1-3. Ocinjonde cipi Petulu a kuata kuenda momo lie tu sukilila oku kuata elomboloko liaco?

 KUNYAMO 36 K.K. Petulu o yeva owuya walua wutanya wo vokuenye osimbu a likutilila kilu liosapalalo yonjo yimue yi kasi ocipepi lokalunga volupale luetapu luo Yopa. Kua pita ale oloneke vimue tunde eci a sikĩlako. Omo lioku sikĩla konjo yaco ci lekisa okuti, ka kaile oku lekisa ocame. Muẽle yonjo yaco, o tukuiwa Simono, una wa kala uyaveki wovipa kuenda havosiko va Yudea va ponduile oku sikĩla konjo yomunu ukuopange waco. a Pole, ndaño ndoco, Petulu o laika oku lilongisa ulandu umue u kuete esilivilo kocituwa ca Yehova coku yuvula ocame.

² Petulu osimbu a likutilila, o kuata ocinjonde. Ocinjonde eye a kuata nda ka ci sanjuisa omunu wosi u Yudea. Eye o mola cimue ca setahãla elasola limue linene li kasi oku loka kilu kuenda kilu liaco, kuli ovinyama via vĩha ndomo ca lekisiwa Vocihandeleko. Poku yeva ondaka yimue yo handeleka oku ponda loku lia ovinyama viaco, Petulu o tambulula hati: “Sia la lia cimue ca vĩha haico ka ca yelisiwile.” Ka vo sapuila lika onjanja yimosi, pole, vitatu okuti: “Liwekapo oku tukula ovina Suku a yelisa okuti via vĩha.” (Ovil. 10:14-16) Ocinjonde ci kokisa Petulu oku kuata atatahãi, pole, ka a kala otembo yalua.

³ Ocinjonde ca Petulu ci lomboloka nye? Ci kuete esilivilo oku kuata elomboloko liaco, momo ci tu longisa ocili cimue  condongosi catiamẽla konjila ndomo Yehova a tenda omanu. Omo okuti Tuakristão vocili, ka tu pondola oku eca uvangi wosi watiamẽla Kusoma wa Suku nda ka tu kuete ovisimĩlo ndevi Suku a kuetele omanu. Oco tu kuate elomboloko liocinjonde ca Petulu, tu kũlĩhĩsi ovolandu a komõhisa a pitako.

4, 5. Helie wa kala Korneliu kuenda nye ca pita osimbu a kala oku likutilila?

⁴ Petulu ka kũlĩhĩle nda eteke lia pita ko Kaisarea okuti ocinãla ci soka 50 kolokilometulu konano, ulume umue o tukuiwa Korneliu wa kuatelevo ocinjonde. Korneliu kesongo kolohoka ko Roma, “wa kala ukuetavo.” b Eye wa kalavo usongui wepata vakuangangu yiwa, momo “wa sumbilile Suku kumue la vakuanjo yaye.” Korneliu ka kaile omongoloke; eye wa kala ukualofeka ka seviwile evamba. Pole, wa enda oku lekisa ohenda ku va Yudea olohukũi poku va ĩha ovina va sukilile. Ulume waco ukuacili, “wa enda oku likutilila ku Suku olonjanja viosi.” —Ovil. 10:2.

⁵ Vokuenda kuelivala 15, Korneliu wa kala oku likutilila eci a kuata ocinjonde cimue muna ungelo o sapuila hati: “Olohutililo viove via yeviwa la Suku kuenda eye wa siata oku mola ekuatiso weca eca kolohukũi.” (Ovil. 10:4) Pocakati cungelo, Korneliu wa tuma alume oco va ka vilikiye upostolo Petulu. Omo okuti Korneliu wa kala ukualofeka haeye ka seviwile evamba, ndopo wa laikele oku iñilila pepito limue  okuti, kokuaye lia yikiwile. Korneliu wa laikele oku tambula esapulo liepopelo.

6, 7. (a) Tukula ulandu umue u lekisa okuti Suku o tambulula olohutililo viomanu vakuotima wa sunguluka va yongola oku kũlĩha ocili catiamẽla kokuaye. (b) Nye tu pondola oku sima catiamẽla kovolandu ndava?

⁶ Anga hẽ koloneke vilo Suku o tambulula olohutililo viomanu vakuotima wa sunguluka va yongola oku kũlĩha ocili catiamẽla kokuaye? Kũlĩhĩsa ulandu umue. Ukãi umue kofeka yo Albania wa tava Utala umue Wondavululi u vangula catiamẽla koku tekula omãla. c Eye wa sapuila Kombangi ya Yehova yeyile konjo yaye oku u kundila ndoco: “O tava hẽ okuti nda kala oku likutilila ku Suku oku u pinga ekuatiso oco ndi tẽle oku pindisa omãla vange vakãi? Eye wa ku tuma! Ovina wa popia, ovio muẽle nda sukilile oku yevelela!” Ukãi waco lomãla vaye, va fetika oku lilongisa Embimbiliya, noke vokuenda kuotembo ulume waye wa fetikavo oku panga onepa kelilongiso liaco.

⁷ Anga hẽ ulandu owu owo lika? Ocili okuti, sio! Ovolandu a soka ndava, a siata oku pita olonjanja vialua voluali luosi. Oco hẽ nye tu pondola oku sima? Catete, Yehova o tambulula olohutililo viomanu vakuotima wa sunguluka vana va sanda oku u kũlĩha. (1 Olos. 8:41-43; Osa. 65:2) Cavali, ovangelo va tu kuatisa kupange woku kunda. —Esit. 14:6, 7.

8, 9. Nye espiritu lia situluila Petulu kuenda nye a linga?

⁸ Osimbu Petulu a kasi handi kilu liosapalalo, wa “kala oku sokolola elomboloko” liocinjonde caco kuenje olomunga via Korneliu via pitĩla konjo. (Ovil. 10:17) Noke lioku popia olonjanja vitatu okuti, o likala ovikulia vi tendiwa Locihandeleko okuti via vĩha, anga hẽ Petulu nda wa tava oku kuama alume vaco loku iñila vonjo yukualofeka? Lonjila yimue, espiritu sandu lia situluila Petulu ocipango ca Suku catiamelã kondaka yaco ndoco: “Ota! Alume vatatu va kasi oku ku sandiliya. Votoka, loka, kuende lavo, ku ka kuate atatahãi, momo ame nda va tuma.” (Ovil. 10:19, 20) Ocili okuti ocinjonde covinyama via vĩha Petulu a mola, co pongiyila oku tava olonumbi viespiritu sandu.

⁹ Petulu poku kũlĩha okuti Korneliu wa pindisiwa la Suku oco  va kope Petulu, wa kovonga olomunga Vakualofeka oku iñila vonjo kuenda “wa va yekisa ndakombe vaye.” (Ovil. 10:23a) Upostolo waco ukuepokolo wa kala ale oku pongolola ekalo liaye kovolandu a pita ndopo atiamẽla koku tẽlisiwa kuocipango ca Suku.

10. Yehova o songuila ndati afendeli vaye kuenda nye tu sukila oku lipula?

¹⁰ Toke cilo, Yehova wa siata oku songuila afendeli vaye. (Olosap. 4:18) Pocakati cespiritu sandu liaye, o songuila “ukuenje wa kolelua haeye wa lunguka.” (Mat. 24:45) Olonjanja vimue tu tambula apongoloko amue a lingiwa kelomboloko tu kuete Liondaka ya Suku, ale pamue ku lingiwa apongoloko kolonjila vimue vi kuamiwa vocisoko. Tu sukila oku lipula ndoco: ‘Ndi tenda ndati apongoloko aco? Ndi pokola kolonumbi viespiritu lia Suku catiamẽla kovina evi?’

11, 12. Nye Petulu a linga eci a pitĩla vo Kaisarea kuenda nye a lilongisile?

¹¹ Keteke lia kuamamo noke liocinjonde Petulu a kuata, eye lecea kalume, lolomunga vitatu via tumiwa la Korneliu kuenda ‘vamanji epandu’ va Yudea vo ko Yopa, va enda ko Kaisarea. (Ovil. 11:12) Korneliu osimbu a kala oku lavoka Petulu wa laleka “va ngandiaye kuenda akamba vaye” citava okuti, vosi yavo va kala Vakualofeka. (Ovil. 10:24) Poku pitĩla Petulu wa linga ocina cimue a tendele kosimbu okuti ca vĩha ndeci, oku iñila vonjo Yukualofeka ka seviwile evamba! Petulu wa lombolola ndoco: “Ene wa kũlĩhi ciwa okuti, ka citava u Yudea umue oku kuata ukamba lomunu ukuepata liñi, ale oku amela kokuaye, pole, Suku wa ndi lekisa oco si ka tukule umue okuti, wa vĩha pamue ka yelisiwile.” (Ovil. 10:28) Vepuluvi eli Petulu wa kuatele ale elomboloko liokuti ocinjonde a mola, ca kuata ocimãho coku u longisa okuti, ka ca tiamisiwile kokulia omunu umue a ponduile oku lia. Eye ka ponduile oku ‘tukula omunu umue [ndaño Ukualofeka] okuti, wa vĩha.’

¹² Ocimunga comanu va lekisa onjongole, ca kala oku kevelela Petulu. Korneliu wa popia hati: “Tu kasi vosi kovaso a Suku oco tu yeve ovina viosi Yehova a ku handeleka oku popia.” (Ovil. 10:33) Sokolola ndomo nda wa liyeva nda omunu umue wa lekisa onjongole wa ku sapuilile olondaka ndevi! Petulu wa fetika ohundo yaye lolondaka vi kuãimo viokuti: “Ocili, cilo nda limbuka okuti Suku hokuacameko, pole, kolofeka viosi omunu una u sumbila  loku linga ovina via sunguluka, o taviwa laye.” (Ovil. 10:34, 35) Petulu wa lilongisile okuti, ocisimĩlo ca Suku catiamẽla komanu ka ca tambele kekova, kofeka, ale kocina cikuavo. Noke Petulu wa eca uvangi watiamẽla kupange woku kunda, wolofa kuenda wepinduko lia Yesu.

13, 14. (a) Eci Korneliu lomanu vakuavo Vakualofeka va linga Akristão kunyamo 36 K.K., ca koka nye? (b) Momo lie tu sukilila oku yuvula oku pisa omanu kovina tu lete?

¹³ Vocipikipiki kua pita ocina cimue ci komõhisa: “Osimbu Petulu a kala oku vangula,” espiritu sandu lia wila ‘komanu vaco vakualofeka.’ (Ovil. 10:44, 45) Ulandu owu, owo lika wa sonehiwa Vovisonehua u lekisa okuti, espiritu sandu lia wila komanu osimbu ka va papatisiwile. Petulu poku limbuka okuti ca kala ondimbukiso yoku taviwa la Suku, wa “handeleka [oco omanu vaco Vakualofeka] va papatisiwe.” (Ovil. 10:48) Vakualofeka vaco, poku linga Akristão kunyamo 36 K.K., ca koka esulilo ku va Yudea oku taviwa lonjila yilikasi. (Dan. 9:24-27) Petulu poku kala usongui vepuluvi liaco, wa talavaya ‘losapi Yusoma’ yatatu, haiyo ya sulako. (Mat. 16:19) Osapi yaco ya yikuila epito Vakualofeka ka va seviwile evamba, oco va linge Akristão va wavekiwa lespiritu.

¹⁴ Etu tuakundi Vusoma koloneke vilo, tua kũlĩha okuti, “ku Suku ka kuli ocame.” (Va Rom. 2:11) Eye o yongola okuti “omanu vosi va popeliwa.” (1 Tim. 2:4) Omo liaco, lalimue eteke ka tu ka pisi omanu, omo liovina tu lete. Ocikele cetu oku eca uvangi wosi watiamẽla Kusoma wa Suku, muna  mua kongela oku kundila omanu vosi vakuekova, vakuafeka, vakuemolẽho, ale vakuetavo lia litepa.

15, 16. Momo lie Akristão vamue va Yudea va lihoyisila la Petulu kuenda eye wa lombolola ndati ovilinga viaye?

¹⁵ Citava okuti, Petulu omo a yonguile oku lombolola ovina via pita, wa enda ko Yerusalãi. Pole, ci molẽha okuti esapulo liokuti Vakualofeka ka va seviwile evamba “va tava kondaka ya Suku,” lia yeviwa ale osimbu ka pitĩlileko. Noke lia Petulu oku pitĩla, “vakuakuvetiya oku sevisa evamba,” va fetika oku u pisa. Ovo va fetika oku hoyisa Petulu omo a “iñilile vonjo yalume . . . ka va seviwile evamba loku lia kumue lavo.” (Ovil. 11:1-3) Ocitangi ka ca kaile omo Vakualofeka va linga olondonge via Kristu. Ocili okuti olondonge viaco va Yudea, via kala oku lipilika oco Vakualofeka va kapeko Ocihandeleko—oku kongelamo coku seviwa evamba, oco efendelo liavo li taviwe la Yehova. Olondonge vimue va Yudea, va kuata ocitangi coku tava esulilo Liocihandeleko ca Mose.

¹⁶ Petulu wa lombolola ndati ovilinga viaye? Ndomo ca tukuiwa Kovilinga 11:4-16, eye wa tukula ovovangi akuãla violonumbi via tunda ku Suku viatiamẽla kocitangi eci ndeci: (1) ocinjonde a kuata (Ovinimbu 4-10); (2) onumbi a tambula kespiritu sandu, (Ovinimbu 11, 12); (3) epasu ungelo a linga ku Korneliu (Ovinimbu 13, 14); kuenda (4) oku wavekiwa kuespiritu sandu ku Vakualofeka. (Ovinimbu 15 kuenda 16) Petulu wa malusula lepulilo limue ka lia sile atatahãi liokuti: “Nda Suku wa eca ocali [espiritu sandu] kokuavo [okuti Vakualofeka va tava kesapulo] ndeci a tu ĩha [etu va Yudea] omo tua tava ku Ñala Yesu Kristu, ame helie okuti ndi tamalãla la Suku?” —Ovil. 11:17.

17, 18. (a) Uvangi upi wa Petulu wa kisika Akristão va Yudea oku nõla onjila yimue? b) Momo lie ka ca lelukile oku teyuila omunga yekongelo kuenda nye tu sukila oku lipula?

¹⁷ Uvangi wa Petulu wa kisika Akristão vaco va Yudea oku nõlapo onjila yimue. Anga hẽ ovo nda va tẽla oku siapo ocame loku tava Vakualofeka va papatisiwa ndopo nda vamanjavo Akristão? Ulandu u tu sapuila ndoco: “Eci ovo [okuti ovapostolo Lakristão vakuavo va Yudea] va yeva ovina evi, va liwekako oku tamalãla kuenda va sivaya Suku poku popia vati: ‘Suku wa ecelelavo okuti omanu vakualofeka va likekembela akandu avo oco va kuate  omuenyo.’” (Ovil. 11:18) Ocituwa eci ca sunguluka, ca teyuila omunga yekongelo.

¹⁸ Koloneke vilo, oku amamako lomunga ka ca lelukile, momo afendeli vocili va “tunda kolofeka viosi, kovikoti viosi, komanu vosi kuenda kalimi osi.” (Esit. 7:9) Omo liaco, vakongelo alua tu sangamo omanu vakuekova, vakuekalo kuenda vakuavituwa via litepa. Kuenje ciwa nda tu lipula ndoco: ‘Nda tẽla hẽ oku upa vutima wange ocituwa cosi cocame? Nda nõlapo hẽ oku yuvula ovituwa violuali lulo vi koka olonepele pokati komanu muna mua kongela oku litunuila ofeka, ocikoti, ovituwa kuenda olonepele vi koka oku tata lãvi vamanjange Akristão?’ Ivaluka eci ca pita la Petulu (okuti, Kefa) noke lianyamo amue eci Vakualofeka vatete va linga Akristão. Omo lioku yapuisiwa lolonepele via vakuavo, “wa litepa” Lakristão Vakualofeka, kuenje wa sukilile oku penguluiwa la Paulu. (Va Gal. 2:11-14) Lalimue eteke ka tu ka eceleli oku yapuisiwa locituwa colonepele.

19. Ku velie Akristão va Yudea ko Antiokea va fetikila oku kundila kuenda va kuata onima yipi?

¹⁹ Anga hẽ olondonge via Yesu via fetika oku kundila Vakualofeka ka va seviwile evamba? Kũlĩhĩsa eci ceya oku pita noke, ko Antiokea yo Suria. d Volupale luaco, mua kala va Yudea valua kuenda ka pa kaile esuvu lialua pokati ka va Yudea, la Vakualofeka. Omo liaco, o Antiokea ya kala ocikanjo cimue ciwa coku kundila Vakualofeka. Volupale luaco, omo olondonge vimue va Yudea, via fetikila oku kunda olondaka viwa ‘komanu va vangula o Helasi.’ (Ovil. 11:20) Upange woku kunda, ka wa tiamisiwile lika ku va Yudea va vangula o Helasi, pole, wa tiamisiwilevo ku Vakualofeka ka va seviwile evamba. Yehova wa sumũlũisa upange waco, kuenje “owiñi walua wa tava.” —Ovil. 11:21.

20, 21. Barnaba wa lekisa ndati eliketiso liocili kuenda tu lekisavo ndati eliketiso limuamue poku tẽlisa ocikele cetu cupange woku kunda?

²⁰ Oco ku tatiwe ocikanjo caco coku ungula, ekongelo lio ko Yerusalãi, lia tuma Barnaba ko Antiokea. Citava okuti, kua kala omanu valua va lekisa onjongole kuenje omunu umosi, ka ponduile oku tẽlisa upange waco. Omo liaco, kua nõliwa Saulu, oco a kuatise Barnaba kupange waco. (Ovil. 9:15; Va Rom. 1:5) Anga  hẽ Barnaba wa laikele oku tenda Saulu ndunyãli waye? Sio, eye wa lekisa eliketiso liocili. Momo eye muẽle wa nõlapo oku enda ko Tarso oku ka sanda Saulu, loku u nena ko Antiokea oco o kuatise. Kavali kavo, va pita unyamo oku pamisa olondonge vekongelo lio volupale luaco. —Ovil. 11:22-26a.

²¹ Tu lekisa ndati eliketiso poku tẽlisa ocikele cetu cupange woku kunda? Voku lekisa eliketiso, mua kongela oku kũlĩha olongave vietu. Vosi yetu tu kuete ovina tu tẽla, lovoloño a litepa. Ndeci, ku vamue ca leluka oku eca uvangi ka wa sokiyiwile, ale oku kundila konjo lanjo, pole, ca tĩla kokuavo oku linga apasu, ale oku fetika alilongiso Embimbiliya. Momo lie ku pingila ekuatiso, nda o yongola oku mioñoloha konepa yimue yupange woku kunda? Nda wa ci linga, ci ka ku kuatisa oku kuata onima yiwa kuenda oku kuata esanju kupange woku kunda. —1 Va Kor. 9:26.

22, 23. Vamanji ko Antiokea, va lekisa ndati ocisola cocili? Afendeli va Suku koloneke vilo va siatavo oku ci lekisa ndati?

²² Ko Antiokea, oko tete “olondonge via tambuila onumbi ya Suku yoku tukuiwa okuti, Akristão.” (Ovil. 11:26b) Onduko eyi okuti ya taviwa la Suku, yi situlula ciwa vana va setukula ongangu ya Kristu. Osimbu omanu Vakualofeka va kala oku linga Akristão, anga hẽ va Yudea la Vakualofeka vaco vekongelo, va fetika oku litenda nda vamanji kespiritu? Kũlĩhĩsa eci ca pita eci kua kala onjala yalua vokuenda kunyamo 46 K.K. e Kosimbu, onjala ya enda oku koka ovitangi vialua kolohukũi ka via solekele olombongo, ndaño okulia volosila. Citava okuti, Akristão valua va Yudea vana va kala vimbo lio Yudea, va kala olohukũi. Kuenje vokuenda kuotembo yaco yonjala, ovo va sukilile okulia. Poku kũlĩha esukila liaco, vamanji ko Antiokea oku kongelamo Akristão Vakualofeka, va tuma “ekuatiso ku vamanji va tungile vo Yudea.” (Ovil. 11:29) Eli elinga limue lia situlula ocisola cocili!

²³ Afendeli va Suku koloneke vilo, va siatavo oku linga ovina viaco. Eci tu kũlĩha okuti vamanji kolofeka vikuavo, ale pocitumãlo tu kasi va sukila ekuatiso, tu sanda onjila yoku va kuatisa lutima wosi. Ovisoko Viakulu vo ko Filiale, vi sokiya lonjanga yalua Ovimunga vi Eca Ekuatiso ku vamanji va pita lovilunga, ndeci,  ehunguhungu liofela, ovilemawe kuenda andunde ovava. Alikolisilo aco osi oku kuatisa vamanjetu, a lekisa okuti tu panga onepa kongongela yocili ya vamanji. —Yoa. 13:34, 35; 1 Yoa. 3:17.

24. Tu lekisa ndati okuti tua kapako elomboloko liocinjonde ca Petulu?

²⁴ Omo okuti Tuakristão vocili, tua kapako calua elomboloko liocinjonde Petulu a mola kilu liosapalalo ko Yopa, kocita catete. Etu tu fendela o Suku yimue ka yi kuete ocame. Eye o yongola okuti tu eca uvangi wosi watiamẽla Kusoma waye, muna mua kongela oku kundila omanu ci kaile okuti vakuekova liñi, vakuafeka yiñi, ale vakuekalo lia litepa. Omo liaco, tu nõlipo oku eca epuluvi ku vosi va yongola oku yevelela loku tava olondaka viwa. —Va Rom. 10:11-13.