Ociseveto Coluali Luokaliye Cikasi Ale Loku Tumbikiwa
Onepa ye 11
Ociseveto Coluali Luokaliye Cikasi Ale Loku Tumbikiwa
1, 2. Vokutẽlisiwa kuovitumasuku vi’Embimbiliya, eci ci kasi loku pita tu lete lovaso etu muele nye?
OCIKOMOVO elinga eli okuti ociseveto coluali luokaliye lua Suku cikasi ale loku tumbikiwa, losimbu okuti olu luakuka ndeti lua Satana lu sengeteta. Kovaso yovaso etu muele, Suku okasi oku ongotiya omanu vokolofeka viosi, oku va lingila ociseveto coluali ca yimue ohongele yokaliye voluali okuti ndopo yika piñanya oluali luacilo lua li sandola. Ve Embimbiliya, ko 2 Petulu 3:13, ohongele yaco eyi yi tukuiwa ‘oluali luokaliye.’
2 Ocitumasuku c’Embimbiliya lacovo citi: “Ci kala okuti koloneke viesulilo [otembo yilo tukasi ndeti] . . . Olofeka via lua vi popia viti, Enjui, tu lamani komunda ya Yehova [Efendelo liaye liocili], . . . okuti o tu longisa ovituwa viaye ha tu endaela volonjila viaye.”— Isaya 2:2, 3.
3. (a) Pokati kelie ci kasi oku tẽlisiwa ocitumasuku ca Isaya? (b) Olondaka vie ci popia kueci ca tiamela kelivulu lia sulako li Embimbiliya?
3 Ocitumasuku eci ci tẽlisiwa cilo pokati ka vana va pokola ‘ku Suku ha va endaela volonjila viaye.’ Elivulu lia sulako li’Embimbiliya li tukola ohongele eyi yolofeka viava va sole ombembua “owiñi wakahandangala . . . Va tunda kolofeka viosi kuenda kapata osi, okuti omanu vakuapata osi kuenda vakualimi osi,” vakuacisola cocili colungunge vana va vumba locimunga ca Suku. Kuenda Embimbiliyavo liti: “Ava, ovo vana va tunda kohali ya piãla.” Ceci okuti, va ka supuluka kesulilo liekalo eli lĩvi. — Esituluilo 7:9, 14; Mateo 24:3.
Umanji Wocili Kolofeka Viosi
4, 5. Momo nye citava ocisola coluali c’Olombangi via Yehova?
4 Olohuluwa vi’Olombangi via Yehova va sandiliya locili kumuamue lalongiso lolonumbi via Suku. Elavoko liavo liomuenyo kopui lia sevetiwa Voluali luokaliye lua Suku. Lokuambata omuenyo we teke la teke woku pokola kovihandeleko viokilu, ovo va situlula ku Suku emaleho liavo lioku pokola konjila yaye yoku viala cikale cilo ale Voluali luokaliye. Kolonepa viosi, wosi wokolofeka viaye ale epata, opokola kolonumbi vimuamue — via tumbikiwa la Suku Vondaka yaye. Oco okuti ca linga umanji wocili kolofeka viosi, ohongele yoluali luokaliye, lua pangiwa la Suku. — Isaya 54:13; Mateo 22:37, 38; Yoano 15:9, 14.
5 Olombangi via Yehova ka va litendi ovo muele okukala ocisola cimue ka ci setekiwa colungunge. Va kũliha okuti eci cilieca lesupuluko liongusu yapama Ya Suku yivetiya vomanu va pokola kovihandeleko viaye. (Ovilinga 5:29, 32; Va Galatia 5:22, 23) Upange wa Suku. Ndomo Yesu a popia: “Ovina ka vi tẽliwa lomanu vi tẽliwa la Suku.” (Luka 18:27) Kovaso yaco, Suku wa pondola oku tumbika ekalo Lioluali ka li pui opondolavo ekalo liakoka ohongele yoluali luokaliye.
6. Momo nye ocisola c‘Olombangi via Yehova ci tukuiwa ocikomo candopo?
6 Oco, onjila ya Yehova okuviala yoluali luokaliye yi pondola ale okumuiwa vovina vina eye akasi lokupanga kociseveto coluali luokaliye ca tumbikiwa ale. Eci eye asiata okulinga l’Olombangi viaye, kokumuiwa kuondaka ocikomo cacilo. Momo nye? Momo eye osiata oku tumbika Olombangi via Yehova mumue vumanji wocili coluali luosi, okuti lalimue vali eteke wu ka nyõliwa la va kualonepele violofeka, vakuakova ale vakuatavo. Ndaño Olombangi va kasi olohuluwa kuenda va kasi vali 200 kovifuka, ovo va kasi ocimunga ka ci nyõliwa. Ocisola caco eci coluali cilikasi konepa yosi Yesapulo, ocili cimue ocikomo cocili — upange wa Suku. — Isaya 43:10, 11, 21; Ovilinga 10:34, 35; Va Galatia 3:28.
Owiñi wa Suku wa Limbukiwa
7. Ndomo ca popia Yesu, ndamupi olondonge viaye nda via limbukiwa ndoloñame viocili?
7 Lonjila yipi citava oku tukula wupi owiñi Suku a fufula ndociseveto coluali luaye luokaliye? Oco, velie va linga olondaka via Yesu ko Yoano 13:34, 35? Eye wa vosika: “Ndu wihi ocihandeleko cokaliye okuti, Lisoli pokati. Ndeci ame ndo soli, haico ene, lisolivo pokati. Kokulisola kuene pokati oko omanu vosi va limbukila okuti vulondonge viange.” Olombangi via Yehova va tava kolondaka via Yesu kuenda va cilinga. Ndomo Ondaka ya Suku yilongisa, vakolisako “kokulisola pokati.” (1 Petulu 4:8) “Puãi ca piãla enene, wali ocisola, momo ocisola oco ci kutila cosi pamosi vomunga ya kanguka.” (Va Kolosai 3:14) Kovaso yaco, ocisola kumuamue “etokekiso” ci va kongela pamuamue koluali luosi.
8. Oku limbukiwa kupi kua vokiya kuowiñi wa Suku kua tukula 1 Yoano 3:10-12?
8 Kuendavo, 1 Yoano 3:10-12 hati: “Omãla va Suku lomãla veliapu va limbukiwa ndomo okuti, wosi ka lingi esunga hamõla a Sukuko, ndaño u ka sole ukuavo. Ondaka wa yevi tunde kefetikilo yeyi yokuti, cetu oku lisola pokati, oku setahala ukueliapu Kaini, una wa ponda manjaye, haicoko.” Oco, owiñi wa Suku ocisola colungunge, hacinyõliwa.
Ondimbu Yikuavo
9, 10. (a) Upange upi u limbukisa olombumba via Suku, koloneke via sulako? (b) Ndamupi Olombangi via Yehova vasiata okutẽlisa Mateo 24:14?
9 Kuli onjila yikuavo yoku limbuka apika va Yehova. Vocitumasuku caye citiamela kesulilo lioluali, Yesu wa tukula ovina vialua vi situlula onepa eyi ndoloneke via sulako. (Tala Onepa ye 9.) Yimue ombandu yelondo yocitumasuku eci ya tukuiwa volondaka viaye, ko Mateo 24:14: “Kuenje ondaka eyi yiwa yusoma yi kundilua kuoha koluali, ha yi lingi uvangi kolofeka viosi, oco esuliloo liya noke.”
10 Tuasiata oku mõla oku tẽlisiwa kuocitumasuku eci? Tuasiata. Tunde eci oloneke via sulako via fetika ko 1914, Olombangi via Yehova vieya oku kunda olondaka viwa Viusoma wa Suku koluali luosi ndomo ca handelekiwa la Yesu, ndeci, kolonjo viomanu. (Mateo 10:7, 12; Ovilinga 20:20) Olohuluwa vi’Olombangi via Yehova, kolofeka viosi va nyula omanu oco va sapele lavo vitiamela koluali luokaliye. Oco ove wa tambuila okalivulu aka, mekonda upange w’Olombangi via Yehova mua kongela okuamula olohuluwa lolohuluwa vialivulu Kusoma wa Suku. Wa kũliha vakuavo va kunda Usoma wa Suku njo-lanjo, koluali luosi? Kuenda Marko 13:10 olekisa okuti upange owu woku kunda kuenda elongiso “te ondaka yiwa yi kundiwila olofeka viosi,” apa handi esulilo ka lieyile.
Etambululo Kocitangi Cinene Cavali
11. Cipi cilinga vali Olombangi via Yehova oku pokola kuviali wa Suku?
11 Oku pokola kovihandeleko kuenda kolonumbi via Suku, Olombangi via Yehova valinga vali cikuavo. Valekisa okuti Satana ohembi eci alinga hati omunu layumue oka koka ku Suku koku setekiwa, oku tambulula kocitangi cinene comanu citiamela kekolelo liomanu. (Yovi 2:1-5) Oku kala ohongele yolohuluwa viomanu, violofeka, viosi Olombangi via Yehova vililekisa, ndetimba limuamue, lepokolo kuviali wa Suku. Ndaño oco omanu ka va lipuile, va kakatela konele ya Suku kunene waye, mekonda liasipato usatana.
12. Vekolelo liavo, Olombangi va setukula elie?
12 Etali lilo, olohuluwa evi vi’Olombangi via Yehova vavokiya uvangi okuti owu wolombangi wapita cisule valekisa epokolo liavo ku Suku. Pokati kava pasangiwa Havele, Noha, Yovi, Avirahama, Sara, Isake, Yakoba, Devola, Ruti, Daviti kuenda Daniele, oku tukulako ño vamue. (Va Heveru, ocipama ce 11) Ndeci, ca popia Embimbiliya, ovo vakasi ndalimue ‘elende linene ndeli liolombangi.’ (Va Heveru 12:1) Ava lavakuavo, oku kongelamo olondonge via Yesu, va li lekasaile ndakoleli ku Suku. Kuenda Yesu yaco waeca olumapu lunene okukolela kualipua.
13. Olondaka vipi via Yesu citiamela ku Satana via sikulũiwa okuti viocili?
13 Eci ci ciseteka okuti ocili eci Yesu a popia citiamela ku Satana kasongui vatavo: “Cilo puãi vu sanda oku njipa, ame ndimunu nda popia lene ocili nda yeva ku Suku. . . . Wa tundi ku isiene eliapu, oco vu yonguila oku linga ocipango ca isiene. Eye omondi tunde kefetikilo, haeye ka la sumbila ocili momo vokati kaye ka muli ale ocili. Eci a popia uhembi o popia caye muẽle, momo eye ohembi, haeye isia yuhembi.” — Yoano 8:40, 44.
O Nolapo Nye?
14. Nye cikasi loku pita cilo lociseveto coluali luokaliye?
14 Ociseveto coluali luokaliye cina Suku akasi loku panga vohongele yolofeka k’Olombangi via Yehova handi cakoka vali. Kulima lulima, ovita violohuluwa viomanu va fufula elisanjo liavo, lia kunamela kukũlihiso wasuapo, oco va tave uviali wa Suku. Valinga onepa yohongele Yoluali luokaliye, vakuatisa onepa ya Suku kocitangi cunene kuenda va tenda Satana ndohembi.
15. Etepiso lipi likasi lokulinga Yesu koloneke vietu?
15 Okunola uviali wa Suku, valivetiya oku kapiwa “kondio” ya Kristu osimbu eye a tepa “olomeme lolohombo.” Vocitumasuku caye coloneke via sulako, Yesu wapopia: “Kuenje olofeka viosi vi kongelua kokuaye. Oco omanu vaco o va tepa pokati okuti va likaila, ndeci ungombo a tepa olomeme lolohombo. O kapa olomeme kondio, olohombo kepĩli.” Olomeme omanu vonjuka valikongela la vamanji ya Kristu, oku va iha ekuatiso liaye, kuenda oku pokola kuviali wa Suku. Olohombo omanu vamue imbuahuku va silula vamanji ya Kristu kuenda ka va lingi lacimue coku kuatisa usoma wa Suku. Lesulilo lia nye? Yesu hati: “Kuenje ava [olohombo] va enda keyambulo ka li pui, puãi vakuesunga [olomeme] va enda komuenyo ko pui.” — Mateo 25:31-46.
16. Osukila okulinga nye oco okale voluali luokaliye?
16 Ocili muele, Suku okuete ocikembe letu! Ndopo muele, eye okaeca ocumbo celau vongongo. Oyongola oku kala Voluali luelau omu? Nda oyongola, lekisa ombili yove kolonjongo via Yehova, oku lilongisa citiamela kokuaye kuenda okulinga cosi olilongisa. “Sandi Yehova osimbu a sangiwa, u kovongi osimbu a kasi ocipepi; ukuakulinga cĩvi a sie ocituwa caye, u ka lingi esunga a liweke ovisimĩlo viaye, a tiukile ku Yehova, kuenje u linga ohenda.” — Isaya 55:6, 7.
17. Momo nye kakuli otembo yi pumbiwa koku nola helie o vumbiwa?
17 Ka kuli otembo yi pumbiwa. Esulilo lioluali lulo luosimbu likasi ocipepi. Ondaka ya Suku yi lungula: “Ko ka soli oluali pamue ovina vi kasi voluali. Nda omunu o sole oluali, ocisola ca Isia ka ci kasi vutima waye. . . . Oluali lu takata loñeyi yaluo, puãi u o lingainga ocipango ca Suku o kala oloneke ka vi pui.” — 1 Yoano 2:15-17.
18. Oluhimo lupi o likisa luoku talamela lekolelo lioku kala veliwewo li’Oluali luokaliye lua Suku?
18 Owiñi wa Suku wukasi loku pokuisiwila kaliye komuenyo kopui voluali luokaliye. Vakasi loku kuata apondolo kespiritu kuenda akuavo kokuamasako kualumue oluali luokaliye. Tu ku vetiya okuti nola Suku ndombiali kuenda kuatisa upange woku yovola omuenyo una eye akasi lokulinga etali kongongo yosi. Lilongisa Embimbiliya l’Olombangi via Yehova, kuenda pitila koku kũliha o Suku yikuete ocikembe love yina okuti yika mala okupukuapukua. Lonjila ndoyo, ovevo oka pongoloka oku panga onepa yociseveto c’Oluali luokaliye. Oka pondola yapa oku talamẽla lekolelo okusanga ohenda ya Suku kuenda oku ka kala muenda ño hũ muna veliwewo v’Oluali luokaliye.
[Apulilo Elilongiso]
[Elomboluilo kemẽla 31]
Olombangi via Yehova vakasi vepuiti liocisola cimue cokolofeka viosi
[Elomboluilo kemẽla 32]
Ociseveto coluali luokaliye lua Suku cikasi ale loku tumbikiwa
