ECI papita anyamo avali Yosefe handi wa kala vokayike. Kalei kovinyu ya soma ka ivalukile Yosefe. Eteke limue Fareo wa lota olonjoi vivali vi komõhisa. Eye wa saluka calua momo ka kuatele elomboloko liaco. Kũlĩhisa ndomo eye a pekela. Eci kuaca omẽle wa vilikiya olonoño viosi viofeka kuenje wa va sapuila ovina viosi eye a lota. Pole ovo ka va tẽlele oku situlula elomboloko liaco.

Noke kalei kovinyu wa ivaluka Yosefe. Eye wa sapuila Fareo hati: ‘Eci nda kala vokayike, tua kalamo lulume umue okuti wa tu lomboluila olonjoi vietu.’ Kuenje Fareo wa tuma okupa Yosefe vokayike.

Fareo wa sapuila Yosefe olonjoi viaye hati: ‘Tete nda mola olongombe epanduvali via posoka. Noke nda mola olongombe epanduvali via kopa. Olongombe epanduvali vina via kopa via ina olongombe epanduvali vina via neta.’

‘Vonjoi ya vali, nda mola apunga epanduvali a pama hao a posoka okuti a ima kocingenge cimosi. Noke nda mola apunga epanduvali a kupa. Apunga ana a kupa a ina apunga epanduvali awa hao a pama.’

Yosefe wa sapuila Fareo hati: ‘Olonjoi evi vi lomboloka lika ocina cimosi. Olongombe epanduvali via neta kuenda apunga epanduvali a pama, ci lomboloka anyamo epanduvali. Olongombe epanduvali via kopa kuenda apunga epanduvali a kupa ci lombolokavo anyamo epanduvali. Vokuenda kuanyamo epanduvali, vofeka Yegito mu kala okulia kualua. Noke ku kuama anyamo epanduvali onjala.

Noke Yosefe wa sapuila Fareo hati: ‘Nõla ulume umue wa lunguka haeye ukualondunge oco ongolole ovilia viosi vianyamo elau a laika oku iya. Ovilia viaco vi linga eteku lianyamo epanduvali elambu ana a laika oku iya oco omanu ka va ka fe lonjala.’

Fareo wa sanjukilile ondaka yaco. Noke wa nõla Yosefe oco ongolole loku soleka okulia. Yosefe weya oku linga omunu umue wa velapo vofeka Yegito.

Eci pa pita anyamo ecelãla vokuenda kuonjala, Yosefe wa mola alume vamue va kala loku iya vofeka Yegito. Ove hẽ wa kũlĩha alume vaco? Ovo va kasi eci ci soka ekũi! Isiavo Yakoba. Eye wa va tuma kofeka Yegito oco va ka lande okulia omo lionjala ya kala vo Kanana. Yosefe wa limbuka vamanjaye pole ovo ka vo limbukile. Momo lie? Momo kepuluvi liaco Yosefe wa linga ale ukulu kuenda wa wala uwalo umue wolosoma.

Yosefe wa sokolola onjoi yina a lotele eci a kala omõla. Eye wa lotele okuti vamanjaye vo kekamẽla. Ove hẽ ivaluka ulandu waco? Yosefe wa limbuka okuti Yehova eye wo tumile kofeka Yegito kuenda wa ci linga lesunga lialua. Tu konomuisi eci Yosefe a linga.