OMO okuti Yesu wa kala ukuambili koku kunda olondaka viwa, eye wa sila ongangu yiwa olondonge viaye. Eye wa sanda otembo yoku sandiliya omanu poku va kundila, oku va longisa kolonjo viavo kuenda kovitumãlo kua kala omanu valua. (Mat. 9:35; 13:36; Luka 8:⁠1) Yesu ka vanguile lika lomanu valua vepuluvi limosi, pole wa enda oku longisa omunu lomunu kuenda wa longisavo olondonge viaye pokolika. (Mar. 4:​10-13; 6:​35-44; Yoa. 3:​2-21) Eye wa sanda apuluvi osi oco a vangule olondaka vi vetiya havio vi eca elavoko. (Luka 4:​16-19) Ndaño ceci a sukilile oku puyukapo kuenda oku kavuluisiwa, eye ka pumbile epuluvi lalimue lioku eca uvangi. (Mar. 6:​30-34; Yoa. 4:​4-34) Eci tu tanga ovolandu a Yesu atiamẽla kupange woku kunda, ka tu vetiyiwa hẽ oku kuama ongangu yaye? Ocili, tu liyeva ndeci ovapostolo va liyevele.​—⁠Mat. 4:​19, 20; Luka 5:​27, 28; Yoa. 1:​43-45.

² Kũlĩhĩsa apuluvi Akristão va kuete koloneke vilo, oku panga onepa kupange Yesu Kristu a fetika okuti, pa pita ale ci soka 2.000 kanyamo.

³ Omo okuti Tulombangi Via Yehova, tua kũlĩha esilivilo lioku kundila olondaka viwa Viusoma konjo lanjo, lonjila yimue ya sokiyiwa ciwa. Tu kuãi onjila yaco okuti ya linga ondimbukiso yimue kokuetu. Handi vali, onima yiwa tua siata oku kuata yeca uvangi wokuti, tu kasi oku  talavaya ciwa lonjila yaco oco tu vetiye omanu valua votembo yitito ya kambako. (Mat. 11:19; 24:14) Upange woku kundila konjo lanjo, onjila yimue yi lekisa okuti, tu sole Yehova kuenda omanu.​—⁠Mat. 22:​34-40.

⁴ Upange woku kundila konjo lanjo, hacina cimueko ca luvikiyiwa Lolombangi Via Yehova. Upostolo Paulu wa popia okuti, wa enda oku longisa omanu kolonjo viavo. Poku sapela lakulu vekongelo ko Efeso catiamẽla kupange waye woku kunda, wa popia hati: “Tunde keteke liatete nda liatela voluvumba luo Asia, . . . sia liwekelepo oku vu sapuili ovina viwa, ale oku vu longisa . . . konjo lanjo.” Lonjila ndeyi kuenda volonepa vikuavo, Paulu wa “imbila uvangi wosi ku va Yudea kuenda ku va Helasi catiamẽla koku likekembela kovaso a Suku, loku kolela Ñala yetu Yesu.” (Ovil. 20:​18, 20, 21) Kotembo yaco, olombiali vio Roma via vetiyile efendelo lioviteka kuenda omanu va “sumbilile olosuku ka va kũlĩhĩle.” Ovo va sukilile oku sanda lonjanga “Suku una wa lulika oluali kuenda ovina viosi vi kasimo,” Una o kasi “oku sapuila omanu vosi vo kolonepa viosi okuti, va sukila oku likekembela.”​—⁠Ovil. 17:​22-31.

⁵ Esulilo lioluali lulo lũvi li kasi ocipepi. Omo liaco, upange woku kundila omanu olondaka viwa, u sukila oku lingiwa lonjanga. Esukila liaco, li tu vetiya oku likolisilako calua kupange woku kunda. Otembo ya lekisa okuti, ka kuli onjila yikuavo ya velapo yoku sandiliya omanu va kuete onjala yoku kũlĩha ocili, nda hakukundilako konjo lanjo. Onjila yaco, ya siata oku eca onima yiwa koloneke vilo, ndeci ca pita koloneke via Yesu kuenda viovapostolo.​—⁠Mar. 13:⁠10.

⁶ Ove hẽ wa siata oku panga onepa kupange woku kundila konjo lanjo? Kolela okuti, Yehova o sole calua alikolisilo  ove. (Esek. 9:11; Ovil. 20:35) Citava okuti, kokuove ka ca lelukile oku kundila konjo lanjo. Pamue o kuete ocitangi cuhayele, ale wa siata oku kundila vocikanjo cina okuti, omanu ka va kuete onjongole yoku ku yevelela. Ale pamue, citava okuti upange wetu u kasi oku tatekiwa lolombiali. Ove pamue ukuasõi kuenda ka ca lelukile kokuove oku fetika ombangulo lomanu kua kũlĩhĩle. Kuenje olonjanja viosi o panga onepa kupange woku kundila konjo lanjo, o sakalala. Pole, ku ka sumue. (Etu. 4:​10-12) Ekalo liove, ka lia litepele lekalo lia vamanji valua kovitumãlo vimue.

⁷ Yesu wa likuminya kolondonge viaye hati: “Ñasi kumue lene oloneke viosi, toke kesulilo lioluali.” (Mat. 28:20) Ohuminyo eyi yi tu kuatisa oco tu pange onepa kupange woku linga olondonge. Etu tu liyevite ndeci upostolo Paulu, wa popia hati: “Kovina viosi ñuete ongusu mekonda lia una o nyĩha unene.” (Va Fil. 4:13) Kuama ciwa asokiyo a lingiwa lekongelo oku kundila konjo lanjo. Poku kundila kumosi la vakuene, o ka vetiyiwa kuenda o tambula ekuatiso o sukila. Likutilila loku pinga ekuatiso oco o yule ovitangi viosi o kasi oku liyaka lavio kuenda likolisilako oku kala ukundi wolondaka viwa.​—⁠1 Yoa. 5:⁠14.

⁸ Poku vangula la vakuene catiamẽla kolondaka viwa, ove o ka kuata epuluvi lioku va lomboluila “catiamẽla kelavoko o kuete.” (1 Pet. 3:15) Ove o ka limbuka etepiso li kasi pokati ka vana va kuete elavoko Liusoma kuenda vana ka va kuete elavoko. (Isa. 65:​13, 14) Ove o ka kuata esanju poku kũlĩha okuti, o kasi oku pokola kocihandeleko ca Yesu, coku “tuisa ocinyi cove,” loku kuata esumũlũho lioku kuatisa vakuene oku kũlĩha Yehova kuenda ocili  ci tuala komuenyo ko pui.​—⁠Mat. 5:16; Yoa. 17:3; 1 Tim. 4:⁠16.

⁹ Kua siata oku lingiwa asokiyo oku kundila konjo lanjo, kesulilo liosemana kuenda vokati kosemana. Kovitumãlo vina okuti ka ca lelukile oku sanga omanu lutanya, akongelo amue a siata oku linga esokiyo lioku kunda koñolosi. Citava okuti, omanu va likapelako vali oku tambula akombe velivala liaco, okuti komẽle ci sule.

¹⁰ Yesu wa longisa olondonge viaye “oku sandiliya vana va sesamẽla.” (Mat. 10:11) Eye ka endaile lika oku ci linga poku kundila konjo lanjo. Eye wa enda oku eca uvangi vapuluvi osi, ci kaile uvangi wa sokiyiwa ale una ka wa sokiyiwile. (Luka 8:1; Yoa. 4:​7-15) Ovapostolo, va endavo oku kundila kovitumãlo via litepa.​—⁠Ovil. 17:17; 28:​16, 23, 30, 31.

¹¹ Koloneke vilo, ocimãho cetu oku sapelavo letendelo lialua liomanu catiamẽla kesapulo Liusoma. Oco tu ci tẽlise, tu sukila oku setukula olonjila Yesu lovapostolo va kuama koku kunda kuenda oku kapako apongoloko otembo kuenda ekalo liomanu. (1 Va Kor. 7:31) Ndeci, akundi valua va siata oku kuata onima yiwa poku kundila kovitumãlo viavo viupange. Oku kundila volokololo kua siatavo oku eca onima yiwa kolofeka vimue, ndeci poku eca uvangi kovitumãlo viepuyuko, kovitumãlo vioku sia akãlu ale kovitumãlo kuli omanu valua. Akongelo amue, a siata oku talavaya lolomesa kuenda otuakãlu tuoku kapa alivulu. Handi vali, kovitumãlo kuna ku pita omanu valua, o filiale citava okuti yi linga esokiyo lioku eca uvangi ulikasi  kovitumãlo viaco, poku talavaya la vamanji va sangiwa vakongelo a litepa. Poku ci linga, ci kuatisa akundi oku sapela lomanu vana okuti, ka ca lelukile oku va sanga kolonjo viavo.

¹² Eci tu kundila kovitumãlo kuli omanu valua, tu pondola oku eca elivulu limue komunu wa lekisa onjongole. Oco o vetiye o njongole yomunu waco, citava okuti eca kokuaye etendelo liove liotelefone kuenda oku sokiya oku linga epasu, oku u lekisa o jw.org, ale oku eca kokuaye onumbi Yonjango Yusoma ocipepi lonjo yaye. Ove o ka limbuka okuti oku eca uvangi kovitumãlo ku pita omanu valua, onjila yimue yi sanjuisa yoku vokiya upange woku kunda.

¹³ Pole, oku kunda olondaka viwa Viusoma, hawoko lika upange wa eciwa Kakristão koloneke vilo. Oco tu kuatise vakuetu oku tava kocili ci tuala komuenyo, ci kuete esilivilo oku va nyula olonjanja viosi, oco va kule konepa yespiritu kuenda oku kala Akristão va pama kekolelo.

¹⁴ Yesu wa sapuila olondonge viaye hati: “Vu ka linga olombangi viange . . . toke kasulilo o kilu lieve.” (Ovil. 1:⁠8) Pole, wa vi sapuilavo hati: “Kuendi, ka longisi omanu vo kolofeka viosi oco va linge olondonge . . . va longisi oku linga ovina viosi ndo kundiki.” (Mat. 28:​19, 20) Oku linga apasu, ku nena esanju lialua kupange wa Yehova. Vana va lekisa onjongole kolondaka viwa eci wa va kundila onjanja yatete, citava okuti va ka sanjukila oku ku mola vali. Poku sapela lavo catiamẽla Kembimbiliya, o pondola oku va kuatisa oku pamisa ekolelo va kuetele Suku, loku va kuatisa oku limbuka okuti va kuete enyõna liukũlĩhĩso wa  Suku. (Mat. 5:⁠3) Nda ove wa lipongiya ciwa loku va nyula vapuluvi a va sungulukila, citava okuti o fetika oku longisa omunu umue Embimbiliya. Ocili okuti, eci oco ocimãho cove poku linga apasu. Ocimãho cetu hakukũlako lika ombuto yocili, pole oku yi tapelavo.​—⁠1 Va Kor. 3:⁠6.

¹⁵ Ocili okuti, ku vamue ka ca lelukile oku linga apasu. Citava okuti kokuove, ca leluka calua oku fetika ombangulo poku kunda olondaka viwa kuenda o sole calua onjila yaco yoku kunda. Pole, eci o sokolola oku tiukilako vali, oco vu ka sapeli catiamẽla Kembimbiliya, ci pondola oku ku kokela esakalalo lialua. Nda wa lipongiya ciwa, ci ka ku kuatisa oku tula utima. Ku ka ivaleko okuti olonumbi vi eciwa kohongele vokati kosemana, vi pondola oku ku kuatisa. Ove o pondolavo oku laleka ukundi umue wa loñoloha oco a ende love koku linga epasu.

¹⁶ Ukundi Filipu poku sapela la enuku wa kala oku tanga ondaka ya Suku, wo pula hati: “Eci o kasi oku tanga ndeti ca ku lomboloka muẽle?” Ulume wo tambulula hati: “Ci ndomboloka ndati nda ka pali laumue o ci ndomboluila”? Ulandu Wembimbiliya u sangiwa Kovilinga ocipama 8 u lekisa okuti, poku fetika lonepa Yocisonehua ulume a kala oku tanga, Filipu, wo “kundila olondaka viwa viatiamẽla ku Yesu.” (Ovil. 8:​26-36) Ka tua kũlĩhĩle otembo Filipu a kala lulume waco, pole, olondaka viwa Filipu o kundila, vio  vetiya oku kuata ekolelo loku pinga oco a papatisiwe. Eye wa linga ondonge ya Yesu Kristu.

¹⁷ Omanu valua koloneke vilo ka va kũlĩhĩle ciwa Embimbiliya. Omo liaco, ci sukila oku linga apasu olonjanja vialua, loku linga lavo elilongiso Liembimbiliya vokuenda kuolosemana, vokuenda kuolosãi ale ceci ci pitãhala unyamo oco va kuate ekolelo loku papatisiwa. Pole, ekuatiso liocisola kuenda epandi o lekisa kuvakuavitima via sunguluka oco va linge olondonge, li koka onima yiwa, ndomo Yesu a ci popia hati: “Esanju li tunda koku eca olio lia velapo, li tunda koku tambula li sule.”​—⁠Ovil. 20:⁠35.

¹⁸ Ocili okuti, ove o ka sanjukila oku songola elilongiso Liembimbiliya lelivulu limue lia sokiyiwila oku ci linga. Poku kapako olonumbi vi eciwa kohongele yo vokati kosemana, loku talavaya lakundi va loñoloha, ove o ka songola alilongiso Embimbiliya amamako oku kula kuenda oku kuatisa vakuene oku linga olondonge via Yesu Kristu.

¹⁹ Nda ove o sukila ekuatiso lioku fetika elilongiso Liembimbiliya, lianja oco o vangule lukulu umue wekongelo, ale manji umue wa loñoloha koku longisa. Olonumbi vi sangiwa Vekalo Lietu Tuakristão Kuenda Oku Kunda havio via siata oku lekisiwa kolohongele, vi pondolavo oku ku kuatisa. Kolela ku Yehova kuenda u sapuila okuti, o yongola oku fetika elilongiso limue Liembimbiliya. (1 Yoa. 3:22) Omo liaco, ndaño o songola elilongiso limue Liembimbiliya, ku umue ukuepata liove, kuata ocimãho coku fetika elilongiso limue Liembimbiliya. Poku songola alilongiso Embimbiliya, o ka kuata esanju lialua kupange woku kunda.

²⁰ Eci tu kuatisa vakuetu oku kũlĩha Yehova, loku linga olondonge via Yesu Kristu, ovo vatiamẽla kekongelo. Vana tu longisa Embimbiliya va ka kula konepa yespiritu, nda va limbuka okuti Yehova o kuete ocisoko cimue kuenda va talavayela kumosi locisoko caco. Ci kuete esilivilo oku va longisa oku ci linga. Olovideo vimue kuenda ombrochura losapi, Velie va Kasi Oku Linga Ocipango ca Yehova Koloneke Vilo?, via pongiyiwila locimãho caco. Olonumbi vimue vi sangiwa Kocipama 4 celivulu lilo, vi pondolavo oku kuatisa.

²¹ Tunde kefetikilo poku longisa omunu Embimbiliya, u kuatisa oku limbuka okuti Yehova o talavaya locisoko cimue, oco a tẽlise upange woku kunda olondaka viwa palo posi koloneke vilo. Lekisa esilivilo lialivulu etu kuenda lombolola ndomo a siata oku pangiwa loku eciwa koluali luosi, la vamanji va litumbika ku Suku. Laleka ondonge yove oku endela kumosi kolohongele Vonjango Yusoma. Lombolola ndomo olohongele vietu vi lingiwa kuenda u lekisa ku vamanji. U kuatisavo oku kũlĩha Olombangi vikuavo via Yehova, kolohongele vimbo levi viofeka. Vapuluvi aco kuenda akuavo, u wecelela eye muẽle oku limbuka ndomo afendeli va Yehova va li kuetele ocisola, okuti oyo ondimbukiso yi situlula Akristão vocili. (Yoa. 13:35) Ondonge yi ka kuata ukamba uwa la Yehova, osimbu yi kũlĩha ciwa ocisoko caye.

²² Akristão vatete va kala vakuambili koku talavaya Londaka ya Suku. Ovo va enda oku upa olokopia Viovisonehua  oco va vi lilongise pokolika kuenda vekongelo. Va endavo oku vetiya vakuavo oku lilongisa ocili Condaka ya Suku. Olokopia va enda oku soneha via kala vitito pole, va vi velisilepo calua. (Va Kol. 4:16; 2 Tim. 2:15; 3:​14-17; 4:13; 1 Pet. 1:⁠1) Koloneke vilo Olombangi Via Yehova vi kuãi ovoloño vo kotembo yilo, poku upa olokopia loku panga Ambimbiliya alua kuenda alivulu akuavo a kunamẽla Kembimbiliya. Vupange waco mua kongela ovikanda, olombrochura, alivulu kuenda olorevista kalimi alua.

²³ Poku kundila vakuene olondaka viwa, ku ka ivaleko oku talavaya lalivulu a eciwa locisoko ca Yehova. Poku limbuka ndomo wa kuatisiwa poku tanga alivulu Olombangi Via Yehova, ci ku vetiyavo oku a eca ku vakuene.​—⁠Va Hev. 13:​15, 16.

²⁴ Koloneke vilo, omanu va kasi oku talavaya calua lo internet ndono yavo ya koleliwa yoku sanga olonumbi. Etu tu kuete alivulu a kunamẽla Kembimbiliya, tu kuetevo onumbi yetu yo jw.org okuti, ocimalẽho cimue ci kuete esilivilo lialua poku kunda olondaka viwa Viusoma. Omanu vo kolonepa vialua voluali, va pondola oku talavaya lo komputador poku yevelela ovolandu Embimbiliya a ngalavaliwa kuenda ovolandu akuavo a kunamẽla Kembimbiliya kalimi alua. Omanu vana okuti ka va lianji poku sapela letu, ale vana va kasi kovitumãlo vina okuti ka kuli Olombangi Via Yehova, va pondolavo oku kũlĩha ovina tu tava poku iñila vo jw.org, oku upisa muẽle kolonjo viavo.

²⁵ Omo liaco, kua siatavo oku sandekiwa ovipama vo jw.org vapuluvi osi. Nda omunu umue o tu linga epulilo liatiamẽla kovina tu tava, tu u lekisa lonjanga etambululo  liaco vonumbi yetu pocakati co telefone yetu ale vo komputador. Nda tua sanga omunu umue o vangula elimi likuavo, oku kongelamo elimi lioku ilaika, tu pondola oku u sapuila catiamẽla konumbi yetu, oco a sange Embimbiliya kuenda alivulu akuavo a kunamẽla Kembimbiliya kelimi liaye muẽle. Akundi valua va talavaya lolovideo vi sangiwa vo jw.org poku fetika ombangulo ya kunamẽla Kembimbiliya.

²⁶ Yesu wa sapuila vana va kala oku yevelela lutate olondaka viaye hati: “Ene vucinyi coluali. . . . Ocinyi cene ci tuile komanu, oco va mole ovilinga viene viwa kuenje va eca esivayo ku Isiene o kasi kovailu.” (Mat. 5:​14-16) Olondonge viaco via sokolola ciwa ovisimĩlo via Suku poku setukula Yesu una wa popia hati: “Ame ndicinyi coluali.” Yesu wa sila ongangu yiwa Kakristão poku ecelela okuti, “ocinyi comuenyo ci tuila” komanu vana va lekisa onjongole yoku u yevelela.​—⁠Yoa. 8:⁠12.

²⁷ Upostolo Paulu wa tu silavo ongangu yiwa koloneke vilo. (1 Va Kor. 4:16; 11:⁠1) Osimbu eye a kala ko Atenasi, wa kundila omanu va kala pocitanda. (Ovil. 17:17) Vamanji ko Filipu va kuamavo ongangu yaye. Eli olio esunga lieci Paulu a sonehela okuti: “va kala oku tuila ndocinyi voluali pokati kocitumbulukila ca tatama haico ca vĩha.” (Va Fil. 2:15) Koloneke vilo, tu pondola oku tuisa ocinyi Cusoma, pocakati covilinga vietu kuenda kolondaka olonjanja viosi tu kuata epuluvi lioku sapuilako vakuetu, catiamẽla kolondaka viwa. Ocili okuti ongangu yetu yiwa kuenda oku kala vakuacili, ci kuatisa omanu oku limbuka okuti tua litepa  loluali. Pole, eci tu sapela lavo catiamẽla kolondaka viwa, va kuata elomboloko lia suapo lieci tua litepela.

²⁸ Afendeli valua va Yehova va vangula eci catiamẽla kolondaka viwa ku vakuavo va sanga kovopange, kosikola, voviendelo, ale kovitumãlo vikuavo poku linga ovopange eteke leteke. Poku linga ungende, citava okuti tu kuata epuluvi lioku sapela la vana tu linga lavo ungende. Omunu lomunu pokati ketu o sukila oku likolisilako oco a sande epuluvi lioku pongolola ombangulo, loku eca uvangi. Olonjanja viosi tu sukila oku lipongiya oco tu sapele la vakuetu vapuluvi ana a ecelela.

²⁹ Tu vetiyiwa oku ci linga poku ivaluka okuti, tu kasi oku eca esivayo kululiki wetu, loku sumbila onduko yaye. Handi vali, tu kuatisa vakuavitima via sunguluka oku kũlĩha Yehova, oco okuti vo vumbavo loku kuata elavoko liomuenyo ko pui poku kolela ku Yesu Kristu. Yehova wa kapako calua alikolisilo aco kuenda o a tenda okuti upange umue u kola.​—⁠Va Hev. 12:28; Esit. 7:​9, 10.

³⁰ Yehova o yongola okuti esapulo Liusoma li kundiwila voluali luosi, ndeci valupale kuenda kovaimbo va kasi ocipãla. Omo liaco, akongelo ana okuti a kasi ocipãla, va tambula ovikele viovikanjo oku upisa ko Betele. (1 Va Kor. 14:40) Eci ci likuata leci Akristão vo kocita catete va enda oku linga, poku songuiwa la Suku. (2 Va Kor. 10:13; Va Gal. 2:⁠9) Omo okuti, upange Wusoma u kasi oku livokiya calua koloneke vilo via sulako, upange walua u pondola oku lingiwa nda wa sokiyiwa ciwa poku talavaya vocikanjo cekongelo.

 ³¹ Esokiyo liaco, li songuiwa la mitavaso yupange woku kunda. Oñuatisi yimue yekongelo yi pondola oku nõla ocikanjo. Kuli ovikanjo vivali, ocikanjo cocimunga kuenda ocikanjo comunu lomunu. Nda ocikanjo cekongelo citito, olomitavaso viocimunga cupange woku kunda, vi linga eliangiliyo liocikanjo muna akundi va pondola oku kundila. Handi vali, nda ocikanjo caco ci nene, ukundi lukundi o pondola oku kuata ocikanjo caye.

³² Ukundi una okuti o kuete ocikanjo caye, o pondola oku kuata ocitumãlo cimue coku kunda, valivala ana okuti ka ku lingiwa ohongele yoku enda kupange woku kunda, ale vateke ana okuti ka citava oku liongoluila kocimunga. Ndeci, vamue va kuete ocikanjo cavo ocipepi locitumãlo va talavaya kuenda omo va kundila eci va kala kelivala liepuyuko, kelivala lionanya, ale noke liupange. Apata amue a kuete ocikanjo cavo vimbo va kasi loku kundilamo oloneke vimue koñolosi. Nda omunu wa kũlĩha ciwa ocikanjo caye muẽle, cu kuatisa oku talavaya ciwa lotembo a kuete kupange woku kunda. Handi vali, ocimunga ci pondola oku eca uvangi vocikanjo cimue, ndaño okuti ca nõliwila lika omunu umue. Nda o yongola oku kuata ocikanjo cove muẽle, pinga kumanji ukuakueca ovikanjo.

³³ Nda okuti mitavaso o linga esokiyo liocikanjo cocimunga, ale nda ukundi umue o kuete ocikanjo caye muẽle, ovo va sukila oku likolisilako oco va sange omunu umue, konjo lanjo. Mitavaso wosi ale ukundi umue o kuete ocikanjo, o sukila oku likolisilako oku tokeka ocikanjo caco vokuenda kuolosãi vikuãla. Onjila ndomo ocikanjo caco ci tokekiwa, yi sukila oku likuata lesokiyo liolonumbi via eciwa. Noke yoku tokekiwa kuocikanjo caco, ukundi o sukila  oku ci sapuila ku manji ukuakueca ovikanjo. Poku kapako ekalo liocikanjo caco, mitavaso yocimunga ale ukundi, citava okuti o kala locikanjo caco, oco a talavayemo vali ale oku ceca ku manji ukuakueca ovikanjo.

³⁴ Nda okuti akundi vosi vekongelo va talavayela kumosi, ocikanjo ci tokekiwa lonjila yimue ya sunguluka. Handi vali, ci kuatisavo oku yuvula okuti akundi vavali ale akundi valua, va nyula vonjanja yimuamue kolonjo viaco, vepuluvi limue okuti pa pita lika otembo yitito kuenda ka ci sanjuisa omanu tu sanga. Nda tua ci linga tu lekisa okuti tua kapako vamanjetu kuenda omanu tu sanga vocikanjo.

³⁵ Omanu vosi va sukila oku lilongisa catiamẽla ku Yehova Suku, Komõlaye kuenda eci catiamẽla Kusoma. (Esit. 14:​6, 7) Tu kuete onjongole yoku kuatisa omanu kalimi osi, oco va tẽle oku sivaya onduko ya Yehova, oku popeliwa kuenda oku kuata ovituwa viomunu wokaliye. (Va Rom. 10:​12, 13; Va Kol. 3:​10, 11) Ovitangi vipi vi tunda koku kundila kovitumãlo kuna kuli omanu va vangula alimi alua? Tu yula ndati ovitangi viaco oco cecelele okuti etendelo lialua liomanu li kuata epuluvi lioku yeva esapulo Liusoma, kelimi liavo muẽle?​—⁠Va Rom. 10:⁠14.

³⁶ Ovikele viocikanjo cekongelo lekongelo, vi lingiwa ndomo ci likuata lelimi liaco. Omo liaco, kolonepa vina okuti ku vanguiwa alimi alua, akundi va kasi vakongelo ana a litepa, va pondola oku kundila kolonepa viaco. Poku ci linga, ciwa okuti ukundi lukundi, watiamẽla kekongelo  lia litepa, o sukila oku kundila omanu kelimi va vangula. Eci ci tiamisiwilavo kupange u likasi u lingiwa unyamo lunyamo, ale poku eca otuikanda tuoku laleka omanu. Pole, poku eca uvangi kovitumãlo kuna kuli omanu valua, ale poku eca uvangi ka wa sokiyiwile, akundi citava okuti va sapela lomanu vosi loku eca alivulu kalimi akuavo.

³⁷ Olonjanja vimue, akongelo ana okuti a vangula alimi a litepa, ka va tẽla oku kundila kolonepa vi kasi ocipãla locikanjo. Omo liaco, olomitavaso viupange woku kunda vakongelo aco, vi sukila oku lisapela pokati locimãho coku linga esokiyo limue, li ka ecelela oku tokekisa ocikanjo caco okuti, ci kuatisa akongelo osi. Poku ci linga, ci kuatisa omanu vosi oku kuata epuluvi lioku yeva esapulo Liusoma, loku yuvula okuti akundi va kasi vakongelo a litepa va vangula lomanu vamuamue.​—⁠Olosap. 15:⁠22.

³⁸ Nye tu sukila oku linga nda omunu tua sanga ka vangula elimi lietu? Ka tu ka simi okuti akundi vana va vangula elimi liaye ovo va endako oku ko nyula. Akundi vamue va lilongisa ndomo va fetika ombangulo kelimi li vanguiwa vocikanjo cavo. Tu pondola oku lekisa komunu ndomo a tanga, ale oku tapa alivulu kelimi liaye muẽle vonumbi yo jw.org, ale oku likuminya okuti tu ko tualela alivulu kelimi liaye.

³⁹ Nda tua limbuka okuti omunu tua sanga o kuete onjongole, tu sukila oku sanda manji o vangula elimi liaye, oco o kuatise. Tu sukilavo oku sapuila ekongelo li kasi ocipepi, okuti li linga olohongele kelimi liaye. Nda omunu waco o yongola okuti umue o vangula elimi liaye u sandiliya, tu lekisa ndomo a eca olonumbi viaye lekuatiso lio jw.org.  Noke o Betele yi sanda ocikanjo omunu a kasi, ukundi, ocimunga ale ekongelo lina okuti li pondola oku u kuatisa.

⁴⁰ Tu sukila oku amamako oku nyula omunu wa lekisa onjongole, toke eci a popia okuti, konjo yaye ku iyaya ale omunu o vangula elimi liaye. Olonjanja vimue, o Betele yi sapuila akulu vekongelo okuti, ka va sangele omunu o vangula elimi liomunu waco. Nda oco ci pita, tu sukila oku linga cosi citava oco tu likolisileko oku longisa omunu waco. Nda citava, tu lilongisa laye Embimbiliya poku kuama elivulu li kasi kelimi liaye. Nda tua talavaya ciwa lalitalatu, loku pinga komunu waco oco a tange ovinimbu Viembimbiliya via tukuiwa, citava okuti eye o ka kuata ukũlĩhĩso Wembimbiliya. Umue ukuepata wa kũlĩha ciwa elimi liomunu waco, ale elimi li vanguiwa vocikanjo caco, citava okuti u pitiyilako.

⁴¹ Tu pondola oku kuatisa omunu wa lekisa onjongole oku iya vocisoko ca Yehova, poku iya iya kolohongele vietu ndaño okuti ka kuete elomboloko lia suapo lieci ci popiwa. Nda okuti eye o kuete Embimbiliya kelimi liaye, tu u kuatisa oku sanga elomboloko liovinimbu Viembimbiliya vi kasi oku tangiwa. Oku kala la vakuavo vekongelo, ci pamisa omunu waco kuenda ci u kuatisa oku kula konepa yespiritu.

⁴² Ovimunga viakundi va vangula alimi a litepa vekongelo: Ocimunga caco ca sokiyiwa lakundi vana okuti, va kundila kelimi limue okuti ka li vanguiwa vekongelo, ndaño ka pali ukulu umue wekongelo ale oñuatisi yekongelo, yi pondola oku songola ohongele yaco, olosemana viosi kelimi liaye. O Betele yi pondola oku nõla ekongelo limue, oco li songuile ocimunga caco:

1.   (1) Nda vocikanjo caco muli etendelo liomanu valua va vangula elimi lia litepa leli liekongelo.

2.  (2) Nda kuli akundi valua va kũlĩha elimi liaco ale va yongola oku li lilongisa.

3.  (3) Nda ocimunga cakulu vekongelo ci yongola oku kuata ocikele coku songola upange woku kunda kelimi liaco.

 Nda ocimunga cakulu vekongelo ci yongola okuti ekongelo li songuila ocimunga caco, va sukila oku kũlĩhĩsa manji ukuakunyula akongelo. Eye citava okuti wa kũlĩha akongelo a kasi oku seteka oku kundila kelimi liaco kuenda o pondola oku eca olonumbi vi kuatisa oku nõla ekongelo li pondola oku kuatisa ocimunga caco. Akulu vekongelo liaco lia nõliwa, va sukila oku sonehela o Betele loku pinga okuti ekongelo liaco li kũlĩha okuti olio li kasi oku tata ocimunga caco.

⁴³ Ovimunga: O Betele yi pondola oku tava nda okuti, ekongelo limue li songuila ocimunga cimue:

1.  (1) Nda okuti vocikanjo caco muli etendelo liomanu valua va lekisa onjongole va vangula elimi liaco kuenda kuli elavoko lioku kula.

2.  (2) Nda okuti ocimunga cimue citito cakundi, ci vangula ale ci kasi oku lilongisa elimi liaco.

3.  (3) Nda okuti ukulu umue wekongelo ale oñuatisi yekongelo ya nõliwa oco yi songuile ocimunga, loku songola olosemana viosi olohongele, ale onepa yimue yohongele ndeci, ohundo yowiñi ale elilongiso Liutala Wondavululi, kelimi ocimunga caco li vangula.

 Nda olonumbi viosi evi via kapiwako lonjila yimue ya sunguluka, ocimunga cakulu vekongelo ci sukila oku tuma ukanda umue ko Betele loku eca olonumbi vi sukiliwa loku pinga okuti, ekongelo li kũlĩhĩwa okuti olio li songuila ocimunga caco. Ukulu wekongelo ale oñuatisi yekongelo yi songuila ocimunga caco, o tendiwa okuti “usongui wocimunga” ale “oñuatisi yocimunga,” momo eye o kuete ocikele coku tata ocimunga caco.

⁴⁴ Eci ocimunga caco ci sokiyiwa, ocimunga cakulu vekongelo lina okuti olio li kuatisa ocimunga caco, ci nõla nda olonepa vikuavo viohongele vi pondola oku vokiyiwa kuenda olonjanja olohongele vi pondola oku lingiwa vokuenda kuosãi. Citava okuti, ku lingiwavo esokiyo liolohongele viupange woku kunda. Vamanji vosi va tiamẽla kocimunga caco, va ka songuiwa locimunga cakulu vekongelo lina li kasi oku kuatisa ocimunga caco. Akulu vekongelo va kapako ovina vamanji va kasi kocimunga caco va sukila, loku eca olonumbi via sunguluka ku vamanji vaco. Eci manji ukuakunyula akongelo a talavaya locimunga caco vosemana yepasu, ekongelo lia nõliwa oco li songuile ocimunga caco, lieca ulandu wa suapo ko Betele watiamẽla koku amamako kuocimunga caco, loku tukula ovina vi sukiliwa vocimunga caco. Citava okuti, noke yotembo yimue ocimunga caco ci linga ekongelo. Nda vosi va kongeliwamo va kapako olonumbi viocisoko, ci ka sanjuisa calua Yehova.​—⁠1 Va Kor. 1:10; 3:​5, 6.

⁴⁵ Ukristão wosi wa litumbika ku Yehova, o kuete ocikele coku kundila vakuavo olondaka viwa Viusoma. Kuli olonjila  vialua vioku ci linga, pole, valua pokati ketu va sole calua oku kundila kumue la vakuavo. (Luka 10:⁠1) Eli olio esunga lieci akongelo a lingila olohongele viupange woku kunda, kasulilo osemana kuenda vokati kosemana. Ateke owusa a ecavo epuluvi lioku kundila kumosi locimunga, momo vamanji valua vateke aco ka va talavaya. Ocisoko cupange, ci linga esokiyo lioku enda kupange woku kunda valivala a sunguluka kuenda kovitumãlo vina okuti, citava oku kundilako lutanya ale luteke.

⁴⁶ Oku kundila kumosi locimunga, ci kuatisa akundi oku talavayela kumosi loku “livetiya pokati.” (Va Rom. 1:12) Akundi vana okuti ndopo va fetika oku kunda, va pondola oku talavayela kumosi lakundi va loñoloha oco va pindisiwe. Kolonepa vimue ciwa okuti akundi vavali, ale akundi valua va talavayela kumosi omo liohele yi kasi kovitumãlo viaco. Ndaño okuti wa sokiya oku talavaya lika wove vocikanjo, ciwa oku enda kohongele yupange woku kunda momo ci vetiya vakuene. Oku kũlĩha okuti vamanji va kasi oku kunda va kasi ocipepi love, ci pondolavo oku ku kuatisa. Akundi votembo yosi kuenda akundi vakuavo, ka citava okuti va kisikiwa oku kuatisa kolohongele viosi vi lingiwa viupange woku kunda via sokiyiwa lekongelo capiãla enene nda vi lingiwa oloneke viosi. Citava okuti va kuete epondolo lioku kuatisa kolohongele vimue viupange woku kunda olosemana viosi.

⁴⁷ Vosi yetu tu kuami ongangu yiwa ya Yesu kuenda yovapostolo vaye! Tua kolela okuti Yehova o ka tu sumũlũisa nda tua kuatisa lutima wosi, kupange u kuete esilivilo lialua woku kunda olondaka viwa Viusoma.​—⁠Luka 9:​57-62.