AKRISTÃO va handelekiwa oku linga ocipito Conjivaluko yolofa via Kristu. Ocipito caco ci tukuiwa hati ‘Ondalelo ya Ñala.’ (1 Va  Korindo 11:20) Momo lie ocipito caco ci kuetele esilivilo? Otembo yipi ocipito caco ci sesamẽla oku lingiwa? Kuenda ci kuete oku lingiwa ndati?

Yesu Kristu wa sovola ocipito eci vuteke wo Paskoa ya va Yudea kunyamo wo 33. O Paskoa ya va Yudea ya enda oku lingiwa onjanja yimosi vunyamo keteke 14 kosãi ya Nisana. Oco va nõle eteke liaco, ovo va enda oku talamẽla toke otembo yina okuti ekumbi li tumãla oku iñila. Eteke liaco, utanya u tumãla 12 kolowola kuenda uteke u tumãlavo 12 kolowola. Oku molẽha kuosãi keteke liaco, kua kala ondimbukiso yeteke liatete liosãi ya Nisana. Oku upisa keteke liaco, o Paskoa yi fetika eci papita 13 koloneke noke yoku iñila kuekumbi.

Yesu wa lia o Paskoa kumosi lolondonge viaye. Noke wa tundisa Yuda Isikariote. Kuenje wa sovola Ondalelo ya Ñala. Ondalelo yaco ya piñanya o Paskoa ya va Yudea. Omo liaco, yi lingiwa lika onjanja yimosi vunyamo.

Evanjeliu lia Mateo li tu sapuila hati: “Yesu wa nyañula ombolo, wa yi panduila kuenje wa yi timbula,  yu wa yeca kolondonge, kuenje hati, Tambuli, li, ombolo eyi etimba liange. Oku nyañulavo okopo, wa yi panduila, wa yi eca kokuavo hati, Nyuiko vosi; momo eyi osonde yange yocisila, yi peseliwila va lua ongecelo yakandu.”—Mateo 26:26-28.

Vamue va siata oku sima hati Yesu wa pongolola muẽle etimba liaye ombolo kuenda osonde yaye ovinyu. Pole, eci Yesu a eca ombolo yaco, etimba liaye lia sokelepo. Anga hẽ olondonge via Yesu via lia muẽle ositu kuenda via nyua muẽle osonde? Sio. Nda va ci lingile nda va linga oviliamunu. Kuenje nda va lueya ocihandeleko ca Suku. (Efetikilo 9:3, 4; Ovisila 17:10) Kelivulu lia Luka 22:20, tu sangako olondaka via Yesu eci a popia hati: “Okopo eyi ocisila cokaliye ca lisililua vosonde yange yo peselelui.” Anga hẽ okopo yaco eyi oyo muẽle ya linga “ocisila cokaliye”? Sio. Momo ocisila ohuminyo yimue omunu a linga lukuavo. Hacikuatako cimue ci letiwe.

Ombolo lovinyu via kala ño ovindekaise. Ombolo ya kala ocindekaise cetimba lia lipua lia Kristu. Ombolo Yesu a eca kolondonge viaye yina ya supile ko Paskoa. Ombolo yaco ka ya kuatele etumbisa. (Etundilo 12:8) Vembimbiliya etumbisa ocindekaise cekandu ale cevĩho. Omo liaco, ombolo ka yi kuete etumbisa, ya kala ocindekaise cetimba lia lipua lia Yesu. Momo eye ka kaile lekandu.—Mateo 16:11, 12; 1 Va  Korindo 5:6, 7; 1 Petulu 2:22; 1 Yoano 2:1, 2.

Ovinyu yi kusuka, ya kala ocindekaise cosonde ya Yesu. Osonde yaco oyo ya eca esilivilo kocisila cokaliye. Yesu wa popele hati, osonde yaye ya ‘pesiwila ongecelo yakandu.’ Omo liosonde ya Yesu ya pesiwa, omanu ci tava okuti va yelisua kovaso a Suku, kuenje va iñila vocisila cokaliye ca Yehova. (Va Heveru 9:14; 10:16, 17) Ocisila caco eci ca yulula onjila oco Akristão va soka 144.000 va ende kilu. Ovo va ka kala olosoma kuenda ovitunda. Kuenje va ka sumũluisa omanu vosi va ka kala palo posi.—Efetikilo 22:18; Yeremiya 31:31-33; 1 Petulu 2:9; Esituluilo 5:9, 10; 14:1-3.

Velie va kuete omoko yoku lia kolondimbukiso Vionjivaluko yolofa via Yesu? Vana lika vatiamẽla kocisila cokaliye, okuti va kuete elavoko lioku enda kilu. Espiritu sandu lia Suku li va  imbila uvangi wokuti va nõliwila oku ka linga olosoma kilu. (Va Roma 8:16) Ovo va kasivo vocisila Cusoma kumosi la Yesu.—Luka 22:29.

Oco hẽ vana va kuete elavoko lioku kala otembo ka yi pui palo posi valiavo kombolo lovinyu? Ovo kavali kombolo lovinyu. Pole, va pokola kocihandeleko ca Yesu coku kala Kondalelo ya Ñala. Osimbu va kalako, va lavulula lesumbilo ndomo ocipito caco ci lingiwa. Olombangi via Yehova via siata oku linga ocipito Condalelo ya Ñala onjanja yimosi vunyamo, keteke 14 kosãi ya Nisana noke yoku iñila kuekumbi. Ndaño okuti voluali luosi vatito va kuete elavoko lioku enda kilu, ocipito eci ci kuete esilivilo Kakristão vosi. Kepuluvi liaco Akristão va ivaluka ocisola ca velapo ca Yehova kuenda ca Yesu Kristu.—Yoano 3:16.