AFENDELI vocili va Yehova, va tambula ocihandeleko coku liongolola locimãho coku livetiya loku likuatisa pokati. (Va Hev. 10:23-25) Ocitumãlo catete cafendeli va Suku va nõliwa okuti va Isareli, ca kala ‘otavernakulu, ombalaka yohongele.’ (Etu. 39:32, 40) Vokuenda kuotembo Salomone omõla a Daviti, wa tunga onjo yimue ale onembele yoku sivaya Suku. (1 Olos. 9:3) Eci onembele ya tungiwa kunyamo 607 O. Y., va Yudea va enda oku liongolola oco va fendele Suku kovitumãlo vi tukuiwa okuti olosunangonga. Noke onembele ya tumbuluiwa kuenda ya linga vali ocitumãlo cefendelo liocili Liakristão. Yesu wa enda oku longisa volosunangonga kuenda vonembele. (Luka 4:16; Yoa. 18:20) Eye toke muẽle wa lingila ohongele yimue komunda.—Mat. 5:1–7:29.

² Noke yolofa via Yesu, Akristão va enda oku liongoluila kovitumãlo kua kala omanu valua kuenda kolonjo oco va lilongise Ovisonehua loku kala Lakristão vakuavo. (Ovil. 19:8, 9; Va Rom. 16:3, 5; Va Kol. 4:15; File. 2) Olonjanja vimue, ca sukilile okuti va liongoluila kovitumãlo ka kua kaile omanu valua, oco ka va ka kapiwe vokayike la vana va enda oku va lambalala. Ocili, afendeli vakuekolelo kosimbu, va kuata onjongole yalua yoku liongoluila kovitumãlo viefendelo oco va “longisiwe la Yehova.”—Isa. 54:13.

³ Tua siatavo oku liongoluila kovitumãlo ku sua omanu valua kuenda kolonjo oco tu linge olohongele Viakristão. Olonjanja vialua, tua siata oku liongoluila kolonjo via vamanji oco tu linge olohongele viupange woku kunda. Vamanji vana  va siata oku eca olonjo viavo oco ku lingiwile olohongele viaco, va ci tenda okuti esumũlũho limue linene. Valua va liyeva okuti va litumbika calua kupange wa Yehova, poku eca onjo yavo oco mu lingiwile olohongele viaco.

⁴ Ocitumãlo ca velapo coku lingila olohongele Violombangi Via Yehova, vonjango Yusoma. Olonjanja vialua ku landiwa ocitumãlo cimue kuenda ku tungiwa Onjango yimue Yusoma, ale oku tumbulula Onjango yimue. Oco ka ku ka pesiwe olombongo kuenda oku talavaya ciwa lovitumãlo tu kuete, akongelo alua a pondola oku liongoluila Vonjango yimuamue Yusoma nda citava. Kovikanjo vimue, ci sukila oku fetela ocitumãlo cimue. Eci ku tungiwa Onjango yimue Yusoma ale oku yi tumbulula, ca sunguluka oku linga esokiyo limue lioku yi tumbika. Pole, nda kua lingiwa lika apongoloko amue Vonjango Yusoma ya tungiwa ale, ka ci sukila esokiyo limue lioku yi tumbika.

⁵ Onjango yimue Yusoma ka ci sukila lika okuti yi kala ocitumãlo cimue ca fina calua oco ci komõhise. Ndaño okuti ocitumãlo locitumãlo kuli Onjango yimue ya litepa, yi sukila oku sokiyiwa lonjila yimuamue. (Ovil. 17:24) Ndomo ci likuata lekalo lio pocitumãlo, ci sukila oku kala ocitumãlo cimue ciwa haico ca sungulukila oku lingilamo olohongele Viakristão.

⁶ Ekongelo lekongelo Liolombangi Via Yehova, li kuatisa oco Onjango Yusoma yi kaile ocitumãlo ciwa loku yi semũlũla. Ka ku lingiwa ovilumba kuenda ka ku pingiwa olombongo. Vonjango Yusoma, muli olokasia vimue violombanjaile vi kapiwa ocipepi la vana va enda kolohongele oco va kuatise kolombongo vi pesiwa koku tata Onjango Yusoma.  Ovo ka va kisikiwa oku ci linga pole, va ci linga lutima wosi.—2 Va Kor. 9:7.

⁷ Vosi vekongelo va ci tenda okuti esumũlũho oku eca olombongo oco Onjango Yusoma yi tatiwe ciwa, loku linga ovopange akuavo okuti yi yelisiwa. Ukulu umue wekongelo ale oñuatisi yekongelo, o nõliwa oco a linge esokiyo liupange waco. Volonjango viosi Viusoma, upange woku yelisa u lingiwa lovimunga viupange woku kunda kuenda manji o songola ocimunga caco, ale oñuatisi yaye va songola upange waco. Ci kaile vokati Konjango Yusoma kuenda kosamua, yi sukila oku eca esivayo ku Yehova kuenda kocisoko caye.

⁸ Nda okuti Vonjango Yusoma mu liongoluila akongelo alua, akulu vekongelo va kasi vakongelo aco, va sokiya Ocisoko Coku Semũlũla Onjango Yusoma, oco va songuile ovopange a lingiwa Vonjango Yusoma. Akulu vekongelo va nõla manji umue oco a linge mitavoso yocisoko caco. Lonumbi yeciwa lakulu vekongelo, Ocisoko Coku Semũlũla Onjango Yusoma, ci songuila upange woku yelisa kuenda ci kũlĩhĩsa okuti, oyo yi semũlũiwa ciwa kuenda ku kala ovimãleho vi tẽla oco ku lingiwe ovopange aco. Poku ci linga ci sukila okuti, akongelo aco a litava pokati.

⁹ Nda akongelo alua a liongoluila Vonjango yimuamue Yusoma, citava okuti ku lingiwa esokiyo lioloneke kuenda alivala olohongele. Akulu vekongelo va linga esokiyo liaco, poku kapako olonjongole via vakuavo, loku lekisa ocisola. (Va Fil. 2:2-4; 1 Pet. 3:8) Ka citava okuti ekongelo limue li sima okuti li kuete omoko yoku nõlelako akongelo akuavo onjila va kuama. Eci manji ukuakunyula akongelo a nyula ekongelo limue li liongoluila Vonjango Yusoma, akongelo akuavo a ka pongolola oloneke kuenda alivala olohongele viavo, ndomo ci likuata lesokiyo liosemana yaco.

 ¹⁰ Citava okuti Vonjango Yusoma, mu lingiwila olohundo viuvala kuenda olohundo vionambi, nda okuti ci taviwa Locisoko Cupange Vekongelo. Kolonepa viaco, ocisoko cupange ci kũlĩhĩsa lutate epingilo liaco kuenda ci tiamisila onjila va nõla kolonumbi via eciwa lo Betele.

¹¹ Ku lavokaiwa okuti vamanji va nõliwa oku talavaya Vonjango Yusoma lovimãho viaco, va lekisa ovituwa Viakristão vocili. Ka citava oku linga lacimue Vonjango Yusoma ci kokela vamanji ocilondokua ale ovina vi sepula onduko ya Yehova kuenda onduko yiwa yekongelo. (Va Fil. 2:14, 15) Lolonumbi vi eciwa la vamanji ko Betele, Vonjango Yusoma citava okuti mu lingiwilavo ovopange akuavo espiritu ndeci, Osikola Yakundi Vusoma kuenda Osikola Yakundi Votembo Yosi.

¹² Ekongelo olonjanja viosi, li ka tata lesumbilo ocitumãlo cefendelo. Onjila ndomo tu wala kuenda ovituwa vietu, vi sukila oku situlula ovituwa via vana va fendela Yehova. (Uku. 5:1; 1 Tim. 2:9, 10) Eci tu kapako olonumbi viaco, tu lekisa okuti tua sanjukila olohongele vietu Viakristão.

¹³ Ci kuete esilivilo oku linga esokiyo liwa vokuenda kuolohongele. Omãla va sukila oku tumãla lolonjali viavo. Olonjali vina vi kuete omãla vatito, vi pondola oku vetiyiwa oku tumãla kolomangu vina okuti, ka va tateka calua vamanji oku yevelela nda okuti omãla va sukila oku ambatiwa posamua, oco va pindisiwe ale oku linga ovina vikuavo.

¹⁴ Vamanji alume va kuete ovituwa viwa, va nõliwa oco va kaile olonjiliki kolohongele Vonjango Yusoma. Ovo va sukila oku lekisa ukamba kuenda esanju. Vovikele viavo mua kongela oku yolela vana veya onjanja yatete, oku sanga olomangu via vana va cilua, oku tenda olonjeveleli loku  tata ocipapafela Conjango Yusoma nda ka ci kasi ciwa. Nda ci sukiliwa, vamanji olonjiliki va ka ivaluisa olonjali esilivilo lioku tata ciwa omãla vavo, oco ka va ka lupukile Vonjango Yusoma loku papalela kembumbua osimbu ohongele ka ya fetikile ale ceci ohongele yi pua. Eci omõla umue a fetika oku papala ale o linga onjuela, manji onjiliki o pinga ku isia ale ku ina lumbombe kuenda utate, oco ambate omõla posamua okuti ka tateka vakuavo oku yevelela. Upange wa vamanji olonjiliki u kuatisa calua oco vosi vope esilivilo kolohongele. Ca sunguluka oku nõla akulu vekongelo ale oloñuatisi viekongelo oco va kaile olonjiliki.

¹⁵ Kocita catete, Akristão vamue va kuatele ovokuasi alua okuti vakuavo ci sule. Omo liaco, upostolo Paulu wa soneha hati: “Pocakati coku piñainya, kovisupe vu kuete cilo vu kuatisa vana va kuete esukila oco okuti, kovisupe viavo vo kuatisivo kekambo liene, lonjila eyi ku kala oku piñainya.” (2 Va Kor. 8:14) Koloneke vilo, kulivo oku piñainya kumuamue. Olombanjaile vi eciwa lakongelo voluali luosi, vi kuatisa koku tunga kuenda koku semũlũla Olonjango Viusoma. Olombanjaile vi eciwa la vamanji voluali luosi, vi soliwe calua locisoko kuenda lakongelo ana a kuatisiwa lolombanjaile viaco.

¹⁶ Loku kũlĩhĩsa ovina viosi via kongelamo kumue lasukila o pocitumãlo, o Betele oyo yi nõla akongelo a ka liongoluila  Vonjango yimue Yusoma. Handi vali, o Betele oyo yi sokiya otembo kuenda ocitumãlo ku tungiwila ale oku semũlũla olonjango Viusoma vocikanjo co Betele. Eci ku pita ovilunga, ku lingiwa aliangiliyo oku semũlũla Olonjango Viusoma via nyõleha kuenda olonjo via vamanji nda ci sukiliwa.

¹⁷ O Betele yeca olonumbi ku vamanji va lieca olumue oco va kuatise koku landa ovitumãlo, oku sokiya oku tungiwa Kuolonjango Viusoma, oku sanda ovicapa vi ecelela oku tunga, upange waco woku tunga kuenda oku semũlũla. Omo okuti kolofeka vialua kuli esukila Liolonjango Viusoma, ku sukiliwavo vamanji valua va lieca olumue. Akundi vosi va papatisiwa okuti va kuete ovituwa viwa kuenda va yongola oku kuatisa, va vetiyiwa oku soneha ocicapa cimue loku ceca Kocisoko Cupange vekongelo va kasi. Akundi ka va papatisiwile, va pondolavo oku kuatisa koku tunga ale koku semũlũla Onjango yavo Yusoma.

¹⁸ Akristão kocita catete, va enda oku liongolola vovimunga vitito. Pole, olonjanja vimue ‘owiñi walua’ wa enda oku liongolola. (Ovil. 11:26) Cimuamue haico okuti, koloneke vilo afendeli va Yehova va linga olohongele vinene vi tukuiwa okuti, olohongele vimbo kuenda olohongele viofeka. Olonjanja vimue ku fetiwa ovitumãlo vocikanjo, oco ku lingiwile olohongele viaco. Kovikanjo vina ka kuli ovitumãlo vi ecelela, citava okuti ku landiwa ocitumãlo oco ku lingiwile olohongele vinene.

¹⁹ Olonjanja vimue ku landiwa osapalalo yimue, yi semũlũiwa kuenda yi linga Onjango Yolohongele Vinene. Pole, olonjanja vialua ku landiwa ocitumãlo cimue kuenda ku tungiwa onjango yimue. Olonjango Violohongele vinene, vi  tungiwa okuti vimue vitito vikuavo vinene okuti, ca tamba lika kasukila o pocitumãlo. O Betele yi nõla lika oku landa ale oku tunga osapalalo yimue, oco yi linge onjango Yolohongele vimbo kuenda viofeka, noke yoku kũlĩhĩsa olombongo vi pesiwa kuenda etendelo liolonjanja va ka liongoluilamo vunyamo.

²⁰ O Betele yi nõla vamanji oco va songuile upange woku tata onjango Yolohongele Vinene kuenda oku yi semũlũla. Ku lingiwa esokiyo liokuti, vamanji vocikanjo va yelisa olonjanja viosi kuenda va ci lingavo noke yolosãi epandu. Ovo va kũlĩhĩsavo ndomo ovina vi kasi, nda vi sukila oku semũlũiwa ale sio. Vamanji va kuatisiwa calua poku lieca olumue, oco va linge upange waco. Omo liaco, akongelo a vetiyiwa oku kuatisa lutima wosi.—Osa. 110:3; Mal. 1:10.

²¹ Olonjanja vimue Volonjango Violohongele vinene mu lingiwilavo olohongele vikuavo viespiritu ndeci, Olosikola Viembimbiliya, olohongele vi likasi lakulu vekongelo, ale la vamanji va nyula akongelo. Ndeci ci pita Lonjango Yusoma, Onjango Yolohongele Vinene, ocitumãlo cimue ca sokiyiwila efendelo. Eci tu liongoluila Vonjango Yolohongele vinene, ovituwa vietu kuenda onjila ndomo tu li posuisa, vi sukila oku situlula esumbilo, ndeci tu linga vapuluvi tu liongoluila Vonjango Yusoma oco tu fendele.

²² Omanu valua va kasi oku iya vocisoko ca Suku koloneke vilo via sulako. Eci ci situlula esumũlũho lia Yehova. (Isa. 60:8, 10, 11, 22) Omo liaco, tu yongola oku kuatisa kovina viosi via kongela voku tata ovitumãlo viefendelo okuti, vi yelisiwa loku vi semũlũla. Poku ci linga tu lekisa ombili tu kuetele ovitumãlo viaco, vi tu kuatisa oku lipamisa pokati ca piãla enene cilo okuti eteke lia Yehova li kasi ocipepi.