Eci omãla va linga ovina viwa, olonjali viavo vi sanjuka. Eci omõla umue ukãi a linga ocina cimue ciwa, isiaye lesanju lialua o popia hati: “U, omãlange ukãi.” Ale nda omõlaye ulume o linga ocina cimue ciwa, isiaye lesanju lialua o popia hati: “U, omãlange ulume.”

Olonjanja viosi Yesu wa linga ovina vi sanjuisa Isiaye. Eli olio esunga lieci Isia o sanjukilila. Ove ivaluka eci Isia ya Yesu a popia eteke limue eci Yesu a kala lolondonge viaye vitatu?⁠—Ocili okuti, Suku wa vangula oku upisa kilu hati: “U omãlange wa soliwa ndo sanjukila.”⁠—Mateo 17:5.

Yesu olonjanja viosi wa lipongiyila oku linga eci ci sanjuisa Isiaye. Ove wa kũlĩha esunga liaco? Momo okuti, eye o sole calua Isiaye. Nda omunu umue o linga ovina vimue lekisika o sima okuti, ka ca lelukile oku ci linga. Pole, nda eye o kuete onjongole yoku linga ovina viaco, ci leluka. Wa kũlĩha eci ci lomboloka oku kuata onjongole?⁠— Ci lomboloka oku linga ocina cimue.

Ndaño muẽle Yesu osimbu keyile palo posi, eye wa kuata ombili yoku linga ovina viosi Isiaye o pinga oku linga. Momo eye o sole Isiaye, Yehova Suku. Yesu wa kala kocitumãlo cimue ci komõhĩsa la Isiaye okuti, kilu. Pole, Suku wa kuata upange umue u likasi oco Yesu a u linge. Oco Yesu a linge upange waco, wa sukilile oku tunda kilu. Eye wa sukilile oku citiwa kilu lieve ndoñaña yimue. Yesu wa kuata onjongole yoku ci linga momo oco Yehova a yonguile.

Oco Yesu a citiwe kilu lieve ndoñaña, eye wa sukilile oku kuata ina umue. Wa Kũlĩha u wa kala ina yaye?⁠— Onduko yaye Maria. Yehova wa tuma ungelo waye Gabriele oku pisa kilu oco a  vangule la Maria. Gabriele wa sapuila Maria okuti, o ka cita oñaña, eye wa laikele oku luka oñaña yaco okuti, Yesu. Helie wa laikele oku kala Isia yoñaña yaco?⁠— Ungelo wa popia okuti, Isiaye Yehova Suku. Eli olio esunga lieci Yesu a tukuiwila hati, Omõla a Suku.

O sima okuti Maria wa liyeva ndati?⁠— “Anga o sima okuti eye wa popia hati si yongola oku kala ina ya Yesu?” Sio Maria wa yonguile oku linga eci Suku a yonguile. Pole, omo okuti wa kala omõla a Suku kilu, wa laikele oku citiwa ndati ndoñaña palo posi? Momo lie oku citiwa kua Yesu kua litepela loku citiwa kuoloñaña vikuavo? Wa kũlĩha esunga liaco?—

Ocili okuti, Suku wa lulika olonjali vietu viatete Adama la Eva oco okuti, va li tokeka lonjila yimue yi komõhĩsa. Noke, oñaña ya laikele oku kolela vimo lia inaye. Omanu va siata oku popia vati, eci o ocikomo cimue! Tua kolela okuti o tavavo kondaka yaco.

Pole, Suku wa linga ocikomo cimue ci komõhĩsapo vali. Eye wa tikula omuenyo womõlaye kuenje wa u kapa vokati ka Maria. Suku lalimue eteke a ci lingile kuenda eye lalimue eteke a ci linga vali. Omo liocikomo caco Yesu wa fetika oku kulila vokati ka Maria ndeci oloñaña vikuavo vi kula vokati ka ina yavo. Noke Maria wa kuela la Yosefe.

Eci otembo yoku cita Yesu ya pĩtila Maria la Yosefe va kala kolupale luo Beteleme. Pole, mueyukile omanu valua.  Ka kuakaile ohondo layimue oco Maria la Yosefe va kalemo. Omo liaco, va kala pocitumãlo cimue panda oku lala ovinyama. Oko Maria a citila kuenje Yesu wa kapiwa pocimanga ndomo o pondola oku ci mõla velitalatu. Ocimanga, ocina cimue coku kapa okulia kuolomgombe kuenda kuovinyama vikuavo.

Vuteke eci Yesu a citiwa kuapita ovina vi komõhĩsa. Ocipepi lo Beteleme, ungelo umue wa molẽha kangombo vamue. Ungelo waco wa va sapuila okuti, Yesu wa kala omunu umue wa velapo. Ungelo wa popia hati: ‘Tala! Ndu vu sapuili olondaka viwa vi ka sanjuisa omanu. Etaili kua citiwa umue o ka yovola omanu.’⁠—Luka 2:⁠10, 11.

Ungelo wa sapuila angombo va laikele oku sanga Yesu ko Beteleme, okuti wa pekela pocimanga. Noke vocikipiki, angelo vakuavo va molẽha kilu kuenje va li kongela lungelo watete oku sivaya Suku. Ovangelo va imba vati: “Ulamba ku Suku  kuenda kilu lieve ombembua pokati komanu va taviwa laye.”⁠—Luka 2:⁠12-⁠14.

Eci ovangelo va enda, angombo va enda toke ko Beteleme kuenje va sanga Yesu. Oko va sapuila Yosefe la Maria ovina viosi ovo va Yeva. Ove hẽ o pondola oku sokolola esanju Maria a yeva omo lioku tava oku kala ina ya Yesu?

Noke Yosefe la Maria va ambata Yesu kolupale luo Nasara. Oko Yesu a kulila. Eci a linga ukulu, eye wa fetika upange waye woku longisa. Owo wa kala upange umue Yehova Suku a yonguile okuti omõlaye o u linga kilu lieve. Yesu wa kuata onjongole yoku linga upange Waco momo wa solele calua Isiaye wo kilu.

 Osimbu Yesu ka fetikile upange waye, Ndulongisi wa Velapo, Yoano Upapatisi wo papatisa Volui Yordão. Noke kuapita ocina cimue ci komõhĩsa! Eci Yesu a kala oku tunda vovava, Yehova wa vangula oku pisa kilu hati: “U Omõlange, wa soliwa ndo sanjukila.” (Mateo 3:⁠17) O ove hẽ o sanjuka eci olonjali viove vi popia vati va kusole?⁠— O pondola oku tava okuti, Yesu wa cisolavo.

Yesu olonjanja viosi wa linga ovina via sunguluka. Eye ka likembisile. Yesu ka sapuilile omanu okuti, eye wa kala Suku. Ungelo Gabriele wa sapuila Maria hati, Yesu o ka tukuiwa Omõla a Suku. Yesu wa litukula eye muẽle okuti, Omõla a Suku. Eye lalimue eteke a sapuilile omanu okuti, wa kulĩhĩle vali ovina vialua okuti Isiaye ci sule. Eye hati: “Tate wa mbelapo ame ndi sule.”⁠—Yoano 14:28.

Ndaño muẽle kilu, eci Yesu Isiaye a enda oku wĩha upange umue woku linga, Yesu wa enda oku utẽlisa. Eye ka endaile oku popia hati ndi ci linga kuenje o linga ocina cikuavo. Yesu wa solele calua Isia. Eye wa endaile oku yevelela eci Isiaye a enda oku popia. Omo liaco, Yesu eci eya palo posi wa linga eci Isiaye wo kilu a yonguile okuti o ci linga. Eye ka pitile otembo oku linga ovina vikuavo. Ocili okuti, Yehova wa sanjukila calua Omõlaye!

Tu yongolavo oku sanjuisa Yehova, ka tu yongola?⁠— Nda oco, tu sukila oku lekisa okuti, tu yongola oku yevelela muẽle Suku ndeci Yesu a linga. Suku o vangula letu pocakati Cembimbiliya. Ka ca sungulukile oku likembisa ndu okuti, tu kasi oku yevelela Suku kuenje tu tava loku linga ovina ka vi litava Lembimbiliya, siti ocili? Kuenda ivaluka okuti, tu ka kuata esanju lialua poku sanjuisa Yehova nda tuo sola lutima wosi.