Ukundi wa Soliwa Wusoma:

Sokolola okuti, ove o panga onepa pokati kovapostolo va kasi Komunda yolo Oliveira. Yesu o molẽha kovaso yove. Osimbu ku kamba otembo yitito oco a ende kilu eye o popia hati: “Puãi eci espiritu sandu liya kokuene vu ka tambula unene, vu ka linga olombangi viange vo Yerusalãi, vo Yudea yosi kuenda vo Samaria toke kasulilo o kilu lieve.” (Ovil. 1:8) Nda wa linga nye?

Citava okuti, nda wa yeva esakalalo omo liocikele cinene wa tambula. Pamue nda wa lipula ndoco: ‘Etu okuti—ocimunga cimue citito colondonge tu ka tẽla—ndati oku eca uvangi “toke kasulilo o kilu lieve”?’ Citava okuti wivaluka elungulo Yesu a eca vuteke osimbu ka file eci a popia hati: “Upika ka velelepo cime caye. Nda va ndi lambalala, vo lambalalivo; nda va pokola kondaka yange, va ka pokolavo kondaka yene. Pole, ovo va ko lingili ovina evi viosi omo lionduko yange, momo ka va kũlĩhĩle Una wa numa.” (Yoa. 15:20, 21) Poku sokolola kolondaka evi pamue o lipula ndoco: ‘Ndi ka tẽla ndati oku eca uvangi poku liyaka lesuvu liaco kuenda elambalalo?’

Koloneke vilo, tua siatavo oku li linga apulilo amuamue. Vocikele cetu coku kala Olombangi Via Yehova, mua kongelavo oku eca uvangi uwa “toke kasulilo o kilu lieve,” ‘komanu vo kolofeka viosi.’ (Mat. 28:19, 20) Upange waco u pondola oku tẽlisiwa ndati, ca piãla enene poku liyaka lalambalalo a tukuiwa?

Ovilinga Viovapostolo, vi tu lomboluila ulandu umue u komõhisa watiamẽla kovapostolo kuenda ku vamanji Akristão vo kocita catete K.K., ndomo va tẽlisa upange wavo lekuatiso lia Yehova. Elivulu o kasi oku tanga cilo, li kuete ocimãho coku ku kuatisa oku kũlĩhĩsa ulandu waco kuenda oku yeva esanju ndomo kua pita ovina viosi via sonehiwa velivulu Liovilinga. O ka komõha poku limbuka elitokeko li kasi pokati kafendeli va Suku vo kocita catete, lava vo koloneke vilo. O ka limbuka okuti, pali elitokeko kupange va linga kuenda konjila ndomo va liangiliyila oku u linga. Poku sokolola kalitokeko aco, ocili okuti, ci ka pamisa ekolelo liove liokuti, Yehova Suku o kasi oku amamako oku songuila onepa yocisoko caye palo posi.

Tu lavoka lutima wosi okuti, elilongiso lielivulu Liovilinga, li pamisa ekolelo liove kekuatiso lia Yehova kuenda liespiritu sandu liaye. Tu yongola okuti, lonjila eyi, o vetiyiwa oku amamako oku “eca uvangi wosi watiamẽla Kusoma wa Suku” kuenda oku kuatisa vakuene oku sanga onjila yeyovo.—Ovil. 28:23; 1 Tim. 4:16.