ECI papita olosãi vivali tunde eci va tunda Kegito, va Isareli va pitila Komunda Sinai. Komunda yaco ku tukuiwavo hati ko Horeve. Kocitumãlo caco oko Yehova a vanguila la Mose vocisapa ca taima. Kuenje va Isareli oko va kala otembo yimue.

Osimbu omanu va kala loku talamẽla, Mose wa lamanela komunda. Kilu liomunda Yehova wa sapuila Mose ocipango caye. Eye wa yonguile okuti va Isareli va pokola Kokuaye oco va linge omanu vaye va kola. Eci Mose a loka komunda, wa sapuila omanu ovina viosi Yehova o sapuila. Kuenje va Isareli va kumbulula okuti va ka amamako oku pokola ku Yehova oco va linge omanu vaye.

Yehova wa linga ocina cimue ci komõhisa. Omunda Sinai ya fetika oku tunda owisi. Kua kalavo ovilemilo kuenda oviliakulo. Noke wa sapuila omanu hati: ‘Ame ndi Yehova Suku yene nda ku pi vofeka Yegito.’ Kuenje wa va ĩha ocihandeleko hati: ‘Ku ka fendele olosuku viñi te ame.’

Yehova wa eca vali ku va Isareli ci soka ovihandeleko ecea. Omanu va fetika oku kuata usumba walua kuenje va sapuila Mose hati: ‘Popia letu ove, Suku ka ka popie letu sanga tu fa.’

Noke Yehova wa popia la Mose hati: ‘Lamana kulo komunda. Enju kokuange. Ndi ku ĩha itale vivali viovawe vi kuete ovihandeleko nda soneha oku vi longisa omanu.’ Mose wa tiukila vali komunda. Eye wa kala komunda yaco eci ci soka akũi akuãla koloneke.

Yehova wa eca ovihandeleko vialua komanu vaye. Mose wa soneha ovihandeleko viaco. Suku wa ecavo itale vivali viovawe. Vovawe aco, Suku wa sonehamo ovihandeleko ekũi vina a sapuila omanu vosi. Ovihandeleko viaco via tukuiwa hati, Ekũi Liovihandeleko.

Ekũi liaco Liovihandeleko, via kuata esilivilo liocili. Pole kua kalavo ovihandeleko vikuavo Suku a ecele ku va Isareli. Vimue pokati kovihandeleko viaco vievi: ‘Sola Yehova Suku yove lutima wove wosi, lomuenyo wove wosi, longusu yove yosi.’ Ocihandeleko cikuavo ceci: ‘Sola u o lisungue love ndeci o lisole ove muẽle.’ Yesu Kristu omõla a Suku wa lombolola okuti ovihandeleko evi vivali, ovio vinene Yehova a ecele komanu vaye va Isareli. Noke tu ka lilongisa ovina vialua viatiamẽla Komõla a Suku kuenda elongiso liaye.

Etundilo 19:1-25; 20:1-21; 24:12-18; 31:18; Esinumuilo 6:4-6; Ovisila 19:18; Mateo 22:36-40.