VOKUENDA kueci ci soka 1.500 kanyamo, va Isareli va kala omanu vamue va tukuiwile londuko ya Yehova. Noke Yehova wa “ivaluka omanu vo kolofeka vikuavo kuenda pokati kavo eye wa fetika oku nõla omanu vambata onduko yaye.” (Ovil. 15:14) Omanu va tukuiwile londuko ya Yehova, va laikele oku kala olombangi viaye vi likuete omunga kovisimĩlo kuenda kovina va linga ndaño okuti, va tunda kolonepa via litepa violuali. Omanu vaco, va laikele oku ongoluiwa lekuatiso liupange woku kunda una Yesu a handeleka olondonge viaye oku linga poku popia hati: “Kuendi, ka longisi omanu vo kolofeka viosi oco va linge olondonge viange, va papatisili vonduko ya Tate la Mõla kuenda yespiritu sandu, va longisi oku linga ovina viosi ndo kundiki. Kuenje ñasi kumue lene oloneke viosi, toke kesulilo lioluali.”—Mat. 28:19, 20.

² Poku litumbika ku Yehova kuenda oku papatisiwa, ove wa linga ondonge ya Yesu Kristu. Ove o panga onepa kocisoko cimue ci likuete omunga voluali luosi cina ka cecelela okuti, oku litepa kuolofeka, apata, ale ekalo liomuenyo, ka vi koki olonepele pokati kavo. (Osa. 133:1) Omo liaco, ove o sole kuenda wa sumbila vamanjove vekongelo. Vamue pokati kavo vakuekova lia litepa, epata ale va pindisiwa lonjila yimue ya litepa okuti, omanu vamue ove nda wa yuvula oku kala lavo, omo lioku litepa kuaco. Ove o kuetele ocisola omanu vaco okuti, ocisola  caco ca velapo calua ukamba o kuetele omanu vakuavo, ci kaile vakuetavo ale epata.—Mar. 10:29, 30; Va Kol. 3:14; 1 Pet. 1:22.

³ Komanu vamue pamue ka ca lelukile oku yula ocame catiamẽla kekova, ko pulitika kuenda kovina vikuavo. Pole, va sukila oku sokolola kongangu Yakristão va Yudea vo kocita catete. Ovo va sukilile oku yuvula ocame catiamẽla ketavo cina va kuatelele omanu vo kolofeka vikuavo. Upostolo Petulu wa liyaka locitangi caco. Omo liaco, eci a tambula ocihandeleko coku enda konjo ya Korneliu una wa kala kesongo kolohoka via va Roma, Yehova lohenda wo pongiya oco a tẽlise ocikele caco.—Ovilinga ocipama 10.

⁴ Yehova wa ci linga ndati? Vocinjonde cimue, Petulu wa tambula ocihandeleko coku ponda kuenda coku lia ovinyama vimue okuti ku va Yudea, via vĩhisiwile. Eci eye a likala oku ci linga, ondaka yimue ya tunda kilu yiti: “Liwekapo oku tukula ovina Suku a yelisa okuti via vĩha.” (Ovil. 10:15) Ovina viaco via sukiliwile oco Petulu a pongolole ovisimĩlo viaye, loku pongiya utima omo liocikele a laikele oku tambula coku nyula ulume umue ukualofeka. Poku pokola konumbi ya Yehova, Petulu wa sapuila vana va kala laye hati: “Ene wa kũlĩhi ciwa okuti, ka citava u Yudea umue oku kuata ukamba lomunu ukuepata liñi, ale oku amela kokuaye, pole, Suku wa ndi lekisa oco si ka tukule umue okuti, wa vĩha pamue ka yelisiwile. Omo liaco, ndeya, pole, sia likalele eci nda kovongiwa.” (Ovil. 10:28, 29) Noke yovina viaco, Petulu wa  limbuka okuti Yehova wa tava Korneliu kumue lepata liaye.

⁵ Saulu wo ko Tarso okuti wa kala u Fariseo umue wa pindisiwile ciwa, wa lekisavo umbombe kuenda wa pongolola ovisimĩlo viaye. Eye wa sukilile oku kala lomanu vana okuti kosimbu, nda ka kailele lavo. Saulu wa sukilile oku kuama olonumbi viomanu vaco. (Ovil. 4:13; Va Gal. 1:13-20; Va Fil. 3:4-11) Tu pondola oku sokolola kepongoloko liomanu ndeci, Sergio Paulu, Damarisi Dionisio, Filemone, Onesimo kuenda omanu vakuavo va sukilile oku linga oco va pongolole ovisimĩlo viavo eci va tava kolondaka viwa loku linga olondonge via Yesu Kristu.—Ovil. 13:6-12; 17:22, 33, 34; File. 8-20.

⁶ Ka kuli atatahãi okuti, ocisola ca vamanji vekongelo, ca ku kuatisa oku kuata ukamba la Yehova loku iya vocisoko caye. Ove wa limbuka ondimbukiso yocisola yina yi kuatisa oku limbuka olondonge viocili via Yesu Kristu, ndomo eye a ci popia hati: “Ndu wĩhi ocihandeleko cokaliye, cokuti vu lisola pokati; ndeci ame ndo soli, ene lisolivo pokati. Poku ci linga, vosi va ka limbuka okuti vulondonge viange, nda wa lisoli pokati.” (Yoa. 13:34, 35) Kuenje eci wa limbuka okuti ocisola caco ka ci sangiwa lika vekongelo o kasi pole, afendeli va Suku voluali  luosi va lekisavo ocisola caco, esanju o kuetele Yehova kuenda kocisoko caye lia livokiya. Ove o kasi oku mola oku tẽlisiwa kuocitumasuku Cembimbiliya catiamẽla koku kongeliwa kuomanu koloneke via sulako, oco va fendele Yehova lombembua kuenda omunga.—Mika 4:1-5.

⁷ Ndaño okuti kuli ovina vialua vi tepa omanu koloneke vilo, helie wa simĩle okuti nda ca tava oku kongela omanu “va tunda kolofeka viosi, kovikoti viosi, komanu vosi kuenda kalimi osi”? (Esit. 7:9) Kũlĩhĩsa etepiso li kasi pokati komanu vana va kũlĩha calua ovoloño kuenda vana va kakatela kovituwa viosimbu viofeka. Sokolola oku lihoya ku kasi vatavo, pokati komanu vakuekova lia litepa kuenda epata limuamue. Omo lioku livokiya kuolonepele via kova, omanu va kasi oku panga onepa kovitundo vialua vio pulitika kuenda omo liekalo liomuenyo lia litepa li koka olonepele komanu, oku likongela kuomanu vo kolofeka viosi, alimi osi, ovimunga kuenda ekalo lia litepa okuti, va likuetele ocisola kuenda ombembua yocili, ocikomo cimue okuti Suku Ukuonene wosi, eye lika o kuete unene woku ci linga.—Sak. 4:6.

⁸ Omunga yaco yocili kuenda omo okuti Vumbangi ya Yehova ya papatisiwa, o panga onepa komunga yaco. Omo okuti o kuatisiwa lomunga yaco, o kuete ocikele coku kuatisa oku yi teyuila. O pondola oku ci linga poku kapako olondaka via Paulu vi sangiwa kukanda ku va Galatia 6:10 viokuti: “Osimbu tu kuete epuluvi tu lingi eci ciwa komanu vosi, ca piãla enene ku vamanjetu vekolelo.” Tu kapakovo elungulo liokuti: “Ko ka lingi cimue loku hoya pamue oku lipanda, pole, loku omboka  tendi vakuene okuti, va velapo ene vu sule, ko ka sokololi lika ovina viene muẽle, pole, sokololivo ovina via vakuene.” (Va Fil. 2:3, 4) Tu kamamako oku kuata ukamba wombembua kuenda wesanju la vamanjetu, nda tua lilongisa oku va tenda ndomo Yehova a va tenda okuti ka tu tiamisila lika utima kekalo liomuenyo wavo.—Va Efe. 4:23, 24.

⁹ Upostolo Paulu wa tukula ocindekaise cetimba liomunu, oco a lekise okuti ekongelo ka lia tepiwile, pole, vosi va likapako pokati. (1 Va Kor. 12:14-26) Pamue oku kala ocipãla la vamanji ci pondola oku tu tepa la vamue pokati kavo voluali luosi, pole, onjila ndomo tua kapako ekalo liavo, lacimue ocinãla ci tepulula ocisola tu va kuetele. Nda vamue pokati ka vamanjetu va lambalaliwa, vosi yetu tu yeva esumuo. Nda vamue va pita lovitangi ale ovilunga kuenda uyaki, vakuavo va sandiliya lonjanga onjila yoku va kuatisa konepa yespiritu kuenda ketimba.—2 Va Kor. 1:8-11.

¹⁰ Vosi yetu tu sukila oku tukula vamanjetu volohutililo eteke leteke. Vamue va kasi oku liyaka loloseteko vioku vetiyiwa oku linga eci cĩvi. Vakuavo va kasi oku tala ohali okuti valua va ci kũlĩha. Handi vali, vakuavo va kasi oku lambalaliwa la vana va talavayela kumosi, ovitangi vi tunda kohueli yimue okuti Hambangiko ya Yehova kuenda havosiko va ci kũlĩha. (Mat. 10:35, 36; 1 Va Tes. 2:14) Ovina viaco, vi tu sakalaisa momo tumanu vamue va likuete omunga voluali luosi. (1 Pet. 5:9) Pokati ketu, pali vamanji va talavaya calua kupange wa Yehova okuti, va songola upange woku kunda kuenda ovopange akuavo  vakongelo. Kulivo vamanji vana va kuete ovikele vioku songola upange woku kunda, voluali luosi. Vosi yavo tu sukila oku va tukula volohutililo vietu kuenda pocakati colohutililo viaco, tu lekisa ocisola tu va kuetele kuenda tu lekisa okuti tua va kapako lutima wosi ndaño ceci pamue ka kuli vali cimue tu pondola oku linga oco tu va kuatise.—Va Efe. 1:16; 1 Va Tes. 1:2, 3; 5:25.

¹¹ Omo liombuanja yi kasi palo posi koloneke vilo via sulako, afendeli va Yehova va sukila oku lipongiya oco va kuatise vakuavo. Olonjanja vimue ovilunga ndeci, ovilemawe kuenda andunde ovava, vi koka okuti ku lingiwa esokiyo lioku kuatisa loku pongiya ekuatiso lialua lio ketimba. Akristão vo kocita catete, va eca ongangu yiwa yatiamẽla kovina viaco. Oku ivaluka elungulo lia Yesu olondonge vio ko Antiokea via tuma lesanju ekuatiso lio ketimba ku vamanji va Yudea. (Ovil. 11:27-30; 20:35) Noke upostolo Paulu wa vetiya vamanji ko Korindo, oku kuatisa keliangiliyo lioku eca ekuatiso lia lingiwa lonjila yimue ya sokiyiwa ciwa. (2 Va Kor. 9:1-15) Cimuamue haico koloneke vilo okuti, afendeli va Yehova ci kaile omunu lomunu ale vocimunga, va kuatisa lonjanga eci vamanjetu va sukila ekuatiso.

¹² Omunga yi sangiwa pokati ketu voluali luosi, yi kuatisa koku linga ocipango ca Yehova. Koloneke vilo ocipango caye ceci cokuti olondaka viwa Viusoma vi kundiwa voluali luosi, oco vi linge uvangi kolofeka viosi. (Mat. 24:14) Osimbu tu tẽlisa upange wetu woku kunda, Yehova o yongola okuti omuenyo wetu u likuata lolonumbi viaye. (1 Pet. 1:14-16) Tu sukila oku likuatisa pokati  loku likolisilako oku kunda olondaka viwa. (Va Efe. 5:21) Yilo hayoko otembo yoku sanda olonjongole vietu muẽle, pole, tu sukila oku sanda tete Usoma wa Suku komuenyo wetu. (Mat. 6:33) Poku talavaya vomunga omo liolondaka viwa, ci tu nenela esanju lialua cilo kuenda asumũlũho ka a pui.

¹³ Etu Tulombangi Via Yehova, tumanu vamue ka va sokisiwa okuti, tua litepa lomanu vakuavo, omo tumanu vamue va liyelisa kuenda tu lekisa ombili kupange tu lingila Suku. (Tito 2:14) Efendelo lietu ku Yehova li koka okuti tu kala omanu va litepa. Etu ka tu talavaya lika la vamanjetu voluali luosi, pole, tu vangula elimi limue li likasi liocili kuenda ovituwa vietu, vi likuata lelimi liaco. Eci ca lekisiwa volondaka Yehova a popia pocakati cuprofeto Sofoniya viokuti: “Ndi ka eca komanu elimi limue lia pua esanda, oco vosi yavo va vilikiye onduko ya Yehova, okuti vo vumba lutima umuamue.”—Sof. 3:9.

¹⁴ Yehova wa vetiyavo Sofonia oco a lombolole omunga tu kuete koloneke vilo yi sangiwa pokati ketu voluali luosi, poku popia hati: “Vana va supa ko Isareli ka va ka linga eci cĩvi; ka va ka popia uhembi ale oku yapuisa omanu lomẽla wavo; ovo va ka lia loku pekela kuenda lomue o ka va lingisa usumba.” (Sof. 3:13) Etu tu tẽla oku talavaya lomunga yaco omo okuti, tu kuete elomboloko Liondaka yocili ya Yehova, tua pongolola ovisimĩlo vietu kuenda ekalo liomuenyo wetu li likuata lolonumbi viaye. Tua tẽlisa ovina okuti, kovaso yomanu nda ka vi tẽliwa. Ocili okuti, tumanu vamue va likasi kuenda tuafendeli va Suku vana vo sumbila voluali luosi.—Mika 2:12.