Olohueli vialua via siata oku kala pamosi osimbu ka via kuelele. Vamue va siata oku ci linga momo va yongola oku kũlĩhĩsa nda ekalo liavo li likuata leli liomunu ukuavo kuenda va yongola oku vokiya apuluvi lioku kuata olohuela vimue viesanju. Anga hẽ eci ocisimĩlo ciwa?

Vocipama cilo

•  Nye Embimbiliya li popia?

•  Anga hẽ ulume lukãi oku kala kumosi osimbu ka va kuelele ci va kuatisa oku lipongiyila oku kuela?

•  Oku kala kumosi ci kuatisa hẽ koku yuvula oku pesela olombongo vialua?

•  Oku kala kumosi ci kuatisa hẽ oku yuvula oku kuela lomunu umue ku yongola?

•  Anga hẽ kuli onjila yikuavo ya sunguluka?

•   Embimbiliya li popia okuti ulume lukãi oku lipekela osimbu ka va kuelele ka ca sungulukile. Olio hati: “Tili evĩho liukahonga!” (1 Va Korindo 6:18; 1 Va Tesalonike 4:3) Omu mua kongela oku lipekela kuomanu va kasi kumosi okuti ka va kuelele ndaño okuti ovo va kuete ocisimĩlo coku kuela noke. a Oku kapako olonumbi Viembimbiliya ci teyuila ohueli yimue oku mina osimbu ka va kuelele kuenda ovitangi vikuavo vi tunda kulume lukãi oku kala kumosi okuti ka va kuelele.

•   Suku eye wa sovola olohuela. Eci a ci linga, eye wa popia hati: “Eli olio esunga lieci ulume a ka silapo isiaye la inaye kuenda o ka likakatela kukãi waye kuenje va ka linga etimba limuamue.” (Efetikilo 2:24) Eci ulume lukãi va kuela, ovo va pondola oku kuata epata limue liwa halio lia sanjuka.

 Vamue va popia okuti ci kuatisa. Ovo va sima okuti ci kuatisa ohueli oku lingila kumosi ovopange o konjo kuenda oku kũlĩhĩsa ovituwa viomunu lukuavo eteke leteke. Pole oco tu kuate olohuela vimue viesanju, tu sukila oku linga ohuminyo yimue.

 Oku kala kumosi “ndoseteko” yimue, ci koka okuti vepuluvi limue kavali kavo va pondola oku litepa kuenda hacoko ci koka olohuela viesanju. Pole volohuela mu kala lika esanju nda okuti kavali kavo va linga ohuminyo yimue yocili kuenda oku yula ovitangi viosi vi pondola oku iya.

 Oku teta onimbu: Omanu va kasi kumosi okuti handi ka va kuelele, ka va kasi oku lipongiyila olohuela pole va kasi oku ligongiyila oku litepa.

 Onumbi Yembimbiliya: “Eci omunu a kũla, haico a kongula.”—Va Galatia 6:7.

 Omanu vamue va popia okuti ci kuatisa. Ekonomuiso limue lia lingiwa kofeka yo Estadus Unidus lia lekisa okuti kolohueli ekũi va kala kumosi osimbu ka va kuelele, vakuãla pokati kavo va ci linga omo va yonguile oku yuvula oku pesela olombongo vialua. Pole omanu valua va tambulula kakonomuiso aco va popia okuti, ndaño omanu va kala kumosi vokuenda kotembo yimue pole handi ka va kuatele olombongo vi tẽla oco va kuele.

 Omunu oku kala kumosi okuti ka va kuelele ci pondola oku koka ovitangi vikuavo, capiãla enene kakãi. Ndeci, eci va li tepa akãi ovo va kala locikele coku tata omãla.

 Oku teta onimbu: Omanu oku kala kumosi okuti ka va kuelele, va pondola oku kuata ovitangi vialua okuti onima va simile ci sule.

 Onumbi Yembimbiliya: “Ame ndi Yehova, ndi Suku yove, Una o ku longisa eci ci ku kuatisa.”—Isaya 48:17.

 Omanu vamue va popia okuti oco. Pole elivulu limue liatiamẽla kolohuela li popia okuti: “Omanu oku kala kumosi okuti ka va kuelele olonjanja vimue ka va limbuka okuti oku ci linga ka ci leluka oku litepa.” Akonomuiso a lekisa okuti ndaño omanu vana va limbuka okuti ka va pondola oku kala kumosi vamamako oku kala kumosi omo liovikele vimue ndeci oku tata ocinyama cimue, ovina va landela kumosi ale oku mina kumue ka va lavokaile. b Elivulu liaco liamisako hati: “Omanu vamue okuti vapuluvi akuavo nda va litepa, noke va kuela omo ci leluka kokuavo oku kala kumosi.”

 Oku teta onimbu: Ulume lukãi oku kala kumosi okuti ka va kuelele, ka ci kuatisa oku nõla onjila yiwa pole ci koka okuti ka ci leluka oku tepa olohuela vimue ka vi kasi ciwa.

 Onumbi Yembimbiliya: “Ukualondunge o mola ohele kuenje o salama, pole, omunu wa kamba olondunge amamako oku enda kuenje o tala ohali.”—Olosapo 22:3.

 Ocili okuti kuli. Ci tẽliwa oku yuvula ovitangi ulume lukãi oku kala kumosi okuti ka va kuelele kuenda oku vokiya apuluvi lioku kuata olohuela vimue viesanju. Ndamupi? Poku kapako olonumbi Viembimbiliya viatiamẽla kolohuela. Sanda otembo yoku kũlĩha ciwa omunu lukuavo osimbu ka wa kueleli loku kala kumosi. Ciwa oku sanda ohueli yimue okuti kavali kene vu tavi ovina vimuamue okuti ku kuela omo liocimãho coku lipekela.

 Vembimbiliya mu sangiwa olonumbi vi pondola oku vu kuatisi oku kuata olohuela vimue viesanju havio via kolapo. c Ndeci, Vembimbiliya o sangamo olonumbi vi pondola oku ku kuatisa . . .

•   oku kala ukuacili.

•   oku kala ohueli yiwa kovaso yoloneke.

•   oku kũlĩhĩsa vokuenda kuotembo yoku namulala ovituwa vi lekisa nda okuti omunu waco o kala ohueli yimue yiwa.

 Oco o kũlĩhe ovina vikuavo viatiamẽla kondaka yaco tala onepa “Olohuela Kuenda Epata” vo jw.org.

 Onumbi Yembimbiliya: “Ovisonehua viosi vi kola, vi tunda ku Suku kuenje ovio vi silivila koku longisa.”—2 Timoteo 3:16.