Tua Kũliha Ndati Okuti Tukasi “Koloneke Via Sulako”
Onepa ye 9
Tua Kũliha Ndati Okuti Tukasi “Koloneke Via Sulako”
1, 2. Tu kũliha ndati okuti tukasi koloneke via sulako?
TUKUATA ndati ekolelo okuti tukasi votembo yina Usoma wa Suku uka tangulukilamo ekalo liacilo liuviali womunu? Tua kũliha ndati okuti tukasi muẽle ocipepi lotembo okuti Suku oka kapa esulilo liũvi wosi lohali?
2 Olondonge via Yesu Kristu via yonguile oku kũliha ovina evi. Vopulisa yipi ya yikala “ondimbukiso” yokuiya Kuaye vunene Wusoma “Londimbukiso yesulilo lioluali ye.” (Mateo 24:3) Yesu wa tambulula loku lombolola olondimbukiso lekalo lioku tuñunya oluali, nda u litokeka oco ci lekise okuti omanu vañila “kotembo yesulilo,” “koloneke via sulako” violuali lulo. (Daniele 11:40; 2 Timoteo 3:1) Tusole oku mõla vohulũkãi eyi yalima ondimbukiso eyi ya litenga? Oco, tusole oku mõla, kuenda calua muẽle!
Ovoyaki Oluali
3, 4. Ndati ovoyaki vocita cilo akapiwa vawanji a Yesu?
3 Yesu wa ci popia okuti ‘ofeka ya yi katukila ofeka yikuavo lusoma u katukila ukuavo.’ (Mateo 24:7) Ko 1914, oluali lualitenga vovota akuti ceya oku tumila olofeka lolosoma vonepa yimue yiñi ka yilisoki leyi ya tete. Loku limbuka eci, vakuakueca asapulo votembo yina va yitukula okuti Uyaki Unene. Wa kala uyaki watete vonepa eyi vesapulo, uyaki watete woluali. Ca soka 20 000 000 kasualali lawiñi va nyelisa omuenyo, capiãla vali hambi ovoyaki akuavo konyima.
4 Uyaki Watete Woluali wa kapa ondimbukiso yoloneke via sulako. Yesu wa popia heti ocikomo eci levi vikuavo nda vi kala “efetikilo ño liolongembia.” (Mateo 24:8) Oco ca lingiwa, omo liaco Uyaki Wavali Woluali wa kala vali handi wolofa ci soka 50 000 000 kasualali lomanu va pondiwa. Vocita cilo ca 20, ci pitahãla vali 100 000 000 komanu vapondiwa vovoyaki, ci supa vali olonjanja vi kuãla etendelo liava vafa vo 400 kalima a kuamamo! Hepisokuolio liuviali womanu!
Olondimbukiso Vikuavo
5-7. Vipi olondimbukiso vikuavo kuli ndakuti tukasi koloneke via sulako?
5 Yesu wa kongela ovina vikuavo nda ya vikuama oloneke via sulako: “Ku kala ovilemawe vinene. Kolonele vimue ku kala onjala lefengi [ovikulia].” (Luka 21:11) Eci cikapiwa ciwa vovikomo tunde ko 1914, momo ku sole oku kala evokiyo linene lietokoteluo omo liovilinga evi.
6 Ovilemawe vinene vikasi loku pita olonjanja vialua okuti vi teya ovimuenyo vialua. Ocisinda lutue ca ponda eci ci soka 20 000 000 komanu eci Uyaki Watete Woluali luosi — wa pita esokiso limue lietendelo lia 30 000 000 ale liapitahãla vali. Ndeci o AIDS yisole okupa omuenyo wovita violohulũkãi viomanu, kuenje uka ponda olohũlũkãi vikuavo votembo yikeya. Vulima lulima, olohũlũkãi vi fa lovoveyi utima, londendo kuenda ovoveyi akuavo. Olohũlũkãi vikuavo vikuete olofa vievando vitunda kehonguo. Ka cikuete etatahãi lalimue, ava ‘vaendela kolokavalu vie Esituluilo,’ lovita viavo, ekambo liokulia lovoveyi, akasi loku ponda etendelo linene liomanu pokati kepata liomanu tunde ko 1914.—Esituluilo 6:3-8.
7 Yesu wa lombololavo evokiyo liakandu, eci ci pita volofeka viosi. Eye heti: “Omo eviho li lua, oco ocisola comanu va lua ci pola.”—Mateo 24:12.
8. Ndati okuti owanji ko 2 Timoteo, kocipama ca 3, wusangiwa voloneke vietu?
8 Konyima yeci, owanji we Embimbiliya wa lombolola oku kupuka kuesunguluko, li moleha etali voluali luosi: “Koloneke via sulako kuiya otembo yohali. Momo omanu va linga vakuakulisola, vakuakusola olombongo, vakuakulipandiya, vakueyengu, vakuakatombangunja, haivo va siñaila olonjali viavo, vakualutukãi, ka va kuete efendelo, ka va kuete ocikembe la vangandiavo. Va linga vakuamanya, vakualundi, haivo ka va tẽla oku likandangiya, va linga olongangala, ka va sole eci ciwa, haivo olomakuli, vakuacipango, vakuepela, vakuakusola ca lua esanju, Suku ci sule. Va limolehisa nda vakuekolelo lioku kolela Suku, puãi valikala unene walio. . . . omanu vãvi lolohembi vamamako loku linga cĩvi.” (2 Timoteo 3:1-13) Cosi eci cisole oku muiwa lovaso etu muẽle.
Handi Ono Yikuavo
9. Nye ca pita kilu, ca litokekela lefetikilo lioloneke via sulako vongongo?
9 Kuli handi ono yikuavo ya songola evokiyo liohali vohũlũkãi eyi. Lelitokekelo liefetikilo lioloneke via sulako ko 1914, kua kala ocina cimue ca kapa omanu vohele handi yinene. Kotembo yina, ndomo owanji umue ulombolola kelivulu lia sulako lie Embimbiliya: “Kuenje kilu kueya ovita. Mingeli [Kristu vunene kovailu] lovangelo vaye va liyaka locinyõha [Satana]. Ocinyoha lovangelo vaco [olo-demónio] va tamalala, puãi va yuliwa, lapa va kala vali kilu ka pa molehele. Kuenje ocinyoha caco cinene ca takumuiwa, haico onyoha yosiahũlu, yina ya tukuiwa eliapu, haeye Satana, una endaenda oku kemba oluali luosi, haeye wa imbiwa kilu lieve, lovangelo vaye va imbiwa kumosi laye.” — Esituluilo 12:7-9.
10, 11. Nye lia nena komanu elundulo lia Satana, kuenda olo-demónio viaye Voluali?
10 Olohali vipi vieyilila kepata liomanu? Ocitumasuku camamako: “Puãi ove a ngongo, love a kalunga, ngongo yene! Momo eliapu lia lokila kokuene lonyeño ya lua, omo lia limbuka okuti oloneke vialio vitito.” Oco, Satana wa kũliha okuti ekalo liaye likasi ocipepi lesulilo, lonjila eyi okuti olinga cosi atẽla oco omanu va ñualelepo Suku apa handi eye loluali luaye ka va malusuiwile. (Esituluilo 12:12; 20:1-3) Vakamba olondunge oviluvo evi viespiritu mekonda ka va fufuile elisanjo liavo! Hakutĩlako casiata akalo vongongo mekonda liungangala wavo, capiãla enene tunde ko 1914!
11 Hacokutatãlako eci Yesu a popele citiamẽla koloneke vietu: “Kilu lieve ku kala upongo wolofeka via tangelekua . . . omanu va ambuka longuele yovina vi laika oku iya kilu lieve.” — Luka 21:25, 26.
Esulilo Liuviali Womunu Walitenga Lolo-demónio Likasi Ocipepi
12. Povitumasuku viasulako cipi ci tẽlisiwa apa handi esulilo liekalo lilo ka lieyile?
12 Ovitumasuku vie Embimbiliya viñami viakambako oku tẽlisiwa oco Suku a lundule ekalo liacilo? Oco vitito! Limue po viasulako 1 Va Tesalonike 5:3, hati: “Eci omanu va kasi loku linga vati, Tua kolapo, tu kasi lombembua, oco okunyõleha ocipikipiki kuiya kokuavo.” Eci ci lekisa okuti esulilo liekalo lifetika “eci omanu va kasi loku linga vati.” Ka lia muiwa loluali, enyõleho liya eci li talamelua citito, osimbu eluluvalo liomanu likasi koku talamẽla ombembua loku koka kuavo.
13, 14. Otembo yipi ya popele Yesu, kuenda ndamupi nda yi ka pua?
13 Yi kotoka otembo yoluali lulo luafuimiwa la Satana. Ndopo li pitilapo esulilo liaye votembo olohali vina Yesu a popia: “Momo koloneke viaco ku kala ohali ya lua, yimue ya linga ndoyo ka ya leya tunde kefetikilo lioluali toke cilo, kuenje ka yiya vali.” — Mateo 24:21.
14 Okusula ‘kuohali ya piãla’ cika kala ko Armagedo, kuyaki wa Suku. Eyi oyo otembo uprofeto Daniele, akala loku tukola, muna usoma wa Suku “u nyõla loku lia ovosoma aco osi.” Eci ci lomboloka esulilo liakalo a osi omanu valitepa ku Suku. Usoma waye, ndono kilu, u ka tetulula ovitangi viosi viomanu. Ndomo ca popiwa la Daniele, lalimue vali eteke, uviali “u tambuiwa lomanu vofeka yiñi.” — Daniele 2:44; Esituluilo 16:14-16.
15. Nye ci ka pita lesukilisamuenyo lia Satana leli liolo-demónio viaye?
15 Kotembo yaco, ku ka imuiwavo esukilisamuenyo lia Satana leli liolo-demónio. Oviluvo viaco viaspiritu ovisuanji vi ka maliwako, lonjila eyi okuti ka va ka “kemba oluali luosi.” (Esituluilo 12:9; 20:1-3) Vayambuiwa lolofa kuenda va talamela enyõleho. Helisanjokuolio lika kala kepanduluko liusukilamuenyo waye!
Helie Oka Supuluka? Helie Sio?
16-18. Helie o ka supuluka kesulilo liekalo eli kuenda helie ka ka supuluka?
16 Eci asombiso a Suku alingiwa oku ñualelapo oluali olu, helie oka supuluka? Helie ka ka supuluka? Embimbiliya li lekisa okuti ava va yongola uviali wa Suku va ka popeliwa kuenda va ka puluka. Ava ka va yongola uviali wa Suku ka va ka popeliwa, puãi va ka nyoliwa kumue loluali lua Satana.
17 Olosapo 2:21, 22 hati: “Momo vakuesunga va tunga vofeka, Vakuacili va tumalamo. Vakuakandu puãi va tundisua vofeka, kuenda vakuosuanji va veyuiwamo.”
18 Osamo 37:10, 11 laliovo liti: “Okasimbu kaño handi kuenje ondingaĩvi ka yi kalapo. . . . Ambombe puãi va piñala ofeka, kuenje va sanjukila okusalala kualua.” Ocinimbu 29 civokiyako: “Olondingesunga vi piñala ofeka, vi tungamo oloneke ka vi pui.”
19. Evetiyo lipi tu sukila okuambata locili?
19 Tuambati locili evetiyo lio Osamo 37:34, liapopia liti: “Imba ovaso Yehova, endela vonjila yaye, kuenje o ku kemalisa hu piñala ofeka. O mõla muẽle okunyõleha kuondingaĩvi.” Ovinimbu 37 la 38 hativo: “Limbuka omunu wa pua eko, ndomo a kasi, tala u wa sunguluka, momo omunu ukuambembua o mõla ovitumbulukila. Olondingakandu vi nyõliwa olumue, lovitumbulukila vi va kuãi vi takata.”
20. Momo nye tuponduila oku popia okuti tukasi kotembo yesanju?
20 Helembelekokuolio, ocili, oku kũliha okuti Suku ukuacikembe letu ndakuti ndopo oka mala evĩho liosi lohali! Ci sanjuisa oku kuata elomboloko okuti kua kamba ño okatembo ka tito oco ovitumasuku evi viulamba vitẽlisiwe!
[Apulilo Elilongiso]
[Elomboluilo kemẽla 20]
Embimbiliya lia tukula evi ya vilekisa “ondimbukiso” yoloneke via sulako
[Elomboluilo kemẽla 22]
Ndopo ko Armagedo, ava ka va pokola kuvialo wa Suku vaka nyõliwa. Ava va pokola va ka pita lomuenyo voluali luokaliye luesunga
