Anga hẽ ohueli yove ya ku sapuila okuti ya sakalala omo liocituwa cove coku nyua calua? Nda oco, kuli olonumbi vimue o sukila oku kũlĩhĩsa.

Vocipama cilo

•  Oku nyua calua ovinyua vi koluisa kuenda olohuela—oku tenga ovina viaco ci koka ovitangi

•  Anga hẽ omuenyo wove wa tamba lika koku nyua ovina vi koluisa?

•  Lunguka luhembi

•  Ceci o sukila oku linga

 Oku nyua calua ovinyua vi koluisa, ci koka ovitangi vialua viuhayele, oku kongelamo uvei wutima, wolongela kuenda wokancer. Oku nyua calua ovinyua vi koluisa ka ku sulila lika kovitangi viuhayele; pole, ci kapavo kohele olohuela, ci koka ungangala vonjo, ekambo liolombongo, ekambo lioku likolela pokati kuenda oku linyãla.

 Embimbiliya li lekisa okuti nda omunu o nyua calua ovinyua vi koluisa, ovio vi fetika oku ‘lumana ndonyõha kuenda oyo yi tundisa owule ndombuta.’ (Olosapo 23:32) Ove hẽ o limbuka ndati nda o kasi oku vialiwa lovinyua vi koluisa?

 Apulilo a kuãimo a pondola oku ku kuatisa oku limbuka ekalo liove.

•   Ku tẽla hẽ oku likandangiya poku nyua ovinyua vi koluisa?

•   Wa siata hẽ oku tiamisila calua utima kotembo o ka nyua?

•   Ove hẽ wa siata oku nyua calua ndaño wa kũlĩha ovitangi ci pondola oku ku kokela komuenyo wove kuenda volohuela viove?

•   Ove hẽ ku kala ciwa eci o seteka oku siapo oku nyua?

•   Anga hẽ noke yoku nyua wa siata oku hoya lohueli yove?

•   Anga hẽ onjongo yove yoku nyua yi kasi oku livokiya okuti kosimbu ci sule?

•   Ove hẽ wa siata oku nyuila vuyombi eci o kasi konjo ale kupange?

 Nda pokati kapulilo a-a wa tambululapo limue ale alua hati oco, ci lekisa okuti omuenyo wove u kasi oku tamba kovinyua vi koluisa. O pondola oku kuata ovitangi vi tunda koku nyua calua ovinyua vi koluisa.

 Anga hẽ ohueli yove ya lekisa esakalalo liokuti, ove o kasi oku nyua calua ovinyua vi koluisa? Nda oco, ku ka seteke oku lisandela esunga poku sapuila vakuene oku kongelamo ohueli yove hati:

•   “Nda wa ndi tatele ciwa, nda sinyui calua.”

•   “Nda wa kuatele cime umue nda cime cange, ove nda wa fetikavo oku nyua.”

•   “Nda kũlĩha omanu vamue va nyua vali calua okuti, ame ci sule.”

 Nda wa popia ovina via tukuiwa ndeti, ka ci lekisa hẽ okuti o kasi oku pitisa kovaso onjongole yove yoku nyua okuti esanju volohuela viove ci sule? Anga hẽ oku nyua oco ocina ca velapo?

 Onumbi Yembimbiliya: “Pole, ulume wa kuela wa sakalala . . . ndomo a sanjuisa ukãi waye.”—1 Va Korindo 7:33.

•   Kapako lutima wosi alungulo vohueli yove. Nda ohueli yove ya sakalala calua omo liocitangi caco, momo lie ku lingila apongoloko? Nda ove ku tẽla oku linga apongoloko, ndaño ohueli yove ya sakalala omo liocitangi caco, ci lekisa okuti wa vialiwa lovinyua vi koluisa.

   Onumbi Yembimbiliya: “Omunu lomunu ka kamameko oku sanda olonjongole viaye muẽle, pole, te viomunu ukuavo.”—1 Va Korindo 10:24.

•   Pula. Oco esualali li yule uyaki, olio li sukila oku kũlĩha olonjila vioku yaka viunyãli waye. Cimuamue haco okuti, oco o yule unyãli wove, o sukila oku kũlĩha ovitangi vi tunda kovinyua vi koluisa kuenda ndomo via siata oku nyõla omanu. Ove o sukilavo oku lilongisa olonjila vi pondola oku ku kuatisa oku yuvula oku vialiwa lovinyua vi koluisa kuenda oku yuvula oku nyua vali.

   Onumbi Yembimbiliya: “Amamiko oku yuvula oloñeyi vĩvi vietimba, vina vi liyaka lene.”—1 Petulu 2:11.

•   Pinga ekuatiso. Kuli olonjila vialua vioku kuatisa vana va vialiwa lovinyua vi koluisa ndeci, olonjo vioku kuatisa vana okuti omuenyo wavo wa tekela lika koku nyua kuenda olosipitali. O pondola oku pinga kakamba va pama oco va ku kuatise oku limbuka nda kuli asunga akuavo a kasi oku koka okuti ove o vialiwa lovinyua vi koluisa. O pondolavo oku pinga ekuatiso komunu waco nda o kasi oku setekiwa oku fetika oku nyua vali.

   Onumbi Yembimbiliya: “Ekamba liocili li lekisa ocisola otembo yosi, Kuenda olio li linga manjove kotembo yohali.—Olosapo 17:17.

 Uholua ocitangi cimue cinene okuti, ka ci potoluiwa lika poku tanga ño ocipama cimue citito, ale ove ku pondola oku ci yula poku popia lika okuti, “ndi likolisilako oku nyua citito.” Pole, ove o sukila oku sokolola ndomo ocitanti caco ci kasi oku nyõla uhayele wove kuenda olohuela viove.

 Oco o sange ovolandu akuavo: Tanga ovipama vi kuãimo oco o lilongise ndomo vakuene va tẽla oku yula ocitangi coku nyua calua ovinyua vi koluisa.

 “Eu não sou mais um homem violento”

 “Não sinto mais vergonha de mim mesmo”

 “Fui morador de rua”

 Talavo ovideo losapi, ‘Omuenyo wa Ñumile’