EPULILO 5
Ca Sunguluka hẽ Oku Tava Kembimbiliya?
Wa kuatele ale hẽ ocisimĩlo ka ca sungulukile catiamẽla komunu umue? Citava okuti wa yeva omanu vamue va popia catiamẽla komunu waco. Pamue wa kuata ocisimĩlo ka ca sungulukile catiamẽla kokuaye, pole, poku u kũlĩha ciwa, wa limbuka okuti, ovisimĩlo viomanu vakuavo ka via suilepo. Cimuamue haico, ovisimĩlo viomanu valua viatiamẽla Kembimbiliya, ka via suilepo.
Omanu valua va lilongisa calua kolosikola, va siata oku pembula Embimbiliya. Wa kũlĩha hẽ esunga liaco? Olonjanja vialua elivulu eli li tukuiwa lonjila yimue yi lekisa okuti, haliolondungeko, haliuloñoko, ale ka lia suilepo. Anga hẽ eli nda olio esunga lieci omanu va li yapuisila ovo muẽle catiamẽla Kembimbiliya?
Poku tanga ombrochura yilo, wa komõha hẽ poku mola okuti eci Embimbiliya li longisa ci likuata luloño? Omanu valua va siata oku komõha. Ovo va komõhavo poku lilongisa okuti, Embimbiliya ka li longisa ovina vimue atavo alua a siata oku luvikiya catiamẽla kokualio. Ndeci, atavo amue a lekisa okuti, Embimbiliya li longisa okuti Suku wa lulika Ovailu longongo kuenda oviendalomuenyo viosi vi kasimo voloneke epandu, violowola 24. Pole, ocili ceci okuti, Vembimbiliya ka muli lacimue ci li patãla okuti ca litepa leci olonoño vi popia catiamẽla kanyamo ongongo yi kuete. a
Handi vali, ulandu wa teta onimbu Wembimbiliya watiamẽla konjila ndomo Suku a lulika omuenyo mulo vongongo, weca epuluvi lialua lioku kuata ovisimĩlo kuenda akonomuiso wuloño. Embimbiliya li popia okuti, Suku wa lulika omuenyo wosi kuenda oviendalomuenyo viosi, ndomo ci likuata ‘lapata avio.’ (Efetikilo 1:11, 21, 24) Olondaka evi pamue vi li patãla lalongiso amue wuloño, pole, vi likuata lovovangi wuloño a situluiwa ale. Ulandu wuloño u lekisa okuti, kuiya alongiso kuenda a pita; pole, ovovangi amamako.
Kuli omanu valua va siata oku liwekapo oku konomuisa Vembimbiliya omo lioku sumuisiwa letavo. Ovo va siata oku mola ombambe yi lekisiwa vatavo, ovitukiko kuenda oku litenga vovoyaki. Pole, nda ca sunguluka hẽ oku pisa Embimbiliya omo liovituwa viomanu vamue va li tukula okuti va kuãivo eci olio li longisa? Olonoño vialua vakuacili haivo vakuotima wa sunguluka, va sumua calua lonjila ndomo omanu olongangala vi talavaya lelongiso liokuti ovina via tukuluka ño oco va li sandele esunga lioku lekisa olonepele. Pole, nda ca sunguluka hẽ oku pisa elongiso liokuti ovina via tukuluka ño oku upisa kelinga eli? Ocili okuti, ocina ca sunguluka, oku konomuisa eci alongiso a lekisa kuenda oku a sokisa lovovangi ocili a kasipo.
Tu ku vetiyavo oku ci linga Lembimbiliya. Pamue o komõha poku kũlĩha okuti, alongiso Embimbiliya a litepa calua lalongiso atavo alua. Embimbiliya ka li vetiya uyaki, ungangala omo lioku litepa kuakova, pole, olio li longisa okuti, afendeli va Suku va sukila oku yuvula uyaki kuenda esuvu lina li koka ungangala. (Isaya 2:2-4; Mateo 5:43, 44; 26:52) Embimbiliya ka li kisika oku tekela kocina cimue, loku vetiya oku tava ño vupeke kueci olio li longisa, pole, li longisa okuti, ekolelo liocili lia kunamẽla kovovangi kuenda uloño woku sokolola, u kuete esilivilo lialua ku Suku. (Va Roma 12:1; Va Heveru 11:1) Embimbiliya ka li pisavo oku lekisa ombili yoku kũlĩhĩsa ovina, olio li tu vetiya oku konomuisa ovina vi komõhisa via siata oku velapo omanu.
Ndeci, anga hẽ wa lipulile ale: ‘Nda kuli Suku, esunga lieci a ecelela evĩho?’ Embimbiliya li tambulula epulilo eli kuenda akuavo lonjila ya suapo. b Tu ku vetiya oku amamako oku sanda ocili. O pondola oku sanga atambululo a vetiya hao a sunguluka a kunamẽla kovovangi a koleliwa. Eci ka ci tẽliwa ño ndoco.
a Oco o kũlĩhe ovina vikuavo, tala ombrochura A Vida — Teve um Criador? (Omuenyo — wa Kuata Ululiki Umue?), ya sandekiwa Lolombangi Via Yehova.
b Tanga ocipama 11 celivulu Embimbiliya li Longisa Nye? lia sandekiwa Lolombangi Via Yehova.
Ove o ka ci Sola
APULILO ATAMBULUIWA LEMBIMBILIYA
Anga hẽ Uloño u Likuata Lembimbiliya?
Anga hẽ Vembimbiliya mu sangiwa ovina ka via suilepo viatiamẽla kuloño?
