AMALẼHE VA PULA
Nye Ndi Linga Nda Okuti si Sole Oku Lilongisa Kosikola?
Alongisi va tema, oku lambalaliwa la kamba kosikola, oku linga oloseteko via tĩla kuenda ovopange alua oku linga konjo. Pamue eli olio esunga lieci ku solele oku enda kosikola. a Umalẽhe umue o tukuiwa Rachel b wa popia hati:
“Ndi ñolapo oku linga upange ukuavo okuti oku enda kosikola hacoko. Kokuange hĩse oku enda kopalaya oku tunda lakamba vange, ale oku kuatisa olonjali viange oku teleka pamue oku yelisa onjo.”
Nda ove wa siata oku kuata ovisimĩlo ndevi via Rachel, kokuove oku enda kosikola ci kasi ndoku kala vokayike okuti o tundamo lika eci o yovuiwa. Anga hẽ kuli onjila ya velapo yoku kuata ovisimĩlo via sunguluka yatiamẽla kosikola?
Wa ci kũlĩha? Eci o kuata ovisimĩlo via sunguluka viatiamẽla kosikola, o liyeva okuti ku kasi oku kisikiwa, pole, o ci linga omo o yongola oku lilongisa. Poku ci linga, osikola yi ka ku kuatisa oku lilongisa ovoloño a ka ku kuatisa komuenyo, eci o ka kala ukulu.
Oco o kuate ocisimĩlo ca sunguluka catiamẽla kosikola, tiamisila utima kovina vi kuãimo:
Epindiso liove. Osimbu o lilongisa ovina vikuavo, ci ka leluka oku tetulula ovitangi vio kovaso yoloneke kupange kuenda ovitangi vikuavo vio komuenyo okuti, ku tambi ku vakuene. Lipula ndoco: ‘Ndaño okuti si sole oku lilongisa kosikola, ovina vipi vi kuete esilivilo ndi ka lilongisa?’
Onumbi Yembimbiliya: “Lava olondunge kuenda uloño woku sokolola.”—Olosapo 3:21.
Oco o kũlĩhe ovina vikuavo, konomuisa ocipama losapi, “Como eu posso melhorar minhas notas?”
Ovituwa viove. Oku lilongisa kosikola, ci ku kuatisa oku talavaya ciwa lotembo yove, oku lipindisa, oku talavaya, okuti ovio ovituwa vi ka ku kuatisa eci o ka kala ukulu. Lipula ndoco: ‘Oku lilongisa kosikola ca siata oku ndi kuatisa ndati oku lipindisa kuenda oku kala onalavayi yimue yiwa? Ndi mioñoloha ndati kolonepa viaco?’
Onumbi Yembimbiliya: “Kuli onima yiwa kovopange osi.”—Olosapo 14:23.
Oco o kũlĩhe ovina vikuavo, konomuisa ocipama losapi, “Como posso aproveitar melhor meu tempo?”
Ukamba wove la vakuene. Oku sapela lakamba vove kosikola, ci ku kuatisa oku lekisa ohenda kuenda esumbilo ku vana vu tangela kumosi. Umalẽhe umue o tukuiwa Joshua wa popia hati: “Oku lilongisa oku sapela, ci kuete esilivilo momo ci sokisiwa loku lilongisa o historia kuenda o ciência. Uloño waco u ka ku kuatisa vokuenda kuomuenyo wove wosi.” Lipula ndoco: ‘Nye osikola ya siata oku ndi longisa catiamẽla oku kala ciwa la vakuetu, ci kaile vana va tiamẽla ketavo likuavo ale vana va pindisiwa lonjila ya litepa leyi yange?’
Onumbi Yembimbiliya: “Amamiko oku kala lombembua lomanu vosi.”—Va Heveru 12:14.
Oco o kũlĩhe ovina vikuavo, tala ocipama losapi, “Ndi Pondola Oku Sapela Ndati Ciwa Lomanu?”
Ekalo liove lio kovaso yoloneke. Osikola yi pondola oku ku kuatisa oku limbuka ovina viwa kuenda oku litumbikila ovimãho. Umalẽhe umue o tukuiwa Brooke wa popia ndoco: “Ove o pondola oku lilongisa uloño umosi ndeci ame. Noke lioku mala oku lilongisa, o ka tẽla oku linga upange umue. Lipula ndoco: ‘Noke yoku mala oku lilongisa, halitekula ndati? Ndi kũlĩha ndati okuti ndi kasi oku lilongisa eci ci ka ñuatisa oku linga upange waco?
Onumbi Yembimbiliya: “Olonjila viove viosi vi ka kolapo.”—Olosapo 4:26.
