OVE hẽ wa kũlĩha alume ava va kasi oku vangula ndeti la Yakoba? Noke lioloneke vialua viungende waye, Yakoba wa li ñualehela lavo pocisimo covava. Alume vaco va kala loku lisa olomeme viavo kuenje Yakoba wa va pula hati: ‘Wa tundi pi?’

Ovo hati, ‘Tua tunda ko Harane.’

Yakoba wa va pula vali hati: ‘Wa kũlĩhi Lavane?’

Ovo va kumbulula hati, ‘Tuo kũlĩha. Omõlaye Rahele o kasi oku iya lolomeme.’ Ove hẽ o lete okuti Rahele o kasi oku iya muẽle?

Eci Yakoba a mola Rahele lolomeme via nyohonu yaye Lavane, wa tuvula ewe komẽla wocisimo. Kuenje wa nyuisa olomeme ovava. Noke Yakoba wa sipula Rahele kuenje wa lisitulula kokuaye. Rahele wa sanjukile calua kuenje wa enda konjo yavo oku ka ci sapuila isiaye Lavane.

Lavane poku mola Yakoba wa sa-njukile calua. Handi vali, wa sanju-kilevo calua eci Yakoba a lombolola ocisimĩlo caye coku kuela Rahele. Lavane wa sapuila Yakoba oco a vumbile Rahele anyamo epanduvali. Omo okuti Yakoba wa solele calua Rahele, wa pokola kondaka yaco. Pole eci otembo yaco yoku kuela ya pitila, kua pita ocina cimue. Ove hẽ wa kũlĩha ocina caco?

Lavane ka ecele omõlaye Rahele ku Yakoba. Eye wa eca omõlaye ukuavo o tu kuiwa hati Lea. Yakoba wa vumbila vali Lavane anyamo epanduvali kuenje wa tambula ukãi waye Rahele. Kotembo yaco Suku wa ecelela okuti ulume ci tava oku kuata akãi valua. Pole cilo, Embimbiliya li lekisa okuti ulume ci tava lika oku kuata ukãi umosi.