YEHOVA wa tu ĩha ongangu yiwa yoku kuama okuti, omõlaye Yesu Kristu. (1 Pet. 2:21) Eci umue a linga ondonge ya Yesu, eye o kunda olondaka viwa ndondingupange ya Suku. Yesu wa lekisa okuti eci ci kavuluisa konepa yespiritu poku popia hati: “Enjui kokuange, ene vosi wa kavi haene vu kuete ovilemo kuenje ndi vu kavuluisi. Tambuli okanga yange kuenda lilongisili kokuange, momo ame ndomboka haime ndonjuka vutima kuenje vu sanga ekavuluko.” (Mat. 11:28, 29) Vosi va tava kelaleko liaco, va pondola oku mola oku tẽlisiwa kuohuminyo eyi!

² Yesu Ondingupange ya Velapo ya Suku, wa laleka omanu vamue oco va kaile olondonge viaye. (Mat. 9:9; Yoa. 1:43) Eye wa va pindisa kupange woku kunda kuenda wa va tuma oco va linge upange umuamue eye a linga. (Mat. 10:1–11:1; 20:28; Luka 4:43) Noke eye wa tuma eci ci pitahãla 70 kolondonge vikuavo, oco va ka kunde olondaka viwa Viusoma wa Suku. (Luka 10:1, 8-11) Yesu eci a tuma olondonge viaco, wa vi sapuila hati: “Wosi o vu yeveleli, o njevelelavo ame. Wosi o vu sepuli, o ndi sepulavo ame. Kuenje wosi o ndi sepula, o sepulavo Una wa numa.” (Luka 10:16) Poku ci linga, Yesu wa situlula ocikele eye a eca kolondonge viaye. Ovo olonumiwa via Yesu kuenda via Suku Ukuonene wosi! Cimuamue haico ci popiwa koloneke vilo ku vana va tava kelaleko lia Yesu liokuti: “Enju, linga ondonge yange.” (Luka 18:22; 2 Va Kor. 2:17) Vosi va tava kelaleko eli,  va tambula ku Suku ocikele coku kunda olondaka viwa Viusoma kuenda coku linga olondonge.—Mat. 24:14; 28:19, 20.

³ Poku tava kelaleko lioku kuama Yesu, tu kuete esumũlũho lioku “kũlĩha” Yehova kuenda Yesu Kristu. (Yoa. 17:3) Tua siata oku lilongisa ndomo tu sanjuisa Yehova. Lekuatiso liaye, tu tẽla oku pongolola ovisimĩlo vietu, oku wala omunu wokaliye kuenda oku ambata omuenyo u likuata lolonumbi viaye viesunga. (Va Rom. 12:1, 2; Va Efe. 4:22-24; Va Kol. 3:9, 10) Onjongole yetu yo vutima, ya tu vetiya oku tumbika omuenyo wetu ku Yehova kuenda oku ci lekisa poku papatisiwa. Eci tu papatisiwa, tu tẽlisa olonumbi vi sukiliwa oco tu kũlĩhĩwe okuti tuafendeli va Yehova.

⁴ Lalimue eteke ku ka ivaleko okuti upange tu lingila Suku, u sukila oku lingiwa lutima wa yela. (Osa. 24:3, 4; Isa. 52:11; 2 Va Kor. 6:14–7:1) Ekolelo tu kuetele Yesu Kristu, li tu ecelela oku kuata utima wa yela. (Va Hev. 10:19-23, 35, 36; Esit. 7:9, 10, 14) Upostolo Paulu wa lungula Akristão oco va linge ovina viosi okuti, vi eca ulamba ku Suku oco ka va ka kokele vakuavo ocilondokua. Upostolo Petulu wa tukula esilivilo lioku kuata ovituwa viwa, oco vi vetiye omanu oku iya vocili. (1 Va Kor. 10:31, 33; 1 Pet. 3:1) O kuatisa ndati omunu umue oco a linge ukundi loku likongela kokuetu, koku kunda olondaka viwa?

⁵ Tunde eci o fetika oku longisa Embimbiliya komunu umue, u vetiya oku sapuilako vakuavo ovina a kasi oku  lilongisa. Eye o pondola oku ci linga poku sapela lepata, akamba, vana va talavayela kumosi kuenda omanu vakuavo. Eli enanga limue li kuete esilivilo poku longisa omanu oco va linge olondonge viokaliye via Yesu Kristu kuenda akundi volondaka viwa. (Mat. 9:9; Luka 6:40) Osimbu omunu tu longisa amamako oku kula konepa yespiritu kuenda oku loñoloha poku eca uvangi ka wa sokiyiwile, eye o ka lekisa onjongole yoku panga onepa kupange woku kunda.

⁶ Osimbu kua lalekele omunu umue oku enda kupange woku kundila konjo lanjo onjanja yatete, o sukila oku kũlĩhisa okuti eye o tẽlisa olonumbi vimue. Omunu wosi enda letu kupange woku kunda, wa kũlĩhĩwa lomanu vosi okuti Ombangi ya Yehova. Ci lomboloka okuti, eye ambata omuenyo umue u likuata lolonumbi viesunga via Yehova kuenda citava okuti, o linga ukundi ka papatisiwile.

⁷ Osimbu o longisa omunu umue kuenda o kũlĩhĩsa laye olonumbi Viembimbiliya, citava okuti u kũlĩha ciwa. Pamue o limbuka okuti eye wa kapako ovina a kasi oku lilongisa. Pole, kuli olonepa vimue viekalo liomunu o longisa Embimbiliya okuti, akulu vekongelo va ka yongola oku sapela laye kumue love.

⁸ Mitavaso yakulu vekongelo, o ka linga esokiyo liokuti akulu vavali vekongelo, okuti umue pokati kavo o panga onepa kocisoko cupange, va ka kũlĩhĩsa olonumbi viaco love kuenda lomunu o longisa Embimbiliya. Vakongelo ana okuti ka muli akulu valua vekongelo, ukulu umue  wekongelo kuenda oñuatisi yekongelo va pondola oku ci linga. Vamanji va nõliwa oco va linge ekonomuiso liaco, va sukila oku ci linga lonjanga. Ndeci, nda ovo va tambula esapulo liaco kohongele yimue yekongelo okuti, omunu umue o yongola oku kala ukundi, citava okuti va sapela love kuenda omunu waco kesulilo liohongele. Ombangulo yaco yi lingiwe lesanju. Osimbu omunu o longisiwa Embimbiliya ka taviwile oku kala ukundi ka papatisiwile, akulu vekongelo va sukila oku kũlĩhĩsa laye atosi a kuãimo:

1.  (1) Nda o tava okuti Embimbiliya Ondaka ya Suku.—2 Tim. 3:16.

2.  (2) Nda wa kũlĩha alongiso Embimbiliya a sulemo kuenda o a tava. Kuenje eci a ka pulisiwa, o ka tambulula ndomo ci likuata Lembimbiliya kuenda ka ka kunamẽla kalongiso esanda ale kovisimĩlo viaye muẽle.—Mat. 7:21-23; 2 Tim. 2:15.

3.  (3) Nda o pokola kocihandeleko Cembimbiliya coku liongolola lafendeli va Yehova kolohongele, nda ekalo li u wecelela.—Osa. 122:1; Va Hev. 10:24, 25.

4.  (4) Nda wa kũlĩha eci Embimbiliya li longisa catiamẽla kevĩho liukahonga, oku kongelamo ukahokolo, oluvale, oku lipekela lomunu ukuavimatamata vimuamue kuenda wa kapako alongiso aco komuenyo waye. Nda o kasi lomunu umue okuti ka va kuelele, ovo va sukila oku tokekisa olohuela viavo.—Mat. 19:9; 1 Va Kor. 6:9, 10; 1 Tim. 3:2, 12; Va Hev. 13:4.

5.  (5) Nda o pokola kocihandeleko Cembimbiliya coku yuvula uholua, handi vali ka nyui ovihemba vina  okuti ndontolo ko vĩhile, havio vi nyõla ovisimĩlo.—2 Va Kor. 7:1; Va Efe. 5:18; 1 Pet. 4:3, 4.

6.  (6) Nda wa kũlĩha esilivilo lioku yuvula akamba vãvi.—1 Va Kor. 15:33.

7.  (7) Nda wa siapo oku enda enda katavo esanda kuna okuti, pamue oko a pangele onepa. Nda wa siapo oku enda enda kolohongele viavo kuenda oku kuatisa kovopange akuavo.—2 Va Kor. 6:14-18; Esit. 18:4.

8.  (8) Nda ka tiamelẽle kocitundo lacimue copulitika.—Yoa. 6:15; 15:19; Tia. 1:27.

9.  (9) Nda wa kũlĩha eci elivulu lia Isaya 2:4 li popia catiamẽla koku litenga vuyaki.

10.  (10) Nda o yongola lutima wosi oku kala Ombangi ya Yehova.—Osa. 110:3.

⁹ Nda akulu vekongelo ka va kuete elomboloko lieci ondonge yi sima catiamẽla katosi a-a, ovo va sukila oku u pula. Nda citava, vo lekisa ovisonehua via tukuiwa ndeti. Ondonge yi sukila oku kũlĩha okuti oco yende kupange woku kunda, kumue Lolombangi Via Yehova, yi sukila oku kapako olonumbi Viembimbiliya via tukuiwa. Atambululo aye, a ka kuatisa akulu vekongelo oku limbuka nda eye wa lipongiya muẽle ciwa kuenda nda citava okuti o fetika oku enda enda kupange woku kunda.

¹⁰ Noke akulu vekongelo va sukila oku sapuilako ondonge nda okuti oyo ya taviwa. Nda citava ovo va ci linga noke yoku konomuisa laye atosi aco. Nda wa taviwa, Akulu vekongelo vo sapuila okuti, va sanjuka calua omo a linga ukundi wokaliye vekongelo. (Va Rom. 15:7) Ovo vo vetiya oku enda enda kupange woku kunda, loku  eca ulandu waye wupange kesulilo liosãi. Akulu vekongelo va sukila oku u sapuila okuti, eci omunu a linga ukundi wokaliye kuenje eca ulandu waye watete wupange woku kunda, onduko yaye va yi soneha Vocicapa Cupange Wukundi Vekongelo kuenje va yi kapa vekolombele liekongelo. Akulu vekongelo va soneha vocicapa caco, ulandu wukundi wokaliye, oco ocisoko ci tate ovina viosi viatiamẽla Kolombangi Via Yehova voluali luosi. Ovo va kũlĩhisa olonumbi viaco oco okuti, ukundi wokaliye amamako oku linga upange vekongelo loku tambula ekuatiso konepa yespiritu. Handi vali, akulu vekongelo va sukila oku ivaluisa akundi vokaliye okuti, ovolandu osi atiamẽla kokuavo a tatiwa ndomo ci likuata locisoko ca Yehova catiamẽla koku teyuila olonumbi vi sangiwa vo jw.org.

¹¹ Oku kũlĩha ciwa ukundi wokaliye loku kapako ovina viosi a siata oku linga, ci pondola oku u kuatisa calua. Cu vetiyavo oku eca ulandu waye wupange woku kunda olosãi viosi loku likolisilako oku vumba Yehova.—Va Fil. 2:4; Va Hev. 13:2.

¹² Eci akulu vekongelo va nõlapo okuti ondonge yimue Yembimbiliya yi pondola oku enda kupange woku kunda, citava okuti o tambula elivulu losapi, Vongotiyiwila Oku Linga Ocipango ca Yehova. Noke yoku eca ulandu waye watete wupange woku kunda, vekongelo mu lingiwa esapulo liokuti, eye ukundi wokaliye ka papatisiwile.

¹³ Amalẽhe citavavo okuti va kala akundi volondaka viwa Viusoma. Yesu wa yolela omãla kuenda wa va sumũlũisa.  (Mat. 19:13-15; 21:15, 16) Ndaño okuti olonjali ovio vi kuete ocikele ca velapo coku tata omãla, vamanji vekongelo va sukilavo oku kuatisa omãla vana va kuete onjongole yoku kala akundi Vusoma. Nda ove u isia ale u ina, ongangu yove yiwa yi ka kuatisa omãla vove oku kala vakuambili kupange wa Suku. Nda omõla umue o kuete ovituwa viwa o yongola oku litumbika lutima wosi kupange woku kunda, nye ci sukiliwa oco a kuatisiwe?

¹⁴ Isia ale ina, o sukila oku sanda akulu vekongelo, va tiamẽla kocisoko cupange woku kunda vekongelo oco ku lingiwe ohongele yimue loku limbuka nda okuti eye wa lipongiyila muẽle oku kala ukundi wokaliye. Mitavaso yocimunga cakulu vekongelo, o linga esokiyo liokuti akulu vavali vekongelo okuti umue mitavaso yupange woku kunda, va linga ohongele lomõla kuenda olonjali viaye. Nda omõla wa kũlĩha ocili Cembimbiliya kuenda o lekisa onjongole yoku enda enda kupange woku kunda, ci lekisa okuti eye o kasi oku kula konepa yespiritu. Noke yoku kũlĩhĩsa ovina viaco kumue lovina vikuavo via kongelamo, okuti vi tiamisiwilavo kakulu, akulu vavali vekongelo ovo va nõla nda citava okuti, omõla o linga ukundi wokaliye ka papatisiwile. (Luka 6:45; Va Rom. 10:10) Poku linga ohongele yimue lomõla, ka ci sukila oku konomuisa ovina vimue ndeci ca siata oku lingiwa lakulu okuti ka vi likuata lekalo liomõla.

¹⁵ Vokuenda kuohongele yaco, akulu vekongelo va sukila oku eca olopandu omo lioku kula kuomõla loku u vetiya oku kuata ocimãho coku papatisiwa. Omo okuti olonjali via siata oku likolisilakovo oku pindisila omãla vavo vocili, vi sukilavo olopandu. Oco olonjali vi amameko  oku kuatisa omãla, akulu vekongelo va vetiyavo olonjali, oku tanga pokakasia losapi hati: “Esapulo Kolonjali Akristão,” ka sangiwa kemẽla 179-181 lielivulu lilo.

¹⁶ Ndaño okuti ove wa kũlĩha Yehova kuenda u sole, wa kapako olonumbi viosi eye a yongola kuenda enda enda kupange woku kunda, ove handi o sukila oku amamako oku pamisa ukamba wove laye. Ndamupi? Poku tumbika omuenyo wove kokuaye loku ci lekisa poku papatisiwa.—Mat. 28:19, 20.

¹⁷ Elitumbiko, li lomboloka oku lisokiyila ocimãho cimue ci kola. Oku litumbika ku Suku, ci lomboloka oku linga ohutililo yimue kokuaye, loku likuminya lutima wosi okuti, o yongola oku tumbika lika omuenyo wove kupange waye loku endela volonjila viaye. Ci lombolokavo okuti, eye lika o vumba otembo yosi. (Esin. 5:9) Eyi onjila yimue okuti, omunu eye muẽle o yi nõla. Lomue o pondola oku ku nõlelako.

¹⁸ Pole, ove o sukila oku linga ovina vikuavo okuti, oku popia lika ku Yehova okuti o yongola oku linga ocipango caye, ci sule. O sukila oku lekisa komanu vosi okuti, wa litumbika ku Suku. O ci linga poku papatisiwa ndeci Yesu a linga. (1 Pet. 2:21; 3:21) Nda wa nõlapo oku vumba Yehova loku papatisiwa, nye o sukila oku linga? O sukila oku sapuilako mitavaso yakulu vekongelo. Eye o ka linga esokiyo liokuti, akulu vamue vekongelo va sapela love, oco va kũlĩhe nda ove wa kapako olonumbi via Suku viatiamẽla kepapatiso. Oco o sange olonumbi vikuavo, tala pokakasia losapi hati: “Esapulo Limue Kakundi  ka va Papatisiwile,” ka sangiwa kamẽla 182-184 lielivulu lilo kuenda okakasia losapi hati: “ ,” ka sangiwa kamẽla 182-184 lielivulu lilo kuenda okakasia losapi hati: “ ,” ka sangiwa kamẽla 182-184 lielivulu lilo kuenda okakasia losapi hati: “Apulilo Atiamẽla ku Vana va Yongola Oku Papatisiwa,” ka sangiwa kamẽla 185-207.

¹⁹ Vokuenda kuanyamo alua, ovolandu atiamẽla koku livokiya kuefendelo liocili voluali luosi, a siata oku vetiya calua afendeli va Yehova. Tunde eci Yesu Kristu a sapuila olondonge viaye okuti olondaka viwa Viusoma vi kundiwa kolonepa viosi violuali, Akristão vocili va siata oku lekisa onjongole yoku linga upange waco.—Mat. 28:19, 20; Mar. 13:10; Ovil. 1:8.

²⁰ Olondonge viatete via Yesu, via solailevo oku yeva ovolandu atiamẽla koku livokiya kupange woku kunda. (Mar. 6:30) Embimbiliya kelivulu Liovilinga li lekisa okuti ci soka 120 kolondonge, via tambulavo espiritu sandu ko Pendekoste yunyamo wa 33 K. K. Etendelo liolondonge lieya oku kala ci soka 3000, noke lia livokiya eci ci soka 5000 komanu. Ulandu wa lekisa okuti, “Yehova wa kala oku kongela omanu vakuavo okuti vana va kala oku popeliwa laye” kuenda “owiñi walua wovitunda wa fetika oku tava kekolelo.” (Ovil. 1:15; 2:5-11, 41, 47; 4:4; 6:7) Ocili okuti asapulo aco, a pamisa calua olondonge! Ovolandu aco a komõhisa, a vetiya olondonge oku amamako lupange woku kunda okuti, oco ocikele va tambuile ku Suku, ndaño lelambalalo liasongui vatavo a va Yudea!

²¹ Kanyamo 60-61 K. K., Paulu wa sonehela va Kolosai okuti, olondaka viwa “vi kasi oku ima epako loku kula  voluali luosi,” kuenda “via kundiwila komanu vosi va kasi vemẽhi lilu.” (Va Kol. 1:5, 6, 23) Akristão vatete vamamako oku pokola Kondaka ya Suku kuenda espiritu sandu lia va ĩha unene woku kunda olondaka viwa, osimbu o Yerusalãi ka ya nyõliwile kunyamo wa 70 K. K. Akristão vaco vakuekolelo va kuata esanju lialua poku yeva ovolandu wupange wa kala oku lingiwa!

²² Cimuamue haico okuti, ocisoko ca Yehova koloneke vilo, ci kasi oku likolisilako oku soneha ovolandu wupange woku kunda, u kasi oku lingiwa oco ku tẽlisiwe olondaka vielivulu lia Mateo 24:14 viokuti: “Olondaka evi viwa Viusoma vi ka kundilua koluali luosi, ha vi lingi uvangi kolofeka viosi, oco esulilo liya noke.” Omo okuti tuafendeli va litumbika ku Suku, tu kuete upange wonjanga woku linga. Tu sukila oku lekisa onjongole oco tu pange onepa kupange woku kunda okuti, u tẽlisiwa osimbu esulilo ka lieyile. Yehova o ka tu kuatisa oco upange waco u maluisiwe kuenda nda tua panga onepa kokuawo, tu ka taviwa laye.—Esek. 3:18-21.

²³ Nye tu sukila oku soneha vulandu wupange woku kunda? Ocicapa Culandu Wupange Woku Kunda (Relatório de Serviço de Campo) ca eciwa locisoko, ci lekisa eci tu sukila oku sonehamo. Pole, olonumbi vi kuãimo vi lekisa ndomo tu ci linga.

²⁴ Pulala pa sonehiwa okuti “Alivulu, (Alivulu Opeka a Eciwa Kuenda a-a a Tumiwa Votelefone) sonehapo alivulu wa eca ale alivulu wa tuma votelefone komunu una okuti Hambangiko ya Yehova. Pulala pa sonehiwa okuti  “Olovideo,” sonehapo olonjanja ove wa lekisa olovideo.

²⁵ Poku soneha “Apasu,” soneha olonjanja wa nyula omunu umue okuti Hambangiko ya Yehova oco o vetiye onjongole yaye. Epasu limue citava okuti li lingiwa poku nyula omunu umue, oku u sonehela ukanda, oku u telefonalela, oku u tumisa esapulo limue ale oku eca alivulu etu. Olonjanja viosi o songola elilongiso Liembimbiliya, ci tenda ndepasu. Isia ale ina una o songola efendelo Liepata, o pondolavo oku ci tenda ndepasu nda ka pali omõla umue ulume wa papatisiwa.

²⁶ Ndaño okuti elilongiso limue Liembimbiliya li lingiwa olosemana viosi, kesulilo liosãi li tendiwa lika okuti elilongiso limosi. Akundi va sukila oku soneha etendelo lialilongiso a litepa a songuiwa vokuenda kuosãi. Valilongiso aco, mua kongela ana a lingiwa komanu okuti Halombangiko Via Yehova via papatisiwa, ale vana va papatisiwa ndopo okuti, ka va malẽle oku lilongisa elivulu losapi hati: Sanjukili Omuenyo Otembo ka yi Pui! Citavavo oku soneha otembo yi pesiwa koku longisa omanu vana va liwekelepo oku kunda loku enda enda kolohongele, okuti onumbi yaco yeciwa lukulu umue wekongelo watiamẽla kocisoko cupange.

²⁷ Ci kuete esilivilo lialua oku soneha ulandu wa suapo watiamẽla “Kolowola.” Momo oyo otembo ove o pesila kupange woku kunda, poku kundila konjo lanjo, oku linga apasu, alilongiso Embimbiliya, oku eca uvangi ka  wa sokiyiwile komanu vana okuti, Halombangiko Via Yehova via papatisiwa. Nda akundi vavali va talavayela kumosi, kavali kavo va sukila oku tenda otembo pole, omunu lomunu o soneha lika apasu aye kuenda alilongiso aye Embimbiliya. Ci kaile isia ale ina, citava okuti va soneha owola yimosi vokuenda kuosemana poku linga Efendelo liavo liepata. Vamanji alume va linga olohundo viowiñi, va sukilavo oku tenda otembo yaco. Nda okuti manji umue ulume ale manji ukãi o kasi oku pitiya kelimi likuavo kovaso yowiñi, o sonehavo otembo yaco. Kuli ovopange amue okuti ka ci sukila oku soneha otembo yaco. Ndeci, oku lipongiyila upange woku kunda, oku enda kolohongele viupange woku kunda, loku linga ovopange akuavo.

²⁸ Ukundi lukundi o sukila oku kuama owanji wutima waye wa pindisiwa Lembimbiliya, poku soneha otembo a pesila kupange woku kunda. Akundi vamue va siata oku kundila kovitumãlo kuli omanu valua kuenda akundi vakuavo va kundila kovitumãlo ka kuli omanu valua. Poku ci linga va sukila oku enda calua. Ovikanjo via litepa kuenda akundi va kuetevo ovisimĩlo via litepa vioku tenda otembo va pesila kupange woku kunda. Vamanji va panga onepa Kosungu Yolombangi Via Yehova, ka va kisika okuti akongelo voluali luosi va kuama ovisimĩlo viavo, catiamẽla konjila ndomo va tenda otembo yupange woku kunda kuenda lomue o kuete omoko yoku tumbika ovihandeleko vi lekisa ndomo ci lingiwa.—Mat. 6:1; 7:1; 1 Tim. 1:5.

²⁹ Otembo yi pesiwila kupange woku kunda, yi sukila oku sonehiwa yosi. Ku lingiwa lika apongoloko nda ukundi  umue wa kuka calua okuti, ka tẽla oku tunda konjo, o kasi kosipitali, ale konjo yoku tata vana va kuka. Ukundi waco citava okuti eca lika 15 kakukutu upange woku kunda. Ndaño okuti vokuenda kuosãi wa talavaya lika 15 kakukutu, citava oku soneha otembo yaco. Eye o tendiwa okuti ukundi Wusoma. Onumbi yaco yi tiamisiwilavo kukundi una okuti, vokuenda kuotembo yimue ka tẽla oku tunda konjo omo lioku vela ale ocitangi cikuavo. Eliangiliyo eli li tiamisiwila lika kakundi vana okuti, ka va tẽla ndomo va enda kupange woku kunda. Ocisoko cupange oco ci nõla nda manji umue o kuatisiwa leliangiliyo liaco.

³⁰ Ulandu wupange woku kunda o linga olosãi viosi, u sonehiwa Vocicapa Cupange Wukundi Vekongelo. Ovicapa viaco viekongelo. Nda o yongola oku ilukila vekongelo likuavo, ku ka ivaleko oku sapuilako akulu vovekongelo o kasi. Manji usonehi o ka tuma ocicapa cove cupange woku kunda vekongelo liokaliye wa ilukila. Nda wa ci linga akulu vekongelo va ka ku tambula ciwa kuenda va ka ku kuatisa konepa yespiritu. Nda o tunda vekongelo liove olosãi vimue vitatu, amamako oku tuma upange wove woku kunda vekongelo liove.

³¹ Anga hẽ olonjanja vimue wa siata oku ivalako oku eca ulandu wove wupange woku kunda? Ocili okuti olonjanja vimue, vosi yetu tu sukila oku tu ivaluisamo. Pole nda tua kuata elomboloko liesunga lieci upange woku  kunda u kuetele esilivilo, ci leluka vali oku ivaluka ovina tu linga.

³² Vamue va siata oku lipula ndoco: “Omo okuti Yehova wa kũlĩha ovina ndi linga, momo lie ndi sukilila oku eca ulandu wupange woku kunda vekongelo?” Ocili okuti, Yehova wa kũlĩha ovina tu linga kuenda wa kũlĩhavo nda tu linga upange waco lutima wosi ale sio. Pole, ove o sukila oku ivaluka okuti Yehova wa soneha oloneke Noha a kala vocimbaluku kuenda anyamo va Isareli va kala vekalasoko. Suku wa soneha etendelo liomanu va kala vakuekolelo kuenda lia vana va lekisa esino. Wa sonehavo ndomo ofeka yo Kanana ya tambuiwa kuenda ovina olonganji vakuekolelo, va Isareli va linga. Ocili okuti Suku wa soneha ovopange alua afendeli vaye va linga. Eye wa tuma oku soneha ovolandu aco, oco a tu kuatise oku kũlĩha ndomo eye a tenda ovolandu.

³³ Ovolandu a sonehiwa Vembimbiliya, a lekisa okuti ovolandu a tiamẽla kafendeli va Yehova a sonehiwa ciwa. Olonjanja vimue ka ci leluka oku tukula ovolandu Embimbiliya okuti, ka ku tukuiwa atendelo aco lonjila yimue ya suapo. Kũlĩhĩsa ovolandu a kuãimo: Efetikilo 46:27; Etundilo 12:37; Olonganji 7:7; 2 Olosoma 19:35; 2 Asapulo 14:9-13; Yoano 6:10; 21:11; Ovilinga 2:41; 19:19.

³⁴ Ocili okuti vovolandu etu wupange woku kunda, ka mua kongelele ovina viosi tu linga kupange wa Yehova, pole, owo u kuete esilivilo lialua vocisoko ca Yehova. Kocita catete, eci ovapostolo va tiuka kupange woku kunda, va sapuila Yesu “ovina viosi va linga kuenda oku  longisa.” (Mar. 6:30) Olonjanja vimue ovolandu etu wupange woku kunda, a lekisa okuti ovina vimue viupange woku kunda vi sukila oku kũlĩhĩsiwa. Atendelo a pondola oku lekisa okuti, kua kala elivokiyo kovopange amue, pole, kovina vikuavo ndeci, etendelo liakundi ka kua kaile elivokiyo lialua. Citava okuti, ku kala esukila lioku eca evetiyo, ale lioku tetulula ovitangi vimue. Vamanji va kuete ovikele, va ka konomuisa ovolandu kuenda va ka likolisilako oku tetulula ovitangi vimue, citava okuti vi kasi oku tateka vamanji vamue ale ekongelo liosi oku kula konepa yespiritu.

³⁵ Ovolandu wupange woku kunda, a kuatisavo ocisoko oku kũlĩha kovitumãlo ku sukila akundi. Kovitumãlo vipi kuli elivokiyo? Kupi ka kuli elivokiyo? Alivulu api a sukiliwa oco a kuatise omanu oku kũlĩha ocili? Ovolandu aco, a ecelela okuti, ocisoko ci kũlĩha alivulu a sukiliwa kupange woku kunda kolonepa via litepa violuali. Omo liaco, ocisoko ci pondola oku lipongiya oco cece ekuatiso li sukiliwa.

³⁶ Kokuetu, ovolandu wupange woku kunda a lomboloka evetiyo. Ka tu komõha hẽ poku kũlĩha ovopange vamanjetu va kasi oku linga kupange woku kunda voluali luosi? Ovolandu aco, a tu kuatisa oku kũlĩha ndomo ocisoko ca Yehova ci kasi oku livokiya. Kuenda ovolandu a vamanjetu, a sanjuisa utima wetu loku vokiya ombili yetu kupange woku kunda. (Ovil. 15:3) Oku eca ulandu wetu wupange woku kunda, ci kuete esilivilo kuenda ci lekisa okuti tua kapako vamanji kolonepa viosi. Poku ci linga, tu lekisa okuti tu kasi oku pokola kaliangiliyo ocisoko ca Yehova.—Luka 16:10; Va Hev. 13:17.

³⁷ Ka tu kuete esunga lioku sokisa ovopange etu oku kunda la-a a vakuetu. (Va Gal. 5:26; 6:4) Akalo omanu a litepa. Handi vali, tu pondola oku kuatisiwa poku litumbikila ovimãho tu tẽla oku tẽlisa vi tu kuatisa oku limbuka toke petosi lipi tu kasi oku tẽlisa upange woku kunda. Oku tẽlisa ovimãho viaco, ci ka tu kokela esanju lialua.

³⁸ Ka tu kuete atatahãi okuti, Yehova o kasi oku yayuisa upange woku kongela vana a ka teyuila vokuenda “kuohali ya piãla.” Tu kasi kotembo yoku tẽlisiwa kuocitumasuku ca Isaya cokuti: “U o sule, o ka linga ohulukãi kuenda utito, o linga ofeka ya pama. Ame muẽle ndi Yehova, ndi ka ci yayuisa votembo yaco.” (Esit. 7:9, 14; Isa. 60:22) Esumũlũho linene oku kunda olondaka viwa vokuenda kuoloneke vilo via sulako!—Mat. 24:14.