1, 2. Koloneke vilo pi tu pondola oku sanga eteyuilo?

SOKOLOLA ndeci okuti, o kasi oku linga ungende veteke limue okuti ombela yi fetika oku loka lofela yalua. Kilu kuli alende a tekãva, oviliakulo vi fetika oku eca ocinyi, kuenda ovikẽlu vi livokiya. Noke, ombela yi fetika oku loka. Ove o sandiliya ocitumãlo coku wunda. Kuenje, o sanjuka calua eci o sanga ocitumãlo cimue ciwa okuti ku yuli!

² Koloneke vilo tu kasivo vekalo limuamue. Momo, ovitangi voluali vi kasi oku amamako oku livokiya. O pondola oku lipula ndoco: ‘Pi ndi pondola oku sanga eteyuilo?’ Vembimbiliya ukualosamo wa soneha ndoco: “Nukula Yehova siti, ‘Eye ocikolo cange, haeye ombonge yange. Eye Suku yange, ndu kolela.’” (Osamo 91:2) Yehova o pondola oku tu yovola kovitangi tua siata oku liyaka lavio koloneke vilo, kuenda o tu ĩha elavoko li komõhisa lio kovaso yoloneke.

3. Yehova o pondola oku kala ndati ocitililo cetu?

³ Yehova o pondola oku tu teyuila ndati? Eye o pondola oku tu kuatisa poku liyaka lovitangi, kuenda o kuete unene wa velapo okuti ka u sokisiwa lowu womunu umue o seteka oku tu linga cimue cĩvi. Nda tua pita locitangi cimue, tu pondola oku kolela okuti, Yehova o ka ci tetulula kovaso yoloneke. Embimbiliya li tu vetiya ndoco: “Kali vocisola ca Suku.” (Yuda 21) Oco tu tambule ekuatiso lia Yehova vokuenda kuotembo yovitangi, tu sukila oku kuata ukamba laye. Tu pondola oku ci linga ndati?

4, 5. Yehova wa siata oku lekisa ndati ocisola kokuetu?

⁴ Oco tu kuate ukamba la Yehova, tu sukila oku limbuka  ocisola calua a tu kuetele. Sokolola ovina viosi Yehova a siata oku tu lingila. Eye wa tu ĩha ongongo ya posoka ye yuka ovikũla via posoka calua, kuenda ovinyama. Wa siatavo oku tu ĩha okulia kuwa kuenda ovava a yela oku nyua. Yehova lekuatiso Liembimbiliya wa tu longisa onduko yaye, kuenda ovituwa viaye vi komõhisa. Handi vali, wa lekisa ocisola kokuetu eci a tuma palo posi Yesu Omõlaye una a sole calua, oco a tu yovole. (Yoano 3:16) Omo liocilumba caco, tu kuete elavoko li komõhisa lio kovaso yoloneke.

⁵ Yehova wa linga esokiyo liokuti, Usoma u kasi peka lia Mesiya okuti uviali wo kilu, ndopo u ka malako ohali yosi. Usoma waco u ka kuatisa oco ongongo yi linge yokaliye, muna omanu vosi va ka kuata ombembua lesanju otembo ka yi pui. (Osamo 37:29) Yehova wa siatavo oku lekisa ocisola kokuetu, poku tu longisa ndomo tu pondola oku kuata ekalo liwa koloneke vilo. Eye o tu lalekavo oco tu likutilile kokuaye, kuenda olonjanja viosi wa siata oku lekisa onjongole yoku yevelela olohutililo vietu. Yehova wa siata oku lekisa ocisola komunu lomunu pokati ketu.

6. O lekisa ndati ocisola ku Yehova?

⁶ O lekisa ndati ocisola ku Yehova? Lekisa kokuaye okuti, wa siata oku eca olopandu omo liovina viosi a siata oku ku lingila. Pole, koloneke vilo omanu valua ka va siatele oku eca olopandu. Cimuamue haico ca pita la Yesu eci a kala palo posi. Onjanja yimue eci Yesu a sakula alume ekũi va kuatele uvei wovilundu, umosi lika wa eca olopandu kokuaye. (Luka 17:12-17) Omo liaco, tu yongola oku setukula ongangu yulume una wa eca olopandu ku Yesu. Olonjanja viosi tu sukila oku eca olopandu ku Yehova.

7. Tu sukila oku lekisa ndati ocisola ku Yehova?

⁷ Tu sukilavo oku lekisa ocisola ku Yehova. Yesu wa sapuila  kolondonge viaye hati, via sukilile oku sola Yehova lutima wavo wosi, lomuenyo wavo wosi, kuenda lolondunge viavo viosi. (Tanga Mateo 22:37.) Ovina viaco vi lomboloka nye?

8, 9. Tu lekisa ndati ku Yehova okuti tu u kuetele ocisola?

⁸ Anga hẽ tu sukila lika oku popia tuti tu sole Yehova? Sio. Momo, nda tu sole Yehova lutima wetu wosi, lomuenyo wetu wosi, kuenda lolondunge vietu viosi, tu lekisa ocisola kokuaye lekuatiso liovilinga vietu. (Mateo 7:16-20) Embimbiliya li longisa okuti, nda tu sole Suku, tu sukila oku pokola kovihandeleko viaye. Anga hẽ ka ca lelukile oku ci linga? Ca leluka, momo “ovihandeleko via [Yehova] ka vi lemi.”—Tanga 1 Yoano 5:3.

⁹ Eci tu pokola ku Yehova tu kuata esanju komuenyo. (Isaya 48:17, 18) Pole, nye ci tu kuatisa oku kuata ukamba la Yehova? Tu konomuisi ovina viaco.

10. Momo lie o sukilila oku amamako oku lilongisa catiamẽla ku Yehova?

¹⁰ O pondola oku kala ndati ekamba lia Yehova? Elilongiso liove Liembimbiliya lia ku kuatisa oku kũlĩha ciwa Yehova kuenda oku kuata ukamba laye. Ukamba waco u sokisiwa londalu o yongola okuti, yamamako oku taima. Ndeci ondalu yi sukila olohũi oco yi taime, o sukilavo oku amamako oku lilongisa catiamẽla ku Yehova oco ukamba wove laye u pamisiwe.—Olosapo 2:1-5.

11. Alongiso Embimbiliya a pondola oku ku kuatisa ndati?

¹¹ Osimbu amamako oku lilongisa Embimbiliya, o ka lilongisa ovina vi pondola oku vetiya utima wove. Sokolola esanju olondonge vivali via Yesu via kuata eci a vi lomboluila ovitumasuku Viembimbiliya. Ovio via popia hati: “Ovitima vietu ka via tokotele hẽ eci a vangula letu vonjila, leci a tu situluila Ovisonehua?”—Luka 24:32.

12, 13. (a) Nye ci pondola oku pita locisola tu kuetele Yehova Suku? (b) Tu pondola oku pamisa ndati ocisola cetu ku Yehova?

 ¹² Ndeci ovitima violondonge via vetiyiwa eci via kuata elomboloko Liovisonehua, o pondolavo oku kuata esanju liaco eci o kuata elomboloko Liembimbiliya. Ovina viaco vi ku kuatisa oku kũlĩha Yehova kuenda oku u sola. Ku yongola okuti ocisola cove ci pola.—Mateo 24:12.

¹³ Omo okuti wa linga ekamba lia Yehova Suku, o sukila oku likolisilako oku pamisa ukamba wove laye. O sukilavo oku amamako oku lilongisa catiamẽla kokuaye, oku sokolola ovina o kasi oku lilongisa, kuenda ndomo o vi kapako komuenyo wove. (Yoano 17:3) Eci o tanga Embimbiliya ale poku lilongisa o sukila oku li pula ndoco: ‘Ovina evi vi ndi longisa nye catiamẽla ku Yehova Suku? Momo lie ndi sukilila oku u sola lutima wange wosi kuenda lomuenyo wange wosi?’—1 Timoteo 4:15.

14. Ohutililo yi tu kuatisa ndati oku pamisa ocisola cetu la Yehova?

 ¹⁴ Nda o kuete ekamba limue liwa, o sapela lalio olonjanja viosi, kuenje oku ci linga ci pamisa ukamba wene. Cimuamue haico tu sukila oku linga okuti, nda tu sapela la Yehova olonjanja viosi vohutililo, ocisola tu u kuetele camamako oku pamisiwa. (Tanga 1 Va Tesalonike 5:17.) Ohutililo ombanjaile yimue yi tunda ku Isietu o kasi kilu. Tu sukila oku sapela laye olonjanja viosi. (Osamo 62:8) Tu yuvuli oku pitolola olondaka vimuamue poku likutilila, pole, tu sukila oku kuata elomboloko liovina tu popia. Nda tuamamako oku lilongisa Embimbiliya loku likutilila lutima wetu wosi, ocisola tu kuetele Yehova ci pamisiwa.

15, 16. O tenda ndati upange woku kunda?

¹⁵ Nda tu yongola oku amamako oku kuata ukamba la Yehova, tu sukilavo oku sapela lomanu vakuavo catiamẽla kekolelo lietu. Oku sapela lomanu vakuavo eci catiamẽla ku Yehova, esumũlũho limue linene. (Luka 1:74) Yesu wa eca ocikele caco Kakristão vosi vocili. Omunu lomunu pokati ketu o sukila oku kunda olondaka viwa Viusoma wa Suku. Ove hẽ wa siata ale oku ci linga?—Mateo 24:14; 28:19, 20.

¹⁶ Upostolo Paulu wa limbukile okuti upange woku kunda u kuete esilivilo lia velapo, kuenje wa u tukula hati “ukuasi.” (2 Va Korindo 4:7) Oku sapuila komanu eci catiamẽla ku Yehova kuenda kocipango caye, oco ocina ci kuete esilivilo lia velapo o pondola oku linga. Oku ci linga, oyo onjila o sukila oku kuama poku vumba Yehova, kuenje eye o kapako ovina wa siata oku u lingila. (Va Heveru 6:10) Upange woku kunda u pondolavo oku kuatisa ove, kuenda omanu va ku yevelela. Momo, poku ci linga, o kuatisa omanu vakuavo kumue love muẽle, oco vu pamisi ukamba wene la Yehova, kuenda oku kuata omuenyo ko pui. (Tanga 1 Va Korindo  15:58.) Anga hẽ kuli upange ukuavo u pondola oku ku nenela esanju lialua?

17. Momo lie upange woku kunda u sukilila oku lingiwa lonjanga?

¹⁷ Upange woku kunda u sukila oku lingiwa lonjanga. Tu sukila oku “kunda ondaka,” kuenda oku “ci linga lonjanga.” (2 Timoteo 4:2) Omanu va sukila oku yevelela eci catiamẽla Kusoma wa Suku. Embimbiliya li popia hati: “Eteke linene lia Yehova li li ocipepi; li li ocipepi muẽle, [li] yayulako.” Esulilo “ka [li] cilua.” (Sofoniya 1:14; Havakuki 2:3) Ndopo Yehova o ka kundula oluali lulo lua vĩha lua Satana. Pole, osimbu ka ci lingile handi, omanu va sukila oku lunguiwa oco va nõlepo oku vumba Yehova.

18. Momo lie tu sukilila oku fendela Yehova kumosi Lakristão vocili?

¹⁸ Yehova o yongola okuti, tu u fendela kumue Lakristão vakuavo vocili. Embimbiliya li popia hati: “Tu likapiko pokati ndomo tu livetiya locisola kuenda ovilinga viwa, ka tu ka liwekipo oku liongolola kolohongele vietu ndeci vamue va lingainga, pole, tu lipamisi pokati, ca piãla enene eci tu limbuka okuti eteke li kasi ocipepi.” (Va Heveru 10:24, 25) Tu sukila oku likolisilako oku endaenda kolohongele viosi. Olohongele vi tu ĩha epuluvi lioku li vetiya kuenda oku li pamisa pokati.

19. Nye ci pondola oku tu kuatisa oku sola vamanji?

¹⁹ Eci enda kolohongele, o sanga akamba vawa va pondola oku ku kuatisa oku fendela Yehova. Kuenje, o sanga vamanji va litepa va ku kuetele ocisola okuti, va siata oku likolisilako oku fendela Yehova. Omo okuti kua lipuile, ovo ka va lipuilevo, kuenda va siata oku lueya. Nda va ku lueyela, kuata ocituwa coku va ecela. (Tanga Va Kolosai 3:13.) Olonjanja viosi tiamisila utima kovituwa viwa via  vamanji poku linga ovina vi ku kuatisa oku va sola, kuenda oku kuata ukamba la Yehova.

20, 21. ‘Omuenyo wocili’ u lomboloka nye?

²⁰ Yehova o yongola okuti akamba vaye va kuata ekalo liwa. Embimbiliya li tu longisa okuti, ekalo liomuenyo wetu kovaso yoloneke li ka litepa calua leli lio koloneke vilo.

²¹ Kovaso yoloneke, ka tu ka kuata lika 70 ale 80 kanyamo, pole, tu ka kala otembo ka yi pui. Tu ka sanjukila oku kuata ‘omuenyo ko pui,’ uhayele wa li pua, ombembua, kuenda esanju voluali luokaliye palo posi. Ovina evi ovio Embimbiliya li tukula hati, ‘omuenyo wocili.’ Yehova wa likuminya oku tu ĩha omuenyo wocili, pole, cilo tu sukila oku linga ovina tu tẽla oco tu ‘kakatele’ kovina viaco.—1 Timoteo 6:12, 19.

22. (a) Tu pondola ndati oku “kakatela komuenyo wocili”? (b) Momo lie ka tu sesamẽlela oku kuata omuenyo ko pui?

²² Tu pondola ndati oku “kakatela komuenyo wocili”? Tu sukila oku “linga ovina viwa” kuenda oku ‘linga olohuasi kovilinga viwa.’ (1 Timoteo 6:18) Eci ci lomboloka okuti, tu sukila oku kapako ovina tu lilongisa Vembimbiliya. Pole, omuenyo wocili ka u tundi kalikolisilo etu. Momo, ka tu sesamẽla oku kuata omuenyo ko pui. Pole, omuenyo waco ombanjaile yimue Yehova a eca kafendeli vaye vakuekolelo, omo ‘liohenda yaye ya piãla.’ (Va Roma 5:15) Isietu wo kilu, o yongola oku eca ombanjaile yaco kafendeli vaye vakuekolelo.

23. Momo lie o sukilila oku nõla onjila ya sunguluka cilo?

²³ Lipula ndoco: ‘Ndi kasi hẽ oku fendela Suku lonjila yimue yi taviwa laye?’ Nda wa limbuka okuti o sukila oku linga apongoloko amue, sandiliya oku a linga lonjila yimue ya sunguluka. Nda tu likolisilako oku kolela ku Yehova loku linga ovina tu tẽla oco tu pokole kokuaye, eye o linga ocitililo cetu. Yehova o ka popela afendeli vaye vakuekolelo vokuenda kuoloneke via sulako violuali lulo lua  vĩha lua Satana. Noke, Yehova o ka ecelela okuti, tu kala otembo ka yi pui Voluali Luokaliye, ndomo a ci likuminya. Omo liaco, nda cilo wa nõla onjila ya sunguluka, o pondola oku kuata omuenyo wocili!