Ongongo Yimue Yalipua Vohali
Onepa ya 2
Ongongo Yimue Yalipua Vohali
1, 2. Cipi ocisimilo ca litepa cikuete omanu?
POLE, olohuluwa viomanu voluali luosi va kuete ocisimilo cimue ciliñi. Va pañinya elavoko limue liwa kawiñi. Va popia veti palo muele posi pa ka kala ndopo eci oluali lumue ka lukuata evĩho ndaño ohali. Va kolela eci okuti ũvi ndopo eci wimuha, kuenda kuiya oluali lumue luokaliye. Va popia muele vati ociseveto coluali luaco ca kapiwa ale!
2 Omanu ava va tava okuti oluali luokaliye ka luka kuata uyaki, ungangala, ũvi, oku puiya kuenda uhukuĩ. Lu ka kala oluali lumue ka muli uvei, enyumalo, asuelela kuenda ndaño olofa sio. Votembo yaco, omanu va ka lipua kuenda va ka kala hũ lomuenyo wesanju, vocumbo cimue celau. Kuenje, ava vafa va ka pinduiwa kuenda va ka kuata epuluvi lioku kala hũ lomuenyo!
3, 4. Nye omanu ava vakolelela ovisimilo viavo?
3 Anga ocisimilo catiama kelavoko eli yimue onjoyi, uhembi? Sio, hacoko. Ca sevetiwa vekolelo liocili liakunamela velavoko liokuti lomue o tateka Ocumbo eci celau. (Va Heveru 11:1) Nye hẽ va ci kolelela? Momo ukuepondolo liosi Ndulike yoluali waci likuminya.
4 Citiamela kolohuminyo via Suku, Embimbiliya liti: “Polondaka viosi viwa Yehova Suku yene o popeleli, layimue ya kambapo. Viosi muele vio suisiluipo. Layimue ya kambapo.” “Suku hamunuko okuti o kemba, . . . Eci a popia ka ci lingi hẽ? Ondaka a popia ka yi lemũlũla hẽ?” “Yehova Ukualohoka wa lisila hati, Ocili ndeci nda sima haico ci lingiwa, ndeci nda panga haico ci kala.” — Yehosua 23:14; Atendelo 23:19; Isaya 14:24.
5. Apulilo api asukila oku tambuluiwa?
5 Puãi, nda Suku wa yonguile oku sovola ocumbo celau, lohali sio, nye aecelela okuti ovina vĩvi vikala? Nye a kevelila olohũlũkãi epandu kanyamo poku tangulula eci canyoleha? Anyamo a ka lekisa okuti Suku ka tu sole, ale muele okuti ka kasiko?
[Apulilo Elilongiso]
