Olonoño tunde osimbu vi kasi oku konomuisa olute lu yoyoka utunda kombisi-ociliangu. Momo lie ovo va tiamisilila calua utima kocina caco? Momo olute lutunda kombisi yaco lua tukuiwa okuti cimue pokati “kovimalẽho via leñela ko ku linalula.”

 Kũlĩhĩsa ndoco: Ombisi-ociliangu ocinyama cimue ca li setahãla lombisi yi tukuiwa okuti enguia kuenda yi kasi kosi yokalunga. Eci yi sengiwa lunyali umue, ombisi yociliangu yitundisa olute lumue luyoyoka. Olute luaco lu kuete olonepa vialua viateku kuenda olonepa vikuavo viateku vi panga olute. Olonepa viaco viateku eci vi li sanduila vovava ovokalunga, vi linga olute lumue lua likuata luañuala ombisi-ociliangu. Olute luaco luyika olondangu viovanyali, loku koka okuti ovio vi liwekapo oku lia ombisi yaco kuenda oku tila.

 Olute luyoyoka lutunda kombisi-ociliangu lu kuete atepiso awa calua. Onepa lonepa yeteku ya pelevela calua okuti esinga kuenda utele ci sule. Eci yi li sanduila vovava ovokalunga, elitengo liaco liolute kuenda ateku aco ci kala ocina cimue ca li setahãla lowanda wa pelevela calua. Utungilo waco u pondola oku kuata ocilemo covava 26 kolohulukãi kolonjanja okuti ocilemo cayo ci sule. Olute luaco lu sokiyiwa ca piãla enene lovava!

 Olonoño ka via siatele oku tẽla oku eca etambululo lia suapo liatiamẽla kolute luyoyoka luombisi-ociliangu. Ukonomuisi umue wa popia hati: “Ocina caco catatama calua.” Pole, olonoño handi vi kuete ocisimĩlo coku panga ulala wateku aco poku talavaya lovipuka. Ocimãho cavo oku panga ovikuata vialela, havio via kõla, vi linalula kuenda viwa. Ulala waco wateku wo lo sintetiku via ponduile oku talavayiwa lavio oco ku pangiwe ovikuata via kolapo violomakina vi panga ndeci utele, ovikolo lovina vikuavo kuenda oku talavaya lawo kupange woku sakula. Ocili okuti, oku yoyoka kuaco ku kuete esilivilo lialua.

 Nye o sima? Olute lutunda kombisi-ociliangu kua tukuluka ño? Ale kwa lulikiwa?