Epapatiso lia siata oku lingiwa kolohongele vimbo kuenda kolohongele viofeka Violombangi Via Yehova. Kesulilo liohundo yepapatiso, hundi o ka pinga okuti vana va ka papatisiwa va votoka kuenda va tambulula lolukandi apulilo avali a kuãimo:

1. Wa likekembela hẽ akandu ove loku litumbika ku Yehova kuenda wa tava esokiyo liaye lioku yovola pocakati ca Yesu Kristu?

2. Anga hẽ, ca ku lomboloka ciwa okuti, elitumbiko liove kuenda epapatiso, ondimbukiso yokuti Wumbangi ya Yehova kuenda wa tiamẽla kocisoko caye?

Poku tambulula okuti oco, kapulilo aco, vana va ka papatisiwa va kasi oku sapula komanu vosi okuti, va kolela kocisembi kuenda va tumbika omuenyo wavo ku Yehova. (Va Rom. 10:9, 10) Vana va ka papatisiwa va sukila oku sokolola lutate kapulilo aco kuenda oku likutilila osimbu eteke liaco ka lia pitĩlilepo, oco omunu lomunu a tambulule lekolelo.

 Ove hẽ wa litumbika ku Yehova pocakati cohutililo loku likuminya okuti o ka vumba lika eye loku popia okuti ocipango caye oco ci ka kala ocina ca velapo komuenyo wove?

Ove hẽ wa kolela muẽle okuti wa lipongiyila oku papatisiwa?

Uwalo upi wa sunguluka oku papatisiwa lawo? (1 Tim. 2:9, 10; Yoa. 15:19; Va Fil. 1:10)

Tu sukila oku wala “uwalo wa sunguluka” oco tu lekise okuti tu “fendela Suku.” Omo liaco, vana va ka papatisiwa ka citava okuti va wala ovowalo oku yua a lekisa etimba, ovowalo ana a kuete ololetala, asapulo ale oviluvialuvia. Va sukila oku wala ciwa uwalo wa yela haiwo wa fina okuti wa sungulukila epuluvi liaco.

Ovituwa vipi omunu a sukila oku lekisa poku papatisiwa? (Luka 3:21, 22)

Opapatiso lia Yesu olio ongangu yiwa kapapatiso Akristão koloneke vilo. Eye wa kũlĩhĩle okuti epapatiso, enanga limue li kuete esilivilo kuenje wa ci lekisa kovisimĩlo. Omo liaco, ocitumãlo cepapatiso ka citava okuti ci kala coku liteva, coku linga ovinjembe ale ovina vikuavo ka vi lekisa esumbilo vepuluvi liaco. Ka ci sunguluka okuti omunu noke liepapatiso o lekisa ovituwa vimue ndu okuti wa popeliwa ale. Ndaño okuti epapatiso epuluvi limue liesanju, esanju liaco li lekisiwe lonjila yimue ya sunguluka.

Oku liongolola kuenda oku kala la vamanji vekongelo, ci ka ku kuatisa ndati oku lekisa ovituwa vi likuata lelitumbiko liove ku Yehova?

Noke liepapatiso, momo lie ci kuetele esilivilo kokuove oku amamako oku kuata esokiyo liwa lioku lilongisa Embimbiliya pokolika kuenda oku panga onepa olonjanja viosi kupange woku kunda?

 OLONUMBI KAKULU VEKONGELO

Eci hundi umue ka papatisiwile a popia okuti o yongola oku papatisiwa, eye o sukila oku vetiyiwa oku tanga ciwa onepa yokuti, “Apulilo a Lingiwa ku Vana va Yongola Oku Papatisiwa,” yi sangiwa kemẽla 185-207 lielivulu lilo. Ci sukila oku pinga kokuaye oco a tange onepa yokuti, “Esapulo Kukundi ka Papatisiwile,” yi sangiwa oku upisa kemẽla 182, ku lombolola ndomo eye a pondola oku lipongiya oco a konomuise ulandu waco lakulu vekongelo. Ndomo ca lomboluiwa vulandu waco, eye o pondola oku talavaya lelivulu liaye kuenda oku kũlĩhĩsa ovina a soneha vokuenda kuakonomuiso. Pole, ka sukila oku konomuisa apulilo lomunu umue, osimbu akulu vekongelo ka va sapelele laye.

Omunu wosi o yongola oku papatisiwa, o sukila oku sapela la mitavaso yakulu vekongelo. Noke yomunu oku tanga onepa yokuti, “Apulilo a Lingiwa ku Vana va Yongola Oku Papatisiwa,” mitavaso yakulu vekongelo, o ka pula komunu waco nda wa likutilila oco a litumbike ku Yehova loku linga ocipango Caye. Nda omunu wa linga ale ohutililo yaco, mitavaso yakulu vekongelo o ka pinga okuti, akulu vavali vekongelo va konomuisa laye onepa yokuti, “Apulilo ku Vana va Yongola oku Papatisiwa.” Onepa lonepa yapulilo ku vana va yongola oku papatisiwa, yi konomuisiwa lukulu umue wa litepa wekongelo. Akonomuiso aco citava okuti a lingiwa osimbu ka kua lingiwile esapulo lieteke ku ka lingiwa ohongele yimbo ale ohongele yofeka.

 Olonepa viaco vivali, citava okuti vi lingiwa olonjanja vivali, okuti onepa lonepa owola yimosi ndaño citava okuti vi lingiwa volowola vialua nda ci sukiliwa. Onepa lonepa, yi fetika kuenda yi maluisiwa lohutililo. Ci kaile omunu o ka papatisiwa ale akulu vekongelo, ka citava okuti va kuata onjanga poku konomuisa apulilo aco. Akulu vekongelo va nõliwa, va sukila oku pitisa kovaso ekonomuiso liaco, ndaño okuti va kuete ovikele vikuavo.

Ciwa okuti apulilo a konomuisiwa la vana va ka papatisiwa, a lingiwa komunu lomunu okuti ka a konomuisiwa vocimunga. Eci omunu a tambulula apulilo aco osi, ci kuatisa akulu vekongelo oku kũlĩha okuti, omunu waco o kuete elomboloko lia suapo liocili Cembimbiliya kuenda ka kuli atatahãi okuti, eye wa lipongiyila oku papatisiwa. Handi vali, oku konomuisa omunu lomunu oco a papatisiwe, cecelela omunu waco oku lianja poku vangula. Olohueli citava okuti vi konomuisila kumosi olonepa viaco.

Eci ukulu umue wekongelo a konomuisa apulilo aco la manji umue ukãi, va sukila oku ci lingila pocitumãlo cimue okuti omanu va pondola oku va mola, pole, ka va yevi ovina va kasi oku popia. Nda ci sukiliwa oku kala lomunu ukuavo, eye o sukila oku kala ukulu wekongelo ale oñuatisi yekongelo, okuti catamba lika konepa yi ka konomuisiwa ndomo ci lomboluiwa vocinimbu ci kuãimo.

Nda ka kuli akulu valua vekongelo, oloñuatisi viekongelo via loñoloha, vina vi kuete ocituwa coku lekisa utate kuenda olondunge, va pondola oku konomuisa lomunu waco apulilo a sangiwa ”Konepa 1 losapi hati:  Alongiso Akristão.” Akulu vekongelo ovo lika va sukila oku konomuisa “Onepa 2 losapi hati: Omuenyo Wakristão.” Nda vekongelo ka muli vamanji valua alume va kuete ovikele, citava oku sapela lamanji ukuakunyula akongelo, oco a sande vekongelo likuavo manji umue o pondola oku kuatisa.

Nda okuti omõla umue o yongola oku papatisiwa, olonjali viaye Akristão ale umue pokati kavo, va sukila oku kala laye poku konomuisa olonepa viaco. Nda olonjali Akristão ale umue pokati kavo ka pondola oku kala laye, onepa lonepa yi sukila oku konomuisiwa lakulu vavali vekongelo ale lukulu umue wekongelo loñuatisi yimue yekongelo okuti, ca tamba lika konepa yi ka konomuisiwa.

Akulu vekongelo va sukila oku kũlĩhĩsa okuti, omunu o yongola oku papatisiwa, o kuete elomboloko limue lialongiso a velapo Embimbiliya. Handi vali, va sukila oku kũlĩha nda omunu waco wa kapako ocili kuenda o lekisa esumbilo kocisoko ca Yehova. Nda omunu waco ka kuete elomboloko lialongiso a velapo Embimbiliya, akulu vekongelo va ka linga esokiyo liokuti, eye o tambula ekuatiso oco a lipongiyile oku papatisiwa onjanja yikuavo. Vamue pamue va sukila otembo yimue oco va lekise okuti va kuete elomboloko lia suapo liovina, ndeci esilivilo liupange woku kunda kuenda oku pokola kolonumbi vi eciwa vocisoko. Akulu vekongelo, va sukila oku kuata utate oco va talavaye ciwa lotembo va ka konomuisa konepa lonepa vowola yimosi, ale ceci ci pitahãla owola, oco va kũlĩhĩse ciwa nda omunu waco wa lipongiyila oku papatisiwa. Ndaño okuti apulilo amue ambata otembo  yalua okuti akuavo ci sule, apulilo osi a sukila oku konomuisiwa.

Akulu vekongelo va nõliwa oco va konomuise apulilo aco, noke yonepa yavali, va ka li sapela kuenda va ka nõlapo nda omunu o ka papatisiwa ale sio. Ovo va kapako epindiso kuenda akalo a litepa omunu lomunu. Ocina ca velapo, oku kũlĩhĩsa nda omunu waco o kuetele ocisola Yehova kuenda elomboloko liocili Cembimbiliya. Lekuatiso lietu liocisola, vana va ka papatisiwa va ka lipongiya ciwa oco va tẽlise ocikele ca velapo tu kuete okuti, oku kunda olondaka viwa.

Noke, ukulu umue ale vavali vekongelo vana va konomuisa apulilo la vana va ka papatisiwa, lukundi waco, va ka sapela laye oco vo sapuile nda eye o ka papatisiwa muẽle ale sio. Nda omunu waco o ka papatisiwa, akulu vekongelo va ka konomuisa laye ulandu u sangiwa kemẽla 206-207 losapi hati, “ Ekonomuiso Lia Sulako la Vana va ka Papatisiwa.” Nda okuti omunu waco handi ka malele oku lilongisa elivulu losapi, Sanjukili Omuenyo Otembo ka yi Pui! akulu vekongelo vo vetiya oco a malusule elivulu liaco noke liepapatiso. Akulu vekongelo va sukila oku sapuila omunu o ka papatisiwa okuti eteke liepapatiso liaye, li sukila oku sonehiwa vocicapa cokuti, Ocicapa Cupange Wukundi Vekongelo, cina ca sokiyiwila omunu waco. Handi vali, akulu vekongelo va ka ivaluisa akundi vokaliye okuti ovolandu avo osi, a selekiwa ndomo ci likuata lolonumbi Violombangi Via Yehova, viatiamẽla koku teyuila ovolandu aco, ndomo ci sangiwa vo jw.org. Ombangulo yaco ka yi pitahãla akukutu ekũi.

 Eci pa pita unyamo tunde eci ukundi waco a papatisiwa, akulu vavali vekongelo, va sapela laye oco vo pamise loku u wĩha olonumbi vi pamisa. Umue pokati kakulu vekongelo, mitavaso yupange woku kunda ukundi waco a tiamẽla. Nda okuti ukundi waco umalẽhe, olonjali viaye Akristão, ale umue pokati kavo, o sukila oku kala kohongele yaco. Ohongele yaco yi sukila oku kala yesanju haiyo yi pamisa. Akulu vekongelo, va ka konomuisa ndomo ukundi waco a kula konepa yespiritu noke yepapatiso, loku eca kokuaye olonumbi viwa viatiamẽla konjila ndomo eye a pondola oku amamako lesokiyo liwa lielilongiso lio pokolika, oku tanga Embimbiliya, oku linga efendelo liepata olosemana viosi, oku enda enda kolohongele olonjanja viosi, loku panga onepa kokuavio kuenda oku enda olosemana viosi kupange woku kunda. (Va Efe. 5:15, 16) Nda okuti ukundi waco ka malele handi oku lilongisa elivulu Sanjukili Omuenyo Otembo ka yi Pui!, akulu vekongelo va ka linga esokiyo liokuti omunu umue o lilongisa laye. Akulu vekongelo, va sukila oku kala vakuacisola kuenda oku eca epandiyo. Olonjanja vialua, citava lika oku eca alungulo kuenda olonumbi viatiamẽla ketosi limosi ale avali.