Ulandu Woku Fetika
‘Setukuli vana okuti omo liekolelo kuenda epandi, va piñala olohuminyo.’—VA HEVERU 6:12.
1, 2. Mitavaso umue o nyula akongelo wa kũlĩha ndati ulandu womanu vakuekolelo va tukuiwa Vembimbiliya, kuenda momo lie omanu vaco va tendiwila ndakamba vocili?
“MANJI umue ukãi noke yoku yeva ohundo ya mitavaso o nyula akongelo, wa popia hati: “Poku lombolola ovolandu omanu va tukuiwa Vembimbiliya wa ci linga ndoku tukula akamba vaye.” Eye wa kuata esunga lioku popia olondaka viaco, momo mitavaso yaco wa pita anyamo alua oku lilongisa Ondaka ya Suku, loku yi longisa komanu. Kuenje, wa kũlĩhĩle ciwa ovolandu valume lakãi vakuekolelo va tukuiwa Vembimbiliya ndakamba vaye.
2 Ku sukila hẽ oku tenda omanu valua va tukuiwa Vembimbiliya ndakamba vove? O tava hẽ okuti omanu vaco va kalako muẽle? Sokolola ndu okuti o kasi oku sapela la Noha, Avirahama, Ruti, Eliya, kuenda Ester osimbu wendeli pamosi kuenje, o pita otembo yalua oco o va kũlĩhe ciwa. Sokololavo ovituwa viavo ndomo vi pondola oku ku vetiya, lolondaka viavo viwa kuenda elembeleko va pondola oku ku ĩha!—Tanga Olosapo 13:20.
3. (a)Tu kuatisiwa ndati poku lilongisa ovolandu alume kumue lakãi vakuekolelo va tukuiwa Vembimbiliya? (b) Apulilo api tu ka konomuisa?
3 Ocili okuti, kotembo ‘yepinduko lia vakuesunga’ tu ka kuata esumũlũho lioku linga ukamba lavo. (Ovil. 24:15) Pole, ndaño muẽle cilo, tu pondola oku kuatisiwa poku lilongisa ovolandu alume kumue lakãi va tukuiwa Vembimbiliya. Ndamupi? Upostolo Paulu o tambulula ndoco: ‘Setukuli vana okuti omo liekolelo kuenda epandi, va piñala olohuminyo.’ (Va Hev. 6:12) Osimbu ka tua fetikile handi oku lilongisa ovolandu alume kumue lakãi vakuekolelo, tu konomuisi apulilo amue a tu ivaluisa olondaka via Paulu ndeci: Ekolelo li lomboloka nye, kuenda momo lie tu li sukilila? Tu pondola oku setukula ndati ekolelo liomanu va kala kosimbu?
Ceci ci Lomboloka Ekolelo, Kuenda Esunga Lieci tu li Sukilila
4. Omanu va sima okuti ekolelo li lomboloka nye? Kuenda momo lie ovisimĩlo viaco ka via sungulukilile?
4 Ekolelo, ocituwa cimue ci vetiya, cina alume kumue lakãi vosi va tukuiwa velivulu lilo va velisilepo calua. Omanu valua koloneke vilo, ka va kũlĩhĩle eci ci lomboloka ekolelo liocili. Ovo va sima okuti ka va pondola oku tava kuvangi umue ka u letiwe. Ovisimĩlo viaco viuhembi. Momo ekolelo liocili lia litepa loku tava kovina viaño. Oku tava kovina viaño, ku koka ohele. Ovisimĩlo viaño vi pita ombamba, ndaño muẽle oku tava okuti kuli Suku hacoko lika ci kuete esilivilo, momo ‘olondele laviovo vi tava, kuenda vi luluma.’—Tia. 2:19.
5, 6. (a)Ekolelo lietu li tiamisiwila kovina vipi vivali ka vi letiwe lovaso? (b) Ekolelo lietu lia pama ndati? Ci lombolola.
5 Ekolelo li kuete esilivilo lia velapo. Ivaluka ndomo Embimbiliya li tukula eci ci lomboloka ekolelo. (Tanga Va Heveru 11:1.) Paulu wa popia hati, ekolelo li tiamisiwila kovina vivali ka vi letiwe lovaso. Catete, ovina vi kasiko okuti, ‘ka vi letiwe lovaso.’ Ovaso etu, ka a pondola oku mola ovina vi kasi kilu, ndeci: Yehova Suku, Omõlaye, ale Usoma, okuti cilo wa tumbikiwa ale kilu. Cavali, ‘ovina vi lavokaiwa,’ okuti, ovolandu ana ka a tẽlisiwile handi. Cilo handi ka tu pondola oku mola oluali luokaliye lu ka tumbikiwa ndopo vonduko Yusoma wa Suku. Eci hẽ ci lomboloka okuti, oku kolela kovina viaco kuenda kovolandu akuavo, ka ci kuete esilvilo?
6 Lakamue! Paulu wa lombolola hati, ekolelo liocili, li kuete ociseveto ca pama. Poku popia hati, ekolelo ‘ondimbukiso,’ wa tukula ondaka yimue yi lomboloka ‘uvangi woku kuata ocina cimue.’ Sokolola ndeci okuti, omunu umue o yongola oku ku ĩha onjo. Citava okuti oku ĩha ocicapa cuvangi kuenje, oku sapuila hati: “Eyi onjo yove yokaliye.” Eci ka ci lomboloka okuti, ove o kala vopapelo yaco. Pole, oku kuata ocicapa cuvangi waco, ci ku ĩha omoko yokuti onjo yaco yove muẽle. Cimuamue haico ci pita lovovangi ana tu tava okuti, a pamisa ekolelo lietu.
7.Nye ca kongela vekolelo liocili?
7 Vekolelo liocili, mua kongela oku tava kovina via velapo kuenda oku tiamisila utima ku Yehova Suku. Ekolelo li tu vetiya oku imba ovaso ku Isietu wokilu ukuacisola, kuenda oku tava okuti olohuminyo viaye viosi vi ka tẽlisiwa. Pole, vekolelo liocili, mua kongela ovina vialua. Olio li posokela oku tekuiwa ciwa oco li pame. Li sukilavo oku kuata ovilinga, sanga li fa.—Tia. 2:26.
8.Momo lie ekolelo li kuetele esilivilo?
8 Momo lie ci kuetele esilivilo oku kuata ekolelo? Paulu wa eca etambululo limue li vetiya calua. (Tanga Va Heveru 11:6.) Nda ka tu kuete ekolelo, ka tu pondola oku amela ku Yehova ndaño oku u sanjuisa. Ekolelo olio ocina ca velapo oviluvo vi kuete olondunge vi sukila oku kuata, poku linga ukamba la Yehova, Isietu wokilu.
9.Yehova wa lekisa ndati okuti o yongola oku pamisa ekolelo lietu?
9 Omo Yehova wa kũlĩha okuti tu sukila oku kuata ekolelo, wa linga eliangiliyo lioku tu longisa ndomo tu vokiya loku pamisa ekolelo lietu. Eye o sumũlũisa alume vakuangangu yekolelo oco va songuile ekongelo Liakristão. Ondaka yaye yi popia ndoco: “Setukuli ekolelo liavo.” (Va Hev. 13:7) Yehova o tu ĩha ovina vialua. Paulu wa soneha eci catiamẽla ‘kelende linene liolombangi’ vialume kumue lakãi va kala kosimbu vana va lekisa ekolelo liocili. (Va Hev. 12:1) Paulu poku tukula vamue pokati komanu vakuekolelo kelivulu lia va Heveru kocipama 11, ka tendele ulala womanu vosi vakuekolelo. Vembimbiliya mu sangiwa ovolandu alume lakãi, amalẽhe kuenda akulu, va lekisa ekolelo okuti, ongangu yavo yi pondola oku tu longisa ovina vialua kotembo yilo yekambo liekolelo.
Tu Setukula Ndati Ekolelo Lia Vakuetu?
10. Elilongiso lietu lio pokolika li tu kuatisa ndati oku setukula alume lakãi vakuekolelo va tukuiwa Vembimbiliya?
10 Ove ku pondola oku setukula omunu umue okuti ku kuete laye ukamba. Osimbu o tanga elivulu lilo, o ka limbuka okuti akonomuiso o linga, a ku kuatisa oku setukula alume lakãi vakuekolelo. Momo lie ku lilongisila elivulu lilo loku linga akonomuiso akuavo? Kelilongiso liove lio pokolika, konomuisa ondongosi Vembimbiliya lovimãleho viosi o kuete. Osimbu o sokolola ovina wa tanga, setekavo oku sokolola ocitumãlo kua pita ulandu wa tukuiwa Vembimbiliya. Sokolola ndu okuti o lete ocitumãlo caco, o yevite olondaka viavo, lelemba liovina viaco, kuenda ndu okuti o kasi oku sapela lavo. Handi vali, limbuka ovisimĩlo viomanu vaco. Osimbu o sokolola ekolelo liavo, o ka kũlĩha ciwa omanu vaco kuenda vamue pokati kavo va ka linga akamba vove.
11, 12. (a)Eci o tenda ekalo lia Avirama la Sarai o sima nye? (b) O kuatisiwa ndati longangu ya Hana, la Eliya, kuenda Samuele?
11 Nda wa kũlĩha ciwa omanu vaco o ka setukula ongangu yavo. Sokolola ndu okuti wa tambula ocikele cimue cokaliye. Vonduko yocisoko ca Yehova, ove wa lalekiwa oku vokiya upange wove woku kunda, ndeci ovo va lalekiwilevo. Pamue ove wa pinga oco o ka kundile kocitumãlo cimue ka kuli akundi valua, ale wa lalekiwa oku linga upange woku kunda lonjila yimue kua kũlĩhĩle ciwa. Osimbu o konomuisa ocikele caco kuenje, o likutilila oco o ci tẽlise, momo lie ku sokoluila ongangu ya Avirama oco o kuatisiwe? Eye kumue la Sarai, va sile konyima elau va kuata volupale luo Uri kuenje, va sumũlũisiwa calua. Nda wa setukula ongangu yavo, o ka va kũlĩha ciwa okuti kosimbu ci sule.
12 Nye ci popiwa kokuove nda omunu umue o lisungue laye wa siata oku ku tata lãvi, ndaño muẽle ceci o tunda kolohongele? Nda wa konomuisa ulanda wa Hana, kuenda ndomo Penina a enda oku u sepula, o ka kuatisiwa oku linga ovina via sunguluka. Handi vali, Hana o ka linga ekamba liove. Cimuamue haico ci pita love okuti, nda omunu umue wa siata oku ku tenda ndu okuti ku kuete esilivilo, o pondola oku linga ukamba la Eliya poku lilongisa ulandu waye, kuenda ndomo Yehova o lembeleka. Amalẽhe vana va siata oku kisikiwa lakamba vo kosikola oku linga ovina ka via sungulukile, va pondola oku kuatisiwa poku lilongisa ulandu wa Samuele ndomo a yuvula ovina vĩvi omãla vocitunda Eli va lingaila vo tavernakulu.
13. Anga hẽ oku setukula ekolelo liomanu va tukuiwa Vembimbiliya, ci tepulula ekolelo omunu a kuete? Ci lombolola.
13 Anga hẽ oku setukula ekolelo liomanu va tukuiwa Vembimbiliya, ci lekisa okuti ekolelo liove ka li kuete esilivilo? Sio! Ivaluka okuti, Ondaka ya Yehova yi tu vetiya oku setukula ekolelo liomanu vaco. (1 Va Kor. 4:16; 11:1; 2 Va Tes. 3:7, 9) Vamue pokati komanu tu ka lilongisa ovolandu avo, va setukulavo ekolelo liomanu vana va kala komuenyo osimbu ovo ka va citiwile. Ndeci, Vocipama 17, limbuka okuti Maria wa tukula olondaka via Hana, ci lekisa okuti, wa setukula ongangu yaye. Eci hẽ ci lomboloka okuti Maria ka kuatele ekolelo lia pama? Sio! Ndaño okuti ongangu ya Hana ya kuatisa Maria oku vokiya ekolelo, eye wa likolisilako oku pamisa ukamba waye la Yehova Suku.
14, 15. Ovina vipi vi sangiwa velivulu lilo, kuenda tu kuama ndati ovina viaco poku lilongisa elivulu lilo?
14 Elivulu lilo, lia pangiwila oku ku kuatisa oco o pamise ekolelo liove. Ovipama vi sangiwamo, viopiwa vovipama Viutala Wondavululi, via sandekiwa oku upisa kunyamo wo 2008 toke wo 2013, vi kuete osapi hati: “Setukuli Ekolelo Liavo.” Pole, kuli ovina vimue viokaliye via vokiyiwako. Apulilo a kapiwilamo oku tu kuatisa oku tambulula loku kapako ovina tu lilongisa. Oviluvialuvia via posoka, via pangiwila lika elivulu lilo kuenje, via vokiyiwa oco vi kale vinene. Mu sangiwavo ovina vikuavo ndeci, ulala wotembo kuenda olomapa. Elivulu Setukuli Ekolelo Liavo, lia pangiwila oku kuatisa omunu lomunu pokati ketu, epata, kuenda kelilongiso liekongelo. Apata alua citava okuti va ka sanjukila oku tangela kumuamue asapulo a leluka.
15 Tu lavoka okuti elivulu lilo, li ku kuatisa oku setukula afendeli va Yehova vakuekolelo vana va kala kosimbu. Nda wa ci linga, o ka pamisa ekolelo liove osimbu amela ku Yehova, Isietu wokilu!
