ANYAMO osi omanu valua va siata oku iñila vonjo yi kola ya Yehova poku tẽlisa ovitumasuku Viembimbiliya. (Mika 4:1, 2) Tu sanjuka calua poku va yolela “vekongelo lia Suku!” (Ovil. 20:28) Ovo va sanjukila epuluvi lioku vumbila Yehova kumue letu, loku panga onepa kocumbo celau konepa yespiritu okuti ca lipua haico combembua. Espiritu sandu lia Suku kuenda alungulo olondunge a sangiwa Vondaka yaye, vi tu kuatisa oku amamako lombembua loku kuatisa oku yelisa ekongelo.—Osa. 119:105; Sak. 4:6.

² Poku kapako olonumbi Viembimbiliya, tu wala “omunu wokaliye.” (Va Kol. 3:10) Tu siapo oku lihoya kuenda ka tu kapiko ekambo lioku lipua lia vakuetu. Omo okuti tu kuete ovisimĩlo via Yehova, tu yula oku litepa kua siata voluali kuenda tu talavayela kumosi vomunga la vamanji voluali luosi.—Ovil. 10:34, 35.

³ Olonjanja vimue kuiya ovitangi vi nyõla ombembua kuenda omunga vekongelo. Momo lie kua siatela oku pita ovina viaco? Olonjanja vialua, kua siata oku pita ovitangi viaco omo okuti, ka kua kapiwileko onumbi yimue Yembimbiliya. Tu sukila oku liyaka lekambo lietu lioku lipua. Vosi yetu tuakuakandu. (1 Yoa. 1:10) Omunu umue pamue o linga ekandu limue li vĩhisa ekongelo konepa yespiritu. Tu pondola oku sumuisa omunu umue  omo liovina tu popia, ale tu sumua omo liovina umue a linga ale vievi a popia. (Va Rom. 3:23) Tu tetulula ndati ovitangi viaco?

⁴ Yehova omo liocisola wa kapako ovina viaco viosi. Vondaka yaye, eye eca alungulo a lekisa eci tu sukila oku linga nda kuiya ovitangi viaco. Akulu vekongelo okuti angombo vakuacisola konepa yespiritu, va pondola oku eca ekuatiso komunu lomunu. Poku kapako olonumbi viaco Viembimbiliya, tu pondola oku tumbulula ukamba la vakuetu kuenda oku taviwa la Yehova. Nda tua tambula epindiso omo liekandu limue tua linga, tu pondola oku kolela okuti, ocindekaise cocisola ca Isietu wokilu.—Olosap. 3:11, 12; Va Hev. 12:6.

⁵ Olonjanja vimue, pokati ka vamanji vekongelo peya ovitangi vimue. Ovitangi viaco, vi sukila oku tetuluiwa lonjanga locisola. (Va Efe. 4:26; Va Fil. 2:2-4; Va Kol. 3:12-14) Ocili okuti, pamue o tava okuti ovitangi la manji umue, vi pondola oku tetuluiwa poku kapako elungulo liupostolo Petulu liokuti, “lisoli pokati, momo ocisola ci tuvika akandu alua.” (1 Pet. 4:8) Embimbiliya li popia okuti: “Vosi yetu tuakuakulueya olonjanja vialua.” (Tia. 3:2) Oku kapako ocihandeleko coku sola vakuetu poku va lingila ovina viosi tu yongola okuti ovio va tu lingila, ci tu kuatisa oku ecela loku ivalako ovitangi vitito.—Mat. 6:14, 15; 7:12.

⁶ Nda wa limbuka okuti omunu umue wa sumua omo liocina cimue wa popia ale wa linga, sanda epuluvi lioku  tumbulula lonjanga ombembua. Ivaluka okuti mua kongelavo ukamba wove la Yehova. Yesu wa lungula olondonge viaye hati: “Nda wa nena ombanjaile yove kutala kuenje wa ivaluka okuti manjove o ku kuetele ondaka yimue, sia ombanjaile yove kovaso yutala, kuende. Tete ka lisunguluise la manjove kuenje tiuka, oco wece ombanjaile yove.” (Mat. 5:23, 24) Citava okuti, kuli cimue ka ca lombolokele ciwa. Nda oco, ka sapele lomunu waco. Ocituwa caco coku sapela vekongelo, ci kuatisa oku yuvula ovitangi kuenda oku vi tetulula eci viya omo liekambo lioku lipua.

⁷ Olonjanja vimue, akulu vekongelo va nõlapo oku lungula omunu umue oco a mioñolole ovisimĩlo viaye. Pole, olonjanja vimue ka ca lelukile. Paulu wa sonehela Akristão vo ko Galatia hati: “A vamanji, nda umue wa linga ekandu limue okuti eye ka ci limbukile, ene Wakristão wa loñolohi pengululi omunu waco lumbombe. Pole, amamiko oku lavulula sanga ene muẽle vu yonjiwavo.”—Va Gal. 6:1.

⁸ Akulu vekongelo poku nyula vamanji, va teyuila ekongelo kolohele vialua konepa yespiritu, loku tateka okuti pokati ka vamanji pa kala ovitangi vialua. Akulu vekongelo va likolisilako okuti upange wosi va linga vekongelo u likuata lohuminyo Yehova a linga pocakati ca Isaya yokuti: “Kuenje omunu lomunu pokati kavo o ka kala ndocitumãlo coku tila ofela, ndocitumãlo cimue coku vunda ombela yenda lofela yalua, ndolondui  viovava vofeka yimue ka muli ovava, ndulembo wesenje limue linene vofeka yimue yekango.”—Isa. 32:2.

⁹ Upostolo Paulu wa eca elungulo limue liatiamẽla ku vamanji vamue okuti, pamue va laikele oku yapuisa vakuavo vekongelo poku popia hati: “Cilo a vamanji, tu kasi oku eca kokuene olonumbi okuti, . . . vu litepa la manji wosi wa sina, haeye ka pokola kelongiso ene wa tambuli kokuetu.” Eye wa vokiyako kolonumbi viaco poku popia hati: “Nda umue ka pokola kondaka yetu pocakati cukanda ulo, kũlĩhĩsi omunu waco kuenda ko ka kuati ukamba laye, oco a kutisiwe osõi. Ka vu ko tendi ndunyãli, pole, amamiko oku u lungula nda manji.”—2 Va Tes. 3:6, 14, 15.

¹⁰ Citava okuti vekongelo muli umue okuti, ndaño ka lingile ekandu linene li koka oku tundisiwa, pole, o lekisa ekambo liesumbilo kolonumbi via Suku. Citava okuti mua kongela ovina vimue ndeci: Ocisiãi, ukuakupopia lãvi vakuavo kuenda ocimbondo. Citavavo okuti ka ‘yongola oku talavaya, haeye o litenga vovitangi viamãle.’ (2 Va Tes. 3:11) Pamue o sanda lika oku lia ovina via vakuavo ale ukuakutala ovina ka via sungulukile. Ocituwa cĩvi haciwako vekongelo kuenda ci pondola oku yapuisa Akristão vakuavo.

¹¹ Catete akulu vekongelo va ka seteka oku kuatisa omunu waco lalungulo Embimbiliya. Pole, nda omunu waco amamako oku lekisa ekambo liesumbilo kolonumbi Viembimbiliya, ndaño loku lunguiwa olonjanja vialua, citava okuti akulu vekongelo va linga ohundo yimue  ndelungulo vekongelo. Akulu vekongelo va ka kũlĩhĩsa lutate nda elinga liaco lĩvi calua kuenda nda ci sukiliwa oku linga ohundo yaco vekongelo. Manji o linga ohundo o ka eca alungulo atiamẽla kocituwa caco ka ca sungulukile, pole, ka ka tukula onduko yomunu o kasi oku lekisa ocituwa caco. Kuenje vana va kũlĩha ocitangi ci kasi oku tukuiwa vohundo, va ka yuvula oku linga ukamba lomunu waco ndaño vamamako oku lingila kumosi ovina viespiritu loku u ‘lungula omo okuti manji.’

¹² Ku lavokaiwa okuti onjila vamanji vakuekolelo va nõlapo vekongelo, yi kuatisa omunu waco oku kuata osõi, omo liocituwa caye ka ca sungulukile kuenda oku linga apongoloko. Nda ca limbukiwa okuti omunu waco wa siapo ocituwa caye cĩvi, ka ci sukila oku u tata ndomunu umue wa tambula epindiso.

¹³ Oku ecela akulueya amue, ka ci lomboloka okuti ka tua kapeleko ovina viaco vĩvi ale tu tava kovituwa viaco. Kuli akandu amue okuti ka a lingiwa omo liekambo lioku li pua, handi vali hekanduko oku yuvula oku kapako akulueya ana a pitahãla vovina vitito. (Ovis. 19:17; Osa. 141:5) Ocisila Cocihandeleko, ca tukuile akandu amue okuti anene calua, okuti akuavo a sule. Cimuamue  haico ci pita vekongelo Liakristão koloneke vilo.—1 Yoa. 5:16, 17.

¹⁴ Yesu wa popia eci ci sukiliwa oku lingiwa poku tetulula ovitangi vinene pokati ka Vamanji. Kũlĩhĩsa ananga eye a tukula: “Nda manjove wa linga ekandu limue, [1] vangula laye catiamẽla kekandu liaco. Nda wa ku yeva, wa kuatisa manjove oku linga eci ciwa. Pole, nda ka ku yevele, [2] ambata omunu umosi ale vavali okuti, luvangi wolombangi vivali ale vitatu, ocitangi cosi ci sukila oku tetuluiwa. Nda eye ka va yevele, [3] ci sapuila ekongelo. Nda lopo ka yevele ekongelo, u tenda ndukualofeka ale ndukuakutambula elisimu.”—Mat. 18:15-17.

¹⁵ Poku sokolola kolusapo lua kuamamo Yesu a tukula kelivulu lia Mateo 18:23-35, citava okuti limue pokati kakandu eye a kala oku sokolola okuti li sangiwa kelivulu Mateo 18:15-17, lia tiamẽlele kolombongo ale kovokuasi ndeci ekambo lioku feta ofuka ale oku nyana. Ale citava okuti eye wa kala oku sokolola kolombonde, ekandu limue okuti li vĩhisa ekalo liomunu.

¹⁶ Nda wa limbuka okuti umue vekongelo wa ku lingila ekandu liaco, ku ka yayuleko oku vangula lakulu vekongelo loku pinga okuti ovo va ku tetuluilako ocitangi caco. Ndomo Yesu a ci popia, vangula tete lomunu waco. Seteka oku tetulula ocitangi caco kavali kene, okuti ka vu kongelamo omunu ukuavo. Ivaluka okuti Yesu ka popele lika okuti, ‘kuende ño onjanja yimosi u lekisa ekandu liaye.’ Pole, nda omunu ka tavele okuti wa linga ekandu loku pinga ongecelo, ca sunguluka oku sapela laye velivala likuavo. Nda ca tava oku tetulula ocitangi  caco lonjila ndeyi, una wa linga ekandu liaco o ka ku pandula calua omo kua vanguile lacimue catiamẽla kokuaye lomunu ukuavo okuti, ca vĩhisa ekalo liaye vekongelo. Poku ci linga o “kuatisa manjove.”

¹⁷ Nda omunu wa linga ekandu wa limbuka oku lueya kuaye, wa pinga ongecelo kuenda wa sanda oku tetulula ocitangi caco, ka ci sukila oku sapuila ondaka yaco komunu ukuavo. Ndaño ekandu liaco lia kala linene, ocitangi caco ci pondola oku tetuluiwa pokati kene.

¹⁸ Pamue ove ku tẽla oku tetulula ocitangi caco poku vangula laye. Nda oco, o pondola oku linga ndomo Yesu a ci popia hati, “ambata omunu umosi ale vavali kuenda sapela vali la manjove.” Ocimãho comanu va ku kuama, coku kuatisa manjove. Hĩse okuti omanu vaco va kaile, vana okuti olombangi viekandu liaco, pole, nda ka pali laumue, ove o pondola oku pinga ku vamanji vavali oco va kaile olombangi viombangulo yaco. Citava okuti ovo va kũlĩha ciwa ondaka yaco kuenda va pondola oku nõla nda ocitangi caco ekandu muẽle. Nda ukulu umue wekongelo wa lalekiwa oco a kaile kombangulo yaco, eye ka lingi ocindekaise cekongelo omo okuti ka vo tumĩle oco a tetulule ocitangi caco.

¹⁹ Nda ocitangi ka ca tetuluiwile ndaño lalikolisilo alua, wa sapela lomunu waco pokolika, ale wa laleka vamanji vavali kuenda ku tẽla oku ivalako ondaka yaco, citava okuti o sapuilako akulu vekongelo. Ivaluka okuti ocimãho cavo, oku teyuila ombembua kuenda oku yelisa ekongelo. Noke yoku sapela lakulu vekongelo, eca ocitangi caco peka liavo kuenda kolela ku Yehova. Lalimue eteke  ku ka ecelele okuti ovituwa viomunu umue vi ku kokela ocilondokua ale vi nyõla esanju liove koku vumba Yehova.—Osa. 119:165.

²⁰ Angombo vocunda va ka konomuisa ocitangi caco. Pamue va limbuka okuti ovina omunu waco a ku lingila ekandu, ka likekembelele kuenda ka yongola oku linga eci ca sunguluka oco a tetulule ocitangi caco. Nda oco, ci ka sukila okuti akulu vekongelo va tundisa vekongelo omunu waco ukuekandu. Poku ci linga ovo va teyuila ocunda loku yelisa ekongelo.—Mat. 18:17.

²¹ Akandu amue anene ndeci evĩho liukahonga, ukahokolo, oku litumbika kovilinga vioku lipekela la vakuavimatamata vimuamue viuyali, atonãi unanguluke kuenda efendelo lioviteka, ka citava okuti a eceliwa lika lomunu va lueyela. (1 Va Kor. 6:9, 10; Va Gal. 5:19-21) Omo okuti akandu aco anene a kapa kohele koku yelisiwa kuekongelo konepa yespiritu, a sukila oku sapuiwa kakulu vekongelo oco va tetulule ocitangi caco. (1 Va Kor. 5:6; Tia. 5:14, 15) Pamue omunu umue o sanda akulu vekongelo, oco a va lomboluile ekandu limue a linga ale oku va sapuila eci a kũlĩha catiamẽla kekandu omunu umue a linga. (Ovis. 5:1; Tia. 5:16) Nda akulu vekongelo va yeva ekandu limue lia lingiwa la manji wa papatisiwa, tete akulu vavali vekongelo va konomuisa ocitangi caco. Nda ca kũlĩhĩsiwa okuti ondaka yaco yocili kuenda kuli uvangi u lekisa okuti kua lingiwa ekandu linene, akulu vekongelo va ka sokiya ocisoko cimue cesombiso okuti,  ku kala akulu vatatu vekongelo oco va tetulule ocitangi caco.

²² Akulu vekongelo vana va lavulula ocunda, va sanda oku va teyuila kovina viosi vi kapa kohele ekalo liavo konepa yespiritu. Ovo va likolisilako oku talavaya ciwa Londaka ya Suku oco va pindise vana va lueya loku tumbulula uhayele wavo konepa yespiritu. (Yuda 21-23) Ovina viaco vi likuata lolonumbi upostolo Paulu a ecele ku Timoteo viokuti: “Ndu ku handeleka kovaso a Suku kuenda kovaso a Kristu Yesu una o ka sombisa vana va kasi lomuenyo lava va fa . . . Lemẽla, lungula, vetiya lepandi liosi kuenda luloño woku longisa.” (2 Tim. 4:1, 2) Akulu vekongelo pamue va sukila otembo yalua oco va ci linge. Pole, ci panga onepa kupange walua va siata oku linga. Vamanji vekongelo va sole calua upange wavo kuenda va limbuka okuti, va sesamẽla esumbilo lialua.—1 Tim. 5:17.

²³ Nda kua limbukiwa okuti omunu waco wa linga muẽle ekandu, ocimãho ca velapo cakulu vekongelo, oku tumbulula ukamba womunu waco la Yehova. Nda omunu waco wa likekembela kuenda akulu vekongelo va tẽla oku u kuatisa, epindiso va ka eca kokuaye ci kaile pokolika ale kovaso yolombangi vokuenda kuesombiso, ci ka kala ndepindiso kokuaye kuenda ndelungulo kolombangi viaco. (2 Sam. 12:13; 1 Tim. 5:20) Ovitangi viosi vina vi sukila esombiso, ku nõliwa okuti omunu waco o liwekapo oku linga ovina vimue. Poku ci linga omunu waco wa lueya o ka kuatisiwa oku ‘suñamisa olonjila violomãhi viaye.’ (Va Hev. 12:13) Vokuenda kuotembo, omunu waco o ka linga vali ovopange a lingaile, nda kua  limbukiwa okuti o kasi oku tumbulula ukamba waye la Yehova.

²⁴ Nda ocisoko cakulu ca limbuka okuti omunu waco wa likekembela, pole, pamue ocitangi caco ci ka kũlĩhĩwa la vamanji vekongelo ale lomanu vakuavo vimbo kuenda vamanji vekongelo, va ka sukila oku lunguiwa catiamẽla komunu waco, Kohongele Yekalo Lietu Tuakristão Kuenda Oku Kunda, ku ka lingiwa esapulo liokuti: “Manji, [onduko yomunu waco] wa tambula epindiso.”

²⁵ Kovitangi vimue omunu pamue amamako oku linga ekandu kuenda ka tava kalikolisilo oku u kuatisa. Citava okuti omunu wa linga ekandu, ka lingi “ovina vi lekisa elikekembelo” ku vana va kasi oku u pindisa. (Ovil. 26:20) Nye ci lingiwa? Kovitangi viaco, ci sukila oku tundisa vekongelo omunu waco ukuekandu ka likekembela, poku tateka okuti o kala lafendeli va yela va Yehova. Omunu waco ukuavituwa vĩvi, o tundisiwa vekongelo oco ku teyuiwe oku yela konepa yespiritu kuenda onduko yayo yiwa. (Esin. 21:20, 21; 22:23, 24) Paulu poku kũlĩha ovituwa vi kutisa osõi viomunu umue vekongelo lio ko Korindo, wa lungula akulu vekongelo poku popia hati, “ulume waco vu sukila oku weca ku Satana . . . , oco espiritu [liekongelo] li popeliwe keteke lia Ñala.” (1 Va Kor. 5:5, 11-13) Paulu wa popiavo catiamẽla komanu vakuavo vo kocita catete okuti, va sinĩla ocili kuenda va tundisiwa vekongelo.—1 Tim. 1:20.

 ²⁶ Eci ocisoko cesombiso ci nõlapo okuti manji umue ka likekembelele o sukila oku tundisiwa vekongelo, ci sukila oku sapuilako omunu waco loku u lomboluila ciwa esunga Liembimbiliya lieci a sukilila oku tundisiwa. Poku ci linga ocisoko cesombiso ci ka sapuila omunu waco okuti, nda o sima okuti ocitangi caco ka ca tetuluiwile ciwa kuenda o yongola oku pinga omo lionjila ya nõliwapo, o sukila oku ci linga poku soneha ukanda umue loku tukula asunga aco. Oku upisa keteke omunu waco vo sapuila okuti o sukila oku tundisiwa vekongelo, eye o ka kuata oloneke epanduvali oco a ci linge. Nda okuti eye wa linga epingilo liaco, akulu vekongelo va ka sapela la manji ukuakunyula akongelo una o ka nõla akulu vakuavo vekongelo oco va linge ocisoko cimue cepingilo, loku sokiya ocisoko cimue cokaliye cesombiso. Ovo va ka likolisilako oku liongolola osimbu ka pa pitile osemana tunde eci va tambula ukanda waco wepingilo. Nda kua lingiwa epingilo limue, esapulo lioku tundisa omunu waco vekongelo handi ka li ka lingiwa. Vokati kotembo yaco, omunu waco citava okuti enda kupange woku kunda, pole, ka ka linga ovina vimue ndeci oku eca atambululo kolohongele, oku likutilila kolohongele, ale oku linga ovina vikuavo vekongelo.

²⁷ Epuluvi lioku linga epingilo, ocindekaise cohenda komunu wa linga ekandu loku eca kokuaye epuluvi lioku yeviwa vali. Pole, nda omunu waco o nõlapo okuti ka kala kohongele yaco yepingilo, ku ka lingiwa esapulo lioku u tundisa vekongelo noke liakulu vekongelo oku likolisilako calua oku u sanda, oco va sapele laye.

 ²⁸ Nda okuti omunu waco ka yonguile oku linga epingilo, ocisoko cesombiso ci ka lomboluila ciwa kokuaye esilivilo lioku likekembela kuenda ananga a sukila oku eca oco a tambuiwe vali votembo ya sokiyiwa. Oku ci linga, ci lekisa ohenda kuenda ci lingiwa lelavoko liokuti omunu waco o pongolola ovituwa viaye kuenje, vokuenda kuotembo o tiuka vali vocisoko ca Yehova.—2 Va Kor. 2:6, 7.

²⁹ Eci ku sukiliwa oku tundisa omunu umue vekongelo wa linga ekandu okuti ka likekembelele, ku lingiwa esapulo liokuti: “[Onduko yomunu] Hambangiko vali ya Yehova.” Esapulo liaco li ka kala elungulo ku vamanji vakuekolelo vekongelo oco va liwekepo oku kuata ukamba lomunu waco.—1 Va Kor. 5:11.

³⁰ Ondaka “oku nõlapo oku siapo oku vumba Yehova,” yi tiamisiwila kovilinga viomunu umue wa papatisiwa okuti, o nõlapo oku likala ocikele caye Cukristão. Omunu waco o pondola oku ci linga poku popia okuti ka yongola vali oku kala Ombangi ya Yehova ale pocakati covilinga viaye, ndeci oku tiamẽla kocisoko cimue ka ci taviwa la Yehova Suku omo okuti, ovimãho viaco ka vi likuata lalongiso Embimbiliya.—Isa. 2:4; Esit. 19:17-21.

³¹ Upostolo Yoano poku vangula catiamẽla komanu vana va likala ekolelo koloneke viaye, wa soneha ndoco: “Ovo va tunda pokati ketu, pole, ka va tiamẽlele kokuetu;  momo nda va tiamẽlele kokuetu, nda vamamako oku kala pokati ketu.”—1 Yoa. 2:19.

³² Eci omunu umue a nõlapo eye muẽle oku siapo Yehova, ekalo liaye kovaso a Yehova lia litepa calua lomunu una wa liwekapo oku enda enda kolohongele kuenda kupange woku kunda. Omunu umue pamue o liwekapo oku enda enda kolohongele kuenda kupange woku kunda omo okuti, wa siapo oku tanga Ondaka ya Suku oloneke viosi. Ale citava okuti wa lipita lovitangi vimue, elambalalo kuenda ka kuete vali ombili yoku vumba Yehova. Akulu vekongelo kuenda vamanji vakuavo vekongelo, va kamamako oku eca ekuatiso konepa yespiritu Ukristão waco a sukila.—Va Rom. 15:1; 1 Va Tes. 5:14; Va Hev. 12:12.

³³ Pole, nda Ukristão umue eye muẽle o nõlapo oku siapo oku vumba Yehova, vamanji vekongelo va ka ci kũlĩha pocakati cesapulo liokuti: “[Onduko yomunu] Hambangiko vali ya Yehova.” Omunu waco o tatiwa lonjila yimuamue yoku tata omunu umue wa tundisiwa vekongelo.

³⁴ Omunu wa tundisiwa vekongelo ale eye muẽle wa siapo oku vumba Yehova, o pondola oku tambuiwa vali eci ku kala ovovangi a lekisa okuti, eye wa likekembela. Vokuenda kuotembo yimue, eye o sukila oku lekisa okuti, wa siapo ovituwa vĩvi kuenda o yongola oku kuata ukamba uwa la Yehova. Akulu vekongelo va sukila oku kuata utate poku kũlĩhĩsa okuti, ku pita otembo  yimue, olosãi vimue, unyamo ale ceci ci pitahãla otembo yaco okuti, ca tamba lika kekalo liomunu oco eye a lekise okuti wa likekembela muẽle. Eci akulu vekongelo va tambula ukanda umue wepingilo woku tiuka vekongelo, ocisoko cimue coku tambula vana va tiuka vekongelo, ci vangula lomunu waco. Ocisoko caco ci ka kũlĩhĩsa nda kuli ovovangi a lekisa okuti, omunu waco o kasi oku linga ovina vi lekisa elikekembelo liaye kuenje, ci ka nõlapo nda omunu waco o sukila muẽle oku tambuiwa vepuluvi liaco ale sio.—Ovil. 26:20.

³⁵ Nda omunu una o kasi oku pinga oku tiuka vekongelo wa tundisiwila vekongelo likuavo, ocisoko cakulu ci tambula vana va tiuka vekongelo eye a kasi cilo, ci ka linga ohongele yimue lomunu waco, loku kũlĩhĩsa epingilo liaye. Nda ocisoko caco ca tava okuti omunu waco o sukila oku tiuka, va ka tuma ukanda umue kakulu vekongelo, kuna a kala eci a tundisiwa. Ovisoko viaco vivali vi ka talavayela kumosi oco va konomuise okuti, kua nõliwa onjila yimue yesunga. Pole, ocisoko coku tambula vana va tiuka vekongelo, cekongelo ca tundisile omunu waco, oco ci ka nõla nda omunu waco o tiuka ale sio. 

³⁶ Nda ocisoko coku tambula vana va tiuka vekongelo ca kolela muẽle okuti omunu wa tundisiwile ale wa nõlapo eye muẽle oku siapo oku vumba Yehova, wa likekembela muẽle kuenda o yongola oku tiuka, esapulo liaco li ka lingiwila vekongelo omunu waco a tundisiwile.  Nda omunu waco cilo o kasi vekongelo likuavo, ku ka lingiwavo esapulo vekongelo liaco. Ku sukila lika oku popiwa hati: “[Onduko yomunu] wa tambuiwa oco a kaile vali Ombangi ya Yehova.”

³⁷ Akandu anene a lingiwa lomãla vatito okuti va papatisiwa, a pondola oku lomboluiwa kakulu vekongelo. Eci akulu vekongelo va tetulula ovitangi viaco, olonjali vi sukila oku kalapo. Ocimãho colonjali oku kuatisa konjila akulu vekongelo va ka nõlapo okuti, ka va teyuila omõla wa linga ekandu, loku u tateka okuti o tambula epindiso. Ndeci ci lingiwa kakulu, ocisoko cakulu cesombiso ci likolisilako oku lungula loku kuatisa omunu wa lueya oco a tumbulule vali ukamba waye la Yehova. Pole, nda omõla ka likekembelele, o sukila oku tundisiwa.

³⁸ Nye ci lingiwa nda okuti akundi ka va papatisiwile va linga ekandu linene? Omo okuti ka va papatisiwile, ka va pondola oku tundisiwa vekongelo. Pole, alungulo a eciwa lohenda, a pondola oku va kuatisa “oku suñamisa olonjila violomãhi” viavo, momo citava okuti ka va kuatele ciwa elomboloko liolonumbi Viembimbiliya.—Va Hev. 12:13.

³⁹ Nda omunu wa linga ekandu ka papatisiwile kuenda ka likekembelele noke yakulu vavali vekongelo oku sapela laye loku seteka oku u kuatisa, ci ka sukila oku sapuilako ekongelo. Ku ka lingiwa esapulo liokuti: “[Onduko yomunu] wa liwekapo oku kala ukundi ka papatisiwile.” Vamanji vekongelo va ka tenda omunu waco  ndomunu ukualuali. Ndaño okuti omunu waco ka tundisiwile vekongelo, ci sukila oku kuata utate kueci catiamẽla koku kuata ukamba laye. (1 Va Kor. 15:33) Omanu va kasi vekalo liaco, ka citava okuti ulandu wavo wupange woku kunda u tambuiwa.

⁴⁰ Vokuenda kuotembo omunu una ka papatisiwile okuti, wa silepo oku kala ukundi omo liekandu limue, pamue o yongola oku kala vali ukundi. Vocitangi eci, akulu vavali vekongelo va linga ohongele yimue lomunu waco kuenda va konomuisa oku kula kuaye konepa yespiritu. Nda eye o kuete ovituwa vi u wecelela oku kala vali ukundi, ku lingiwa esapulo liokuti: “[Onduko yomunu] wa linga vali ukundi ka papatisiwile.”

⁴¹ Koloneke vilo, vosi vana va tiamẽla kefendelo lia Suku, va pondola oku sanjukila ekalo liwa konepa yespiritu Yehova a eca kafendeli vaye. Ekalo lietu konepa yespiritu liwa calua kuenda tu kuete ovava alua ocili a kavuluisa. Tua siata oku teyuiwa la Yehova pocakati cakulu vekongelo, vana va songuiwa la Kristu. (Osa. 23; Isa. 32:1, 2) Oku kala vocumbo celau konepa yespiritu koloneke vilo via sulako, ci tu kuatisa oku liyeva okuti tua kolapo.

⁴² Eci tu teyuila ombembua kuenda oku yela kuekongelo, tu ecelela okuti ocinyi cocili Cusoma ci tua. (Mat. 5:16; Tia. 3:18) Lesumũlũho lia Yehova, tu ka kuata esanju lioku mola omanu valua oku u kũlĩha kuenda oku likongela kokuetu koku linga ocipango caye.