Onepa ye 6

Momo Nye Suku Asiatela Oku Ecelela Ohali

1, 2. Vaisia yetu vatete ndati vanyõla efetiko liaposoka lina Suku a vaihile?

 NYE ca tunda lãvi? Nye ca pita oco ci nyõle efetiko lia posoka lina Suku aeca kuvaisia yetu vatete Oluali luelau Edene? Momo nye, hambi yombembua kumuamue Loluali lumue lueposo Vocumbo Celau, luamamako lopo volohuluwa vianyamo evĩho lohali?

² Eci mekonda Adama la Heva va fufula lãvi elisanjo liavo liokunola. Va pumba muele lelinga okuti ka va lulikiwile oco va sokepo lonepa ku Suku lovihandeleko viaye. Valiyonguila okulitepa la Suku, okusima okuti eci nda ca mioñolola omuenyo wavo. Handi, va pitahãla olongave vioku-linõlela kuavo via kapiwa la Suku. — Efetikilo, ocipama ca 3.

 Ocitangi Cokuviala Cosi

3-5. Suku nye ka nyõlele Adama la Heva noke ha fetika vali cokaliye?

³ Momo nye Suku ka nyõlele lika Adama la Heva noke ha fetika vali lolohuela viñi? Momo okuviala kuaye cosi, eci ceci, omoko Yaye yokuviala, ya sanumuiwa.

⁴ Ocitangi cakala: U o kuete omoko yoku viala helie, kuenda uviali welie wasuapo? Eye oku kala ukuonene-wosi kuenda Ululiki woviluvo viosi ceca ku Suku omoko yoku viala kokuavio. Mekonda ukualondunge-viosi, uviali waye owo wavelapo koviluvo viosi. Puãi uviali wa Suku wa sanumuiwa. Handivo, anga kua kala cimue cĩvi kociluvo caye — omunu? Tu ka kũlihisa vali kovaso etokekiso lipi likasipo lekolelo liomunu.

⁵ Omunu oku pongoloka umue walitepa ku Suku, kua votuiwa limue epulilo likuavo: Omanu nda cavatunda ciwa nda ka va vialiwile la Suku? Ululiki ocili muele wa kũlihile etambululo, pole yimue onjila yakoka oco omanu va ci limbuke oku va iha elisanjo va yonguile. Ovo vanola onjila eyi yonjongole yavo muele, kuenje Suku waecelela eci.

6, 7. Suku momo nye asiatela okuecelela elisanjo liosi komanu otembo yakahandangala?

⁶ Lokueca otembo yasuapo komanu oco va seteke elisanjo liosi, Suku nda wa tangulula onjanja yimosi ocitangi nda cavelapo komanu oku vialiwa la Suku ale valitepa. Kuenda otembo yaeciwako nda yatẽla oco omanu va pitile petosi liacina vatukula okuti nda va tukula elondo liovilinga viavo ko pulitika, kupange, kuloño kuenda koku sakula.

⁷ Okuamisako, Suku waeca komunu ovisimĩlo vialianja toke koloneke vilo, loku lekisa, atatahãi lakamue, nda uviali womunu, walitepa Kokuaye, citunda ciwa ale ndandati. Omo liaco, omunu osiata oku pondola oku nola pokati kunjuke kuenda ungangala, ocisola lonya, esunga kuenda eci ka ca sungulukile. Pole eye osiata okuliyakavo loku pukuapukua kuokunola kuaye: okunjuka lombembua, ale evĩho kuenda ohali.

Usuanji Woviluvo Viaspiritu

8, 9. (a) Usuanji wa fetika ndati vuviali waspiritu? (b) Hambi ya Adama la Heva, velie Satana a sosuiyavo okulinga usuanji?

⁸ Kuli vali elinga likuavo li kũlĩhisiwa. Vaisia yetu vatete havoko lika valinga usuanji luviali wa Suku. Pole helie vali wa kala kotembo yina? Oviluvo viaspiritu. Apa handi ka lulikile omanu, Suku wa lulikile lonjila yimue yavelapo vali yomuenyo, etendelo limue linene liovangelo, oco va kale vuviali wokilu. Ovo lavovo va lulikiwa loku-linõlela kuenda va sukila oku vialiwa la Suku. — Yovi 38:7; Osamo 104:4; Esituluilo 5:11.

 ⁹ Embimbiliya lilekisa okuti usuanji wa fetikila tete vuviali waspiritu. Ociluvo cimue cespiritu ca yonguile elisanjo liosi. Toke muele ca yonguile okuti omanu vovumba. (Mateo 4:8, 9) Ocisuanji eci cespiritu ca pongoloka umue ukuakusakalaisa vusuanji wa Adama la Heva, loku popia uhembi okuti Suku wa va limbika eci ciwa. (Efetikilo 3:1-5) Oco okuti, eye o tukuiwa Eliapu (Ukualombonde) kuenda Satana (Unyali). Noke yaco, eye wa tiangulula oviluvo vikuavo oco va lingevo usuanji. Ava va kũlĩhiwa okuti olo-demónio. — Esinumuĩlo 32:17; Esituluilo 12:9; 16:14.

10. Nye ca supuluka kusuanji womanu kuenda koviluvo viaspiritu?

¹⁰ Loku lingila usuanji Suku, omanu va likongela voku sosuiya kua Satana kuenda kuolo-demónio viaye. Oco Embimbiliya litukula Satana ndo “osuku yoluali lulo,” una o “tekavisa ovitima viavo.” Kovaso yaco, Ondaka ya Suku ya popia hati “loluali luosi lu kasi povaka eliapu.” Yesu yaco wa tukula Satana okuti “ombiali yoluali lulo.” — 2 Va Korindo 4:4; 1 Yoano 5:19; Yoano 12:⁠31.

Ovitangi Vivali

11. Kocitangi cipi cikuavo Satana asanumula Suku?

¹¹ Satana wa tukulula vali ocitangi ca sanomola Suku. Vocili, eye wa lundila Suku okuti wa lueya konjila ndomo Eye a lulikile omanu okuti layumue pokati kavo nda wa panga okulinga ocina ca miuha lesipato. Lelinga, eye wa popia hati, ovo oku kala voseteko, toke muele nda va siñala Suku. (Yovi 2:​1-⁠5) Lonjila ndoyo, Satana wa kuata etatahãi citiamela kekolelo lioku lulikiwa kuomanu.

12-14. Otembo nda ya lumbulula ocili citiamela kovitangi vivali via katula Satana?

¹² Handi vali, Suku waeca otembo yecelela oco oviluvo viosi vianyanga vitale ndomo ocitangi eci, kuendavo ocitangi coku viala kueci ca Suku, nda ca potoluiwa. (Cisokisa l’Etundilo 9:​16.) Vokuenda kuotembo, evi vipita vesapulo liomanu nda via tukulula ocili citiamela kovitangi evi vivali.

¹³ Tete ya cosi, eci nda ca tukulula otembo citiamela kocitangi coku viala cosi, oku miuha kuviali wa Suku? Omanu nda va liviala cavelapo okuti ndomo Suku a viala cisule? Anga ekalo limue liuviali womunu, walitepa ku Suku, nda waima oluali lumue luesanju, lualipua vuyaki, vevĩho kuenda vungangala? Nda kuakala uviali umue nda wamalako usuke lokueca elavoko kuvosi? Okuti nda wa malako uvei, ukuke kuenda oku fa? Uviali wa Suku waloñale koku linga cosi eci. — Efetikilo 1:​26-⁠31.

¹⁴ Kocitangi cavali, o nye nda ca tukulula otembo yesesamẽlo kociluvo comanu? Anga cakala okulueya konepa ya Suku okulinga oviluvo viomanu ndomo a va panga? Nda wa panga vimue poviavo oku vi kapa koseteko? Nda kuakala omanu nda valekisa esukila liuviali wa Suku lokunola oku litepa luviali womanu?

[Apulilo Elilongiso]

[Elomboluilo kemẽla 13]

Suku waeca otembo oco omanu vapitile petosi livilinga viavo

[Ono Yelitalatu]

Ônibus espacial: Baseado numa foto da NASA