O Besouro-Diabólico-de-Ferro, yi kasi kutakelo wo ko Amerika yo Konano. Ndomo ca konomuisiwa lolonoño, etimba liocinyama caco li pondola oku pandikisa kocilemo ci soka 39.000 kolonjanja. Oco ci pondola oku puluka ndaño muẽle ceci ci tusuiwa lekãlu. Ocinyama caco ci pondola ndati oku pandikisa kovitangi viaco?

 Onepa yovokati kuenda yo ko samua yocipa cetimba yalio, vi likongela volonepa via litepa. Olonepa vimue via kolapo okuti, ka vi nyõleha eci vi sengiwa kuenda vi teyuila ovimatamata vikuavo. Vikuavo via leñela oco vi kuatise oku tumbulula ocipa lonjila yimue ya leluka. Handi vikuavo, vi ecelela okuti etimba liocinyama caco li lisenga senga. Ocinyama caco ci pondola oku iñila kovituta vitito, pokati kovawe, ale pokati koviti.

 Handi vali, etokekelo li sangiwa vocikokoto calio, li kuete olongenge vialua vi tukuiwa okuti ololamina. Ovio via lilundaka ndotulopesa tu tukuiwa quebra cabeça, vi teyuila ocinyama caco. Ololamina viaco via lilundakaila kuenda vi kuatisa ocinyama oku litumbulula vali. Eci ocinyama caco ci lemẽhiwa, pamome aco pa tundila oloproteina loku ecelela okuti olonamina viaco ka vi teka kuenje ci teyuila ocinyama. Vokuenda kuotembo olonamina viaco vi litumbulula vali.

 Olonoño via popia okuti vakuakupanga ovina, va pondola oku setukula etimba lio Besouro-Diabólico-de-Ferro, oco va kolele okuti ovina va panga via kolapo okuti ndaño via veta vocina cimue ka vi pengi, ndeci akãlu, ayau kuenda olonjo.

 Nye o sima? Onjila ndomo etimba liocinyama ci tukuiwa besouro-diabólico-de-ferro, lia pangiwa ya tukuluka ño? Ale lia lulikiwa?