OLONDAKA evi viupostolo Paulu via tukuiwa kukanda ku Va Heveru 13:7, citava okuti vi pongoluiwa ndoco: “Ivaluki vana va ku viali.” Oku upisa ko Pendekoste yunyamo 33 K. K., ovapostolo vakuekolelo va Ñala Yesu Kristu, va tẽlisa ocikele caco ndosungu yakulu, ya kala oku songuila loku eca olonumbi kekongelo Liakristão lia tumbikiwa ndopo. (Ovil. 6:2-4) Kunyamo 49 K. K., ocimunga cakulu ca vokiyiwile kuenda mua kongelele omanu vakuavo okuti, ovapostoloko va Yesu havoko lika. Eci kua potoluiwa ocitangi coku seviwa evamba, vosungu yakulu mua kongelele ‘ovapostolo lakulu ko Yerusalãi.’ (Ovil. 15:1, 2) Ocikele cavo ca kala coku tetulula ovitangi Akristão va kala oku liyaka lavio kolonepa viosi. Ovo va enda oku tuma ovikanda kuenda olonumbi vi pamisa akongelo, loku kuatisa olondonge oku likuata omunga kovisimĩlo kuenda kovilinga. Akongelo a enda oku pokola loku kapako olonumbi viosungu yakulu kuenda onima yeyililako yeyi okuti, va tambula asumũlũho a Yehova kuenje etendelo liava va tava lia livokiya eteke leteke.—Ovil. 8:1, 14, 15; 15:22-31; 16:4, 5; Hev. 13:17.

² Noke yolofa viovapostolo, unanguluke wa fetika. (2 Va Tes. 2:3-12) Ndomo Yesu a ci popele volusapo luaye luotiliku kuenda luosoka, kua kũlĩwa osoka (Akristão vakuakulikembisa) kilu liotiliku (Akristão  olombuavekua). Vokuenda kuanyamo, kua taviwa okuti ovimunga viaco vivali vi kulila kumosi toke koku ungula okuti, “kesulilo lioluali.” (Mat. 13:24-30, 36-43) Vokuenda kuotembo yaco, handi palo posi, pa kala Akristão olombuavekua. Pole, ka kua kaile osungu yakulu, ale Yesu ka kaile loku talavaya locimunga cimue oco a ece olonumbi kolondonge viaye. (Mat. 28:20) Pole, eye wa popele okuti vokuenda kuotembo yoku ungula ku ka pita epongoloko limue.

³ “Helie ukuenje wa kolelua haeye wa lunguka?” Eli lia kala epulilo limue Yesu Kristu a fetika lalio olusapo lumue ata ndonepa “yondimbukiso” eye a eca yatiamẽla “kesulilo liovina vi kasi voluali.” (Mat. 24:3, 42-47) Yesu wa lekisa okuti ukuenje wa kolelua wa laikele oku amamako lupange waye, poku eca okulia kuespiritu kafendeli va Suku “votembo ya sokiyiwa.” Ndeci Yesu a talavaya locimunga cimue calume oco va songuile upange kocita catete, ukuenje wa kolelua Yesu a kasi oku talavaya laye koloneke vilo via sulako, hamunu umosiko lika.

⁴ Helie Yesu a nõla oco a tekule olondonge viaye? Ndomo ca lavokawaile, eye wa talavaya Lakristão olombuavekua palo posi. Embimbiliya li va tukula okuti, “ovitunda viusoma,” via nõliwila oku sapula “‘ovilinga vi komõhisa’ via Una wa va kovonga oku tunda vowelema okuti, veya vocinyi caye ci komõhisa.’ (1 Pet. 2:9; Mal. 2:7; Esit. 12:17) Anga hẽ olombuavekua viosi voluali vi panga onepa kukuenje wakolelua? Sio. Eci Yesu a linga ocikomo coku tekula owiñi u soka 5.000 kalume,  okuti akãi lomãla ka va tendiwile, eye wa eca okulia kolondonge kuenje olondonge via eca okulia kuaco kowiñi. (Mat. 14:19) Eye wa tekula valua lekuatiso lietendelo litito liomanu va eca okulia kuaco. Koloneke vilo, eye wa siata oku kuama onjila yimuamue poku eca okulia kuespiritu.

⁵ Omo liaco, “kalei wa kolelua haeye wa lunguka” wa sokiyiwa locimunga citito Cakristão olombuavekua, va kuete ocikele coku pongiya loku eca okulia kuespiritu vokuenda kuoku tukuluka kua Kristu. (Luka 12:42) Koloneke vilo via sulako, “ukuenje wa kolelua haeye wa lunguka”, o lomboloka Osungu Yolombangi Via Yehova. Vamanji vaco olombuavekua, va talavayela kumosi kombala yoluali luosi.

⁶ Kristu o kuatisa ocimunga caco oco ci sandeke ovolandu a tiamẽla koku tẽlisiwa kuovitumasuku kuenda oku eca olonumbi vi lekisa ndomo ku kapiwako olonumbi Viembimbiliya eteke leteke. Okulia kuaco kuespiritu, ku eciwa pocakati cakongelo Olombangi Via Yehova. (Isa. 43:10; Va Gal. 6:16) Kosimbu, upika umue wa koleliwile eye wa kala usongui wonjo. Cimuamue haico okuti, ukuenje wa kolelua haeye wa lunguka wa tambula ocikele coku songuila epata vekolelo. Omo liaco, ukuenje wa kolelua haeye wa lunguka, ecavo olonumbi ndomo ku talavayiwa lovikuata kuenda upange woku kunda,  ovipama violohongele vimbo levi viofeka, ovikele viakulu vekongelo oco va tẽlise ovikele vialua vocisoko kuenda oku panga alivulu, oco ci kuatise “vakuanjo.”—Mat. 24:45.

⁷ Velie hẽ “vakuanjo”? Voku teta onimbu, vakuanjo vana va tekuiwa. Kefetikilo lioloneke via sulako, vosi vakuanjo va kala Akristão olombuavekua. Noke mua fetika oku kongeliwa “olomeme vikuavo.” (Yoa. 10:16) Ovimunga viaco vivali vi kuatisiwa lokulia kuespiritu ku eciwa lukuenje wa kolelua.

⁸ Vokuenda kuohali ya piãla, eci Yesu a keya oco a sombise oluali lulo lũvi, eye o ka “kundika cosi a kuete” kukuenje wa kolelua. (Mat. 24:46, 47) Vana va panga onepa kukuenje wa kolelua, va ka tambula onima yavo kilu. Kumue locisupe 144.000, ovo va ka viala la Kristu kilu. Ka ku ka kala vali umue ukuenje wa kolelua palo posi, pole, Yehova kuenda Yesu va ka eca olonumbi ku vana va ka piñala Usoma wa Mesiya palo posi, pocakati ca vana va ka nõliwa oco va talavaye “ndolombuale.”—Osa. 45:16.

⁹ Tu kuete asunga alua oku “ivaluka vana va songola” kuenda oku kolela kokuavo. Momo lie oku ci linga ci tu kuatisila? Upostolo Paulu hati: “Momo va kasi oku amamako oku vu lavi ndava va ka sombisiwa ndomo ci likuata lovilinga viavo, oco va ci linge lesanju halokulisiõsiõlako, momo eci nda ka cu kuatisi.” (Va Hev. 13:17) Omo liaco, ci kuete esilivilo kokuetu oku pokola kuenda  oku kapako olonumbi via vana va tu songuila, momo va tu tata oco va tu teyuile loku kuata ekalo liwa kespiritu.

¹⁰ Kukanda 1 Korindo 16:14, Paulu hati: “Ovina viosi vu linga, vi lingi locisola.” Olonjila viosi vi nõliwa oco vi kuatise afendeli va Suku, via kunamẽla kocituwa eci ca velapo okuti, ocisola. Catiamẽla kocisola, ukanda 1 Korindo 13:4-8 hati: “Ocisola ci pandikisa kuenda ci lingainga uwa. Ocisola ka ci kuete onya. Ka ci lipandiya kuenda ka ci litunula, ka ci lingi akutisasõi, ka ci sandi ovina vialio muẽle, ka ci temi lonjanga. Ka ci amamako oku patekela onyeño. Ka ci yolela ekambo liesunga, pole, ci yolaila locili. Cecaila ovina viosi, ci kolela ovina viosi, ci lavoka ovina viosi, ci pandakaisa kovina viosi. Ocisola lalimue eteke ci tokoka.” Omo okuti ocisola oco ono yolonjila viosi vi nõliwa oco vi kuatise afendeli va Yehova, tu kuete esunga lioku liyeva okuti tua kolapo poku songuiwa la vamanji vaco. Handi vali, onjila yaco yoku songola locisola yi situlula ocisola ca Yehova.

¹¹ Ndeci ca kala kocita catete, vana Yehova a nõla oco va songuile omanu vaye, alume ka va lipuile. Ocili, Yehova wa talavaya lomanu ka va lipuile oco va linge ocipango caye. Noha wa tunga ocimbaluku kuenda wa kunda eci catiamẽla kenyõleho lia laikele oku iya koloneke viaye. (Efet. 6:13, 14, 22; 2 Pet. 2:5) Mose wa nõliwa oco ope omanu va Yehova Kegito. (Etu. 3:10) Alume ka va lipuile va nõliwa oco va sonehe Embimbiliya. (2 Tim. 3:16; 2 Pet. 1:21) Yehova poku talavaya lomanu ka va lipuile koloneke vilo, oco va songuile upange woku kunda kuenda oku linga olondonge, ka ci tepulula ekolelo lietu kocisoko Caye. Pole, ci tu pamisa poku kũlĩha okuti, nda  ka ca kaile lekuatiso lia Yehova, ocisoko lalimue eteke nda ca tẽla oku linga ovina viosi ca siata oku linga. Omo liovina viosi via pita ale, oku kongelamo ovitangi vialua, ukuenje wa kolelua wa siata oku lekisa okuti, espiritu lia Suku li kasi oku songuila ovopange. Onepa yoposi yocisoko ca Yehova, ca siata oku tambula asumũlũho alua koloneke vilo. Omo liaco, etu tu kuatisa kuenda tua kolela kocisoko caco lutima wosi.

¹² Vana va nõliwila ovikele vekongelo, va lekisa okuti va kolela ku Yehova poku tava kovina viosi via kongela vovikele viavo kuenda oku vi tẽlisa lutima wosi. (Ovil. 20:28) Omo okuti tuakundi Vusoma, tu lekisa ombili poku kunda olondaka viwa konjo lanjo, oku linga apasu kuenda oku longisa omanu Embimbiliya. (Mat. 24:14; 28:19, 20) Oco tu kuatisiwe lokulia kuespiritu ku eciwa lukuenje wa kolelua, tu lipongiyila olohongele vietu, loku kalako, oku kongelamo olohongele vimbo kuenda viofeka. Tua siata oku pamisiwa calua omo lioku livetiya pokati eci tu kala kolohongele la vamanjetu.—Va Hev. 10:24, 25.

¹³ Tu lekisavo ekolelo lietu kocisoko poku eca olombanjaile vietu. (Olosap. 3:9, 10) Eci tu mõla okuti vamanjetu va kasi oku pita lovitangi, tu va kuatisa lonjanga. (Va Gal. 6:10; 1 Tim. 6:18) Etu tua siata oku ci linga omo liocisola tu li kuetele, loku lavulula apuluvi osi oco tu lekise ku Yehova kuenda kocisoko caye okuti tua sanjukila ovina viosi viwa va siata oku tu lingila.—Yoa. 13:35.

¹⁴ Tu lekisavo okuti tua kolela kocisoko poku tava kolonjila ci nõla. Voku ci linga, mua kongela oku kapako  lutima wosi olonumbi via “vana va songola,” vana tu sukila oku pokola kokuavo loku linga eci va tuma, ndeci vamanji va nyula akongelo kuenda akulu vekongelo. (Va Hev. 13:7, 17) Ndaño okuti pamue ka tu kuata elomboloko lia suapo lieci kua nõliwila onjila yimue, tua kũlĩha okuti oku tava konjila yaco olonjanja viosi ci ka tu kuatisa. Nda tua ci linga, Yehova o tu sumũlũisa omo lioku pokola Kondaka yaye kuenda kocisoko caye. Kuenje tu lekisa epokolo lietu ku Ñala yetu Yesu Kristu.

¹⁵ Tu kuete esunga lialua lioku kolela kukuenje wa kolelua haeye wa lunguka. Satana osuku yoluali lulo, o kasi oku likolisilako calua oco a vĩhise onduko ya Yehova kuenda ocisoko Caye. (2 Va Kor. 4:4) Kuata utate oco ku ka yapuisiwe latutu a Satana! (2 Va Kor. 2:11) Eliapu lia limbuka okuti kuo kambela lika ‘oloneke vitito’ oco limbiwe vekungu kuenda lia li kapelako oku yapuisa etendelo lialua liomanu va fendela Suku. (Esit. 12:12) Osimbu Satana a vokiya alikolisilo aye, tu amamiko oku vokiya ukamba wetu la Yehova. Tu koleli ku Yehova kuenda kono a siata oku talavaya layo oco a songuile afendeli vaye koloneke vilo. Oku ci linga, ci koka omunga pokati ketu.