OMO okuti tuafendeli va Yehova va litumbika kokuaye, tu kuete ocikele coku situlula ulamba waye kolondaka kuenda kovina tu linga. Upostolo Paulu wa tukula onumbi yaco yi tu songuila, poku soneha hati: “Omo liaco nda vu lia, ale vu nyua, pamue vu linga ovina vikuavo, lingili ovina viosi ulamba wa Suku.” (1 Va Kor. 10:31) Voku ci linga, mua kongela oku kapako olonumbi viesunga via Yehova, vina vi situlula ovituwa viaye via lipua. (Va Kol. 3:10) Omo okuti tumanu va kola, tu sukila oku kala olosetukuli via Suku.—Va Efe. 5:1, 2.

² Poku sapuila ondaka yaco Kakristão, upostolo Petulu wa soneha ndoco: “Ndomãla va pokola, liwekipo oku pongoluiwa loloñeyi vĩvi wa kuateli osimbu wa kali vonumbi, puãi ndeci Una wo kovongi a Kola, lenevo koli kovituwa viene viosi, momo ca sonehiwa citi: “Vu sukila oku kola, momo ame ndi kola.” (1 Pet. 1:14-16) Ndeci va Isareli va linga, vosi vekongelo Liakristão va sukila oku kala omanu va kola. Eci ci lomboloka okuti va sukila oku pua etondelo, va yuvula oku linga ekandu kuenda ovituwa violuali. Poku ci linga, va nõliwa oco va linge upange u kola.—Etu. 20:5.

³ Etu tu amamako oku kala omanu va kola, poku lekisa epokolo kovihandeleko kuenda kolonumbi via Yehova, vina vi sangiwa Vovisonehua vi Kola. (2 Tim. 3:16) Poku tanga Embimbiliya tua lilongisa eci catiamẽla ku Yehova  kuenda kolonjila viaye kuenje tua kokiwa laye. Elilongiso liaco, lia tu kuatisa oku limbuka okuti, tu sukila tete oku sanda Usoma wa Suku loku linga ocipango ca Yehova okuti, oco ocina ca velapo komuenyo wetu. (Mat. 6:33; Va Rom. 12:2) Eci ci kisika okuti tu wala omunu wokaliye.—Va Efe. 4:22-24.

⁴ Oku kapako olonumbi viesunga via Yehova, olonjanja vimue ka ca lelukile. Unyãli wetu Satana Eliapu, o seteka oku tu yapula vocili. Ovituwa violuali kuenda ekambo lietu lioku lipua, vi koka okuti ka ci leluka. Oco tu lekise ovituwa vi likuata lelitumbiko lietu, tu sukila oku yaka uyaki umue konepa yespiritu. Embimbiliya li lekisa okuti, ka tu sukila oku komõha poku liyaka lalambalalo ale oloseteko. Ocili okuti tu ka tala ohali omo liesunga. (2 Tim. 3:12) Pole, tu pondola oku kuata esanju poku liyaka lovitangi momo ceca uvangi wokuti, tu kasi oku linga ocipango ca Yehova.—1 Pet. 3:14-16; 4:12, 14-16.

⁵ Yesu ndaño okuti wa lipuile, wa lilongisa epokolo omo liohali a tala. Eye ka yapuisiwile loloseteko via Satana kuenda ka livelele ovina violuali. (Mat. 4:1-11; Yoa. 6:15) Yesu lalimue eteke a simĩle oku liwekapo oku kala ukuacili. Ocituwa caye cekolelo, ca koka okuti oluali lu u suvuka, pole, wa kakatelele kolonumbi viesunga via Yehova. Eci olofa via Yesu via kala ocipepi, wa sapuila olondonge viaye okuti oluali lua lakelevo oku va suvuka. Tunde kotembo yaco, olondonge viaye via siata oku tala ohali, pole, oku kũlĩha okuti Omõla a Suku wa yula oluali, ci va kuatisa oku kuata utõi.—Yoa. 15:19; 16:33; 17:16.

 ⁶ Oco tu yuvule oku panga onepa koluali, tu sukila oku teyuila olonumbi viesunga via Yehova ndeci Yesu Ulongisi wetu a linga. Ka tu sukila lika oku yuvula oku panga onepa kopulitika yoluali, pole, tu sukila oku yuvula ovituwa vĩvi. Tu kapako elungulo li sangiwa kelivulu lia Tiago 1:21 liokuti: “Imbipo eliño liosi, levĩho liosi kuenda tavi lumbombe ondaka ya kũliwa la Suku yina yi tẽla oku vu popeli.” Poku lilongisa Embimbiliya loku enda enda kolohongele, tu pondola oku limbuka “oku kũliwa kuondaka” yocili vovisimĩlo lo vutima wetu kuenda lalimue eteke tu ka livela ovina violuali. Ndonge Tiago wa soneha ndoco: “Ka wa kũlĩhĩli okuti ukamba loluali ukuse la Suku? Omo liaco, wosi o yongola oku kala ekamba lioluali, o li lingisa unyãli wa Suku.” (Tia. 4:4) Vembimbiliya mu sangiwa elungulo liwa li tu kuatisa oku kakatela kolonumbi viesunga via Yehova kuenda oku litepa loluali.

⁷ Ondaka ya Suku yi tu lungula oku yuvula ovituwa via vĩha kuenda ovituwa vina vi kutisa osõi. Oyo yi tu sapuila hati: “Evĩho liukahonga lovina viosi via vĩha, ale ocipululu ka vi ka tukuiwe pokati kene, pole, lingi ndeci ca siata komanu va kola.” (Va Efe. 5:3) Omo liaco, ka tu ka eceleli oku tiamisila ovisimĩlo vietu kovina via vĩha ale kovina vi kutisa osõi. Kuenda ka tu ka ecelelivo okuti ovina viaco, vi panga onepa kolombangulo vietu. Nda tua ci linga tu ka lekisa okuti, tu yongola oku kuama olonumbi viwa via Yehova vina via lipua havio viesunga.

⁸ Akristão ka va sukila lika oku liyelisa konepa yespiritu kuenda kovisimĩlo, pole, va kũlĩha esilivilo lioku liyelisa  ketimba. Ko Isareli yosimbu, Suku una o kola, wa kisikile okuti ocilombo ca sukilile oku yelisiwa. Etu tu sukilavo oku liyelisa oco Yehova “ka ka mole ocina cimue ca vĩha” kokuetu.—Esin. 23:14.

⁹ Vembimbiliya ondaka oku kola kuenda oku liyelisa ketimba, vi kuete elitokeko. Paulu wa soneha ndoco: “Tu liyelisi kevĩho liosi lio ketimba kuenda vutima oco okuti, tu kola vali enene koku sumbila Suku.” (2 Va Kor. 7:1) Omo liaco, Akristão vosi va sukila oku likolisilako oku liyelisa ketimba, poku kuata ocituwa coku yua kuenda oku sukula ovowalo avo. Ndaño okuti ekalo liomuenyo lia litepa vofeka lofeka, pole, ci tẽliwa oku sanga ovava kuenda onjapãu vioku liyelisa loku yelisavo omãla.

¹⁰ Omo liupange wetu woku kunda, tua kũlĩhĩwa calua lomanu tu lisungue lavo. Oku yelisa onjo yetu loku yongotiya ciwa vokati kuenda kosamua, uvangi umue uwa komanu tu lisungue lavo. Eci ocina cimue vosi vepata va sukila oku linga. Ndeci, alume Akristão va pondola oku tata kosamua yonjo, momo va kũlĩha okuti konjo yimue kuenda kocitali nda kua yela ciwa, ceca uvangi uwa komanu vakuavo. Utate waco kuenda oku tẽlisa ovikele viespiritu, ci lekisa okuti alume va kasi oku songuila ciwa epata liavo. (1 Tim. 3:4, 12) Akãi Akristão va kuetevo ovikele ca piãla enene poku tata onjo. (Tito 2:4, 5)  Omãla va pindisiwa ciwa, va panga onepa yavo poku liyelisa ketimba kuenda oku yelisavo ohondo yavo. Poku ci linga, epata li kuatisa oku sokiya olonumbi vioku liyelisa, vina vi ka kala voluali luokaliye vemẽhi Liusoma wa Suku.

¹¹ Afendeli valua va Yehova koloneke vilo, va kuete akãlu kuenda olomoto vioku enda enda kolohongele. Kovitumãlo vimue ovina viaco vi sukiliwa, oco va ende lavio kupange woku kunda. Olonjanja viosi vi sukila oku yelisiwa loku tatiwa ciwa. Onjo yetu kuenda ocendelo cetu, vi sukila oku situlula okuti, tuafendeli va Yehova va yela haivo va kola. Onumbi yaco yi tiamisiwilavo konjila ndomo tu tata Embimbiliya lietu kuenda ekolombele tu ambata kupange woku kunda.

¹² Uwalo wetu kuenda onjila ndomo tu liposuisa, vi sukila oku likuata lolonumbi via Suku. Nda okuti tu ka lisanga lomunu umue wa velapo, ocili okuti tu sukila oku wala loku liposuisa ciwa. Cimuamue haico tu sukila oku linga, poku situlula Yehova kupange woku kunda ale kembumbua! Onjila ndomo tu liposuisa kuenda uwalo wetu, yi situlula ndomo omanu va tenda efendelo lia Yehova. Ocili okuti, tu sukila oku lekisa esunguluko ale oku kapako vakuetu. (Mika 6:8; 1 Va Kor. 10:31-33; 1 Tim. 2:9, 10) Omo liaco, poku lipongiya oco tuende kupange woku kunda, kolohongele viekongelo, kolohongele vimbo kuenda kolohongele viofeka, tu sukila oku ivaluka ovina Embimbiliya li popia viatiamẽla koku liyelisa ketimba kuenda koku liposuisa ciwa. Olonjanja viosi tu yongola oku eca ulamba lesivayo ku Yehova.

 ¹³ Onumbi yaco yi kuamiwavo eci tu nyula ombala Yolombangi Via Yehova voluali luosi ale o Betele yimue Yolombangi Via Yehova. Ivaluka okuti onduko o Betele, yi lomboloka “Onjo ya Suku.” Omo liaco, tu sukila oku wala loku lekisa ovituwa ndevi tu lekisa eci tu enda kohongele yimue Vonjango Yusoma.

¹⁴ Ndaño ceci tu linga olomapalo, tu sukila oku kũlĩhĩsa ciwa uwalo wetu kuenda konjila ndomo tu liposuisa. Tu pondola oku lipula ndoco: ‘Anga hẽ ndi kuata osõi poku eca uvangi ka wa sokiyiwile omo liuwalo nda wala’?

¹⁵ Tu sukila epuyuko loku linga olomapalo oco tu kuate uhayele ketimba kuenda kovisimĩlo. Onjanja yimue Yesu wa lalekele olondonge viaye oku enda kocitumãlo cimue “oco va ka puyukepo kamue.” (Mar. 6:31) Epuyuko kuenda omapalo yiwa ale ovitalukilo, vi pondola oku tu nenela esanju. Vi pondolavo oku tu nenela ekavuluko oco tu amameko lupange wetu.

¹⁶ Omo okuti kuli olonjila vialua vioku linga olomapalo koloneke vilo, Akristão va sukila oku kuata utate loku lekisa olondunge vio kilu poku linga olomapalo. Ndaño okuti olomapalo vi sukila oku kuata ocitumãlo cavio, pole, hacoko ocina ca velapo komuenyo. Tua lunguiwa okuti “koloneke via sulako,” omanu va ka kala “vakuakusola ayele okuti Suku ci sule.” (2 Tim. 3:1, 4) Olomapalo vialua vi situlula ovituwa via vĩha okuti, ka vi likuata lolonumbi viesunga via Yehova.

¹⁷ Akristão vo kocita catete, va sukilile oku pandikisa kekalo ka lia sungulukile liomanu voluali vo koloneke  viaco okuti, va enda lika oku tiamisila utima koku sanda ayele. Kolomapalo via enda oku lingiwa ko Roma, omanu va enda oku sanjukila ohali ya vakuavo loku yi tenda ndocitalukilo. Ungangala, oku pesela osonde kuenda evĩho liukahonga, via enda oku lekisiwa oco vi taluise omanu, pole, Akristão va enda oku yuvula ovina viaco. Koloneke vilo, onepa yalua yolomapalo violuali, vi lekisa ovina vimuamue kuenda vi vetiya olonjongole ka via sungulukile viomanu. Tu sukila “oku lavulula” olonjila vietu loku yuvula olomapalo ka via sungulukile. (Va Efe. 5:15, 16; Osa. 11:5) Ndaño okuti ovitalukilo vimue ka vi lekisa ovina ka via sungulukile, pamue ovina vi lingiwa ka vi taviwa.—1 Pet. 4:1-4.

¹⁸ Kuli olomapalo kuenda ovitalukilo vialua Akristão va pondola oku linga. Valua va kuatisiwa poku kapako olonumbi Viembimbiliya kuenda vina vi sangiwa valivulu etu.

¹⁹ Olonjanja vimue apata amue a lalekiwa konjo yamanji umue oco va pite laye otembo yimue. Ale citava okuti, vamanji vamue va lalekiwa kocipito cimue cuvala ale kocipito cikuavo. (Yoa. 2:2) Omanu vana va laleka vakuavo, va sukila oku kuata ocikele covina viosi vi pita kocitumãlo caco. Ci sukila oku kuata utate eci omanu valua va liongoluila pamosi. Ekalo liovipito viaco lia siata oku koka okuti, vamue ka va lekisa vali ovituwa viwa Viukristão, okuti va lia calua ale oku nyua calua toke muẽle va linga akandu akuavo anene. Kovina viaco, Akristão va lekisa olondunge ketendelo liomanu va laleka kuenda otembo ocipito caco ci kala. Nda ku kala ovinyua vi koluisa, va sukila oku lekisa utate. (Va Fil. 4:5) Nda cosi  ca lingiwa oco olomapalo viaco viende ciwa kuenda vi pamise konepa yespiritu, okulia lovinyua, ka vi ka kala ovina via velapo.

²⁰ Ciwa oku lekisa ocituwa coku yekisa. (1 Pet. 4:9) Eci tu laleka vamanji vakuavo konjo yetu, oco tu linge omapalo yimue, oku sapela kuenda oku lia, tu sukila oku ivaluka vamanji ka va kuete ovina vialua. (Luka 14:12-14) Nda okuti etu tua lalekiwa, ovituwa vietu vi sukila oku likuata lelungulo li sangiwa kelivulu lia Marko 12:31. Olonjanja viosi, ciwa oku lekisa olopandu kuenda ohenda ya lekisiwa kokuetu.

²¹ Akristão va sanjukila olombanjaile viohenda ya Suku kuenda va kũlĩha okuti, ‘va sukila oku lia loku nyua, loku sanga esanju omo liupange wavo.’ (Uku. 3:12, 13) Eci tu lingila “ovina viosi ulamba wa Suku” kolomapalo, ci kaile nda okuti etu tua laleka ale tua lalekiwa, tu kuata esanju poku ivaluka okuti, apuluvi aco a kavuluisa konepa yespiritu.

²² Omãla Volombangi Via Yehova va kuatisiwa, poku pindisiwila kosikola. Osimbu va kasi kosikola, va likolisilako oku tanga loku soneha ciwa. Ovina vikuavo vi longisiwa kosikola, vi kuatisavo amalẽhe osimbu va litumbikila ovimãho konepa yespiritu. Vokuenda kuanyamo va kasi oku tanga kosikola, ovo va sukila oku likolisilako oku ivaluka Ululiki wavo wa Velapo, poku pitisa kovaso ovina viespiritu.—Uku. 12:1.

²³ Nda ove wumalẽhe umue Ukristão, kuata utate oco ku ka pite otembo yalua lamalẽhe voluali nda ka kuli  esunga liaco. (2 Tim. 3:1, 2) Yehova o tu ĩha akuatiso alua oco tu liteyuile kovituwa vimue violuali. Omo liaco, o sukila oku vi konomuisa oco o liteyuile kovituwa viaco. (Osa. 23:4; 91:1, 2) Oco o liteyuile, talavaya ciwa laliangiliyo a Yehova.—Osa. 23:5.

²⁴ Amalẽhe valua Olombangi Via Yehova, oco ka va ka pange onepa yoluali osimbu va kasi kosikola, va nõlapo oku yuvula oku linga ovopange alua a lingiwa kosikola. Pamue ka ca lelukile ku vana va tangela kumosi ale kalongisi, oku kuata elomboloko liaco. Pole, ca velapo oku sanjuisa Suku. Eci ci lomboloka okuti, ove o sukila oku talavaya lowanji wove wo vutima wa pindisiwa Lembimbiliya, loku nõlapo oku yuvula ovituwa vioku lisokisa la vakuene kuenda o pulitika. (Va Gal. 5:19, 26) Poku kapako olonumbi Viembimbiliya via eciwa lolonjali Akristão kuenda oku kuatisiwa lakamba vawa vo vekongelo, ene wamalẽhe vu pondola oku kakatela kolonumbi viesunga via Yehova.

²⁵ Asongui vepata va kuete ocikele coku tata vakuepata liavo. (1 Tim. 5:8) Pole, afendeli va Suku va limbuka okuti upange wavo woku sanda eteku, ka wa velelepo okuti ovina viespiritu vi sule. (Mat. 6:33; Va Rom. 11:13) Poku vumba Suku loku sanjukila okulia kuenda ovowalo va kuete, ovo va yuvula asakalalo kuenda olonjanjo vioku kuata ovokuasi.—1 Tim. 6:6-10.

²⁶ Akristão vosi va litumbika ku Yehova okuti va talavaya ocipãla, va sukila oku kapako olonumbi Viembimbiliya. Oco tu sande eteku lonjila yimue ya sunguluka,  tu sukila oku yuvula ovituwa ka vi likuata lovihandeleko via Yehova ale lovihandeleko viofeka. (Va Rom. 13:1, 2; 1 Va Kor. 6:9, 10) Etu tuasualali va Kristu, tu yuvula olomĩlu vina vi nyõla ekolelo lietu ale vina vi kapa kohele ukamba wetu la Yehova. (Isa. 2:4; 2 Tim. 2:4) Olonjanja viosi tu ivaluki ohele yi tunda koku kuata akamba vãvi. Kuenda tu yuvuli oku panga onepa “ko Bavulono Yinene” okuti unyãli wa Suku.—Esit. 18:2, 4; 2 Va Kor. 6:14-17.

²⁷ Nda tua kakatela kolonumbi viesunga via Suku, tu ka yuvula oku linga olomĩlu kuenda ovina vikuavo, viatiamẽla kokuetu muẽle eci tu kasi kolohongele Viakristão. Ocimãho coku liongolola kolohongele Viakristão, kolohongele vimbo kuenda viofeka, oku fendela lika Yehova. Vapuluvi aco, tu litekuila komesa ya Yehova loku “lipamisa pokati.” (Va Rom. 1:11, 12; Va Hev. 10:24, 25) Olohongele viaco, vi sukila oku kala lika viovina viespiritu.

²⁸ Olonumbi viesunga via Yehova vi kisika okuti, afendeli vaye va ‘likolisilako oku amamako lomunga yavo, yina va tambula omo liespiritu sandu.’ (Va Efe. 4:1-3) Ovo ka va sandi oku lisanjuisa ovo muẽle, pole, omunu lomunu o sanda oku lingila eci ciwa vakuavo. (1 Va Tes. 5:15) Eli olio ekalo o ka sanga vekongelo o kasi. Ndaño okuti va kuete ekova lia litepa, va tunda kofeka ya litepa, va kuete ekalo liomuenyo ale epindiso lia litepa, pole, vosi va songuiwa lepindiso limuamue liesunga. Toke muẽle omanu vana ka va lilongisa Embimbiliya va  limbuka okuti, oco ocituwa cafendeli va Yehova.—1 Pet. 2:12.

²⁹ Poku tukula vali catiamẽla kono yomunga yaco, Embimbiliya li popia okuti: “Kuli etimba limosi kuenda espiritu limosi, ndeci wa kovongiwi lelavoko limosi; kuli Ñala umosi, ekolelo limosi, epapatiso limosi; Suku umosi haeye Isia ya vosi, una wa velapo vosi, pocakati ca vosi kuenda ku vosi.” (Va Efe. 4:4-6) Olondaka evi, vi tu vetiya oku likuata omunga ci kaile koku kuata elomboloko lialongiso Embimbiliya a pita pokati, ale lialongiso ondongosi. Poku ci linga tu lekisa okuti, tu tava kuviali wa Yehova. Ocili okuti, Yehova wa siata oku eca kafendeli vaye elimi limue lia pua esanda oco okuti, vo vumbila kumosi vomunga.—Sof. 3:9.

³⁰ Omunga kuenda ombembua yi sangiwa vekongelo Liakristão, ovio ono yekavuluko komanu vosi va fendela Yehova. Tua siata oku mola oku tẽlisiwa kuohuminyo ya Yehova yokuti: “Ndi ka vi kapa pamosi ndolomeme vi kasi vocunda.” (Mika 2:12) Tu yongola oku amamako lomunga yaco yombembua poku kakatela kolonumbi viaye viesunga.

³¹ Vosi vana va tava oku tiamẽla kekongelo lia Yehova, va kuete esanju lialua! Oku tukuiwa londuko ya Yehova, oco ocina ca velapo okuti alikolisilo tu pondola oku linga a sule. Osimbu tu amamako oku kala akamba vaye, tu likolisiliko oku kakatela kolonumbi viaye viesunga loku vetiyavo vakuetu oku ci linga.—2 Va Kor. 3:18.