Kokuene wa Soliwi Ene Wakundi Volondaka Viwa:

Esumũlũho limue linene oku likuata omunga poku fendela Suku yocili, Yehova! Etu “tulondingupange viaye,” tu kuete ocikele cinene coku kunda kuenda oku longisa olondaka viwa Viusoma okuti, upange umue u popela ovimuenyo viomanu. (1 Va Kor. 3:9; Mat. 28:19, 20) Oco tu tẽlise upange waco u kasi oku lingiwa voluali luosi lombembua kuenda omunga, tu sukila oku u linga lonjila yimue yongotiyiwa ciwa.—1 Va Kor. 14:40.

Elivulu eli, li ka ku kuatisa oku sanga elomboloko lia suapo li lekisa ndomo ekongelo Liakristão li talavaya koloneke vilo. Ove o ka lilongisa eci catiamẽla kovikele viove kuenda kasumũlũho o kuete omo lioku kala Ombangi ya Yehova. Nda ove wa kapako asumũlũho ove loku tẽlisa ciwa ovikele viove, o ka pamisa ‘ekolelo liove.’—Ovil. 16:4, 5; Va Gal. 6:5.

 Omo liaco, tu ku vetiya oku tanga lutate elivulu eli. Ndeci, nda ndopo wa linga ukundi ka papatisiwile, ananga api o sukila oku eca oco o kaile Ombangi ya Yehova ya papatisiwa? Handi vali, nda wa papatisiwa ale nye o sukila oku linga oco wamameko oku kula konepa yespiritu, loku vokiya upange o lingila Yehova? (1 Tim. 4:15) O kuatisa ndati kombembua yo vekongelo? (2 Va Kor. 13:11) Ove o ka sanga atambululo velivulu eli.

Nda ove wa papatisiwa, nye o kasi oku linga oco o kaile oñuatisi yekongelo ale ukulu wekongelo? Kuli esukila lialua lia vamanji alume va loñoloha oco va kaile olomitavaso, momo omanu va kasi oku amamako oku iya vocisoko ca Suku. Elivulu eli, li ka ku kuatisa oku limbuka esilivilo lioku li kolisilako oco o tẽlise ovimãho viove konepa yespiritu.—1 Tim. 3:1.

 Tu ku likutililako oco elivulu eli, li ku kuatise oku limbuka ocikele cove vocisoko ca Yehova kuenda oku velisapo ocikele cove. Etu tu vu soli calua kuenda tu vu likutililako oco wamamiko oku kala pokati komanu vana va ka kuata esanju ka li pui vefendelo lia Isietu wokilu Yehova.—Osa. 37:10, 11; Isa. 65:21-25.