Olohuela vi nena epata liokaliye. Ndaño okuti o ka amamako oku sola loku sumbila vangandiove, pole, ohueli yove oyo omunu wa velapa palo posi. Vamue pokati ka vangandiene ka ca lelukile kokuavo oku tava kocisimĩlo caco. Pole, Embimbiliya li pondola oku ku kuatisi oku lekisa esunguluko, oco wamamiko lombembua la vangandiene, osimbu vu likolisilako oku pamisa epata liene liokaliye.

CECI EMBIMBILIYA LI POPIA: “Sumba so la nyõho.” (Va Efeso 6:2) Ndaño ove ukulu, pole, otembo yosi o sukila oku kapako olonjali viove kuenda oku vi sumbila. Limbuka okuti ohueli yove omo okuti omõla, yi sukilavo oku kapako olonjali viaye. Omo okuti “ocisola ka ci kuete onya,” lalimue eteke ku ka sumue omo liukamba ohueli yove yi kuete lolonjali viaye.—1 Va Korindo 13:4; Va Galatia 5:26.

CECI O SUKILA OKU LINGA:

• Yuvula oku popia ndoco, “Olonjanja viosi epata liove lia ndi lavisa,” ale “Ina yove lalimue eteke a sanjukila ovina ndi linga”

• Seteka oku kapako ovina ndomo ohueli yove ya vi kapako

CECI EMBIMBILIYA LI POPIA: “Oco ulume o sia isiaye la inaye hã ha litokeka lukãi waye, kuenje va linga etimba limuamue.” (Efetikilo 2:24) Eci ove o kuela, olonjali viove vi sima okuti, handi vi kuete omoko yoku ku nõlelako ovina o sukila oku linga, kuenda vi yongola oku litenga volohuela viove kovina vimue okuti, ka vi kuete omoko yaco.

Ove lohueli yove, ene vu nõla ovina vu yongola okuti, olonjali viene viu kuatisi oku vi linga, kuenda va sapuiliko oco va ci kũlĩhe. Ene u pondola oku vangula lavo pole yuvuli oku vangula lukãlu. (Olosapo 15:1) Umbombe, ohenda kuenda epandi vi ka ku kuatisi oku kuata ukamba la vangandiene, kuenda oku amamako oku “liunjukila pokati locisola.”—Va Efeso 4:2.

CECI O SUKILA OKU LINGA:

• Nda wa sakalala omo okuti epata liove li kasi oku litenga calua vomuenyo wene, sapela lohueli yove catiamẽla kondaka yaco osimbu olonyeño via tulumuha

• Kuati ovisimĩlo vimuamue ndomo vu ka tetulula ovitangi viaco