POKU TẼLISA ocitumasuku Yesu a tukula catiamẽla koloneke via sulako, Olombangi Via Yehova via siata oku kunda olondaka viwa, “toke kasulilo o kilu lieve.” (Ovil. 1:8; Mat. 24:14) Oco upange waco u lingiwe, ovo va lieca olumue lotembo yavo kuenda ongusu, oco va sapuile vakuavo ovina viatiamẽla Kembimbiliya. Ovo va kolela okuti Yehova, o ka kuatisa olondingupange viaye kuenje vamamako oku pitisa kovaso Usoma wa Suku komuenyo wavo. (Mat. 6:25-34; 1 Va Kor. 3:5-9) Onima va siata oku kuata yi situlula okuti, va sumũlũisiwa kuenda va taviwa la Yehova.

² Omanu vamue, eci va mola okuti tu kasi oku eca Ambimbiliya kuenda alivulu akuavo atiamẽla Kembimbiliya komanu vosi okuti ka va feti cimue, ovo va lipula ndoco: “Ovina evi viosi vi tẽliwa ndati?” Ocili okuti, voku panga Ambimbiliya kuenda alivulu atiamẽla Kembimbiliya, mua kongela olombongo. Oku tunga loku tata olofiliale, oco mu kaile vamanji va talavaya lolomakina vinene, vamanji va songola upange woku kunda kuenda vamanji va linga ovopange akuavo, oku kuatisa koku kunda olondaka viwa, mua kongela oku pesela olombongo. Handi vali, vamanji va nyula akongelo, olomisionaliu, akundi va likasi kuenda vakuavo va kasi kupange wotembo yosi u  likasi, va tambula ekuatiso liolombongo oco vamameko kupange wavo. Ovina evi vi lekisa okuti, vupange woku kunda olondaka viwa koloneke vilo, ci kaile pocitumãlo kuenda voluali luosi, mua kongela oku pesela olombongo vialua. Olombongo viaco vi tunda pi?

³ Omanu valua okuti va sole upange Wolombangi Via Yehova woku longisa, va siata oku eca olombanjaile vi kuatisa kupange woku kunda voluali luosi. Pole, upange waco u kuatisiwa ca piãla enene Lolombangi Via Yehova kuenda vamue pokati kavo va tuma olombanjaile viavo, kofiliale yo vofeka yavo. Ovo va lekisa ovituwa vimuamue levi viafendeli va Yehova kosimbu okuti, va lekisa ocali poku kuatisa Koku tunga ocitumãlo coku fendela Yehova. (Etu. 35:20-29; 1 Asa. 29:9) Olombanjaile vimue violombongo, vi sonehiwa votestamento, osimbu okuti vikuavo vi eciwa lomunu lomunu, lakongelo kuenda lovikanjo okuti olonjanja vimue, olombongo viaco ka via luile. Oku kongela olombanjaile viaco, ci kuatisa koku amamako lupange wetu woku kunda.

⁴ Kolombangi Via Yehova, esumũlũho linene oku talavaya lolombongo vi kuete kuenda ovina vikuavo oco vi kuatise kupange woku kunda. Yesu kumue lolondonge viaye, va kuatele okasia yimue yoku kapa olombongo, ci lekisa okuti ovo va enda oku tambula ekuatiso liolombongo, oco va lande ovina va sukilile. (Yoa. 13:29) Embimbiliya li tukula eci catiamẽla kakãi, va enda oku kuatisa Yesu kuenda olondonge viaye. (Mar. 15:40, 41; Luka 8:3) Upostolo Paulu, wa enda oku tava lesanju, ekuatiso lio ketimba lia enda oku eciwa la vana va yonguile oku kuatisa oku sandeka olondaka viwa loku kuatisa kupange  waye woku kunda. (Va Fil. 4:14-16; 1 Va Tes. 2:9) Olombangi Via Yehova vi kasi oku amamako oku kuama ongangu yaco, yoku lekisa ombili kupange kuenda ocali. Omo liaco, citava oku “eca ocali ovava omuenyo” ku vakuavitima via sunguluka kolonepa viosi.—Esit. 22:17.

⁵ Ovina vi landiwa kakongelo o pocitumãlo vi fetiwavo lolombanjaile. Ka ku konguiwa olombongo, ka ku tumbikiwa etendelo liolombanjaile kuenda ka ku pingiwa olombongo. Kuli olokasia violombanjaile kovitumãlo ku lingiwila olohongele, oco omunu lomunu a ece “ndeci a sokiya vutima waye.”—2 Va Kor. 9:7.

⁶ Ku talavayiwa lolombanjaile ca piãla enene, oco ku tatiwe kuenda oku semũlũla Onjango Yusoma. Akulu vekongelo va pondola oku nõlapo oku tuma onepa yimue yolombongo kofiliale Yolombangi Via Yehova yo pocitumãlo, oco vi kuatise kupange woku kunda voluali luosi. Omo liaco, vamanji vosi vekongelo va linga ohuminyo yimue yoku tava konjila ya nõliwa. Kuenje akongelo alua, a eca olombanjaile oco vi kuatise kupange woku kunda voluali luosi. Nda okuti vosi va kapako ovina vi sukiliwa otembo lotembo, ka ci ka sukila oku linga asapulo olonjanja vialua atiamẽla kolombanjaile.

⁷ Noke yohongele, vamanji vavali vopa olombongo via kapiwa volokasia violombanjaile kuenda va soneha etendelo liaco. (2 Olos. 12:9, 10; 2 Va Kor. 8:20) Akulu vekongelo va ka tuma oku seleka olombongo viaco toke eci vi tumiwa ko filiale ale oku landa ovina vi sukiliwa  vekongelo. Manji ukuacikele coku tata olombongo, o ka pongiya ulandu umue wosãi losãi oco u lomboluiwe vekongelo kuenda olonjanja viosi eci pa pita olosãi vitatu, mitavaso yakulu vekongelo o linga esokiyo lioku kũlĩhĩsa ovicapa violombongo.

⁸ Olombongo vioku landa ovina vi pesiwa kolohongele vimbo kuenda ovina vikuavo vi sukiliwa vocikanjo, vi fetiwa lolombanjaile vi eciwa Lolombangi Via Yehova vocikanjo locikanjo. Kuli olokasia violombanjaile kovitumãlo violohongele vinene, oco mu kapiwe olombanjaile viovocikanjo. Handi vali, oco ku fetiwe olombongo viovina via landiwa vokuenda kuolosãi vimue, akongelo a pondola oku eca olombanjaile viavo kapuluvi akuavo.

⁹ Ca sunguluka okuti ocikanjo locikanjo, ci feta olombongo viovina via landiwa kuenda olombongo vikuavo vi tumiwa oco vi kuatise kupange woku kunda voluali luosi. Nda vokasia yo vocikanjo ka muli olombongo vioku feta ovina vi landiwa kohongele yimbo ale kohongele yikuavo yimbo yi ka kuamamo, oco ku sangiwe olombongo vioku fetela ocitumãlo cimue, manji o nyula akongelo o pondola oku eca ocisimĩlo cokuti, ku eciwa esapulo limue kakongelo liatiamẽla kesumũlũho lioku eca olombanjaile. Akulu vekongelo va ka konomuisa ondaka yaco, loku nõla etendelo ekongelo li ka eca oco li kapiwe vokasia yocikanjo. Noke ovo va ka sapuilako ekongelo eci ukundi lukundi a sukila oku eca.

¹⁰ Eci ku molẽha esukila limue liolombongo vocikanjo okuti akulu vekongelo va sukila oku li konomuisa, citava  okuti va linga ohongele yimue keteke liohongele yimbo. Olonjila viosi vikuavo vi nõliwa okuti ka mu kongela ovina vi sukiliwa vocikanjo, vi sukila oku taviwa lakulu vekongelo vo vocikanjo lekuatiso liolombongo ukundi lukundi a nõlapo oku eca. Olonjanja viosi ku molẽha esukila, akulu vekongelo vo vocikanjo va sukila oku liongolola oco va tave onjila yaco. Olonjila vi nõliwa, vi sukila oku sonehiwa letendelo liolombongo vi sukiliwa.

¹¹ Ekonomuiso liolombongo vio vocikanjo, li sukila oku lingiwa olonjanja viosi.

¹² Okasia yolombanjaile Yesu kumue lolondonge viaye va kuatele, ya kala locimãho coku kuatisa olohukũi. (Mar. 14:3-5; Yoa. 13:29) Ocikele caco Cakristão ci kasi oku amamako, momo Yesu wa popele hati: “Otembo yosi ene vu kasi lolohukũi.” (Mar. 14:7) Olombangi Via Yehova koloneke vilo, vi tẽlisa ndati ocikele caco?

¹³ Olonjanja vimue, vamanji vakuekolelo vekongelo, va sukila ekuatiso omo lioku kuka, oku vela ale ocitangi cikuavo okuti ka va tẽla oku ci tetulula. Eci ku molẽha ocitangi caco, epata kuenda omanu vakuavo va kũlĩha ocitangi caco, pamue va vetiyiwa oku kuatisa. Eci ci likuata lolondaka viupostolo Yoano viokuti: “Puãi wosi o kuete ukuasi woluali lulo kuenje o mola okuti manjaye wa  kambela cimue, pole, ndaño ndoco o likala oku lekisa ohenda kokuaye, ocisola ca Suku camamako ndati vokuaye? Atumãla, ka tu ka soli londaka pamue lelimi, pole, te lovilinga kuenda locili.” (1 Yoa. 3:17, 18; 2 Va Tes. 3:6-12) Vefendelo liocili, mua kongela oku tata vakuekolelo okuti pamue, va sukila ekuatiso lio ketimba.—Tia. 1:27; 2:14-17.

¹⁴ Upostolo Paulu vukanda waye watete a sonehela Timoteo, wa lombolola ndomo ku eciwa ekuatiso ku vana va suka. O pondola oku tanga olonumbi viaco kukanda 1 Timoteo 5:3-21. Ukristão lukristão, eye o kuete ocikele coku tata asukila a vakuepata liaye. Vana va kuka, ale vana va vela, va sukila oku tambula ekuatiso liomãla vavo, liolonekulu ale liomanu vakuavo okuti epata. Olonjanja vimue citava oku tambula ekuatiso pocakati covipama vi sokiyiwa lombiali. Kuenje vakuepata kuenda omanu vakuavo, va pondola oku kuatisa omunu waco lepingilo limue oco a tambule ekuatiso liaco. Pamue ku molẽha ekalo limue okuti, ekongelo li sukila oku konomuisa nda li pondola oku kuatisa manji umue wa suka okuti o kasi oku vumba Yehova vokuenda kuotembo yalua. Nda okuti ka kuli laumue ukuepata liaye, ale epata likuavo li pondola oku kuatisa manji yaco kuenda ka kuli esokiyo liombiali lioku eca ekuatiso, akulu vekongelo va pondola oku linga esokiyo lioku kuatisa. Kakristão esumũlũho linene oku tepelako vana va suka ovina va kuete.

¹⁵ Vamanji valua pamue va pita lesukila omo lielambalalo, uyaki, ovilemawe, andunde ovava, onjala ale ovitangi vikuavo via siata koloneke vilo via sulako. (Mat. 24:7-9) Akongelo o pocitumãlo pamue ka a kuete epondolo  lioku kuatisa. Omo liaco, Osungu Yolombangi Via Yehova, yi sokiya vamanji vo kolonepa vikuavo oco va ece ekuatiso li sukiliwa. Eci ci sokisiwa lekalo Liakristão vo ko Asia Menor poku eca okulia ku vamanji vo ko Yudea vokuenda kuotembo yimue yonjala. (1 Va Kor. 16:1-4; 2 Va Kor. 9:1-5) Poku kuama ongangu yavo, tu situlula ocisola cetu ku vamanji kuenda tu lekisa okuti tu londonge viocili via Yesu Kristu.—Yoa. 13:35.

¹⁶ Ambimbiliya kuenda alivulu a kunamẽla Kembimbiliya, a kuete esilivilo koku sandekiwa kuesapulo Liusoma. Olonjanja vialua akulu vekongelo va nõla oñuatisi yimue yekongelo, oco yi tate alivulu. Vamanji va tambula ocikele coku tata alivulu aco, va kapako calua ovikele viavo. Ovo va soneha ciwa ulandu waco, oco vekongelo ka mu ka kambele alivulu.

¹⁷ Omo okuti Tuakristão va litumbika, tu limbuka okuti otembo yetu, ovoloño tu kuete, ovina tu tẽla oku linga, ovina tu kuete, oku kongelamo omuenyo wetu, viosi olombanjaile via eciwa la Suku okuti tu pondola oku talavaya lavio kupange waye. (Luka 17:10; 1 Va Kor. 4:7) Poku talavaya ciwa lovina tu kuete, tu lekisa ocisola tu kuetele Yehova. Tu yongola oku u kemainya lovina viosi tu kuete ci lekisa okuti, tu yongola oku u vumba lomuenyo wetu wosi. (Olosap. 3:9; Mar. 14:3-9; Luka 21:1-4; Va Kol. 3:23, 24) Yesu wa popia hati: “Omo wa tambuli ocali, ecivo ocali.” (Mat. 10:8) Poku linga upange wa Yehova lutima wosi kuenda oku talavaya lovina tu kuete, ci tu nenela esanju lialua.—Ovil. 20:35.