LOTE lepata liaye va kala kumosi la Avirahama kofeka yo Kanana. Eteke limue Avirahama wa sapuila Lote hati: ‘Vofeka yilo ka tu suimo lovinyama vietu. Tu li tepe. Nda ove wenda konele eyi, ame ngenda konele yikuavo.’

Noke Lote wa petuila ovaso aye kofeka. Wa mola onepa yimue ya posoka yoko Yordão okuti kuosi ku kuete ovava. Kuenje Lote wa enda konepa yaco lepata liaye kuenda ovinyama viaye. Va tunga vo Sodoma.

Omanu vo Sodoma va kala olondingaĩvi. Elinga liomanu vaco, lia sumuisile Lote la Yehova momo Lote wa kala ukuesunga. Noke Suku wa tuma ovangelo vavali ku Lote. Ovangelo vaco va sapuila Lote okuti Suku o laika oku nyõla imbo lio Sodoma kuenda o Gomora omo lievĩho liavo.

Ovangelo va popia la Lote hati: ‘Katuka, ambata ukãi wove, lomãla vove vakãi vavali va kasi kulo!’ Pole, Lote lepata liaye va simũlapo kamue. Kuenje ovangelo va kuata Lote peka, lukãi waye, lomãla vaye vakãi vavali oco va tunde vimbo liaco. Noke umue pokati kovangelo wa popia hati: ‘Tili, popeli omuenyo wene; ko ka vanji konyima. Tilili komunda, sanga u nyõliwa.’

Lote lomãla vaye vakãi va pokola kondaka yaco kuenje va tunda vo Sodoma. Ka va vanjele konyima. Pole ukãi wa Lote ka pokuile kondaka yavo. Noke lioku tunda vo Sodoma, eye wa vanja konyima kuenje wa linga ongunji yomongua. Tala vociluvialuvia cilo ndomo eye a kasi.

Nye tu pondola oku lilongisila kulandu owu? Ulandu owu, u lekisa okuti Suku o popela lika omanu vana va pokola kokuaye. Omanu vana ka va pokola kokuaye, va ka pesela omuenyo wavo.