KŨLĨHISA ndomo Yosefe a kasi. Eye wa sumua calua kuenda wa pua elavoko. Vamanjaye vo kuatela ukuse kuenje volandisa kalume vamue va kala oku enda Kegito oco a kale upika kofeka yaco.

Isiavo Yakoba wa solele calua Yosefe. Omo liocisola o kuatela, wo tongisila uwalo umue wokovoko. Eci vamanjaye ekũi va limbuka okuti Yakoba o sole calua Yosefe, va fetika oku u suvuka. Pole kua kala vali esunga likuavo lioku u suvuka.

Yosefe wa lotele olonjoi vivali. Volonjoi viaco wa mola okuti vamanjaye vo kekamẽla oku u fendela. Eci Yosefe a sapula olonjoi viaco ku vamanjaye, ovo va fetika vali oku u suvuka calua.

Eteke limue eci vamanjaye va kala oku lisa olomeme Yakoba wa popia la Yosefe hati: ‘Kuende, ka kũlĩhise vahuvove kumue loviunda.’ Eci va manjaye vo muila ocipãla, vamue pokati kavo va popia hati: ‘Tu wipayi.’ Pole ukulu waco Ruvene wa popia hati: ‘Ka tu ka peseli omuenyo waye.’ Tu wimbi ño vocitunu covava. Noke va fetika oku sokiya eci va pondola oku linga laye.

Osimbu va kala oku sokolola eci va linga, va mola alume va Isameli. Kuenje Yuda wa popia la vamanjaye hati: ‘Tu u landisi ku va Isameli.’ Vamanjaye va tava kokuaye kuenje vo landisa lakũi avali kolopalata. Helingakuolio lĩvi!

Kaliye, nye vamanjaye va ka sapuila isiavo? Ovo va ipaya ocitupi cohombo kuenje va nyañula uwalo wa Yosefe va u yaveka vosonde yaco. Noke vambata uwalo waco toke ku isiavo. Eci va pitila ku Isiavo va popia hati: ‘Tua nõla uwalo owu. Kũlĩhisa nda uwalo womõlove Yosefe.’

Yakoba wa limbuka uwalo waco kuenje wa fetika oku lila. Eye wa popia hati: ‘Yosefe wa takĩliwa locinyama ca tema.’ Eci oco vamanjaye va vetiya isiavo oku sokolola. Yakoba wa sumuile calua kuenda wa lila oloneke vialua. Pole Yosefe ka file. Tu konomuisi eci ca pita la Yosefe eci a kala Kegito kuna a landisiwile.