Onepa ye 8

Ocipango Ca Suku Cipanda Koku Tẽlisiwa

1, 2. Ndamupi Suku asole oku liangiliya oco ohali yipue?

 UVIALI womanu lolo-demónio ovisuanji vikasi loku nyola epata liomanu vovita vialima. Pole, Suku ka sole okuivalako olohali vietu. Puãi, vokuenda kuovita viosi evi, eye okasi loku liangiliya oco a yovole omanu kuevi vĩvi kuenda kohali.

² Eci kua mõleha usuanji vo Edene, Suku wa fetika oku lombolola ocipango caye coku pongiya ombiali ya yi lingisa ongongo eyi ofeka yesanju komanu. (Efetikilo 3:15) Noke yaco, ndayumue wa velapo kapitiya ka Suku, Yesu wo lingisa nduviali wa Suku osapi yelongiso liaye. Wa vangula heti nda olio lika elavoko liomanu. — Daniele 2:44; Mateo 6:9, 10; 12:21.

3. Onduko yipi Yesu aeca kombiali ya laeka okuiya Vongongo, kuenda momo lie?

³ Yesu wa tukula ombiali eyi ya Suku ya laeka okuiya ‘ndusoma wokilu.’ (Mateo 4:​17) Wa u tukulavo ‘ndusoma wa Suku,’ momo Suku nda eye Usovoli Waye. (Luka 17:​20) Vokuenda kuovita vialima, Suku wa tumisa asonehi vaye oco va sonehe ovitumasuku via tiamẽla kuava ya va sokiya ombiali eyi kuenda eci ya yi linga.

Osoma Yokaliye Yongongo

4, 5. Ndati Suku a lekisa okuti Yesu wa kala Soma yaye a kolela?

⁴ Yesu u, oku panda volohulukãi vivali vianyamo, wa suisapo ovitumasuku vialua via tiamela ku una nda okala o Soma Yusoma wa Suku. Eye wa li tukulula ndonoliwe ya Suku kuviali Wosoma eyi yokilu komanu. Noke yokufa kuaye, Suku wapindula Yesu komuenyo wokilu okuete ongusu yondulikue yespiritu, ka lifi. Pa kala olombangi vialua viepinduko liaye. — Ovilinga 4:10; 9:1-9; Va Roma 1:1-4; 1 Va Korindo 15:3-8.

⁵ Yesu noke ‘wa tumala oloneke ka vi pui kondio ya Suku.’ (Va Heveru 10:​12) Opo, eye wa kevelela otembo yokuti Suku u kapa koku tambula omoko Yusoma Vusoma wokilu wa Suku. Eci ca tẽlisa ocitumasuku co Osamo 110:​1, omu Suku o popisa: “Tumãla kondio yange toke hu lingila ovanyali vove ociliatelo cove.”

6. Ndati Yesu a lekisa okuti wa loñolohele oco a linge Soma Yusoma wa Suku?

⁶ Eci a kala posi, Yesu wali lekisa okuti wa loñolohele oku linga upange waco. Omo liesuvuko, wa nola oku pokola lika ku Suku. Oku linga eci, wa lekisa okuti Satana wa kemba pokueca ekoliso ndakuti lomue omunu nda okala ukuacili ku Suku loseteko. Yesu, ulume umue ukuesunga, ‘Adama ya vali,’ wa lekisa okuti Suku kalueyele loku lueya koku lulika omanu vakuesunga. — 1 Va Korindo 15:22, 45; Mateo 4:1-11.

7, 8. Ovina vipi viwa Yesu alinga eci a kala Posi, kuenda eye wa lekisa nye?

⁷ Ombiali yipi kaya la linga eci ciwa nda Yesu valima atito vupange waye wusoma? Lepondolo liespiritu sandu lia Suku, Yesu wa sakula ava vavela, ovilema, olomeke, ovisitatuĩ lovitende. Kuendavo wa pindula ava vafa! Eye wa ci lekisa vonepa yitito eci nda eya oku linga komanu vonepa yoluali luosi eci nda eya oku kapiwa kepondolo Liusoma. — Mateo 15:30, 31; Luka 7:11-16.

 ⁸ Eci a kala vongongo, Yesu wa linga ovina via lua viwa okuti ondonge yaye Yoano ya popia: “Kulivo ovina via lua vikuavo Yesu a linga. Nda viosi via sonehiwile, nda soka siti, voluali, alivulu aco a sonehiwa, nda ka a suimo.”— Yoano 21:25. a

9. Nye vongolokaila ku Yesu omanu va kuete utima wa sunguluka?

⁹ Yesu wa kala embombe ukuahenda, wa solaele calua ocili omanu. Wa kuatisa olosuke lava va talisua ohali, puãi ka tepisile ava va kuata ovohuasi ale ovikele. Omanu vakuete utima wa sunguluka va tava ocisola celaleko lia Yesu: “Enjui kokuange, vosi wa sovoloki kuenda wa lemiwi kuenje ndu kavuluisi. Likapi okanga yange kuenda lilongisi kokuange, momo ndonjuka, haime nda liketisa vutima, oco vu sanga ekavuluko vovitima viene, momo okanga yange ya sunguluka, locitele cange ca leluka.” (Mateo 11:28-30) Omanu va sumba Suku va lupukila kokuaye loku kevelela ombiali yaye. — Yoano 12:19.

Olombiali Vialikongela

10, 11. Helie oka linga onepa la Yesu koku tumila kilu lieve?

¹⁰ Oco ndeci volombiali viomanu muli ava va tiamela kombonge, Vusoma wokilu wa Suku mulivo. Vakuavo, okutepako Yesu, va ka kuata onepa yokuviala vongongo, puãi Yesu wa likuminya kuava va litokeka laye okuti ava ya va viala laye ndolosoma komanu. — Yoano 14:2, 3; Esituluilo 5:10; 20:6.

¹¹ Oco, kumue la Yesu, limosi etendelo liomanu likuete ongave kuenje li pinduiwavo komuenyo wokilu. Ovo va tunga Usoma wa Suku wuka nena asumũlũho aenda hũ komanu. (2 Va Korindo 4:14; Esituluilo 14:1-3) Omo liaco, lovita vialima, Yehova osole okuimba ociseveto c’Umbonge cika nena asumũlũho aenda ño hũ kepata liomanu.

Esulilo Liuviali Walitepa

12, 13. Usoma wa Suku kaliye wa liangiliya oco ulinge nye?

¹² Vohũlũkãi eyi, Suku osole oku litenga lesunga vovitangi vioposi. Ndomo Onepa ye 9 yokalivulu aka yika sokisa, owanji we Embimbiliya u lekisa okuti Usoma wa Suku vu Yesu wa tumbikiwa ko 1914 kuenda kaliye wa liangiliya oco u kelekese oluali luosi lua Satana. Usoma owu wa pongiyiwa oco ‘u viale pokati kovanyali’ va Kristu. — Osamo 110:2.

 ¹³ Omo liaco, ci popia ocitumasuku, ku Daniele 2:44: “Koloneke violosoma viaco [vietali lilo], Suku yokilu o katula usoma [kilu], kuenje ka u nyolẽha, ka u tambuiwa lomanu vofeka yiñi; puãi [Usoma wa Suku] owo u nyõla loku lia ovosoma aco osi, haiwo u kala muẽle hũ oloneke ka vi pui.”

14. Api akalo amue awa a ka siñiwa kesulilo liuviali womunu?

¹⁴ Onjanja uviali wosi walitepa la Suku u sondoluiwa, uviali Wusoma wa Suku wuka yuka kongongo. Kuenje, omo okuti ombonge y’Osoma yikasi kilu, ka ci ka tava oku nyoliwa lomanu. Unene wuviali u ka kala oku wa kala aile kefetikilo, oku kuliha, kilu, la Suku. Kuenje, onjanja yimue okuti uviali wa Suku wu ka lava ongongo yosi, ka ci ka tava okuti yumue o yapuisiwa latavo esanda ale lovilongua viesanda liaño ka vi sanjuisa omanu kuenda ovisimilo vi tunda kuloño wuhembi. Ka ci kaecelela ekalo lalimue liovina evi. — Mateo 7:15-23; Esituluilo, ovipama vie 17 toke 19.

[Etosi pombuelo]

[Apulilo elilongiso]

[Elitalatu kemẽla 18]

Eci a kala Vongongo, wa sakula ava va vela kuenda wa pindula ava vafa oco a lekise eci aka linga Voluali luelau

[Elitalatu kemẽla 19]

Usoma wokilu wa Suku uka kundula olombiali viosi via litepa laye