1-6. Tukula ovolandu Olombangi Via Yehova vi kundila vakalo a liyekaila.

 REBECCA ufeko umue Ombangi ya Yehova wo ko Gana, kosikola a tangela wa yi tendele ndocikanjo caye. Vekolombele liaye otembo yosi ka mua kambelele alivulu etu. Vapuluvi epuyuko, eye wa enda oku sanda otembo yoku eca uvangi ku vana va tangela kumosi. Rebecca wa fetika ale oku longisa omanu valua Embimbiliya.

² Vocifuka co Madagaskar ocipepi lohulo yutundilo wo Afrika, ohueli yimue yakundi votembo yosi, ya siatele oku enda ocinãla ci soka 25 kolokilometulu vemẽhi liutanya walua. Ovio via enda oku ci linga oco vi pitĩle vimbo limue, loku longisa Embimbiliya komanu va lekisa onjongole.

³ Oco va sange omanu kohulo yolondui Paraguai kuenda Paraná, Olombangi Via Yehova vio ko Paraguai, la vikuavo via lieca olumue poku tunda kueci ci soka 15 kolofeka, via talavayela kumosi koku tunga ocimbaluku cimue ci kuete 130 kolometulu, cina ci pondola oku ambata 12 komanu. Poku talavaya locimbaluku caco, akundi Vusoma va kundila olondaka viwa kovaimbo ana okuti, nda ka kua tẽliwile oku pitĩlako.

⁴ Konepa yimue yo Konano yo Alaska, Olombangi Via Yehova via sanda epuluvi lilikasi oco vi ece uvangi vokuenda kuotembo yowuya. Eci ci lingiwa vepuluvi lina okuti, olonaviyu vi nena omanu valua vakuakunyula va tunda kolofeka vialua, kuenje Olombangi Via Yehova viofeka yaco, vi kala volokololo mu pita omanu valua, poku sandeka alivulu etu lonjila yi vetiya valimi añi añi. Volupale luaco, ombalãu yimue ya kuatisa calua eci va yecelela oku pitĩla kovaimbo ocipãla kuenje ca ecelela okuti, olondaka viwa vi kundiwa vimbo lio Aleutes, lio Atapaskas, lio Tsimshians kuenda lio Tlingits.

⁵ Larry wo Volupale luo Texas ko EUA, wa kuata ocikanjo cimue cilikasi okuti, vonjo yepuyuko muna eye a kala. Ndaño okuti endela komangu yalola omo liocilunga coku li tusula kuoviendelo a pita laco, Larry wamamako oku linga ovopange. Eye wa enda oku sapuilako  vakuavo esapulo Liusoma oku kongelamo elavoko Liembimbiliya a kuete liokuti, eteke limue vemẽhi Liusoma wa Suku, o ka tẽla vali oku enda.—Isa. 35:5, 6.

⁶ Ocimunga cimue Colombangi Via Yehova oco cende kohongele yimue yimbo konano yo Miyamar, ca linga ungende woloneke vitatu lowato, oku tunda ko Mandalay. Omo liombili va lekisa yoku kunda olondaka viwa, ovo vambata alivulu loku a eca komanu vakuavo va kala oku endela vowato umuamue. Olonjanja viosi eci owato waco u talama vimbo, ale volupale lumue, akundi vaco vakuambili, va lokavo loku kunda kuenda oku eca alivulu vimbo liaco. Vokuenda kungende, mu londa vali omanu vakuavo okuti va “tendiwa ndocikanjo cokaliye” eci akundi Vusoma va tiuka vowato waco.

7. Olonjila vipi afendeli va Yehova va kuama oco va ece uvangi watiamẽla Kusoma wa Suku kuenda cipi ocimãho cavo?

⁷ Ndomo ca lekisiwa vovolandu a vamanji va tukuiwa, afendeli vakuambili va Yehova kolonepa viosi violuali, va kasi oku “eca uvangi wosi watiamẽla Kusoma wa Suku.” (Ovil. 28:23) Ovo va enda konjo lanjo, va sapela lomanu volokololo, va va sonehela ovikanda kuenda va eca uvangi pocakati colotelefone. Va ci lingavo volokalela, poku ñuala ñuala vocumbo colonelẽho kuenda vokuenda kuepuyuko kupange, va sanda apuluvi osi oco va ece uvangi watiamẽla Kusoma wa Suku. Ndaño okuti olonjila vioku kunda vi pongoloka, ocimãho cimuamue okuti—oku kunda olondaka viwa kuosi ku sangiwa omanu.—Mat. 10:11.

8, 9. (a) Momo lie tu popela okuti, oku lisandula kupange woku kunda Usoma ocikomo cimue cocili? (b) Epulilo lipi lia votuiwa li kuete esilivilo lialua kuenda nye tu sukila oku linga oco tu kuate etambululo liaco?

⁸ Ove o kasi oku tanga ndeti, anga hẽ o panga onepa pokati kakundi valua Vusoma vakuambili okuti va kasi kueci ci pitahãla 235 kolofeka? Nda oco, o kasi oku kuatisa koku lisandula kupange woku kunda Usoma! Ovina via lingiwa ale kupange waco voluali luosi, ocikomo cimue cocili. Ndaño lovitangi vialua ndeci oku tatekiwa kuenda oku lambalaliwa, Olombangi Via Yehova vi kasi oku amamako oku eca uvangi wosi watiamẽla Kusoma wa Suku komanu vo kolofeka viosi.

⁹ Eci ci votola epulilo li kuete esilivilo lialua liokuti: Momo lie lacimue ocitangi ndaño muẽle elambalalo lia Satana ka li tẽla oku tateka oku amamako kupange woku kunda Usoma? Oco ku tambuluiwe epulilo eli, tu sukila oku tiukila kocita catete K.K. Momo, upange u kasi oku lingiwa koloneke vilo Lolombangi Via Yehova, wa fetika oku lingiwa kotembo yaco.

10. Yesu wa tiamisilile utima kupange upi kuenda nye a kũlĩhĩle catiamẽla kupange waco?

¹⁰ Usovoli wetavo Liakristão okuti Yesu Kristu, wa tiamisilile utima koku kunda olondaka viwa Viusoma wa Suku; okuti owo wa kala upange waye wa velapo. Onjanja yimue wa lombolola ndoco: “Te nda kundilavo olondaka viwa Viusoma wa Suku kalupale akuavo, momo oco nda tumiwila.” (Luka 4:43) Yesu wa kũlĩhĩle okuti, wa kala oku fetika upange umue ka ponduile oku malusula likaliaye. Eci kua kambele otembo yitito osimbu ka file, eye wa popele okuti esapulo Liusoma lia laikele oku kundiwa “kolofeka viosi.” (Mar. 13:10) Pole, wa laikele oku lingiwa ndati kuenda velie va ponduile oku u linga?

11. Ocikundi cipi Yesu a eca kolondonge viaye kuenda nye a va likuminya oco va tẽlise upange waco?

¹¹ Yesu noke liolofa viaye loku pinduiwa, wa molẽha kolondonge viaye kuenda wa va ĩha ocikundi ca velapo cokuti: “Omo liaco, kuendi, ka longisi omanu vo kolofeka viosi oco va linge olondonge viange, va papatisili vonduko ya Tate la Mõla kuenda yespiritu sandu, va longisi oku linga ovina viosi ndo kundiki. Kuenje ñasi kumue lene oloneke viosi, toke kesulilo lioluali (Mat. 28:19, 20) Olondaka viokuti “ñasi kumue lene,” vi situlula okuti, olondonge via Yesu via ponduile oku linga upange woku kunda loku linga olondonge lekuatiso liaye. Ovio via sukilile ekuatiso liaco omo okuti, Yesu wa popele hati, ovio via laikele oku “suvukiwa lolofeka viosi.” (Mat. 24:9) Olondonge via ponduilevo oku tambula ekuatiso likuavo. Osimbu Yesu ka endele kilu, wa sapuila olondonge okuti, via laikele oku pamisiwa lespiritu sandu oco vi kale olombangi viaye “toke kasulilo o kilu lieve.” —Ovil. 1:8.

12. Apulilo api a votuiwa okuti a kuete esilivilo lialua kuenda momo lie ci kuetele esilivilo oku kũlĩha atambululo aco?

¹² Cilo kua votuiwa apulilo amue a kuete esilivilo lialua ndeci: Ovapostolo va Yesu kuenda olondonge vikuavo vio kocita catete via kapeleko hẽ ocikundi va tambuile? Ocimunga caco citito calume lakãi Cakristão, ca eca hẽ uvangi wosi watiamẽla Kusoma ndaño lelambalalo lialua? Ovo va tambula muẽle ekuatiso lia tunda kilu kuenda liespiritu sandu lia Yehova poku linga upange woku linga olondonge? Apulilo a lingiwa ndeti kuenda akuavo, a tambuluiwa velivulu Liovilinga Vembimbiliya. Ci kuete esilivilo oku kũlĩha atambululo aco. Momo lie? Ndomo ca likuminyiwa la Yesu, upange  a sia, wa laikele oku amamako “toke kesulilo lioluali.” Omo liaco, ocikundi caco te ci kapiwako Lakristão vosi vocili oku kongelamo etu tu kasi kotembo yilo ya sulako. Kuenje tu kuete onjongole yalua yoku kũlĩha ovina via sonehiwa velivulu Liovilinga.

13, 14. (a) Helie wa soneha elivulu Liovilinga kuenda pi eye opa alomboluilo aco? (b) Nye ci sangiwa velivulu Liovilinga?

¹³ Helie wa soneha elivulu Liovilinga? Elivulu ka li situlula usonehi walio, pole, olondaka viaco vioku fetika vi situlula okuti, omunu umuamue wa soneha Evanjeliu lia Luka. (Luka 1:1-4; Ovil. 1:1, 2) Kuenje tunde osimbu yalua, Luka “ndotolo o soliwe” haeye ukuovolandu ukuotate, o tendiwa okuti eye usonehi welivulu Liovilinga. (Va Kol. 4:14) Elivulu liaco lia sonehiwa vokuenda kueci ci panda 28 kanyamo, tunde eci Yesu a enda kilu oku upisa kunyamo 33 K.K., toke vokuenda kunyamo 61 K.K., eci kua kambele otembo yimue oco Paulu a tunde vokayike ko Roma. Omo okuti polonepa vimue Luka wa likongela vovolandu aco, eci ceca uvangi wokuti, eye wa kalapo eci kua pita ovina viaco. (Ovil. 16:8-10; 20:5; 27:1) Citava okuti, Luka omo a kala ukuakukonomuisa lutate, wa tambula alomboluilo ku Paulu, ku Barnaba, ku Filipu kuenda ku vakuavo va tukuiwa vulandu waco.

¹⁴ Nye ci sangiwa velivulu Liovilinga? Kanyamo atete, Luka Vevanjeliu liaye wa sonehamo eci Yesu a popia, leci a linga. Pole, velivulu Liovilinga wa sonehamo ovina olondonge via Yesu via popia, leci via linga. Omo liaco, elivulu Liovilinga li popia eci catiamẽla komanu vana va linga upange umue u komõhisa ndaño valua pokati kavo va tendiwile okuti, “omanu vaño haivo ka va longisiwile.” (Ovil. 4:13) Oku teta onimbu, ulandu wa sonehiwa u tu lomboluila ndomo kua sokiyiwa ekongelo Liakristão kuenda ndomo lia kula. Elivulu Liovilinga li lekisa ndomo Akristão vo kocita catete va enda oku kunda, olonjila va enda oku kuama kuenda ovituwa viavo. (Ovil. 4:31; 5:42) Li lombololavo ndomo espiritu sandu lia kuatisa koku kunda olondaka viwa. (Ovil. 8:29, 39, 40; 13:1-3; 16:6; 18:24, 25) Elivulu liaco li amamako oku vangula catiamẽla kosapi Yembimbiliya, muna mua kongela Usoma wa Suku u vialiwa la Kristu kuenda li lekisa okuti, oku sandekiwa kuesapulo Liusoma kua kuata onima yiwa ndaño lelambalalo lialua.—Ovil. 8:12; 19:8; 28:30, 31.

15. Oku konomuisa lutate elivulu Liovilinga ci ka tu kuatisa ndati?

 ¹⁵ Ocili okuti, oku konomuisa elivulu Liovilinga ci komõhisa kuenda ci pamisa ekolelo! Nda tua sokolola kovolandu wutõi kuenda ombili olondonge viatete via Kristu via lekisa, vi ka vetiya utima wetu. Tu ka vetiyiwavo oku setukula ekolelo vamanjetu va lekisa kocita catete. Tu ka liangiliya ciwa oco tu tẽlise ocikundi coku ‘enda, . . . oku linga olondonge.’ Elivulu o kasi oku tanga cilo, li kuete ocimãho coku ku kuatisa oku lilongisa lutate elivulu Liovilinga.

16. Vipi ovimãho vitatu vielivulu lilo?

¹⁶ Vipi ovimãho vielivulu lilo? Ovimãho viaco vitatu vievi: (1) oku pamisa ekolelo lietu liokuti, Yehova pocakati cespiritu sandu liaye, o kasi oku kuatisa kupange woku kunda Usoma kuenda oku linga olondonge; (2)  oku vokiya ombili yetu kupange woku kunda poku konomuisa ongangu yolondonge via Kristu vio kocita catete kuenda (3)  oku vokiya esumbilo tu kuetele ocisoko ca Yehova, la vana va songuila upange woku kunda kumue lakongelo.

17, 18. Elivulu lilo lia sokiyiwa ndati kuenda ovina vipi vikuavo vi ka ku kuatisa kelilongiso liove Liembimbiliya lio pokolika?

¹⁷ Elivulu lilo lia sokiyiwa ndati? O ka limbuka okuti, olio lia tepiwa volonepa ecelãla, vonepa lonepa, mu sangiwa onepa yimue yocisonehua celivulu Liovilinga. Olio ka li kuete ocimãho coku konomuisa ocinimbu locinimbu, pole, li tu kuatisa oku limbuka ovina tu lilongisa kovolandu aco kuenda ndomo tu a kapako komuenyo wetu. Kefetikilo liovipama, kuli olondaka vi tõlisa osapi yocipama, oku kongelamo onepa yimue yelivulu Liovilinga yi ka konomuisiwa.

 ¹⁸ Velivulu lilo, muli vali ovina vikuavo vi ka ku kuatisa kelilongiso liove Liembimbiliya lio pokolika. Osimbu o sokolola kovolandu Embimbiliya, alitalatu a posoka a ka ku kuatisa oku mola ovolandu a komõhisa a sonehiwa velivulu Liovilinga. Vovipama vialua, mua kongeliwa otulokasia tu kuete alomboluilo akuavo a kuatisa. Otulokasia tumue tu lombolola ovina viatiamẽla komuenyo womunu umue wa tukuiwa Vembimbiliya okuti, ekolelo liaye li sukila oku setukuiwa. Pole, tukuavo tu eca alomboluilo akuavo atiamẽla kovitumãlo, kovina via pitako, kovituwa, ale komanu vakuavo va tukuiwa velivulu Liovilinga.

19. Nye tu sukila oku linga olonjanja vimue?

¹⁹ Elivulu lilo li pondola oku ku kuatisa oku li kũlĩhĩsa ove muẽle lonjila ya suapo. Ci kaile okuti wukundi Wusoma otembo yalua, ale sio, olonjanja vimue ci kuete esilivilo oku kũlĩhĩsa ovina wa pitisa kovaso yomuenyo wove kuenda ndomo wa tenda upange woku kunda. (2 Va Kor. 13:5) Lipula ndoco: ‘Ndi kasi hẽ oku amamako oku tenda upange woku kunda ndupange umue wonjanga? (1 Va Kor. 7:29-31) Ndi lekisa hẽ ombili koku kunda olondaka viwa Viusoma kuenda lekolelo? (1 Va Tes. 1:5, 6) Ndi likolisilako hẽ kupange woku kunda kuenda oku linga olondonge?’—Va Kol. 3:23.

20, 21. Momo lie upange wetu u sukilila onjanga kuenda onjila yipi tu sukila oku nõlapo?

²⁰ Lalimue eteke ka tu ka ivaliko ocikundi cupange wa velapo tua tambula okuti, coku kunda kuenda oku linga olondonge. Osimbu oloneke vi pita, upange waco wamamako oku kala wonjanga. Esulilo lioluali lulo, li kasi ocipepi calua. Kuli omanu valua va sukila oku popeliwa. Handi ka tua kũlĩhĩle nda kua kamba omanu vañami vakuotima wa sungulukila omuenyo va pondola oku tava esapulo lietu. (Ovil. 13:48) Pole, tu kuete ocikele coku va kuatisa osimbu esulilo ka lieyile.—1 Tim. 4:16.

²¹ Ci kuete esilivilo oku kuama ongangu yakundi Vusoma vakuambili va kala kocita catete. Tu lavoka okuti, poku lilongisa lutate elivulu lilo, o vetiyiwa oku lekisa ombili kuenda utõi poku kunda loku pamisiwa konjila wa nõlapo yoku amamako oku “eca uvangi wosi watiamẽla Kusoma wa Suku.” —Ovil. 28:23.