YEHOVA o teyuila omãla kuenda vana ka va tẽla oku liteyuila lika liavo. Olonjanja vimue omanu va limbuka ndomo Yehova a ci linga, pole, pamue ka va limbuka eci ci kasi oku pita.

Ndeci, osimbu o ñuala ñuala vusenge, o sanga onjila yimue posi, ocipepi lapa o kasi. Oyo yi kala ndu okuti, ya lemẽhiwa. Yi koka evava limue kuenda yi amẽla kovaso eci o pitĩla ocipepi layo. Ove o yi kuama, pole, oyo yi kasi naito kovaso yove. Noke vocipikipiki, oyo yi palãla. Ocili ceci okuti, oyo ka ya lemẽhiwile kevava! Wa kũlĩha hẽ esunga lieci onjila yaco ya ci lingila?—

Ocili okuti, omãla vayo va salamẽle vowangu, ocipepi lapa ya kala. Onjila yaco ya kala ina yomãla kuenda oyo ya kuata usumba wokuti, ove o va sanga loku va linga cimue cĩvi. Eli olio esunga lieci ya li kembisila ndu ya lemẽhiwa, oco o tiamisile utima wove kokuayo okuti, oyo yu ku ambata ocipãla. Wa kũlĩha omunu o pondola oku tu teyuila ndeci onjila yi teyuila omãla vayo?— Vembimbiliya, Yehova o sokisiwa ndonjila yi tukuiwa okuti, ongonga, yina yi kuatisa omãla vayo.—Esinumuĩlo 32:11, 12.

Omõla o soliwe calua la Yehova, Yesu. Eci a kala kilu, Yesu wa kala omunu umue ukuespiritu haeye ukuonene ndeci Isiaye. Eye wa ponduile oku li teyuila lika liaye. Pole, eci Yesu a citiwa palo posi, wa sukilile ekuatiso. Wa sukililevo eteyuilo.

Oco eye a tẽlise ocipango ca Suku palo posi, Yesu wa sukilile oku kula kuenda oku kala ukulu umue wa lipua. Pole, Satana wa seteka oku ponda Yesu osimbu ka kulile. Olonjanja Yesu a setekiwa oku pondiwa eci a kala omõla kuenda eci Yehova a linga oco o teyuile, vi situlula ulandu umue u komõhisa. Ove hẽ o yongola oku u yevelela?—

Noke liotembo yimue yitito tunde eci Yesu a citiwa, Satana wa molẽhisa kovailu wo Kutundilo cimue ca kala ndolumbungululu. Alume vamue va lilongisa uloño wolombungululu okuti, vakuakukũlĩhĩsa olombungululu, va enda ocinãla calua colokilometulu poku kuama olumbungululu luaco toke ko Yerusalãi. Eci va pitĩlako, ovo va pula alume vamue va kũlĩhĩle ciwa Embimbiliya ndoco: ‘Pi ku citiwila una o ka linga osoma ya va Yudea?’ Alume vaco va tambulula vati: “Ko Beteleme.”—Mateo 2:1-6.

Herode noke yoku yeva catiamẽla kosoma yokaliye, yina ya citiwa ndopo volupale luo Beteleme yina ya li sunguile lo Yerusalãi, osoma yaco ondingaĩvi Herode wa sapuila vakuakukũlĩhĩsa olombungululu hati: “Kuendi sandiliyi lutate oñaña yaco kuenje eci vu yi sanga, sapuiliko.” Wa kũlĩha hẽ esunga lieci Herode a yonguila oku kũlĩha pocitumãlo Yesu a kala?— Eye wa kuata esepa kuenda wa yonguile oku ponda Yesu!

Suku wa teyuila ndati Omõlaye?— Ocili okuti, vakuakukũlĩhĩsa olombungululu eci va sanga Yesu, vo wĩha olombanjaile. Noke, Suku pocakati conjoyi yimue, wa va lungula oco ka va ka tiukile kuna Herode a kala. Omo liaco, ovo va tiukila konjo poku pita konjila yikuavo okuti, ka va pitile ko Yerusalãi. Herode eci a limbuka okuti vakuakukũlĩhĩsa olombungululu va endele, wa tema calua. Oco a seteke oku ponda Yesu, wa handeleka okuti, omãla vosi valume vo ko Beteleme vana ka va tẽlisile anyamo avali, va pondiwe! Pole, Yesu wa kala ale ocipãla.

Wa kũlĩha ndomo Yesu a puluka?— Vakuakukũlĩhĩsa olombungululu eci va tiukila, Yehova wa tuma Yosefe ulume wa Maria, oco a katuke loku tilila ko Egito kumue lepata. Oko Yesu a pulukila povaka ondingaĩvi Herode. Noke lianyamo amue, eci Maria la Yosefe va tunda ko Egito la Yesu, Suku wa eca elungulo likuavo ku Yosefe. Pocakati conjoyi yimue wo sapuila oco a ilukile volupale luo Nasara muna Yesu a ponduile oku kolapo.—Mateo 2:7-23.

Wa limbuka ndomo Yehova a teyuila Omõlaye?— Koloneke vilo, velie va sokisiwa lolonjila vi li salama vowangu, ale nda Yesu eci a kala omõla? Ove hẽ o sokisiwa lavio, ale sio?— Kulivo omanu va yongola oku ku panga cimue cĩvi. Wa va kũlĩha hẽ?—

Embimbiliya li popia okuti, Satana o kasi ndohosi yi koma oco yi tu lie. Ndeci ohosi olonjanja vialua yi kuama ovinyama vitito, Satana lolondele viaye va yongola oku panga cimue cĩvi komãla. (1 Petulu 5:8) Pole, unene wa Yehova wa velapo wa Satana. Eye o pondola oku teyuila omãla vo vumba kuenda oku malako evĩho liosi Satana a linga.

Ove hẽ ivaluka okuti kocipama 10 celivulu lilo, tua lilongisa eci catiamẽla kocina cimue Satana lolondele viaye va yongola okuti oco tu linga?— Ovo va yongola okuti, tu lipekela lonjila yina Suku a popia okuti, ka ya sungulukile. Pole, velie va pondola lika oku lipekela? Oco muẽle, vana va kuela, ovo lika va pondola oku lipekela okuti, ulume kuenda ukãi waye.

Pole, ocina cimue ci sumuisa ceci okuti, akulu vamue va sole oku lipekela lomãla. Omo liaco, otuafeko lotuakuenje, va lilongisa oku linga ovina via vĩha. Ovo va fetikavo oku papala lonjila ka ya sungulukile lovimatamata viavo viuyali. Eci oco ca pita kosimbu volupale luo Sodoma. Embimbiliya li popia okuti omanu vo volupale luaco, “oku upisa kumalẽhe toke kukulu wendamba,” va yonguile oku lipekela lalume va endele oku ka nyula Lote.—Efetikilo 19:4, 5.

Omo liaco, ndeci Yesu a sukilile oku teyuiwa, ove o sukilavo oku teyuiwa kakulu vaco kuenda komãla vana okuti—pamue va seteka oku lipekela love. Olonjanja vialua, omanu vaco va li kembisa oku kala akamba vove. Pamue handi va ku ĩha ombanjaile yimue nda o likuminya okuti, ku ci sapuila komunu umue catiamẽla kueci a yongola oku linga love. Pole, omanu vaco vakuacipululu ndeci Satana lolondele viaye okuti, va yongola lika oku tẽlisa olonjongole viavo. Va seteka oku tẽlisa olonjongole viavo poku lipekela lomãla. Oku ci linga, ekandu limue linene!

Nye ovo va linga oco va kuate onjongole?— Pamue va sisita kovimatamata viove viuyali. Vakuavo va yongola oku amisa ovimatamata viavo viuyali kovimatamata viove viuyali. Pole, ove lalimue eteke ku ka ecelele okuti, omunu umue o papala losõlole, ale letalamẽlo liove. Ndaño muẽle manjove ulume ale ukãi, ina yove ale isia yove. Olonepa evi vietimba, vi sukila oku teyuiwa ciwa.

O pondola oku li teyuila ndati komanu va siata oku linga ovina viaco vĩvi?— Catete, ku ka ecelele umue oku papala lovimatamata viove viuyali. Nda umue wa seteka oku ci linga, popia lolukandi hati: “Liwekapo oku ci linga! Ndi sapula eci o kasi oku linga!” Nda eye wa popia okuti, ocina ca lingiwa eko liaco liove, ku ka tave. Eci haciliko. Omunu wosi o ci linga nda epata ale sio, u sapula komunu umue! Ndaño eye o popia okuti, ocina vu kasi oku lingila kumosi ci kale ño voliene, ci sapula komunu umue. Ndaño muẽle omunu waco o ku likuminya oku ku ĩha olombanjaile via fina, ale oku saluisa oku ku linga cimue cĩvi, u tila kuenda sapuilako omunu umue eci a ku linga.

Ku ka kuate usumba, pole, amamako oku lunguka. Nda olonjali viove vi ku sapuila okuti, omanu vamue, ale ovitumãlo vimue vi koka ohele kokuove, pokola kueci ovio vi popia. Nda o ci linga, ci tĩla komunu umue ondingaĩvi oku ku linga cimue cĩvi.