OVE hẽ wa yevele ale ocimbulu ci vangula? Ci tava okuti kua la ciyeva momo ovinyama ka vi vangula. Pole Embimbiliya li lombolola okuti ocimbulu cimue ca vanguile. Tu konomuisi ulandu waco.

Eci va Isareli va kala ocipepi loku iñila vofeka yo Kanana, Balaka soma ya va Moavi wa kala lusumba walua. Kuenje wa tuma ulume umue onoño o tukuiwa hati Baliame oco a siñale va Isareli. Balaka wa likuminyile oku feta olombongo vialua ku Baliame. Noke Baliame wa tikula ocimbulu caye, wa enda ku Balaka.

Yehova ka yonguile okuti Baliame osiñala omanu Vaye. Omo liaco, wa tuma ungelo waye losipata yinene oco a talame vonjila ya Baliame. Baliame ka muile ungelo, ocimbulu oco lika ca mola ungelo. Ocimbulu ca seteka oku tunda vonjila yungelo, noke ca kupukila posi vonjila. Elinga liaco lia temisa Baliame, kuenje wa fetika oku veta ocimbulu caye lombueti.

Noke Yehova wa vetiya ocimbulu oco ci vangule la Baliame. Ocimbulu ca popia la Baliame hati: ‘Nye nda ku linga okuti oco o mbetela?’

Baliame wa kumbulula hati, ‘Momo wanomba. Nda nda kaile losipata peka, nda nda ku ipaya.’

Ocimbulu ca kumbulula hati: ‘Anga hẽ nda ku lingile ale ocina cimue ndeci?

Baliame wa kumbulula hati, ‘sio.’

Noke Yehova wa patulula ovaso a Baliame. Eye wa mola ungelo losipata yinene okuti otãi vonjila. Ungelo wa popia hati: ‘Nye wa vetela ocimbulu cove? Ndeya oku tateka onjila yove momo ka ci tava okuti wenda oku siñala va Isareli. Nda ocimbulu cove ka ca tundile vonjila nda nda ku ipaya pole ocimbulu nda ca siala lomuenyo.’

Baliame wa popia hati: ‘Nda linga ekandu. Sia limbukile okuti ove wa kala vonjila.’ Noke ungelo wa sapuila Baliame okuti kuende. Kuenje Baliame wa enda ku Balaka. Eye wa seteka vali oku siñala va Isareli pole Yehova wa tiamisila esumũlũho ku va Isareli olonjanja vitatu.

Atendelo 21:21-35; 22:1-40; 23:1-30; 24:1-25.