ECI papita anyamo alua, omãla va Noha va fetika oku kuata omãla valua. Eci omãla vaco va kula, va fetikavo oku kuata omãla vavo. Kuenje vokuenda kuotembo kilu lieve kua fetika oku kala omanu valua.

Umue pokati komanu vaco, Nimuroti oneka ya Noha. Nimuroti wa kala ondingaĩvi haeye enyanga liovinyama. Nimuroti wa enda oku pondavo omanu. Eye wa kalavo ombiali yomanu. Suku ka sanjukilile ovilinga via Nimuroti.

Omanu vosi kilu lieve va kala lupopi umuamue. Pole, Nimuroti wa yonguile okuti omanu va kongeliwa pamosi oco eye a kale ombiali yavo. Nye eye a linga? Eye wa sapuila omanu oco va tunge osapalalo yimue ya lepa. Kũlĩhisa vociluvialuvia cilo ndomo omanu va kasi loku panga olondopi.

Yehova Suku ka sanjukilile elinga liaco momo eye wa yonguile okuti omanu va tungila kolonepa viosi violuali. Pole omanu va popia hati: ‘Enjui, tu litungili imbo; tu tungivo osapalalo, utue wayo u pitile kilu; oco tu kemãlise onduko yetu.’ Ovo va yonguile oku sanda ekemãlo liavo muẽle okuti Suku hayeko.

Omo liaco, Suku wa tatamisa upange wavo. Ndamupi? Eye wa ci linga poku pongolola elimi liavo okuti ka va liyevi pokati. Kuenje va liwekapo oku tunga osapalalo yaco. Eli olio esunga lieci va tukuila osapalalo yaco hati, Bavele ale Bavulono. Onduko yaco yi lomboloka ‘Ombuanja.’

Noke omanu va fetika oku li tepa tepa. Ava va vangula elimi limuamue, va enda oku va yongola oku tunga kilu lieve.