EMBIMBILIYA halioko ono yovipito via siata oku lingiwa vatavo amue kuenda kolonepa vialua violuali. Oco hẽ ovipito viaco via fetikila pi? Nda wa konomuisa alivulu amue, oka limbuka eci alivulu aco a popia catiamẽla kovipito via siata oku lingiwa vofeka o kasi. Konomuisako ño handi vimue.

 O Paskoa. ‘Vembimbiliya Kotestamento yokaliye, ka ku sangiwa ovihilahila lavimue ndevi via siata oku lingiwa ko Paskoa yokoloneke vilo.’ Oco hẽ ovihilahila via kongeliwa vo Paskoa yokoloneke vilo via fetikila pi? Via fetikila pokati ka vakuakufendela olosuku viesanda. Ndaño omanu va siata oku popia okuti ocipito co Paskoa coku sambiliya epinduko lia Yesu, ovihilahila via kongeliwamo Haviakristãoko. Catiamẽla kocituwa coku kongela ‘ondimba vocipito co Paskoa,’ elivulu limue lia popia hati: “Ondimba ondimbukiso ya vakualofeka yatiamẽla kosuku yunja.”

Ocipito Combowano. Eteke kuenda ovihilahila viatiamẽla kocipito Combowano via litepa calua kofeka lofeka. Poku lombolola oku kuafetikila ocipito caco, elivulu limue li popia hati: “Mbiali woko Roma wa tukuiwile hati, Juliu Cesar wa tumbika eteke 1 kosãi ya Susu ndeteke Liombowano, kunyamo wa 46 otembo Kristu keyile. Va Roma va enda oku tiamisila eteke liaco kosuku yimue ya tukuiwa hati Janus. Osuku yaco va yi sokisile hati osuku yolombundi kuenda yefetikilo. Osãi ya Susu yopiwa konduko ya Janus, osuku yimue ya kala lovipala vivali. Cimue ca vanja kovaso ci kuavo ca vanja konyima.” Eci ci lekisa okuti ocipito Combowano copiwa kovihilahila via vakualofeka.

Eteke Lioku Ivaluka Ava va fa. Elivulu limue li lombolola hati: ‘ovihilahila via kongeliwa veteke eli, via tunda kosimbu. Ava va enda oku linga ocipito caco, va enda oku ci tiamisila kolosuku vivali via velapo. Okuti osuku yekumbi kuenda osuku yava va fa. Ocipito caco ca enda oku lingiwa keteke 1 liosãi ya Kuvala. Vokuenda kuotembo, ocipito coku sambiliya ava va fa, ceya oku kongeliwa vatavo amue Akristão.’

Ovipito Vikuavo. Ka ci tẽliwa oku lombolola ovipito viosi via siata oku lingiwa voluali. Pole, ovipito viosi vi velisapo omanu ale ovisoko viomanu, ka via sungulukile kovaso a Yehova. (Yeremiya 17:5-7; Ovilinga 10:25, 26) Ivalukavo okuti onjila yimue yoku kũlĩha nda ocipito cimue ca sunguluka kovaso a Suku ale sio, oku kũlĩhĩsa oku ocipito caco ca fetikila. (Isaya 52:11; Esituluilo 18:4) Olonumbi Viembimbiliya via tukuiwa kocipama 16 celivulu lilo, vika ku kuatisa oku limbuka ndomo Suku a tenda oku kuata onepa kovipito violuali.