavo. Omãla vatito, nda va siata oku tala asapulo aco olonjanja vialua, ovo va pondola oku sima okuti ovina viaco via lipita olonjanja vialua.

•   Omãla ka va kũlĩhĩle ovina via kongela vesapulo limue. Pamue ovo ka va limbuka okuti olonjo viasapulo vi sukila oku vetiya omanu oku tala asapulo avo oco va kuate olombongo vialua. Eli olio esunga liokuti, kasapulo amue va vokiyako oco omanu valua va tale asapulo aco.

•   Kũlĩhĩsa asapulo ovo va siata oku yevelela. Eci ka ci lomboloka okuti omãla vove ka va pondola oku tala ovina vi kasi oku pita voluali. Pole, ka va sukilavo oku tala, loku yevelela asapulo otembo yosi.

   “Olonjanja vimue, ame lulume wange tua siata oku sapela ovina via kongela vesapulo limue. Kuenje tu limbuka okuti, ovina viaco via siata oku sumuisa omãla vetu va kasi oku tu yevelela.”—Maria

   Onumbi Yembimbiliya: “Asakalalo a honguisa utima.”—Olosapo 12:25.

•   Yevelela omãla vove lepandi kuenda lekisa kokuavo okuti wa va kapako. Nda ka ca lelukile komõlove oku vangula catiamẽla kovina via lipita, pinga kokuaye oco a sonehe elitalatu limue liatiamẽla kondaka yaco. Poku sapela lomãla vove catiamẽla konjila ndomo va liyevite, tukula olondaka via leluka oku kuata elomboloko kuenda yuvula oku vangula ovina ka vi kuete esilivilo viatiamẽla kesapulo liaco.

   “Omõletu ukãi o liyeva ciwa eci tu sapela laye. Ocina cimue ka ci kuatisa oku popia ndoco: ‘Ca siata ovina evi oku li pita. Etu ka tu pondola oku linga cimue.’”—Sarahi

   Onumbi Yembimbiliya: “Omunu lomunu a kale ukuanjanga koku yevelela, a livale koku popia.”—Tiago 1:19.

•   Kuatisa omõlove oku kuata elomboloko liocili catiamẽla kasapalo. Ndeci, esapulo liatiamẽla kolongangala viambata omunu umue, ci vetiya omõlove oku sima okuti ocina cimue ca siata kuenda ci pondolavo oku lipita laye. Lomboluila komãla vove ovina wa siata oku linga oco va kolepo okuti ovina viaco ka vi lipiti lavo. Kuatisa omãla vove oku kuata elomboloko liokuti, eci ku pita ulandu umue ndowu, u pongoloka asapulo omo okuti, ocina cimue ka ca siatele.

   “Kuatisa omãla vove ndomo va liyaka lovisimĩlo va kuete. Ovisimĩlo onima yi tunda kovina omunu a sokolola, omo liaco, nda wa kuatisa omãla vove oku sokolola ocina cimue ciwa, ovo va ka liyeva ciwa.”—Lourdes

   Onumbi Yembimbiliya: “Omunu ukualondunge o nõla lutate olondaka viaye, kuenda oku vangula kuaye ku vetiya.”—Olosapo 16:23.