OVE hẽ o lete eci ci kasi oku pita ndeti palo? Ava ndeti olohoka via va Isareli. Alume va petama ndeti, va kasi loku nyua ovava. Ulume o tãi ndeti ponele yavo, eye Gideone onganji. Eye o kasi loku tala ndomo alume vaco vanyua ovava.

Kũlĩhisa ndomo va kasi oku nyua ovava. Vamue, va tuvika ovipala viavo vo vava. Pole umue o kasi loku nyuila ovava peka liaye oco a tẽle oku lavulula eci ci kasi konele yaye. Ocituwa caco ci kuete esilivilo. Momo Yehova wa sapuilile Gideone oco a nõle lika alume vana va tẽla oku lavulula osimbu va kasi oku nyua ovava. Suku wa popia hati, alume vakuavo va tiukile kimbo. Tu konomuisi esunga liaco.

Va Isareli va kala oku liyaka lovitangi vialua momo ka va pokuile ku Yehova. Ovo va kala oku yuliwa la va Midiane kuenda oku pondiwa. Omo liaco, va Isareli va likutilila ku Yehova oku pinga ekuatiso. Kuenje Yehova wa yeva epingilo liavo.

Yehova wa sapuila Gideone oco a pongiye olohoka vimue. Kuenje Gideone wa pongiya akũi atatu la vavali kolohũlũkãi vialume vakuavita. Pole ovanyali vavo va kala eci ci soka, ocita kakũi atatu latãlo kolohũlũkãi vialume vakuavita. Yehova wa sapuila Gideone hati: ‘Omanu va kasi kumue love valua enene.’ Momo lie Yehova a ci popela?

Yehova wa ci popela omo okuti, va Isareli ci tava okuti va yula uyaki. Pole nda va yula uyaki waco, va ka sima okuti va ci linga lunene wavo. Kuenda va ka sima okuti, ka va sukilile ekuatiso lia Yehova. Omo liaco, Yehova wa sapuila Gideone hati: ‘Sapuila alume vosi vakuosumba oco va tiukile vimbo.’ Gideone poku ci linga weya oku tuma vimbo eci ci soka, akũi avali la vavali kolohũlũkãi vialume. Kuenje wa siala lika leci ci soka ekũi liolohũlũkãi vialume oco va liyake locita kakũi atatu latãlo kolohũlũkãi vialume.

Pole Yehova wo sapuila hati: ‘Alume va kasi love, valua enene.’ Kuenje wa sapuila Gideone oco a handeleke alume vaco okunyua ovava vokalui aka. Alume vosi okuti poku nyua ovava va tuvika ovipala viavo vovava va tiukila vimbo. Yehova wa likuminya ku Gideone hati: ‘Ngeca eyulo kokuove lovita vitatu kalume vana va tẽla oku lavulula osimbu va nyua ovava.’

Otembo yoku liyaka ya pitila. Gideone wa kala leci ci soka ovita vitatu kalume. Kuenje wa tepa alume vaco vovimunga vitatu. Eye wa va ĩha anguena kuenda asanga. Vokati kaco wa kapamo ovimihi. Vokati kuteke, vosi yavo va ñuala ocilombo covanyali vavo. Noke va fetika oku sika anguena avo kuenda oku tetola asanga avo, loku kaluka hati: ‘Osipata ya Yehova la Gideone!’ Eci ovanyali vavo va pasuka, va kuata usumba kuenje va tila. Omo liaco, va Isareli va yula uyaki.

Olonganji kocipama 6 toke 8.