“KEFETIKILO Suku wa lulika ovailu kuenda ongongo,” kuenje ovina viosi ‘a lulika via posoka calua.’ (Efet. 1:1, 31) Yehova wa lulika omanu lelavoko li komohĩsa lio kovaso yoloneke. Pole, omo liesino lia lingiwa vocumbo Cedene, elavoko liaco lioku kuata esanju ka lia kaile otembo yalua. Ocili okuti, ocipango ca Yehova catiamẽla kongongo ka ca pongolokele. Suku wa lekisa okuti, ovitumbulukila via Adama vakuepokolo vi ka yovuiwa. Efendelo liocili lia laikele oku tumbuluiwa kuenda Suku o ka kundula olondingaĩvi kumue lovilinga viavo vĩvi. (Efet. 3:15) Ovina viosi via laikele vali oku “posoka.” Yehova o ka tẽlisa ocipango caye pocakati Comõlaye, Yesu Kristu. (1 Yoa. 3:8) Omo liaco, ci kuete esilivilo oku limbuka ocikele Suku a eca ku Kristu.—Ovil. 4:12; Va Fil. 2:9, 11.

² Poku sokolola kocikele Suku a eca ku Kristu, tu limbuka okuti ocikele caco ci kuete esilivilo lialua. Yesu eye Onjovoli yomanu, Ocitunda Cinene, Utue wekongelo Liakristão kuenda cilo, Osoma Yusoma wa Suku. Oku sokolola kovina viaco, ci vokiya onjongole yetu yoku mola ndomo Suku a siata oku ongotiya ovina kuenda kocisola cetu tu kuetele Yesu Kristu. Embimbiliya li situlula amue pokati kovopange aye.

 ³ Kristu vokuenda kupange waye woku kunda palo posi, kua limbukiwa okuti, omanu vakuepokolo va pondola oku linalisa la Suku pocakati ca Yesu. (Yoa. 14:6) Omo okuti Yesu eye Onjovoli yomanu, wa eca omuenyo waye oco a yovole omanu valua. (Mat. 20:28) Yesu eye ongangu yiwa yoku lekisa ovituwa vi sanjuisa Suku. Eye omunu wa velapo poku tẽlisiwa kuocipango ca Suku catiamẽla komanu. Eye lika o tẽla oku tu kuatisa oku kuata ohenda ya Suku. (Ovil. 5:31; 2 Va Kor. 5:18, 19) Olofa via Yesu kuenda epinduko liaye, via yikula onjila oco okuti omanu vakuepokolo, va tambula asumũlũho ka a pui vemẽhi Liusoma wa Suku.

⁴ Omo okuti Yesu eye Ocitunda Cinene, “wa kapako oku hongua kuetu” loku tuvika akandu vomanu vana vakuekolelo va kasi palo posi. Upostolo Paulu wa popia hati: “Momo ka tu kuete ocitunda cinene okuti ka ca kapeleko oku hongua kuetu, pole, tu kuete cimue ca setekiwa kovina viosi ndetu, pole, ka ci kuete ekandu.” Noke Paulu wa vetiya vana va kolela Yesu Kristu oku upa esilivilo kaliangiliyo aco okuti va linalisa la Suku poku popia hati: “Omo liaco, tu ameli kocalo cohenda ya piãla lutõi woku vangula, oco tu tambule ocali kuenda oku sanga ohenda ya piãla eci tu sukila ekuatiso.”—Va Hev. 4:14-16; 1 Yoa. 2:2.

⁵ Yesu eye Utue wekongelo Liakristão. Ndeci olondonge viaye vio kocita catete via linga, etu koloneke vilo ka tu sukila usongui umue womunu. Yesu wa siata oku tu ĩha olonumbi pocakati cespiritu sandu kuenda cakulu vekongelo vana va loñoloha okuti, va kuete ocikele kovaso aye kuenda kovaso a Isiaye coku lava ocunda  ca Suku. (Va Hev. 13:17; 1 Pet. 5:2, 3) Poku popia catiamẽla ku Yesu, Yehova wa popia hati: “Tali! Ame ndo lingisa ombangi yimue yolofeka, usongui umue kuenda kesongo kolofeka.” (Isa. 55:4) Yesu wa tẽlisa ocitumasuku caco poku popia hati: “Ko ka tukuiwi hati asongui, momo Usongui wene umosi lika, Kristu.”—Mat. 23:10.

⁶ Yesu womboka haeye embombe kuenda o yongola oku tu kuatisa. Uvangi waco tu u limbukila kolondaka a popia viokuti: “Enjui kokuange, ene vosi wa kavi haene vu kuete ovilemo kuenje ndi vu kavuluisi. Tambuli okanga yange kuenda lilongisili kokuange, momo ame ndomboka haime ndonjuka vutima kuenje vu sanga ekavuluko. Momo okanga yange ya sunguluka kuenda ocitele cange ca lela.” (Mat. 11:28-30) Yesu Kristu o songuila ekongelo Liakristão lumbombe kuenda lonjila yimue yi tu nenela ekavuluko. Eci ci lekisa okuti eye “ungombo uwa,” poku setukula ongangu ya Isiaye Yehova Suku.—Yoa. 10:11; Isa. 40:11.

⁷ Paulu kukanda waye watete ku Va Korindo, wa lombolola ocikele cikuavo ca Yesu Kristu poku popia hati: “Momo eye o sukila oku viala ndosoma toke eci Suku a kapa ovanyãli vosi vemẽhi liolomãhi viaye. Pole, eci ovina viosi vi pokuisua kokuaye, Omõla layevo o ka pokola ku Una wo pokuisa ovina viosi oco okuti, Suku o kala utue wovina viosi komanu vosi.” (1 Va Kor. 15:25, 28) Osimbu Yesu keyile palo posi, wa kala “ndomesele ya loñoloha”  kuenda eye wa kala ociluvo catete Suku a lulika. (Olosap. 8:22-31) Eci Suku a tuma Yesu palo posi, eye wa linga ocipango ca Suku vapuluvi osi. Eye wa pandikisa koseteko ya tĩla calua kuenda wamamako oku lekisa ekolelo ku Isiaye toke kolofa. (Yoa. 4:34; 15:10) Omo okuti Omõla wa lekisa ekolelo toke kolofa, Suku wo pindula oco a tambule omuenyo kilu kuenda wo wĩha omoko yoku kala Osoma Yusoma wokilu. (Ovil. 2:32-36) Omo okuti Kristu eye Osoma, wa tambula ocikele cimue cinene coku songuila oviluvo vio kilu oco a kundule ovoviali omanu loku malako ungangala wosi wa siata oku lingiwa palo posi. (Olosap. 2:21, 22; 2 Va Tes. 1:6-9; Esit. 19:11-21; 20:1-3) Omo liaco, Usoma wa Suku vemẽhi liuviali wa Kristu, owo lika u viala palo posi.—Esit. 11:15.

⁸ Yesu Kristu Ongangu yetu, wa lipuile. Eye wa tambula ocikele coku tu tata. Oco tu kuatisiwe leteyuilo liaye liocisola, tu sukila oku amamako oku kolela Yehova loku kuama ocisoko caye.

⁹ Olondonge via Yesu vio kocita catete via limbukile ocikele ca Kristu. Ovio via ci lekisa poku talavaya lomunga vemẽhi lionumbi va tambuile pocakati cespiritu sandu. (Ovil. 15:12-21) Upostolo Paulu wa tiamisila omunga yaco yekongelo liolombuavekua poku soneha hati: “Pole, oku vangula muẽle ocili, locisola tu lingi akulu vendamba kovina viosi vu Kristu okuti, eye utue. Vokuaye etimba liosi li litokeka pamosi kuenda li likuatisa pokati lasokoluilo osi okuti, lieca eci ci sukiliwa. Eci ocimatamata locimatamata ci talavaya ciwa, ci kuatisa etimba  oku kula, osimbu olio li li pamisa locisola.”—Va Efe. 4:15, 16.

¹⁰ Nda vosi vekongelo va talavayela kumosi loku kuama onumbi ya Kristu yoku songola, ci kuatisa oku kula konepa yespiritu kuenda ci kuatisa oku kuata ombembua okuti, yi “tokeka omanu vomunga yimuamue.”—Yoa. 10:16; Va Kol. 3:14; 1 Va Kor. 12:14-26.

¹¹ Ovina vi kasi oku pita voluali okuti vi kasi oku tẽlisa ovitumasuku, vi lekisa okuti Yesu Kristu wa tambula Unene woku viala tunde kunyamo wo 1914. Eye cilo o kasi oku viala pokati kovanyãli vaye. (Osa. 2:1-12; 110:1, 2) Eci ci lomboloka nye komanu va kasi palo posi? Yesu ndopo o ka tẽlisa ocikele caye coku kala Osoma yolosoma kuenda Ñala yoloñala, eci a ka sombisa ovanyãli vaye. (Esit. 11:15; 12:10; 19:16) Noke, ohuminyo yepopelo Yehova a linga kefetikilo liesino liomanu, yi ka tẽlisiwa oco yi kuatise vana va ka vialiwa la Kristu haivo va taviwa laye. (Mat. 25:34) Tu kuete esanju omo lioku kũlĩha ocikele Suku a eca ku Kristu! Vokuenda kuoloneke vilo via sulako, tu yongola oku amamako oku linga ocipango ca Yehova kumue la vamanjetu, poku limbuka ocikele ca Kristu.