Onepa ye 7

Esulilo Liusuanji Liasiata Oku Kala Ndati?

1-3. Otembo ya situlula ndamupi okuti Yehova ukuaci li?

 NDA kocitangi ca Suku okuviala, lipi liasiata oku kala esulilo liovita evi viuviali womanu valitepa ku Suku? Omanu va li lekisa ndu vavelapo koku viala okuti Suku ci sule? Oku sima kesapulo liehuko liomunu komunu, ocili muele sio.

² Eci vaisia yetu vatete va silula uviali wa Suku, esulilo liaco liakala upongo. Va linenela ohali ovo muele kuenda kepata liomanu vosi ocitumbulukila cavo. Kuenda nda ka va lundila layumue puãi ovo muele. Ondaka ya Suku yiti: “Vo lueyela. Ka va lingi vali omala vaye omo atondelo avo alua.” — Esinumuĩlo 32:5.

³ Esapulo li situlula okusuapo kuakala elaleko lia Suku ku Adama la Heva, konjila eyi okuti, nda va pambukile kovihandeleko viokilu, nda va sengeteta kuenda, oku sulako, nda oku fa. (Efetikilo 2:17; 3:19) Ovo vasiapo oku vialiwa la Suku noke, lotembo, va sengeteta muele yapa va fa.

4. Etu nye tua citiwila ka tua lipuile, tutiamela kokuvela loko ku fa?

 ⁴ Eci ceya okupita noke yocitumbulukila cavo, Va Roma 5:12 lilombolola: “Ekandu lia iñila voluali lomunu umuamue, [Adama, sungu yepata liomanu] kuenda okufa kueya lekandu, haico okufa kua sambukila omanu vosi.” Kaliye, eci vaisia yetu vatete va linga usuanji lumitavaso wa Suku, vapongoloka vakuakandu vakuakulueya. Kumuamue lovihandeleko vieci ca yeviwa, okuhongua kuasupako kuakala lika cosi citiama kocitumbulukila cavo. Oco eci okuti etu tua citiwa tumãla, tutiamela kokuvela loko ku fa.

5, 6. Esapulo lialekaisa nye citiamela komunu okulitumbika oku nena ocili combembua kuenda elavoko?

⁵ Papita ale ovita vialua. Kuamoleha kuenda kua lunduiwa ovonene. Kua setekiwa uviali wosi ka wu simiwa. Kovaso yaco, ovina vilingisa usumba viasiata vituihinya okupita kepata liomanu. Noke yepandu liolohũlũkãi vianyamo, nda ku simiwa okuti nda catavele nda omanu vatẽla ale oku pitila petosi lioku tumbika ombembua, esunga kuenda elavoko Kongongo yosi kuenda nda va mioñolola ale asilivilo atava unjuke, ohenda locimunga.

⁶ Ocili, puãi, esinjiviko. Laumue uviali womunu ukasi ale wa ponduile oku nena ombembua lelavoko kuvosi. Handiño mulo vocita ca 20, tulete okuliponda kuolohũlũkãi viomanu k’Olondunda, kuenda okuliponda kueci cisoka vali 100 kolohuluwa vovoyaki. Koloneke vietu, etendelo limue ka li tukuiwa liomanu va va pupola, va va sasõla loku vaendisa vumandekua mekonda liumamale.

Ekalo Etali

7. Ekalo liepata liomanu etali li tondonguiwa ndati?

⁷ Haicoko ño, lilongisi ekalo liasiata liepata liomanu etali. Evĩho lungangala viasiata. Elaviso liolo-droga lialinga efengi. Kulivo afengi amue lovoveyi apitiyiwa luvasi. Uveyi ulingisa usumba o AIDS wusambukila olohuluwa. Akuĩ ovita violohuluwa vafa vunyamo lunyamo lonjala ale lovoveyi, losimbu okuti etendelo limue litito liomanu vakuete ovohuasi akahandangala. Omanu vavĩhisa ofela loku punda ongongo. Omuenyo wepata kuenda evi vi silivila vovisimĩlo via sengeteta konepa yosi. Ocili muele, omuenyo etali wusima uviali wukasa ‘wosuku yoluali lulo,’ Satana. Oluali, olu okuti eye eye muele, watalala, oñangavaso haiye muele ombĩha. — 2 Va Korindo 4:4.

8. Ka tu ponduila nye oku tukula ovilinga viomanu okuti okuamako kuocili?

⁸ Suku waeca otembo yitẽla oco omanu va seteke cosi kokuamako kuavo kuloño lovikuata. Pole, anga hẽ okuamako kuocili ohonji lusongo oku piñainyiwa lovilunga, atangi, olo-mbomba olombalãu viuyaki lolomise viovota anene? Anga okuamako omanu oku pondola okulingila ungende vepuluvi, pole ka va pondola oku kala omunga lombembua Vongongo? Anga okuamako omanu oku kala lusumba okupita volokololo luteke ale toke muele lutanya kolokololo vimue?

 Ceci Otembo ya Situlula

9, 10. (a) Ovita viapita ale vilekisa muele nye? (b) Suku nye ka kopilako oku-linõlela?

⁹ Eci oseteko yovita vianyamo ya situlula ceci okuti ka ci ponduiwa komanu oku suñamisa okuenda kuavo muele kosamua yuviali wa Suku. Ka cititoko oku pondola oku kala pole okulia sio, okunyua loku fuima. Uvangi wasuapo: Ndeci tua lulikiwila oco tu tiamele konumbi y‘Ululiki wetu, haico tua lulikiwila oku tiamela kokulia, ovava lofela.

¹⁰ Suku okuecelela evĩho, wa lekisa onjanja yimosi lika hũ akusulila kuoku fufula lãvi oku-linõlela. Loku-linõlela ongavelo yimue yi silivila eyi, hambi yoku yupa komanu, Suku wa va ecelela oco va tale ndomo va yi fufula lãvi. Ondaka ya Suku yocili, poku lombolola: “Omunu enda ka tẽla eye muẽle oku suñamisa okuenda kuaye.” Oyovo yocili, poku popia yiti: “Omunu poku kangisa ukuavo o lilinga eye muẽle cĩvi.”​—Yeremiya 10:23; Ukundi 8:9.

11. Kuli hẽ oseteko yimue yuviali womanu okuti ya tẽla oku mala ohali?

¹¹ Suku waecelela kolombiali viomanu epandu liolohũlũkãi vialima ci lekisa okuti omunu kakuete epondolo lioku mala ohali. Kakuli layimue otembo a pondola oku ci linga. Ndeci, voloneke viaye, Soma Salomone, wo k’Isareli, luloño waye wosi, ukuasi kuenda epondolo, ka tẽlele oku pengulula esumuo lia tunda kombiali yomanu. (Ukundi 4:1-3) Ocovo, olombiali viovoluali etali, ndaño lovoloño vokaliye vamako, ka va kuete epondolo lioku mala ohali. Capiãla handi, Esapulo li situlula okuti omanu, valitepa luviali wokilu, va vokiyako ohali, eci okuti nda va yi mala.

Ocinjonde Cokilu Cocinãla

12-14. Asumũlũho api aenda hũ asupako omo Suku aecelela ohali?

¹² Suku oku ecelela ohali ku supuluka upongo kokuetu. Puãi eye wakala locinjonde cocinãla, loku kũliha asukiyo awa ana akeya votembo ya tukuiwa. Ocinjonde caco eci ca Suku cika sumũluisa oviluvo havokatemboko katito ño, ale muẽle volohũlũkãi vianyamo, puãi volohuluwa lolohuluwa vianyamo, oco, volonahũlũlua viosi.

¹³ Nda kueya ocituwa votembo yimue kovaso ku yumue oku fufula lãvi oku-linõlela, oku liñoñonisa omo Suku a panga ovina, ka ci ka sukila oku wiha elivala oco a seteke ovisimilo viaye. Lokueca ale olohuluwa vianyamo kisuanji, Suku wa tumbika limue elivango liomoko lika kapiwako kolonahũlũlua viosi konepa yosi yoluali.

 ¹⁴ Mekonda Yehova wa ecelela evĩho lohali toke etali, kuka setekiwa okuti ocina cimue nda ka ci li tokekisa laye ka ci tuamelela. Ku ka tumbikiwa okuti kaku ka mumuiwa vali esokiyo lalimue liolonepele, cikale liomanu, cikale lioviluvo viaspiritu, lipondola oku nena asumũlũho aenda hũ. Ndomo, Suku oka kuata muele esunga lioku keleñala muele pe wosi ocisuanji. “Olondingaĩvi puãi, o vi nyõla.” — Osamo 145:20; Va Roma 3:4.

[Apulilo elilongiso]

[Elitalatu kemẽla 15]

Noke cina okuti vaisia yetu vatete vanola okulitepa ku Suku, ovo okusulako vakuka kuenje vafa

[Elitalatu kemẽla 16]

Uviali womulu, walitepa ku Suku, wa li situlula okuti owo wanena upongo

[Ono yelitalatu]

Foto da U.S. Coast Guard