Onepa ye 10

Oluali Lumue Luokaliye lu Komohisa Lua Lulikiwa la Suku

1, 2. Nye ci ka pita cina okuti uyaki wo Armagedo wakomba ekalo eli?

 NOKE cina okuti Suku wa komba ekalo eli kuyaki wo Armagedo, ci ka kala ndati? Kuka fetika umue ulamba wekalo. Olosupuluke vio ko Armagedo, loseteko yavo ale kuviali wa Suku, vaiñila Voluali luokaliye. Lisanjuisa ekalo liaco Liocisipuluilo, liaco eli lika kala osimbu konepa ya Suku ku liongoluila ovikomo viasumũlũho kepata liomanu!

 ² Lonumbi Yusoma wa Suku, olosupuluke va ka fetika okutandisa oluali luelau. Vaka linga lupami wavo kovopange wundingaewa una wuka sumũlũisa vosi va ka kalamo. Ongongo yika pongoluiwa vocitumãlo cimue combembua kuenda cesanju komanu.

Esunga Pocitumãlo Cevĩho

3. Elisanjo lipi lionjanga lika yeviwa noke yo Armage⁠do?

³ Cosi eci cika ponduiwa lenyõleho lioluali lua Satana. Ka kuka kala vali okulitepa kolohuela, akalo olohongele ale olombiali. Ka kuka kala vali apepisandaka usatana oku kemba omanu; asapulo osi atundako aka sukoka kumue lekalo lia Satana. Sokolola: ofela yosi yikuete inenu violuali lua Satana yi ka pekuiwako! Helisanjokuolio lika kala!

4. Lombolola epongoloko lika kala kelongiso.

⁴ Ovisimilo viuviali womunu viokunyõla vika piñaliwa lelongiso li kolisa litunda ku Suku. “Omãla vove vosi va longisiwa la Yehova.” (Isaya 54:13) Lelongiso liaco lia lianja, ulima lulima, “kilu lieve ku yuka ukũlĩhĩso wa Yehova ndeci ovava e yuka vokalunga.” (Isaya 11:9) Omanu ka va ka lilongisa vali eci cĩvi, pole “oco olonungi viovoluali vi lilongisa esunga.” (Isaya 26:9) Ovisimilo kuenda ovilinga vi kolisa vika kala ocihandeleko ceteke keteke. — Ovilinga 17:31; Va Filipoi 4:8.

5. Nye ci ka pita levĩho liosi kuenda lomanu vãvi?

⁵ Kuenje, kaku ka kala vali oku pondiwa, evĩho, aku tuiyila olonjo, ndaño akandu amue añi. Layumue oka tala ohali mekonda lialinga ãvi akuavo. Olosapo 10:30 viti: “Vakuesunga ka va sondoloka vali, olondingaĩvi puãi ka vi tumãla vofeka.”

Wa Tumbuluiwa Uhayele Walipua

6, 7. (a) Ocili cipi catĩla voluali Usoma wuka sulisa? (b) Ndamupi Yesu a ci lekisa eci a kala vongongo?

⁶ Voluali luokaliye, muka kala epongoluiso lielinga liusuanji wosiahũlu. Ndeci, uviali Wusoma wu ka mãla uvei kuenda ukuke. Etaili, ndaño oco omunu oliyevite hise kuhayele, ocili ceci okuti, osimbu akuka, iso liaye liwuvala, ovayo aye asokoka, olinga ocisitatuĩ, ekova liaye litaka ovanya, ovimatamata viaye vi sipalala toke eci etimba li fa.

⁷ Noke, otulongembia otu tuesumuo tua piñala kuvaisia yetu vatete ndopo ka ka linga ovina via pita. Sokolola okuti Yesu wa lekisa citiamela kuhayele eci akala Vongongo? Liti Embimbiliya: “Omanu va lua veya kokuaye. Va nena ovilema lava va lemehua, lolomeke, lovitende, la va lua vakuavo. Va va tulila posi kolomãi viaye yu wa va sakula. Oco eci omanu va mola ovitende vi popia, lava va lemehua va sakuiwa, lovilema vi enda, kuenda olomeke vi lete.” — Mateo 15:30, 31.

8, 9. Lombolola epuiti lika kala Voluali luokaliye eci ku tumbuluiwa uhayele walipua.

 ⁸ Hepuitikuolio li ka kala oluali luokaliye eci akupukuapukua etu a ka maliwako! Ohali yituñunya uhayele ũvi lalimue vali eteke vi ka tu kangisa. “Layimue onungi yi popia yiti, Ndi vela.” “Oco ovaso olomeke a patuluka kuenda ovatuĩ ovisitatuĩ a situluka. Oco ocilema ci somboka ndosonge. Kuenda elimi liocitende limba ocisungo.” — Isaya 33:24; 35:5, 6.

⁹ Ka ci ka kala esanju okupasuka mẽle la mẽle loku limbuka okuti okasi luhayele wa pama? Ka ci kaeca onima kakulu oku limbuka okuti olohõlo viavo viovokuenje via tumbuluiwa loku pitila poku lipua ketimba lokovisimilo kuna Adama la Heva kosiahũlu va kale lako? Ohuminyo y’Embimbiliya yeyi: “Etimba liaye li tumbuluke vali, li kuate ongusu ndeyi yovutila.” (Yovi 33:⁠25) Heliwewoko lika kala oku inasi olowokolo, evi vioku yevisa, olomuleta, oloteyo viovilema lovihemba! Lalimue vali eteke ku sukiliwa olosipitali, olondotolo kuenda vakuakutukũla ombandu.

10. Nye ci ka pita lokufa?

¹⁰ Omanu va kasi lelisanjo liuhayele ka va ka yongola oku fa. Ndaño oku sukila, mekonda omanu ka va ka kala vali vekandu kuenda okufa via piñaliwa. “Kristu o viala toke a kapa ovanyali vaye vosi vemẽhi liolomãi viaye. Unyali o sulako oku imuha Kufa.” “Ocali ca eciwa la Suku oco omuenyo ko pui.”​—⁠1 Va Korindo 15:25, 26; Va Roma 6:23; talavo Isaya 25:⁠8.

11. Ndamupi Esituluilo li tukola asumũlũho o Voluali luokaliye?

¹¹ Oku tukola asumũlũho ana Suku okuete ocikembe letu akavela epata liomanu Voluali luelau, elivulu liasulako li’Embimbiliya liti: “Eye [Suku] o puenya asuelela osi kovaso avo. Okufa ka ku kalako vali, ndaño oku lila loku liyula lupongo laviovo ka vi kalako vali. Momo ovina viatete via pita.” — Esituluilo 21:3, 4.

Okutiuka kuava Vafa

12. Ndamupi Yesu a lekisa epondolo lina Suku o wiha lioku pindula?

¹² Yesu wa linga vali hakukayisako lika loku lemulula ovilema. Eye wa tiulavo omuenyo komanu vana vafa vakala vonjembo. Wa lekisa ndoco ocikomo cepinduko cina Suku o wihile. O sokolola okatembo kana Yesu aenda konjo yulume umue una omõlaye wa file? Yesu wa popia ku kafeko wafa: “Ofeko, hu sapuila siti, Pasuka.” Lesupuluko lia nye? “Haico ufeko a votoka, kuenje enda.” “Kuenje va saluka okusaluka kua lua.” Ka ca tavele esanju liaye okuliuhila! — Marko 5:41, 42; talavo Luka 7:11-16; Yoano 11:​1-45.

13. Omanu vapi va ka pinduiwa?

 ¹³ Voluali luokaliye, citava “okuti kuli epinduko lia vakuesunga lava havakuesungako.” (Ovilinga 24:⁠15) Kotembo yaco, Yesu oka fufula unene una Suku o wiha woku pindula ava vafa, ndomo, eye a popia: “Ame ndipinduko haime ndimuenyo. U o ñolela, ndaño o fa, haimo o kala vali lomuenyo.” (Yoano 11:⁠25) Eye wa popiavo: “Vosi va kasi vayambo [vonjivaluko ya Suku] va yeva ondaka yaye, [ya Yesu] yu va tundamo.” — Yoano 5:28, 29.

14. Okumõla okuti olofa kavi ka kalako vali, nye ci ka pita olumue?

¹⁴ Esanju li ka piãla Kongongo yosi eci owiñi lowiñi womanu vakuakuenda vatiuka lomuenyo oco va likongele kuvakuavo! Kaku ka kala vali atosi olonambi loku nena esumuo kolosupuluke. Puãi, handi: atosi ava va pinduiwa kesanju lia vana va va solale. Omo liaco, upange wolombila wu ka pua, latiko, kuenda ovilangu!

Oluali Lumue Muele Luombembua

15. Ndamupi cika tẽlisua kombangulo vali yamiuha vowanji wa Mika?

¹⁵ Ombembua yocili yika tẽliwa kovolilo osi omuenyo. Ovoyaki, vakuakukoka ovoyaki lokupanga ovita vika kala ovina viapita. Momo nye? Mekonda liakulitepa kuolonjongole violofeka, kuapata lakova. Kotembo yaco, kombangulo yamiuha, “ofeka ka yi tikuila vali ofeka yikuavo osipata, ka va lilongisa vali ovita.” — Mika 4:⁠3.

16. Ndamupi Suku a ka lava okuti kaci ka tava vali okulinga ovoyaki?

¹⁶ Eci cimõleha ndu ci saluisa mekonda liosonde yesapulo liomanu voku tuamelẽla kuovoyaki. Pole eci ci lingiwa mekonda omanu va siata oku kala vupika wolombiali lolo-demónio. Voluali luokaliye, vo ku tetuluiwa ku Usoma, tala ci ka pita: “Enjui, ndo tali ovilinga via Yehova, . . . Imola ovita toke kesukiyo liongongo. O teya ohonji. O teta pokati onjelia. O yoka akãlu [vuyaki] vondalu.”​—⁠Osamo 46:8, 9.

17, 18. Voluali luokaliye, etokekiso lipi lika kala pokati komunu lovinyama?

 ¹⁷ Kuka kalavo ombembua pokati komunu locinyama, ndeci kuakala ve Edene. (Efetikilo 1:28; 2:⁠19) Suku wapopia: “Eteke liaco hu inãlĩsa lovinyama viovusenge lolonjila viovilu kuenda evi vi yaila posi. . . . Hu tumãlĩsa ciwa oko kua koka.” — Hosea 2:⁠18.

¹⁸ Ombembua yi ka kala yalua? “Ombinji yi tunga pamamue lomõla omeme, kuenda ongue yi lala lala lomõla ohombo; onãle leyove liohosi vi endela pamuamue, kuenje okamõla ka vi songuila.” Ovinyama kavi ka lingisa vali usumba omunu ale vimue lavikuavo. Toke muele “lohosi yi lia lia owangu ndongombe.” — Isaya 11:6-9; 65:⁠25.

Ongongo Yapongoluiwa mumue Voluali Luelau

19. Ongongo yi ka pongoluiwa ndamupi?

¹⁹ Ongongo yosi yika pongoluiwa mumue voluali luelau komanu. Oco Yesu a ponduila oku likuminya kulume umue wo kolela: “O kala kumue lame vofeka.” Embimbiliya liti: “Ekalasoko lofeka ya kukuta vi sanjuka, ekango li yolela, kuenje li telẽha ndelosa; . . . Momo vekalasoko mu tunda ovava kuenda vekango olondui.” ​— Luka 23:43; Isaya 35:⁠1, 6.

20. Momo nye omanu ka va ka lambuka vali onjala?

²⁰ Vu Usoma wa Suku, olohũlũkãi viomanu kavi ka lambuka vali. “Vofeka mu kale olomema via lua. Vi hunge hunge kilu liolomunda.” “Oviti viusenge vi eca apako avio, losi yeca ovaima ayo. Vi koka vofeka yavio.” — Osamo 72:16; Esekiele 34:⁠27.

21. Nye ci ka pita lakutungayala, akambo kuenda olosanjala vi yuvuiwa?

 ²¹ Kaku ka kala vali usuke, omanu oku tungayala, ndaño olosanjala vimulunjo mekonda lievĩho. “Va tunga olonjo kuenje va kalamo; va kũla oviumbo viayuva kuenje va lia epako liavio. Ka va tungi okuti umue wiñi o kalamo. Ka va kũli okuti umue wiñi o liako.” “Puãi vosi va tumãla, omunu omunu vemi liuyuva waye, pamue vemi liukuyu waye, kuenje lomue o va lingisa usumba.” — Isaya 65:21, 22; Mika 4:⁠4.

22. Embimbiliya lilombolola ndati asumũlũho wuviali wa Suku?

²² Omanu va ka sumũlũisiwa la viosi evi kuenda vialua vali Voluali luelau. Osamo 145:16 viti: “[Suku] o nyanyumula eka liove, kuenje o kutisa viosi vi kasi lomuenyo.” Hacoku komohako okuti owanji w’Embimbiliya wu okulombolola: “Ambombe puãi va piñala ofeka, kuenje va sanjukila okusalala kualua. Olondingesunga vi piñala ofeka, vi tungamo oloneke ka vi pui.” — Osamo 37:11, 29.

Osimbu Yalombokiwa

23. Lonjila ye Usoma wa Suku wu ka lomboka ohali yosi tutala ndeti?

²³ Uviali Wusoma wa Suku wuka lomboka evĩho liosi lineniwa kepata liomanu voku sula kuolohulũkãi epandu lianyamo. Asanju o kotembo yaco a ka kandela olohali viosi vina omanu va talele. Omuenyo ka u ka sakalaisua loku sokolola evi visumuisa lolohali viosimbu. Ovisimilo kuenda ovopange akolisa eteke lateke o-o a ka mãla oku sokolola ikumbiti.

24, 25. (a) Nye ca popele Isaya? (b) Momo nye tu ci kolela okuti ovina viale viohali yapita vi ka imuiwa?

²⁴ O Suku ukuacikembe o tondongola: “Tala, ndulika ilu liokaliye [uviali umue wokilu womanu] kuenda ongongo yokaliye [ohongele yomanu vakuesunga]; ovina viale ka vi ivalukiwa, ka vi sokoluiwa. Puãi yoleli, sanjukili ño-o hũ ovina nda lulika.” “Oluali luosi lua puyuka, kuenje lua talala; va imba ovisungo.” — Isaya 14:7; 65:17, 18.

 ²⁵ Kovaso yaco, Vusoma waye, Suku oka yengulula muele pe ekalo lĩvi lia tumala otembo yalua. Kolonahũlũlua kuosi eye o ka lekisa unene wonjongole yaye kokuetu, okupaila asumũlũho o kaeca onima kohali tuatala kotembo yapita. Akutĩlamuenyo ale tuakala lao aka pongoluiwa vasokoluilo alela, mbi nda tu ka sokolola vali.

26. Mekonda lie Suku oka tuavela kohali yosi tuatala osimbu?

²⁶ Omo Suku aka tu ihila omo ongavelo kohali eyi tu li loku tala voluali omu. Eye wa kũliha okuti ka ca kaile kekandu lietu oku citiwa ndavamue ka va lipuile, momo tua piñala ekandu kuvaisia yetu vatete. Ka tua ci pangele oku citiwila voluali lumue luasatana, momo, nda Adama la Heva va pokuile, etu nda tua citiwila mumue velau. Kaliye, locinguva calua, Suku o kaeca vali enene oku fetuluinya osimbu tua pita.

27. Ovitumasuku vipi vi ka kuata etẽliso li komohisa voluali luokaliye?

²⁷ Voluali luokaliye, omanu va ka liwewa lelisanjo lia popiwa ko Va Roma 8:21, 22: “Eteke limue ovina via lulikiwa vi panduluiwa kupika wenyõleho ha vi moli eyovo liulamba womãla va Suku. Momo tua kũlĩha okuti, toke cilo, ovina viosi via lulikiwa vi yavalela kumuamue olongembia vioku cita.” Omanu va ka mõla okutẽlisiwa kuohuminyo yohutililo: “Usoma wove wiye. Ocipango cove ci lingiwe posi ndeci ci lingiwa kilu.” (Mateo 6:⁠10) Akalo akomõhisa Vongongo yelau aka linãla lakalo okilu.

[Apulilo Elilongiso]

[Elomboluilo kemẽla 23]

Voluali luokaliye, olosekulu vika kala vali akuenje

[Elomboluilo kemẽla 24]

Ovovei osi lovolema voluali luokaliye aka kunduiwa

[Elomboluilo kemẽla 25]

Voluali luokaliye, ava vafa va ka pinduiwa

[Elomboluilo kemẽla 26]

‘Ka va ka lilongisa vali ovita’

[Elomboluilo kemẽla 27]

Omanu lovinyama va ka kala lombembua Vocumbo

[Elomboluilo kemẽla 27]

‘Suku o ka nyanyumula eka liaye kuenje o kutisa viosi vi kasi lomuenyo’

[Elomboluilo kemẽla 28]

Usoma wa Suku wu kaeca vali eliwewo kolohali viosi tua pita lavio