OKU pokola ku Yehova, Ombiali ya Velapo ci sukiliwa, nda tu yongola oku ongotiyiwila oku linga ocipango caye. Tua limbuka okuti omõlaye eye o kasi oku songuila ekongelo Liakristão kuenda tu kuamavo onjila yimuamue yoku songola kolonepa vikuavo viomuenyo. Epokolo liaco kocihandeleko ca tumbikiwa la Suku, ci kuatisa omanu vosi.

² Esukila lioku pokola komunu umue o kuete unene, lia lekisiwa onjanja yatete komanu vocumbo Cedene. Lia lekisiwavo kocihandeleko ca Suku ci sangiwa kelivulu Liefetikilo 1:28 kuenda 2:16, 17. Oviluvo viosi vikuavo palo posi, via laikele oku vialiwa lomanu kuenda Adama la Eva, va sukilile oku pokola kocipango ca Suku. Oku pokola ku Suku ku nena ombembua kuenda oku linga ovina lonjila yimue ya sokiyiwa ciwa. Onumbi yepokolo noke ya lomboluiwa kukanda 1 Va Korindo 11:3. Upostolo Paulu wa soneha hati: “Ndi yongola oco vu kũlĩhi okuti, utue wulume Kristu; kuenda utue wukãi ulume; kuenje utue wa Kristu Suku.” Ndomo tua ci tanga, Yehova eye lika ka sukila oku pokola komunu umue.

³ Omanu vamue koloneke vilo, ka va limbuka kuenda ka va lingi ovina viwa ndomo ci likuata lonumbi yepokolo. Momo lie? Ocitangi ca fetikila vocumbo Cedene eci olonjali vietu viatete via nõlapo ovio muẽle, oku  liwekapo oku pokola kuviali wa Yehova Suku. (Efet. 3:4, 5) Pole, ovo ka va kuatele elianjo lialua. Kuenje va vialiwa lociluvo cimue okuti, Satana Eliapu. Esino liaco lia koka okuti, omanu ka va kuata vali ukamba la Suku. (Va Kol. 1:21) Omo liaco, omanu valua koloneke vilo va kasi oku yapuisiwa Londingaĩvi.—1 Yoa. 5:19.

⁴ Poku lilongisa ocili catiamẽla Kondaka ya Suku, loku kapako ovina tu lilongisa komuenyo wetu, tu liwekapo oku vialiwa la Satana. Omo okuti Tulombangi via litumbika kuenda via papatisiwa, tu tava okuti Yehova eye Ñala Tõlo komuenyo wetu. Soma Daviti wa limbukile okuti Yehova, eye “utue womanu vosi” kuenda etu tu tava kokuaye. (1 Asa. 29:11) Etu tu tava lumbombe kolondaka viokuti: “Kũlĩhi okuti, Yehova eye Suku. Eye una wa tu panga kuenda etu tua tiamẽla kokuaye. Tumanu vaye kuenda tulomeme vina eye a lisa.” (Osa. 100:3) Tu limbuka okuti Yehova eye wa velapo kuenda o sesamẽla epokolo lietu liutima wosi momo eye wa lulika ovina viosi. (Esit. 4:11) Omo okuti tuafendeli va Suku yocili, tu setukula Yesu Kristu una wa eca ongangu ya lipua yoku pokola Suku.

⁵ Nye Yesu a lilongisila kohali a tala palo posi? Ukanda ku Va Heveru 5:8 u tambulula ndoco: “Ndaño wa kala omõla, wa lilongisa epokolo omo liohali a talisiwa.” Yesu wa kala ukuacili kuenda wa pokola ku Isiaye wo kilu, ndaño ceci a talisiwa ohali. Handi vali, ka lingile lacimue locipango caye muẽle. Ka popele olondaka viaye muẽle kuenda ka sandele ulamba waye muẽle. (Yoa. 5:19, 30; 6:38; 7:16-18) Yesu vokuenda kupange waye woku kunda, wa sanjukilile oku linga ocipango ca Isiaye  ndaño okuti co kokela oku lambalaliwa kuenda oku setekiwa. (Yoa. 15:20) Ndaño ndoco, Yesu wa pokola ku Suku. Eye wa “liketisa” toke petosi lioku tala “ohali kuenda oku fila kuti.” Eye wa pokola ku isiaye kovina viosi kuenje wa tambula ocikele cimue ca velapo okuti eci a kuatele tete ci sule. Handi vali, wa kemainya Yehova kuenda wa tu ĩha elavoko lioku kuata omuenyo ko pui.—Va Fil. 2:5-11; Va Hev. 5:9.

⁶ Eci tu pokola ku Suku poku linga ocipango caye, tu yuvula asakalalo alua kuenda esumuo okuti, via siata oku sakalaisa omanu va likala oku pokola kuviali wa Yehova. Unyãli wetu Eliapu, olonjanja viosi o seteka oku tu yapuisa. Tu ka yovuiwa kunyãli waco ukuevĩho nda tua tamalãla laye kuenda oku liketisa kovaso a Yehova poku lekisa epokolo liutima wosi.—Mat. 6:10, 13; 1 Pet. 5:6-9.

⁷ Tu limbuka omoko ya Kristu yoku songola kuenda ocikele eye a eca “kukuenje wa kolelua haeye wa lunguka.” Eci ci lekisiwa konjila ndomo tu tenda vakuetu loku va tata. Oku pokola ku Suku vekongelo ci ka tu vetiya oku pokola Kondaka Yaye, kolonepa viosi viefendelo lietu. Vepokolo liaco, mua kongela upange wetu woku kunda, oku enda enda kolohongele loku panga onepa kokuavio, ukamba tu kuata lakulu vekongelo kuenda oku pokola kolonumbi vi eciwa locisoko.—Mat. 24:45-47; 28:19, 20; Va Hev. 10:24, 25; 13:7, 17.

 ⁸ Epokolo lietu ku Suku li kuatisa koku kuata ombembua, eteyuilo kuenda esokiyo liwa vekongelo. Ovituwa via Yehova vi situluiwa komanu vana va pokola kokuaye. (1 Va Kor. 14:33, 40) Ulandu tu kuete vocisoko ca Yehova, u tu vetiya oku situlula ovisimĩlo vietu ndeci Soma Daviti a linga. Daviti eci a limbuka etepiso lia kala pokati kafendeli va Yehova kuenda komanu vakuevĩho, eye wa vangula lesanju hati: “Va sumũlũha omanu vana okuti, Suku yavo Yehova!”—Osa. 144:15.

⁹ Embimbiliya li popia okuti volohuela kuenda vepata, “utue wukãi ulume.” Utue wulume Kristu kuenda utue wa Kristu Suku. (1 Va Kor. 11:3) Ukãi o sukila oku pokola kulume kuenda omãla va sukila oku pokola kolonjali viavo. (Va Efe. 5:22-24; 6:1) Nda okuti vosi vepata va kuama onumbi yepokolo, va kuata ombembua.

¹⁰ Ulume o sukila oku songola locisola poku setukula Kristu. (Va Efe. 5:25-29) Ka citava okuti o talavaya lãvi lomoko a kuete ale oku kala okuti ka ci tẽlisa. Nda wa ci linga, ukãi waye kuenda omãla va ka pokola kokuaye lesanju. (Efet. 2:18) Ukãi poku kuatisa lepandi kuenda oku sumbila ulume waye, o ka soliwa laye kuenda o ka eca esivayo ku Suku. (1 Pet. 3:1-4) Eci alume kuenda akãi va kapako onumbi Yembimbiliya yatiamẽla koku songola, ovo va ka eca ongangu yiwa komãla vavo yatiamẽla koku lekisa epokolo ku Suku.

¹¹ Voku pokola ku Suku, mua kongelavo onjila ndomo tu tenda “olombiali” vina “via tambula unene wavo ku Suku.” (Va Rom. 13:1-7) Akristão omo okuti va pokola kovihandeleko, va feta elisimu poku “eca ku Kaisare  ovina via Kaisare, pole, ovina via Suku, ku Suku.” (Mat. 22:21) Handi vali onjila ndomo va kundila vocikanjo, yi sukila oku likuata lovihandeleko vieteyuilo. Etu tu pokola kolombiali olonjanja viosi nda okuti poku ci linga ci likuata lovihandeleko viesunga via Yehova. Tu pondola oku tiamisila alikolisilo etu longusu yetu, kupange woku kunda.—Mar. 13:10; Ovil. 5:29.

¹² Akristão va sumbila onumbi yepokolo kolonepa viosi viomuenyo wavo. Pocakati cekolelo, tu pondola oku lavoka eteke okuti omanu vosi va ka pokola ku Yehova Suku. (1 Va Kor. 15:27, 28) Omanu vana va limbuka lesanju uviali wa Yehova kuenda va lekisa epokolo kokuaye, va ka sumũlũisiwa otembo ka yi pui!