NDONGE Tiago wa soneha ndoco: “Ameli ku Suku kuenje eye amela kokuene.” (Tia. 4:8) Ndaño okuti Yehova eye Tõlo kuenda o kasi kocitumãlo cimue ca velapo, eye o yevelela olohutililo viomanu ka va lipuile. (Ovil. 17:27) Oco tu amele ku Suku, tu sukila oku kuata ukamba uwa laye. Tu ci linga ndati? Onjila yimue yoku ci linga, oku likutilila kokuaye lutima wosi. (Osa. 39:12) Onjila yikuavo, poku tanga Ondaka yaye Embimbiliya olonjanja viosi. Poku ci linga, tu kũlĩha Yehova Suku, ocipango caye kuenda ovina a tu yonguila. (2 Tim. 3:16, 17) Handi vali, tu lilongisa oku u sola kuenda tu yuvula oku u sumuisa.—Osa. 25:14.

² Citava lika oku amela ku Suku pocakati Comõlaye Yesu. (Yoa. 17:3; Va Rom. 5:10) Yesu eye lika omunu o pondola oku tu kuatisa oku kuata elomboloko liwa liatiamẽla kovisimĩlo via Yehova. Eye wa kũlĩhĩle ciwa Isiaye toke petosi lioku popia hati: “Lomue wa kũlĩha Omõla, te Isia, lomue wa kũlĩha Isia, te Omõla kuenda una Omõla a panga oku u situluila.” (Luka 10:22) Omo liaco, eci tu lilongisa Avangeliu oco tu kũlĩhe ovisimĩlo via Yesu, tu kasivo oku kũlĩha ovisimĩlo via Yehova. Ukũlĩhĩso waco, u ka tu kuatisa oku amela ku Suku.

³ Oco tu kuate ukamba uwa la Yehova, tu sukila oku kũlĩha ocisoko caye co kilu, cina ci tu longisa oku linga  ocipango Caye. Handi vali, tu sukila oku limbuka omoko Yesu a kuete. Ndomo ca tukuiwa kelivulu lia Mateo 24:45-47, Cime Yesu Kristu, wa eca ocikele kukuenje wa kolelua haeye wa lunguka, oco a ece “okulia votembo ya sokiyiwa” kuvakuanjo vakuekolelo. Koloneke vilo ukuenje waco, wa siata oku tu ĩha okulia kualua konepa yespiritu. Pocakati cono yaco, Yehova o tu vetiya oku tanga Ondaka yaye eteke leteke, oku enda enda kolohongele kuenda oku panga onepa kupange woku kunda “olondaka viwa Viusoma.” (Mat. 24:14; 28:19, 20; Yeh. 1:8; Osa. 1:1-3) Ndaño okuti ukuenje wa kolelua ka lipuile, tua kolela okuti eye o songuiwa la Yehova. Tu sukila oku likolisilako oku tiamẽla konepa yocisoko ca Yehova palo posi loku kuama olonumbi viaye. Poku ci linga, ci ka tu kuatisa oku amela ku Suku kuenda ci tu pamisa loku tu teyuila eci tu liyaka lalambalalo.

⁴ Ove pamue o kasi ale vocili vokuenda kuanyamo alua. Nda oco, ocili okuti wa kũlĩha eci ci lomboloka oku liyaka lovina vi seteka ekolelo. Pole, ndaño okuti wa kũlĩha Yehova kuenda ndopo wa fetika oku kuata ukamba lafendeli vaye, wa kũlĩha okuti Satana Eliapu, o lambalala vana va pokola ku Yehova. (2 Tim. 3:12) Omo liaco, ci kaile okuti o kasi oku liyaka lalambalalo alua ale atito, ku sukila oku kuata usumba ale oku sumua. Yehova wa likuminya oku ku kuatisa loku ku sumũlũisa leyovo kuenda omuenyo ko pui.—Va Hev. 13:5, 6; Esit. 2:10.

⁵ Vosi yetu tu pondola oku liyaka loloseteko koloneke vilo via sulako violuali lua Satana. Tunde eci Usoma  wa Suku wa tumbikiwa kunyamo wo 1914, Satana ka vo wecelelele vali oku enda kilu. Eye kumue lovangelo vaye vakuevĩho, va imbiwa palo posi kuenda va kasi lika oku sakalaisa omanu. Satana wa tema kuenda o kasi oku vokiya ovitangi palo posi lelambalalo kafendeli va litumbika ku Yehova. Ovina evi vi lekisa okuti, tu kasi koloneke via sulako viuviali wa Satana.—Esit. 12:1-12.

⁶ Satana wa tema omo liekalo liaye, loku kũlĩha okuti otembo yo kambelapo yitito. Eye kumue lolondele viaye, o linga cosi a tẽla oco a tateke upange woku kunda, loku nyõla omunga yafendeli va Yehova. Eci ci koka okuti, tu kala vuyaki umue konepa yespiritu u tukuiwa okuti, “uyaki umue okuti halomanuko, te lovoviali, lovonene, lolombiali violuali lulo luowelema kuenda lolohoka viaspiritu ãvi.” Oco tu yule uyaki waco, loku kala konele ya Yehova, tu sukila oku pandikisa kuenda olonjanja viosi tu sukila oku kũlĩhĩsa ovimãleho vietu konepa yespiritu. Tu sukila oku “talama ngõ katutu Eliapu.” (Va Efe. 6:10-17) Oco tu ci linge, tu sukila oku pandikisa.

⁷ Epandi “ocituwa cimue ci kuatisa oku liyaka lovitangi.” Konepa yespiritu, ci lomboloka oku amamako oku linga eci ciwa ndaño lovitangi, elambalalo, oloseteko ale ovina vikuavo vi kapa kohele ekolelo lietu ku Suku. Akristão va sukila oku likolisilako oku kuata epandi. Oku ci linga, cambata otembo. Osimbu tu pamisa ekolelo lietu, ocituwa cetu coku pandikisa ci livokiya. Poku pandikisa koloseteko vitito vi seteka ekolelo lietu eci tu linga Akristão, tu pamisiwa kuenda tu ka tẽla oku liyaka loloseteko  ka via lelukile vi keya kovaso yoloneke. (Luka 16:10) Ka tu sukila oku kevelela toke eci ku iya ovitangi vinene, oco tu nõlepo oku amamako lekolelo. Onjila yaco yi nõliwa osimbu oloseteko ka via fetikile. Poku lekisa okuti tu sukila oku kuata epandi kumue lovituwa vikuavo vi sanjuisa Suku, upostolo Petulu wa soneha ndoco: “Lingi alikolisilo osi a sukiliwa okuti, kekolelo liene vu vokiyako esunga, kesunga liene, ukũlĩhĩso, kukũlĩhĩso wene, oku likandangiya, koku likandangiya kuene, epandi, kepandi liene, oku sumbila Suku, koku sumbila kuene Suku, oku sola vamanji, koku sola kuene vamanji, ocisola.”—2 Pet. 1:5-7; 1 Tim. 6:11.

⁸ Tiago wa lekisa esilivilo lioku kuata epandi, eci a soneha hati: “A vamanjange, sanjuki calua eci vu liyaka loloseteko viñi viñi, omo wa kũlĩhi okuti oku setekiwa kuekolelo liene, ku koka epandi. Pole, eceleli okuti epandi li tẽlisa ocimãho calio okuti, vu kanguka kuenda vu kala ciwa kovina viosi vu linga kuenje lacimue cu kambeli.” (Tia. 1:2-4) Tiago wa popia okuti Akristão va sukila oku tava lesanju oloseteko, momo vi tu kuatisa oku kuata epandi. Ove hẽ, o ci tenda lonjila yimuamue? Tiago noke wa lekisa okuti, epandi li tẽlisa ocimãho cimue kokuetu okuti, li tu kuatisa oku kangula ovituwa vietu Viukristão kuenda oku taviwa la Suku. Omo liaco, epandi lietu li pamisiwa eteke leteke poku liyaka kuenda oku yula alambalalo. Eci epandi li pamisiwa, li tu kuatisa oku kuata ovituwa viwa tu sukila.

⁹ Epandi lietu, li sanjuisa Yehova kuenda omo liepandi liaco, eye o ka tu ĩha onima yomuenyo ko pui. Tiago wamisako  hati: “Wa sumũlũha omunu una o pandikisa koseteko, momo eci a yula oseteko, o ka tambula ekolowa liomuenyo, lina Yehova a likuminya ku vana vamamako oku U sola.” (Tia. 1:12) Omo liaco, tu pandikisa omo tu yongola oku kuata omuenyo ko pui. Nda ka tua pandikisile, ka tu ka tẽla oku amamako oku endela vocili. Nda tua yuliwa loloseteko violuali, tu ka tiukila vali voluali. Nda ka tua pandikisile, tu ka pumba espiritu lia Yehova kuenda ka tu ka kuata Epako liespiritu komuenyo wetu.

¹⁰ Oco tu pandikise koloneke vilo via tĩla, tu sukila oku kuata ocituwa ca sunguluka catiamẽla kovitangi tu liyaka lavio omo lioku kala Akristão. Ivaluka okuti Tiago wa soneha hati: “Sanjuki calua eci vu liyaka loloseteko.” Poku ci linga, ka ca lelukile momo pamue mu kongela ohali yo ketimba ale esakalalo limue. Pole, ivaluka okuti oco tu kuate omuenyo kovaso yoloneke, tu sukila oku ci linga. Ovina via lipita lovapostolo vepuluvi limue, vi tu kuatisa oku kuata elomboloko konjila ndomo tu kuata esanju poku tala ohali. Ulandu u sangiwa kelivulu Liovilinga u popia ndoco: “Va vilikiya ovapostolo, va va tipula kuenda va va handeleka oco va liwekepo oku vangula vonduko ya Yesu, yu va va eca. Ovo va tunda Vekanga Linene lonjolela, momo va tendiwile okuti va sesamẽla oku sepuiwa omo lionduko yaye.” (Ovil. 5:40, 41) Ovapostolo va kuatele elomboloko liokuti, ohali  va tala ya lekisa okuti, va kala oku pokola kocihandeleko ca Yesu kuenda va taviwa la Suku. Noke yanyamo amue, Petulu poku soneha ukanda waye watete wa lekisa esilivilo lioku pandikisa kohali omo liesunga.—1 Pet. 4:12-16.

¹¹ Vulandu ukuavo, mua kongela Paulu la Sila. Osimbu va kala oku linga upange wavo ko Filipoi, va kapiwa vokayike kuenda va lundiliwa okuti, va kala oku nyõla ombembua volupale loku sandeka ovituwa ka vi likuata lovihandeleko. Omo liaco, va tipuiwa calua loku kapiwa vokayike. Ulandu Wembimbiliya u lekisa okuti: “Vokati kuteke Paulu la Sila va kala oku likutilila loku sivaya Suku lovisungo kuenda olomandekua via va yeva.” (Ovil. 16:16-25) Paulu lekamba liaye, va tendele ohali va tala omo lia Kristu lonjila yimue ya sunguluka okuti, ka va kaile lika vakuacili ku Suku kuenda komanu, pole, ca ecavo uvangi komanu vana va yonguile oku yevelela olondaka viwa. Mua kongelele omuenyo womanu vakuavo. Vuteke waco, ukuakayike kumue lepata liaye, va yeva esapulo kuenje va linga olondonge. (Ovil. 16:26-34) Paulu la Sila va kolelele ku Yehova, kunene waye kuenda konjila yaye yoku va kuatisa eci va kala oku tala ohali. Ovo ka va sumuĩle.

¹² Cimuamue haico koloneke vilo okuti, Yehova wa siata oku tu ĩha ekuatiso tu sukila eci tu liyaka loloseteko. Eye o yongola okuti tu pandikisa. Yehova wa tu ĩha Ondaka yaye oco yi tu kuatise oku kuata ukũlĩhĩso wa suapo wocipango caye. Oyo yi pamisa ekolelo lietu. Tu kuete epuluvi lioku kala la vamanjetu kuenda oku linga upange u kola. Tu kuetevo esumũlũho lioku amamako  lukamba wetu la Yehova pocakati cohutililo. Eye o yevelela olondaka vietu viesivayo kuenda epingilo lietu liekuatiso tu linga lutima wosi, oco tu amameko oku yela kovaso aye. (Va Fil. 4:13) Etu ka tu ivalako ongusu tu tambula eci tu sokolola lutate kelavoko tu kuete.—Mat. 24:13; Va Hev. 6:18; Esit. 21:1-4.

¹³ Oloseteko tu liyaka lavio koloneke vilo, via lisoka levi olondonge viatete via Yesu Kristu via liyaka lavio. Koloneke vilo, Olombangi Via Yehova via siata oku kangisiwa loku tipuiwa, povaka a vakuakulambalala vana okuti, ka va kuete elomboloko liovina via popiwa. Ndeci ca kala koloneke viovapostolo, onepa yalua yalambalalo yi kokiwa la vakuetavo okuti, alongiso avo esanda kuenda ovituwa viavo, vi situluiwa Vondaka ya Suku. (Ovil. 17:5-9, 13) Olonjanja vimue afendeli va Yehova, va siata oku kuatisiwa poku tukula ovihandeleko vi eciwa lolombiali viopulitika. (Ovil. 22:25; 25:11) Pole, kuli ovitangi vimue okuti, olombiali vi tateka upange wetu locimãho coku malako upange woku kunda. (Osa. 2:1-3) Poku liyaka lovitangi viaco, ci tu kuatisa oku kuama lutõi ongangu yovapostolo vakuekolelo va popia hati: “Cetu oku pokola ku Suku ndombiali, komanu hakoko.”—Ovil. 5:29.

¹⁴ Olonepele viofeka via siata oku livokiya voluali luosi. Omo liaco, oloseteko vioku liwekapo oku pokola kovihandeleko via Suku poku kunda olondaka viwa, via livokiya calua. Eci ci koka okuti afendeli vosi va Suku, va kuata elomboloko lia suapo liesilivilo lielungulo li sangiwa kelivulu Liesituluilo 14:9-12, liatiamẽla koku fendela  “ocinyama ca tema lociñumañuma caco.” Tu kuete elomboloko liolondaka viupostolo Yoano viokuti: “Olosandu vi sukila oku pandikisa okuti, vana va siata oku lava ovihandeleko via Suku, haivo va kakatela kekolelo lia Yesu.”

¹⁵ Ovoyaki, usuanji, elambalalo ale olombiali vi pondola oku ku tateka oku vumba Suku ndomo o yongola. Olonjanja vimue ka citava oku linga olohongele viekongelo. Onjila ndomo tu sapela la vamanji ko filiale yi pondola oku tatekiwa kuenda ka tu nyũliwa la manji ukuakunyula akongelo. Pamue ka tu tambula alivulu. Nda cimue pokati kovina evi vi pita letu, nye ove o linga?

¹⁶ Etambululo lieli liokuti, linga cosi o tẽla ndomo ci likuata lekalo liove. Citava okuti, o pondola oku linga elilongiso lio pokolika. Olonjanja vimue ovimunga vitito vi pondola oku liongoluila kolonjo via vamanji. Tu pondola oku talavaya lalivulu tua lilongisa kosimbu kuenda Embimbiliya oco tu linge olohongele. Ku ka sakalaile ale oku kuata usumba. Osungu Yolombangi Via Yehova, lonjanga yi pondola oku sanga olonjila vioku sapela la vamanji va kuete ovikele vioku songola.

¹⁷ Ndaño okuti o kasi ocipãla la vamanji vosi ivaluka okuti, ku kasi ocipãla la Yehova kumue Lomõlaye Yesu Kristu. Ove o pondola oku amamako oku pamisa elavoko liove. Yehova o yeva olohutililo viove loku ku pamisa pocakati cespiritu liaye. Sanda olonumbi kokuaye. Ivaluka okuti, ove wufendeli wa Yehova kuenda wundonge ya Yesu Kristu. Omo liaco, talavaya ciwa lapuluvi o kuete oku eca uvangi. Kolela okuti, Yehova o ka sumũlũisa alikolisilo ove kuenda vokatembo kamue, vakuene va ka  likongela kokuove kefendelo liocili.—Ovil. 4:13-31; 5:27-42; Va Fil. 1:27-30; 4:6, 7; 2 Tim. 4:16-18.

¹⁸ Ndeci ca pita lovapostolo kuenda lomanu vakuavo, omuenyo wove pamue u kala kohele. Poku liyaka locitangi caco, kolela ku “Suku una o pindula vana va fa.” (2 Va Kor. 1:8-10) Ekolelo liove kepinduko, li pondola oku ku kuatisa oku pandikisa kelambalalo lina okuti ka lia lelukile. (Luka 21:19) Yesu Kristu wa eca ongangu yiwa; eye wa kũlĩhĩle okuti oku pandikisa kuaye koloseteko, kua laikele oku kuatisa vakuavo oco va pandikisevo. Cimuamue haico okuti, oku pandikisa kuove, ku pondola oku kala ono yongusu ku vamanjove.—Yoa. 16:33; Va Hev. 12:2, 3; 1 Pet. 2:21.

¹⁹ Pamue ku liyaki lika lalambalalo ale oloseteko, pole, o liyakavo lovitangi vikuavo ka via lelukile. Ndeci, vamue va sumua omo okuti vocikanjo omanu ka va tambulula ciwa. Vakuavo va kasi oku liyaka lovovei o ketimba kuenda kovisimĩlo kumue lovitangi vikuavo, vi tunda kekambo lioku lipua. Upostolo Paulu wa liyaka loloseteko ndevi via koka okuti, olonjanja vimue ka ca lelukile oku tẽlisa upange waye. (2 Va Kor. 12:7) Epafroditu Ukristão umue kocita catete, wa sumuĩle momo akamba vaye va yevele okuti, “wa kala oku vela.” (Va Fil. 2:25-27) Ekambo lietu lioku lipua kuenda lia vakuetu, li pondola oku tu nenela ovitangi okuti ka ci leluka oku liyaka lavio. Citava okuti, pamue tu sumuisiwa la manji umue ale umue ukuepata lietu. Pole, vana va kapako olonumbi Viondaka ya Yehova va pondola oku liyaka lovitangi kuenda oku vi yula.—Esek. 2:3-5; 1 Va Kor. 9:27; 13:8; Va Kol. 3:12-14; 1 Pet. 4:8.

²⁰ Tu sukila oku kakatela komunu una Yehova a ñola oco a kaile Utue Wekongelo okuti, Yesu Kristu. (Va Kol. 2:18, 19) Tu sukila oku pokola kolonumbi “viukuenje wa kolelua haeye wa lunguka” kuenda kakulu vekongelo. (Va Hev. 13:7, 17) Poku pokola kolonjila vi nõliwa locisoko kuenda ku vana va songola, tu kala omanu vamue vongotiyiwa ciwa, oco tu linge ocipango ca Yehova. Tu sukila oku talavaya ciwa lesumũlũho liohutililo. Ivaluka okuti ndaño muẽle ovimano viokayike ale oku kapiwa vokayike, ka ci tu tateka oku sapela la Isietu wokilu ale oku nyõla omunga tu kuete la vamanji.

²¹ Lutõi kuenda epandi, tu lingi cosi tu tẽla oco tu tẽlisi ocikele cetu coku kunda, poku pokola kocihandeleko Yesu a eca kolondonge viaye noke liepinduko liaye liokuti: “Omo liaco, kuendi ka longisi omanu vo kolofeka viosi oco va linge olondonge viange, va papatisili vonduko ya Tate la Mõla kuenda yespiritu sandu, va longisi oku linga ovina viosi ndo kundiki.” (Mat. 28:19, 20) Tu pandikisi ndeci Yesu a linga. Olonjanja viosi tu kapiko elavoko Liusoma kuenda ohuminyo yomuenyo ko pui tu kuete. (Va Hev. 12:2) Omo okuti tulondonge via Yesu via papatisiwa, tu kuete esumũlũho lioku panga onepa kocitumasuku caye, catiamẽla “kesulilo lioluali.” Eye wa popia hati: “Olondaka evi viwa Viusoma vi ka kundilua koluali luosi, ha vi lingi uvangi kolofeka viosi, oco esulilo liya noke.” (Mat. 24:3, 14) Nda okuti koloneke vilo tua litumbika kupange waco lutima wosi, tu ka kuata esanju lioku kala otembo ka yi pui voluali luokaliye, luesunga lua Yehova!