Onepa ya 4

Suku Otu Lomboluila Citiamela Kovipango Viaye

1, 2. Ndamupi tua kũliha okuti Suku eca atambululo kuvana vapula?

 UMUE Suku yocisola ocili o situluila ovipango viaye kuvana vosanda locili. Komanu vakuakupula eye o tambulula apulilo ndeci momo nye eye asiatela oku ecelela ohali.

² Liti Embimbiliya: “Nda . . . u sanda, [Suku] eye o tava oku sangiwa love.” “Kilu kuli Suku ukuakusitulula alumbu.” “Ocili, Ñala Yehova ka lingi cimue te tete o situlula ocisimĩlo caye kovakuenje vaye ovaprofeto.”​— 1 Asapulo 28:9; Daniele 2:28; Amosi 3:7.

Atambululo Akasi Pi?

3. Mupi tu pondola oku sanga atambululo ndakuti momo nye Suku aecelela ohali?

³ Atambululo kapulilo ndeci momo nye Suku aecelela ohali kuenda nye a ka linga konepa yaco, asiñiwa kocisonehua cina eye a fuimila kesumũlũho lietu. Ocisonehua eci Ondaka yaye, Embimbiliya Li Kola. “Ovisonehua vi kola viosi ovitumasuku, kuenje vi silivila oku longisa, loku lungula, loku pindisa, loku ikisa esunga, okuti omunu wa Suku o loñoloha, haeye angiliyiwila ovopange osi awa.” — 2 Timoteo 3:16, 17.

4, 5. Nye ci lingisa okuti Embimbiliya ka lilisoki lelivulu likuavo?

⁴ Embimbiliya elivulu limue okuti ka li setekiwa. Mu siñiwa vali cavelapo ocisonehua cocisipuluilo comanu, kuenda litukola toke muele kotembo apa handi omanu ka va lulikiwile. Haliovo elivulu liacilo, mekonda ovitumasuku vialio vikueteko cimue lotembo yetu kuenda kovaso ocipepi.

⁵ Kakuli vali elivulu likuavo musangiwa ovindekaise viokusuapo kuocisipuluilo. Ndeci, kuli ño vimue viatayiwa viasonehi vosimbu. Pole kuli atayiwo alua ve Embimbiliya, amue konepa amue asuapo: cisoka 6 000 k’Ovisonehua via Helasi (kuenda cisoka 39 kalivulu “Otestamento Yale”) kuenda cisoka 13 000 li’Ovisonehua vi’Ovakristão va Heveru (27 kalivulu “Otestamento Yokaliye”).

6. Momo nye tu kuatela ekolelo liokuti Embimbiliya etali lia sevetiwa kumuamue la kuna cakala eci Suku a li fuimĩla?

⁶ Suku Ukuonene-Wosi, wa fuimĩla Embimbiliya, wa lava okuti epanamãlo lialio liovinimbu liangiliyiwa vovisonehua omu viatayiwa. Kovaso yaco, Ambimbiliya etu etali asilivila hao amuamue kovisonehua viosiahũlu via fuimĩlua. Onjila yikuavo yitu kuatisa oku pongolola eci yeyi okuti ovisonehua vimue viatayiwa vi’Ovisonehua Viovakristão va Heveru viataya ondata cisoka ocita canyamo noke yocisonehua cosiahũlũ. Ovisonehua visulemo viatayiwa handi vikasi viasonehi vosimbu vokosamua olonjanja vitito viasia olotembo viovita noke yavina viatete osiahũlũ.

Ongavelo ya Suku

7. Okutanda kupi kuasãlehiwa Embimbiliya?

⁷ Embimbiliya olio elivulu lia sandekiwa vali Kesapulo. Cisoka olohuluwa violohuluwa vitatu yovindekaise viapangiwa. Kapali elivulu likuavo lia pitila petosi apa. Kuenda Embimbiliya ale olonepa vikuavo via pongoluisua kueci cisoka 2 000 kalimi. Kaliye, oku ci tukula 98 katosi awiñi olungunge luetu nda atotola k‘Embimbiliya.

8-10. Olonjila vipi vimue koviavio Embimbiliya lisesamela oku kũlĩhisiwa?

 ⁸ Ocili elivulu limue litunda ku Suku kuenda likuete oloseteko viokosamua lovokati kutukulatembo lisesamela oku kũlihisiwa. a Elivulu eli lilombolola onjongole yipi yomuenyo, elomboloko liakalo oluali kuenda nye ci ka pita kovaso. Lalimue elivulu lilinga ndoco.

⁹ Ocili, Embimbiliya osapelo ya Suku lepata liomanu. Eye wa lekisa ocisonehua ce Embimbiliya oku ci lingila vongusu Yaye yapama, ale espiritu, la kumuamue cisoka 40 kalume. Oco, Suku olivanguila letu Vondaka yaye, Embimbiliya Li Kola. Upostolo Paulu wa soneha: “Eci wa tambuli ondaka ya Suku, yina wa yevi kokuetu, wa yi tambuli ndomo yi kasi ocili okuti, handaka yomanuko, puãi ondaka ya Suku.” — 1 Va Tesalonike 2:⁠13.

¹⁰ Abraão Lincoln, osongui ye 16.° ko Estados Unidos, wa tukula Embimbiliya “ndocali ca velapo Suku aeca ale komunu . . . Nda ka lia kalepo, nda ka tu tepisa eci ciwa kueci cĩvi.” Nda oco, o nye ci tu lomboluila ongavelo eyi ndeci ndamupi ohali ya fetika, momo nye Suku aecelela ohali kuenda nye eye a ka linga yapa?

[Atosi]

[Apulilo Elilongiso]

[Elomboluilo kemẽla 10]

Embimbiliya, lia fuimilua la Suku, omo a lisapelela lepata liomanu