UPOSTOLO Paulu wa sonehela ndoco ekongelo lio ko Filipu: “Paulu la Timoteo, haetu tuapika va Kristu Yesu. Ndi sonehela olosandu viosi vi kasi vomunga kumue la Kristu Yesu kuenda olomitavaso, loloñuatisi viekongelo vi kasi ko Filipu.” (Va Fil. 1:1) Limbuka okuti eye wa tukula oloñuatisi viekongelo. Eci ci lekisa okuti vamanji vaco va enda oku linga upange uwa poku kuatisa akulu vekongelo kotembo yaco. Cimuamue haico ci pita koloneke vilo. Oloñuatisi viekongelo vi linga upange walua uwa, u kuatisa akulu vekongelo kuenda wecelela okuti ovina vekongelo vi sokiyiwa ciwa.

² Ove hẽ wa kũlĩha oloñuatisi viekongelo liene? Wa limbuka hẽ upange via siata oku linga okuti u ku kuatisa kuenda u kuatisa ekongelo liosi? Ocili okuti, Yehova wa kapako calua upange wavo. Paulu wa soneha hati: “Alume vana va vumba lonjila yimue ya sunguluka, va kasi oku sandiliya oluhimo luwa kuenda va pondola oku vangula lutõi walua catiamẽla kekolelo liavo vu Kristu Yesu.”—1 Tim. 3:13.

³ Oloñuatisi viekongelo vi sukila oku eca ongangu yiwa komuenyo wavo kuenda oku tẽlisa ciwa ovikele viavo. Eci ci limbukiwa poku konomuisa eci Paulu a popia  catiamẽla kovituwa vi lavokaiwa kokuavo kukanda a sonehela Timoteo hati: “Oloñuatisi viekongelo, laviovo vi kale omanu va sumbiwa, ka vi ka kale lalimi avali, ka vi ka nyue ovinyu yalua, ka vi ka livele onganyu yevĩho, vi kakatele kelumbu li kola liekolelo lowanji wutima wa yela. Vi setekiwe tete nda va tẽla oku tẽlisa ocikele caco; kuenje nda ka va kuete eko va pondola oku kala oloñuatisi viekongelo. Oloñuatisi viekongelo vi linge alume wukãi umosi, vi songuile ciwa omãla vavo kuenda epata liavo muẽle.” (1 Tim. 3:8-10, 12) Eci akulu vekongelo va kũlĩhĩsa vamanji oco va linge oloñuatisi viekongelo, ovo va sukila oku konomuisa nda vamanji vaco va kapako olonumbi Viembimbiliya vi kisikiwa kokuavo. Eci ci teyuila ekongelo kalundi catiamẽla kalume va nõliwa, oco va tambule ovikele vilikasi.

⁴ Ci kaile akulu ale amalẽhe, oloñuatisi viekongelo vi likolisilako calua kupange woku kunda vokuenda kuosãi. Omo lioku setukula Yesu, ovo va lekisa ombili kupange woku kunda. Omo liombili yaco, ovo va situlula onjongole ya Yehova yoku popela omanu.—Isa. 9:7.

⁵ Oloñuatisi viekongelo vi lekisavo ongangu yiwa koku wala, koku liposuisa, koku vangula kuenda kovituwa. Ovo va lekisa esuluviko kuenje ci vetiya vakuavo oku va sumbila. Handi vali, va kapako calua ukamba wavo la Yehova kuenda ovikele va kuete vekongelo.—Tito 2:2, 6-8.

⁶ Vamanji vaco, “va setekiwe tete nda va tẽla oku tẽlisa ocikele caco.” Osimbu handi ka va tambuile ocikele caco, ovo va sukila oku lekisa okuti alume vamue va litumbika. Va lekise okuti komuenyo wavo va pitisa kovaso  Usoma kuenda va likolisilako oco va tẽlise ovikele vikuavo. Ocili okuti, ovo ongangu yiwa ku vakuavo vekongelo.—1 Tim. 3:10.

⁷ Oloñuatisi viekongelo via siata oku lingila vamanji ovopange alua awa okuti, cecelela akulu vekongelo oku kuata otembo yalua yoku tẽlisa ovopange oku longisa kuenda oku pasuisa vamanji. Poku va ĩha ovikele, akulu vekongelo va sokolola kuloño womunu lomunu kuenda kesukila liekongelo.

⁸ Kũlĩhĩsa amue pokati kovopange aco: Oñuatisi yekongelo citava okuti, yi tambula ocikele coku tata alivulu tu tambula, oku lilongisa, loku talavaya la-o kupange woku kunda. Vakuavo va tata ovolandu ekongelo ale ovicapa viovikanjo viekongelo. Vamue va tambula ocikele coku tata anguena, oku talavaya lolomakina viovileñi, oku kala olonjiliki kuenda oku kuatisa akulu vekongelo volonjila via litepa. Oku semũlũla kuenda oku yelisa Onjango Yusoma, cambata upange walua kuenje oloñuatisi viekongelo vi tambula ocikele coku kuatisa kovapange aco.

⁹ Vakongelo amue, citava okuti oñuatisi loñuatisi yi tambula ocikele cimue. Pole vakongelo akuavo, oñuatisi yimosi yekongelo yi tambula ovikele vialua. Handi vali, vakongelo amue oloñuatisi vialua viekongelo vi linga upange umuamue. Nda okuti ekongelo ka li kuete oloñuatisi vialua viekongelo oco vi tẽlise ovikele vimue, akulu vekongelo va linga esokiyo liokuti vamanji vamue va papatisiwa, haivo vakuangangu  yiwa va linga ovopange aco. Kuenje ci va kuatisa oku kuata uloño u va kuatisa oku tẽlisa ovikele vikuavo eci va linga oloñuatisi viekongelo. Nda ka kuli vamanji alume, citava oku pinga kumanji umue ukãi ukuangangu yiwa oco a kuatise kovina vimue, ndaño okuti ka tambula ocikele coku kala oñuatisi yekongelo. Ukristão umue ukuavituwa viwa, ongangu yiwa ku vakuavo kovina viosi a linga komuenyo, ndeci, oku enda enda kolohongele, kupange woku kunda, vomuenyo wepata, poku nõla ovitalukilo, koku wala, koku liposuisa kuenda kovina vikuavo.

¹⁰ Vakongelo ana okuti ka muli akulu valua vekongelo, oloñuatisi viekongelo via loñoloha vi pondola oku nõliwa oco vi kũlĩhĩse lomunu o ka papatisiwa apulilo Embimbiliya. Apulilo aco a sangiwa Kalomboluilo “Onepa 1: Alongiso Akristão.” Pole “Onepa 2: Omuenyo Wukristão,” yi konomuisiwa lukulu wekongelo.

¹¹ Nda kuli esunga likuavo, ocimunga cakulu vekongelo citava okuti, va pongolola ovikele vi eciwa koloñuatisi viekongelo. Pole, kuli asunga alua okuti vamanji vamue va kala lovikele vimue otembo yalua, oco ci va kuatise oku loñoloha.

¹² Omo okuti ekalo lio pocitumãlo li pongoloka, citava okuti, ku kala ovikele vikuavo vi eciwa koloñuatisi viekongelo  okuti, ‘omanu vosi va limbuka muẽle oku amako kuavo.’ (1 Tim. 4:15) Nda ka kuli akulu valua vekongelo, oñuatisi yimue yekongelo yi nõliwa oco yi kale oñuatisi yusongui wocimunga ale oñuatisi yocimunga cupange woku kunda, pole, ci songuiwa lakulu vekongelo. Oloñuatisi viekongelo citava okuti, vi nõliwa oco vi linge olonepa kohongele Yekalo Lietu Tuakristão Kuenda Oku Kunda, oku kongelamo oku songola Elilongiso Liembimbiliya Vekongelo nda ci sukiliwa kuenda oku linga olohundo viowiñi. Nda kuli esukila likuavo, okuti va tẽlisa olonumbi, va pondola oku tambula ovikele vikuavo. (1 Pet. 4:10) Poku kuatisa akulu vekongelo, oloñuatisi viekongelo vi sukila oku lieca lutima wosi.

¹³ Ovikele violoñuatisi viekongelo, via litepa levi viakulu vekongelo. Ndaño ndoco, ka ci lomboloka okuti ka vi koli ale ka vi kuete esilivilo vekongelo. Noke yotembo yimue, nda oñuatisi yimue yekongelo yi tẽlisa ciwa ovikele viaye loku loñoloha poku kala ungombo kuenda ulongisi uwa, eye citava okuti o ñoliwa oco a kale ukulu wekongelo.

¹⁴ Nda ove wumalẽhe ale ndopo wa papatisiwa, o kasi hẽ oku likolisilako oco o tẽlise ocimãho coku kala oñuatisi yekongelo? (1 Tim. 3:1) Unyamo lunyamo omanu valua va kasi oku kũlĩha ocili Cembimbiliya, omo liaco ku sukiliwa alume va loñoloha konepa yespiritu oco va tambule ovikele vekongelo. O pondola oku likolisilako oku tẽlisa ovimãho viaco poku lekisa onjongole yoku kuatisa omanu. Onjila yimue yoku ci linga, oku sokolola kongangu yiwa ya Yesu. (Mat. 20:28; Yoa. 4:6, 7; 13:4, 5) Onjongole yove yi ka livokiya osimbu o kuata esanju li  tunda koku eca. (Ovil. 20:35) Omo liaco, lieca olumue oco o kuatise vakuene, oku kuatisa kupange woku semũlũla Olonjango Viusoma ale oku lieca olumue oco o piñainye manji okuti, ka pondola oku tẽlisa onepa yaye kohongele Yekalo Lietu Tuakristão Kuenda Oku Kunda. Handi vali, likolisilako oku kuata ovituwa Viukristão poku linga efendelo lio pokolika. (Osa. 1:1, 2; Va Gal. 5:22, 23) Manji wosi o likolisilako konepa yaco, o lekisa okuti wa koleliwa eci a tambula ovikele vekongelo.—1 Va Kor. 4:2.

¹⁵ Oloñuatisi viekongelo vi nõliwa lespiritu sandu oco vi kuatise vamanji. Vosi vekongelo va sukila oku lekisa okuti, va kapako upange woloñuatisi viekongelo, poku pokola kokuavo eci va tẽlisa ovikele va tambula. Poku ci linga, vamanji vekongelo va lekisa okuti va sanjukila eliangiliyo lia Yehova lioku amamako oku ongotiya epata liaye.—Va Gal. 6:10.