KŨLĨHISA olonelẽho evi lolomendoa via pia ndeti kuti owu. Uti waco ombueti ya Arone. Olonelẽho evi lapako aco, via tundila kombueti ya Arone vokuenda kuteke. Tu konomuisi esunga liaco.

Va Isareli va kala ale vekalasoko otembo yalua. Omanu valua ka va yonguile okuti Mose o kala vali usongui wavo. Ndaño Arone omanu ka va yonguile okuti o kala vali ocitunda cinene. Kora la Datana la Avirama kuenda 250 kasongui a va Isareli, ovo va kuata ovisimĩlo viaco. Vosi yavo veya ku Mose loku popia hati: ‘Nye wa livelisilipo okuti owiñi ulo u sule?’

Mose wa popia la Kora kuenda omanu vaye hati: ‘Hẽla komẽle, nyañuli oviyukilo viene viondalu. Kapimo insensu. Noke vi neni vo tavernakulu ya Yehova. Oco tu mõle omunu Yehova a nõla.’

Eci kuaca omẽle Kora kuenda 250 komanu vaye veya toke kotavernakulu. Omanu vakuavo veyavo oco va kuatise alume vaco. Yehova wa temẽle calua. Mose wa popia hati: ‘Tundi kolombalaka viomanu ava vãvi. Ko ka lambi cimue cavo.’ Omanu va pokola kondaka yaco kuenje va litepa lombalaka ya Kora la Datana kuenda Avirama.

Noke Mose wa popia hati: ‘Poku ci linga tu ka limbuka omunu Yehova a nõla. Osi yi ka asama kuenje yi ka ina alume vosi vãvi.’

Eci Mose a mãla oku vangula, osi ya asama. Ombalaka ya Kora kuenda viosi viaye via kalamo, osi ya va ina. Datana kuenda Avirama lomanu vosi va kala lavo vosi yavo osi ya va ina. Eci omanu va yeva oku litetela kuava va kala loku iniwa losi, va popia vati: ‘Tu tili! Sanga osi yi tu ina.’

Kora lomanu vaye va soka 250, handi va kala ocipepi lotavernakulu. Omo liaco, Yehova wa va tumisa ondalu kuenje ya va lia. Alume vaco va fa va kala loviyo viondalu vina va lumbile lavio. Noke Yehova wa sapuila Eleasa omõla a Arone oco a yelule oviyo viaco okuti vi teliwa kuenda oku vi yala kutala. Utala waco wa kala ndelungulo ku va Isareli liokuti, Arone lomãla vaye ovo lika va pondola oku vumba ndovitunda ku Yehova.

Yehova wa yonguile oku lombolola ciwa okuti Arone lomãla vaye ovo eye a nõla oco va talavaye ndovitunda. Omo liaco, wa sapuila Mose hati: ‘Epata liosi lia Isareli, usongui waco a nene ombueti yaye. Pole kepata lia va Lewi Arone a nene ombueti yaye. Olombueti viaco vi kapa vo tavernakulu kovaso yo cikasia covisila. Omunu wosi nda nõla oku kala ocitunda, ombueti yaye yi yova olonelẽho.’

Eci kuaca omẽle, Mose wa mola okuti ombueti ya Arone ya yova olonelẽho. Kombueti yaco kua ima olomendua. Momo lie Yehova a lingila ocikomo caco kombueti ya Arone?

Atendelo 16:1-49; 17:1-11; 26:10.