Esapulo 47: Ocimunu Cimue Pokati ka va Isareli
KŨLĨHISA eci ulume u a kasi loku lembika ndeti posi vombalaka yaye. Eye o kasi loku lembika ocikutu cimue ca posoka, locinimbu culu, kuenda olopalata. Ovina viaco wa vi nyana volupale luo Yeriko. Pole nye ovo va sukilile oku linga lovina violupale luaco? Ove hẽ o civaluka?
Ovo va sukilile oku nyõla ovina viaco. Pole ulu lopalata vi eciwa kukuasi wombalaka ya Yehova. Omanu ava ka va pokuile ku Yehova. Ovo va nyana ovina via Yehova. Ulume u, onduko yaye Akani. Vakuavo epata liaye. Tu konomuisi eci ceya oku pita lavo.
Eci Akani a nyana ovina viaco, Yehosua wa tumile alume vamue oco va liyake lofeka yo Hai. Pole omanu vaco Yehosua a tumile, veya oku yuliwa lovanyali vavo. Vamue pokati kavo va pondiwa, kuenje vakuavo va tila. Yehosua weya oku sumua calua. Wa tuvika ocipala caye posi kuenje wa likutilila ku Yehova hati: ‘Nye wa ci lingila?’
Yehova wa kumbulula hati: ‘Votoka! Va Isareli va linga ekandu. Va kuata kovina via sesamelele oku nyõliwa kuenda kovina vioku kapa votavernakulu ya Yehova. Ovo va nyana ocikutu ca posoka kuenje va ci seleka. Nda ka wa yokeli ovina evi lomunu waco, si u sumũlũisi.’ Yehova wa likuminya oku lekisa omunu waco ku Yehosua.
Noke Yehosua wongolola omanu vosi kuenje Yehova wa lekisa omunu waco okuti Akani. Akani wa popia hati: ‘Nda linga ekandu. Nda mola ocikutu ca posoka, locinimbu culu kuenda olopalata. Nda vi sola calua kuenje nda vi yelula. Nda vi lembika posi vombalaka yange.’
Eci va lembulula ovina viaco, va vi nena ku Yehosua. Kuenje Yehosua wa popia la Akani hati: ‘Nye wa tu talisila ohali? Kaliye Yehova oku talisavo ohali.’ Noke omanu va fetika oku sosola Akani lovawe kuenda epata liaye toke va fa. Ovina evi vi lekisa okuti tu sukila oku yuvula oku upa ovina viamãle.
Noke liovina evi, va Isareli va enda vali oku kaliyaka lofeka yo Hai. Yehova wa va kuatisa kuenje va kundula ovanyali vavo.
Yehosua 7:1-26; 8:1-29.
Apulilo
- Ulume u o moleha ndeti vociluvialuvia o kasi oku lembika ovipako viopiwa ko Yeriko helie? Kuenda velie va kasi ndeti oku u kuatisa?
- Momo lie elinga lia Akani lepata liaye ka lia sungulukilile?
- Yehova wa tambulula ndati eci Yehosua o pulisa esunga lieci va Isareli va yuliwile lovanyali vavo ko Hai?
- Eci Akani lepata liaye va neniwa ku Yehosua nye ceya oku pita lavo?
- Nye tu lilongisila keyambulo lia pita la Akani?
Apulilo akuavo
- Tanga Yehosua 7:1-26.
Ohutililo ya Yehosua yi lekisa nye catiamẽla kukamba a kuata Lululiki waye? (Yeh. 7:7-9; Osa. 119:145; 1 Yoa. 5:14)
Ulandu wa Akani u lekisa nye? Kuenda eci ci tu ĩha elungulo lie? (Yeh. 7:11, 14, 15; Olosap. 15:3; 1 Tim. 5:24; Va Hev. 4:13)
- Tanga Yehosua 8:1-29.
Ocikele cipi omunu lomunu pokati ketu a kuete vekongelo Liakristão koloneke vilo? (Yeh. 7:13; Ovis. 5:1; Olosap. 28:13)
